1. Phairam Chulhnu: Shillong tih a han rik hi chuan thinlung hi engemaw ni tak hian a awm thin. Shillong khawpui dung tluan hi nula tute emaw vangin kan lo hrut ve tawh a, a khawpui tlang chhipah te chuan kan mittui a lo tla ve tawh hial thin. Nun liamta a hun duhawm ber ber kha he khawpuiah hian kan hmang zo a, Shillong khawpui leh ka hriatrengna tha lam peng hi a inzawm tlat a.

Kan tleirawl lai hun tha zawng zawng kan hman zawhna hmun a ni a, Shillong tih min an han sawi rik te hi ka la awm ve tlata inhriat chang ka nei thin. Ka thlarau hi a la cham, tlat a ni mai thei. Thawnthu ka ziak ve thin a. Ka trhawnthu ziah tam tak, thawnthu tawi ho chu, shillonga innghat hi a ni tlangpui. Hengte vangte leh chhan tam tak vangin khawmaw lai kawmkar leh hmun khawhar a, ‘Phairam Chulhnu’ tih a lo rik tawh hi chuan khang hun liam tawh hnuah khan min hruai kir chawn chawn mai a ni. Duhtak chawlta Lalsangzuali Sailo hlate kha a tam zawk kha chuan mi khawih lem lo. He hla hi chuan mi a khawih dan a dang zar mai a ni. Khawnge, ‘A hmun leh tlang mah dang si lo’ i han ti leh teh ang hmiang.

2. Di chambawipui: Nula hi rim ngai a ni tih kan hriathma khan ‘Di Chambawihpui’ hmang hian kan lo inawi tawh a. Kan thenawmah hmanlai chhuak Tape Recorder ung tawh lam hian an zai tir tawk tawk thin a, a ria chau viau na a, zai kha chu mawi kan ti thin. Hmeltha hmelthatna hrethiam turin kan han thang chho a, hmeltha kan tih tam takte chu kan duh ve ngawih ngawih chung hian an hnenah engmah kan sawi ngam thin lo. Khatih hun lai khan heng hlate hi a lo mawi leh zual bik alo nih kha. Kan duh thu te kha han sawi ve ngawt dawn ila, eng hehuah min lo ngai dawnin kan hre thin si lo, hrehawm lo tawk vel khan rilru kha a hah ve em em thin a. Khatih hunlai vela mawi kan tih dan angem kha chu ni tawh lo mah se, heng hlate hi chu tupawhin sa se a mawi chu ka la ti fan a ni.
Khawnge, ‘ A riang lunglawm ve nan biahthu di min hlan mai se maw’ i han ti tha leh teh ang u.

3. Ka rawn fang leh hmana kan tuanna tlang: He khawvela hmun pakhat, tute emaw nena kan lo nuiha, kan lo hlim ve biau tawh thinna hmun kha tumkhat chu kan tlawh leh a. A hmun ala danglam teh chiam lo. Amaherawhchu, chu hmunah chuan kan lo nuiin, nite kan lo tumtawi ve tawh thin tih erawh chu tumahin min hriatpui tawh si lo. Chu hmuna mahni chauha khawhar taka ka din lai chuan, lunglei tlangval pakhat, khawhar leh lungleng ve thei tak mai ka hre chhuaka, chupa pawh chuan tumkhat chu an sulhnu hmunhlyui te tlawhin a kal leh a, a hmun leh mual lah chu a lo danglam teh chiam si lo. A nunhlui zawng zawng chu a thinlungah a lo inlar leh a, ‘ Ka rawn fang leh hmana kan tuanna tlang, tuahpui leh val an vul leh ta’ a ti chhuak ta rawih rawih mai a ni. Khawnge, ‘Zun leng erawh a cham tanglaiah, luahloh lungdi, nghilhni i awm lo’ng’ i han ti raih raih teh ang.

4. Van hmunropui hmangaih ram khi: Thalai inkhawm te hi ka hruai ve zauh zauh a, thihna leh nakin hun huanga Kristian Hlabu-in a dah, ‘ Van hmun ropui hmangaih ram khi’ tih hla thlan tlat chang ka nei a. A solfa hla thluk hi mawi ka ti em em thin a. Piano pawhin tlai nitlak dawn hian ka tum fo thin. Eng nunkawng pawh han zawh ila, nula te han rimin nun kawng hrang hrang hi han zawh thin mah ila, Pathian Hmangaihna lak ata chu kan tlanbo thei ngai dawn lo a, Pathian Hmangaihna chuan min lo nghak reng a. Chu Hmangaihna leh khawngiahna chuan chatuan hmun ropui kan thlen thlengin min hruai dawn a ni. Chu hmun, van ropui chu hmangaihna hmun a nia, an hnena cheng tur chuan mi zawng zawng an sawm a. Keini pawh min sawm a ni. Nitinin chu hmun pan chuan ringtu tam tak an liam zel a, keini ngei pawh hi

‘Khawvel ni hi a ral hunin,
Nakinah a in nuamah,
Mi thianghlimte lenna ramah,
Van inah kan cheng ang’

Share

-----------------------------------------------------------------------
Similar Posts

• Ka Tlantu Chu A Nung Tih Ka Hria – Lalduhoma
• untitled…
• A va pawi thin tak em
• Sakhua vang a D ka chan
• Bawngkawn leh Edenthar inkarah ruang chhar a ni

He thu hi Tuesday, March 31st, 2009 dar 4:17 pm a Articles, Music . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.