‘Thian rinawm’ tih Zolawmsangi sak hian hmanah ka lung a ti leng ve ngawt tawh a, tunah pawh kan ti leng leh ngawt teh ang.  Ka zaithiam loh chu thu hran ni se, ka lunglenna lam hi chu hla sak pui awl awl lam a ni ve lo tlat.  Bengchheng tel lo a lungleng mi ka nih ka ring ta deuh.  Ka thluakah hian A AW B (Alphabet) an leng kawi nuk nuk a, chu chu remkhawm a ngai berin ka hre thin.  Thiam leh thiam lo hian kan rem khawm a, phuah khawm chakna min petu pawh he Chinise thufing ka chhiar a vang pawh hi aniang chu, “The palest ink is better than the best memory”.  Ngaihtuahna leh suangtuahnaa a awm reng ringawt chuan awmzia a nei lo a, chuvang chuan midang tan fiah lem lo mahse han ziah chhuah ve reng reng chu a tha a ni tih vang chauh in kan ziak ve hram anih hi.

He hla thu hmang hian ka ngaihtuahna leh suangtuahna ziah chhuah ka tum a, a phuahtu phuah dan leh rilru lam ka ngaihtuah pui lo, ka rilru a awm ang angin ka ziak ve tawp mai a ni.  He hla hian ka lung a ti leng a, chu lunglenna chuan suangtuahna ramah min hruai lut thin.  He hla min hmelhriat tirtu rawlthar nun tur kha ka suangtuah pui thin.  Ani nen pawh kan ngaihtuahna chu a in ang kher awm lo e.
Thapui I rualhlui nen zamual in liam ni khan,
Suihlung a phang ngei ka thlir ngam lo I liamna tlang;
Chinlai famrolungmual liam ni pawh thleng se,
Chhingmittui hei zat a far lawng nge.

He hla chang hian, ka naupan laia ka pa’n sawrkar hna a thawh ve zawk laia thingtlang khua kan va zinna thin, kawngpui reh ruih mai leh nisa vawl vawl chhun lai tak a ka thlir thinna kawng kha min hriat chhuah tir a.  Chu kawng chhak tlang pawng atang ngei chuan he tleirawl te hi dingin, a duh ber leh hmangaih ber college kal tura an khaw chhuah sana, MST bus-a tlan liam ta vawng vawng mai chu, mittui tla chungin a thlir liam turin ka suangtuah pui a.  Kha an in thenna khan an inkar thu tawp a sawi nghal a ni tih a thinlung chhung rilah chuan a hre nghal a, a dan zawh rual loh mittui pawn a bual nghal ngei ang le.  Tuman an ngaihsak lem lo, a tawrhna kha a Duhlai a then tak pawh khan a ngaihtuah pui in ka ring hran lo.   Chu a khawhar lai tak chuan he hla thu hmang bawk hian hnem theih ka lo chak ve mai mai thin.

Jimmy please say you’ll wait for me
I’ll grow up someday you’ll see
Saving all my kisses just for you
Signed with love forever true.

Amah chang lo pawh hian kum in kar hlat avanga harsatna an lo tawh ve tawh zia pawh hi hla thu hmangin an lo au chhuahpui tawh a ni tih hre ta se a rilru pawh a dam ve mah na le!

Hringmi lungduh hmangaihna par ning lo ten kan tlan thin a maw,
Hlun loh tur hmangaihna partlan reng ai chuan,
Thian rinawm berah in thlang zawk ang.

Kum in rual lo e ti lo chuan, hmangaihna par chu an lo tlan dun ve tawh pawh ani mahna.  Rem lo tur tih hre reng chung pawn an lo in hmangaih ve tho pawh a ni thei.  Mahse chu an hmangaihna par tlan chuan engah mah a chhuah dawn lo tih an hriat avang leh, a hmangaih ber a neih theih si loh chuan thianah a sawm ta ngawt mai a ni lo maw.  A theih tho asin, rem lo chunga hmangaihna par tlan hi, mahse kei chuan thian rinawm berah chuan ka rilru tak takin ka sawm theih ka ring ngai lo.  Chu ai chuan a ruka ka hmangaih ni reng zawk se ka duh ang.

Ni e, kum in rual lo tana in hmangaih theih loh a an ngaih miau chuan an in then mai tur zawng a ni reng alawm. A chang chuan hmangaih vang hian midang te hi a duhsak pui daih theih reng alawm.  Chuvang chuan a hmangaih ber mai tana a duhsakna hlan chungin he hla chang hian a thlah lo thei lo ang.

Kei zawng I tawnah ka tling zo nem le,
Hmangaih vang hian ka hrilh nang che lo ngai ve la;
I lenkhua ti  tlai mai tu nih ai chuan,
Ngai chung zel hian ka kiang mai tang e.

Jimmy pawn Joni tap par chung chu he thu hmang tho hian a lo thlah ve tho alawm le.  High School kan zawh lawmnana kan in picnic tum pawh khan, a sawi ve ngei tak kha maw le, “ila naupang a, kei chu nupui nei rual ka ni tawh a, mahse ka hmangaih che tih hi I hre dawn nia” tiin min thlah a.  Kei chu ka tap ve lo, a sawi awmzia kha ka hrethiam miau lo a, ka ring bawk hek lo a.  Mahse an in neih sawmna in min han den meuh chuan a awmzia chu ka hrethiam tehna meuh mai le.  Min lo hmangaih zia pawh tun hnuah chiah hian a ni ka hriatthiam leh zual tak ni.  Ka theihngilh theih  beiseiin min kalsan a, mahse ka theihngilh ngai chuang lo.

Joni, Joni please don’t cry
You’ll forget me by and by
You’re just fifteen and I’m twenty two,
and Joni I just can’t wait for you.

Kum inrual lohna hian in hmangaihte karah harsatna a thlen thin.  Duhsakna sang ber hlan chunga inthen a ngai thin.  A in hmangaih a te pawh khan lo pawisa lo pawh ni se khawtlang hian rem thei in kan hre ngai lo hi a pawi thin a nih hi.  Duh taka innei te pawh rei lo teah an in then leh tho alawm, hlim taka hun rei lote pawh nise an hman dun chuan engnge pawi lem ang.  Eng ang pawn kum in rual lo ang hmiang chance nei tho se a pawi hleinem tih ngaihdan hi pu thei ila aw.
Kumtluang nuthai a tan tuah kan rem si lo,

A pawi ngei e lenlai ruallo kan chan hi;
Thlangkhuan dim zawk mai la hraileng awiin,
Khuanu malsawmna dawngzel nang che.

Jimmy pawn Joni hmangaihna kha a theihngilh thei lo, a harh chhuak a, an khaw lam panin rawn tlan haw vang vang  mahse, tunah chuan he hla thu hmang hian Joni’n a lo hnem a ngai ve leh ta thung si.  Hmangaihte then danah duhthlan tur awm si loah hian, thihna kut vawt tak maiin a laksak ai chuan, hmangaih dang tang dang bel tura then hi chu a har loh zawk ngei ka ring.

Jimmy, Jimmy please don’t cry
You’ll forget me by and by.
It’s been five years since you’ve been gone
Jimmy, I – (married) – your best friend John.

Share

-----------------------------------------------------------------------
Similar Posts

• Zaleng hei zawng zawng zing ah – Hazel eye
• Hmangaihna hi enge a awmzia?
• Min liam san leh si – darryans
• Lo Hre Tehreng Ila
• Mahse Hringnun a kalsual leh thin…

He thu hi Tuesday, March 31st, 2009 dar 7:50 am a Articles . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.