Vawikhat chu Bangalore kan awm lai khan ka thiannu nen, lehkha kan zir nasa tawk tawh bawk alawm, hawh Movie i en ve ang, tuna a chhuak hi a tha lutuk an ti bawk sia tiin, kan inrawt phur chawp a. MG Road lamah kan han chhuak phei ve tawp a. Auto-pu finna hmangin kan enduh hall chu kan thleng ve mai bawk a. Chhungte leh thiante thlazar hnuaiah chuan kan lo en fo tawh nain, mahni chuan kan lo la kal chiah lo anih hmel a. Ticket leina tur kan hmu zo ta lo reng reng mai, a kawtah zak deuhin kan nui, kan nui dun a, chutih lai chuan Vai pakhat hian kan mawlzia hria ni ngei tur a ni, ka lo leisak ang che u a tia, pawisa kan pe a, ticket chu min lei sak ve mai bawk a. Tlem chu kan tip ve chuan ka hria.
Tichuan Hall chhungah kan lut ta alawm, tlemin kei kha ka inti fing deuh hlek a, thutna in number a nei a, chu number-ah chuan thut tur tih kha ka hre ve tlat anih chu, kan han en vang vanga, kan number ni bera kan hriatah chuan kawnfiden tawkin kan thu ve ta a. Vanneih thlak lutuk tak maiin, tlangval pahnih chhe lo zet maite hian thutna an rawn en dan dan a, beisei phak miah loh in kan bulah an rawn thu ta chat anih chu! Vannei kan inti lutuk, Mizo tawngin kan tawnga, “Enteh chass kal pui kan ang ve lutuk tiraw” tih vel kan sawi dun a kan hlim khawp mai. Chutih lai chuan nupa tar deuh tak hi kan hmaah an thu ve bawk a, ticket checktu a lo kal a, saw lamah a sawn phei ta daih mai. Ngaih chu a tha ta vak lo deuh hlek.
Chuan le, a chhuak dawn tawh tih awmah thianzaho bengchheng zet hi an rawn lut a, kan thutna bul chiahah chuan an rawn thu a, an thu kim thei ta tlat lo mai. Kan ticket en min dil a, kan en tir chu kan thut lohna tur zawkah keini pawh chu kan lo thu ve chu niin. Huiham! engtinnge kan thutna dik kan hmuh tak ang, a thim tawh ropui si, khawngaih kan han dil chiam a, kan ticket hi la ula kan thutnaah va thu mai rawh u, kan tih pawn thian zaho rual ve an nih avangin an duh lo tlat a. A tawp a tawpah chuan Ticket check tupa khan a tawsilai lianpui nen kan thutna chu min kawh hmuh ta alawm. Sawtah a hmaa nupa an sawn phei tak kan nuihte bulah chuan ka va thu leh ta anih chu, nuih a za duh kher mai.
Interval hun a lo thleng chuan ei leh in tur miin an lei sup sup sia, lei ve ngei ka duh a, kei a huai zawk ngei mai khan ka va chhuak anga, mahse ka lo lut lai i lo en anga, min lo ko nghal vat ang che, a chhan chu kan awmna hi ka hre tawh dawn si lova ka tia. Engtin tin emaw chuan ka va lei ve a, ka lutchiah kha min lo ko vat a, kan bo rei ta lo hlauh alawm. Chenna ngai loh ram fan pawh a ni lo inchhung fan pawh a bo theih khawp mai!
Tunah chuan ka zei ve tawh lutuk, tricket lakna ka zen fuh ve chat chat tawh mai.
-----------------------------------------------------------------------
Similar Posts
- Kan u-te Generation kha!
- A va ngaihawm tak em!
- Hmanlai an chang zo ta!
- Mei lum ai ang u.
- Friday the 13th zan a ni a…
He thu hi Tuesday, March 31st, 2009 dar 6:16 am a Articles . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
Cinema hall chhung thim tak a bo hi, a chhung a lo awm mek tan a nuih zatthlak duh lutuk.
Shillong-ah Anjalee Cinema hall ka zawng chiam a, ka va hmu a, pawna ticket-an lo zawrh chu ka lei a, kan en ve a, minute 10 chiah ka en hman. A zo der mai a. a ho hle.