“Pathianin mi chapote a dodal a, inngaitlawmte erawh chu khawngaihna a pe si thin” (1 Pet. 5:5)
Mahni hmasialna leh Pathian tihna hi a inkawpkai theilo ngawt mai.Tu pawh hnehna nuna nung duh chuan mahni mihring hlui nun chu a khengbet tur a ni a. A duhzawng a kalsan anga a, nitin a kraws puin Lal Isua a zui tur a ni. Mahni induhna, chapona leh intihveina bansan a ngai.
Hei hi Lal Isua ngeiin min zirtir a ni (Luka 9:23,24). George Mac Donald-a chuan, “Mahni nihna hi Pathianin hlan leh atan min pek a ni a, kan tidanglam tur a ni lo vin kan hlamchhiah tur a ni. Kan nuna roreltu leh remruattu leh a bul tantu a nihna hi kan phatsan ang a,”Engtin nge ka tih ang aw!” tia ngaihtuah lovin, “Minunga chuan engnge min tihtir a tum ang aw” tia ngaihtuah zawk tur a ni,” a ti.
Pathian thu kan sawi pawhin mahni intihlar tum rana thawh a awl a. Rawngbawlna engah pawh thangthat lak tum rana thawh a awl em em. Hetiang hi Charles Colsona chuan kal sualna (heresy) a vuah hial a ni. Missionay kan tirhte hian thangthat lak, hming lan deuh kher a tum theih khawp mai. Fak hlawh tumtu chu kan mihring hlui hi ani zel a. Chu tak mai chuan mahni thinlungah pawh Isua a hliah thin a. Kan thusawi lo ngaithlatu mitah pawh Isua a hliah a. Chuvangin “Mahni” hi chu ral tur, khenbeh tur, hlamchhiah tur a ni. Tuna kan rawngbawl hnaa, kan thatho hle naah hian fak hlawh lo ila kan phur tho angem.
Pastor pakhat hian a nupui leh a fanu hruaiin bial a fang a. An thlenina an riahna pindanah chuan khumlu lamah hian Isua lem an tar a. Khum mawng lam bang bulah chuan darthlalang lianpui a awm a. Isua lem an lu lama intar chu darthlalangah chuan a lang a, mu chunga hmuh theih tawk chiah a ni. An fanu zinga a lo harh chuan a hmu ta ngei a. A nu chu a kaitho va, “Ka nu, keimah ka inhmuh veleh Isua ka hmu thung,” a ti a ni. A pa chuan a lo ngaithla reng a. A hnu lama a sawi lehnaah chuan, “Mahni kan lansarh apiangin Isua kan hliah thin a lo ni,” a ti, Sermon ropui tak a ni mai.
Mahni thiante zinga hmun sang chan duh chuan a Pathian hmu turin hmun hniam chuh rawh se. Mahni chu hlan tur a ni. Inthawi nana hlan chu an hal ral thin a. Thlarau thianghlim mei chuan kan mihring hlui a halral i phal ang u.
-----------------------------------------------------------------------
Similar Posts
- Isua kan hliah thin em? – Upa Lalthankima (L)
- Krismas
- Tlawmna Nun
- KRISTIAN SAKHUA LEH MIZO HNAM SAKHUA DANGLAMNA
- Engtinnge Chanchin Tha hi kan hril?
He thu hi Saturday, May 9th, 2009 dar 11:58 pm a Religion . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
