April ni 27khan Kristian Thalai, Mission Veng Branch chuan Synod Bookroom nen tangkawpin Mission Veng Kohhran Hall-ah Literature Night an hmang. KTP, Mission Veng Branch-in Literature Night an hman hi June thla thleng awh tur Literature Drive hawnna a ni nghal a, members 250 chuang an inkhawm a ni. Inkhawmah hian Literature Sub -Committee atangin an hmalak tawhnate report ngaihthlak a ni a, Pu Rochamlianan “Lehkhabu tha chhiar hlawkna” tih thupui a sawi a, Bookroom Sales Promoter Tv Lalnilianan Synod Bookroom-a lehkhabu chi hrang hrang awmte leh an lehkhabu neih dinhmun a sawi bawk. Tun dinhmunah Synod Bookroom-ah hian lehkhabu chi hrang hrang 4,076 an nei a, heng zinga 2,582 te chu Mizotawng lehkhabu a ni a, Saptawng (English) lehkhabu 1,494 leh naupang pual bik lehkhabu 88 a awm bawk a ni.
Inkhawm banah hian Synod Bookroom Headquarters Show Room, Mission Veng chu dawr theih tura hawn a ni a, thalai leh nu leh pa tam takin an lehkhabu duhzawngte an lei a, Rs. 16,000/- chuang man lehkhabu hralh chhuah a ni. Mission Veng KTP ten Literature Drive an neih chhung hian inkhawm programme hrang hrangah lehkhabu leh thuziak tha chhiar tura infuihna te, article leh drama ziaka group hrang hrang intihsiaknate buatsaih thin a ni ang a, hun tawp lamah member ten hetih chhunga an lehkhabu chhiarte report-in a chhiar tamte hnenah lawman pek a ni bawk ang.
PresCom General Manager Upa F. Lalsangliana chuan, Kristian Thalaite nen tanghova Literature Campaign neih leh zan lama Bookroom Show Room hawn tak hi chu an tih vawi khatna a nih thu sawiin zawngchhang tlak hlea a hriat thu a sawi a, hetiang buatsaih duh KTP Branch dang an awm pawhin an inhawn reng thu leh Thingtlang lamah te pawh tih theih zel ni se a duhawm thu a sawi a. Mission Veng KTP hruaitute pawhin lehkhabu tha chhiar tam lamah an member ten nasa takin hma an sawn phah an beisei thu an sawi bawk. Synod Bookroom hian April 20 zan khan Tuikual Branch KTP te Literature Night hmannaah an lehkhabute lei theihin an pho chhuak tawh bawk a ni.
-----------------------------------------------------------------------
Similar Posts
- Nl. Lalhriatzuali hriatreng nan.
- Kum 2011 KTP Rorel Inkhawm
- Mission Veng ‘Biak Inpui’ hawng
- 2009-11 chhunga Central YMA Hruaitu tur thlan a ni
- Synod hnenah chhiah awl phalna pe: Kum chanve chhungin Rs.29,25,68,561/- hmu
He thu hi Tuesday, April 28th, 2009 dar 5:51 pm a NEWS . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
An inkhawm ban lamah ka va tel ve a, ka fate chhiar tur lehkhabu 2 ka lei a, an chhiar hnu a lo nih lehnghal a
Kan vengah KTP in Literature week kan hmang thin kha a nia. A nuam thei khawp mai. Tun thlengin an la hmangin ka hria. Article inziah siak te, lehkhabu inchhiar tam siak te, Quiz competition te, poetry inphuahsiak, etc te’n kan inel thin kha nia. A zawngchhang tlak khawpin ka hria.
Huis.. ka va kal ve chak ve…duh tawka leina tur pawisa nei bawk ila…