Keini First Mizo Seventh-day Adventist Church of America chuan vawiin May 29, 2009 hian ni lawmawm leh hriatreng tlak kan tawng a. Kan kohhran hi kan fahrah hle a, mi hriattham pawh kan ni vak lo.  Amaherawhchu, Pathian Thlarau Thianghlim chuan he kohhran hi a venghim a, a chenchilh tlat a ni tih loh theih a ni lo. Lawm lo thei kan ni lo va, kan lawmzia hi puang lo thei kan ni bawk lo. Pathian chu fakin awm se, ropui ber rawh se.

 
Lalpa’n Berampu tha tak mai, kan kohhran min enkawl a, min hruaitu tur Pastor L. K. Hluna min pe hlauh mai. Vawiin tlai dar nga khan a lawm luhna inkhawm kan nei a. Sligo kohhran lama unauten kokim takin min rawn tawiawm a. Prebyterian kohhran atangin an hotu Dr. Reverend Jacob Rodawla leh a nupui, Pi Sharoni te an lo tel bawk a. Kan phuisui phah hle.
 
Pathian chawimawi nana kan inkhawm hman dan tlangoui chu hetiang hi a ni a. Pulpit lama rawngbawltute chu, Pastor Rual Chhina Vangchhia, Head Deacon Pu Lalthanzuala Phillips, Head Elder Pu John Clyde, Dr. Thansiama Tlau leh Pu Lalthangliana Sailo te an ni a. A hmasa berin Pu Thangliana chuan inkhawm hmang tura lo kal zawngte chu lo lawmna thu leh, Pathian chunga kan kohhran kan lawmzia lawmna mittui tla phungin a sawi a. 
 
Tan nan Hla, “Lalpa Jeho nang min hruaitu, Ram thianghlimah min thlen la. Kei ka chak lo min tapuitu, I kut chakin min chelh la. Nunna chhang chu ka duh e, min chawm fo rawh,” tih hla kan sa a, kan kohhran nen a inhmeh hle mai. Pu Thangliana a tawngtai nghal a. Pu Sangliana Fanai in Saxophone tumin, Old Rugged Cross, tih a sa a, a mawi hle a ni. Pu Sangliana Fanai hi Pastor Hluna te nen Spicer Memorial College, Pune ah lehkha zir tlang an ni thin a. Chung lai chuan Pu Hluna chu la sehhel ve tak a ni tihte sawiin, Pastor hna thawka hotu chanchang a la ni ang tih a rin phak ngai loh thu a sawi hial a. Pathian chu ropui rawh se!
 
Head Elder Pu John Clyde a lo ding chhuak a, Pastor kan neih kan lawmziate a rawn sawi a. Tlangval Sentea’n Pathian fakna hla mawi tak a rawn sa a. Chu mi zawh chuan Head Elder in Bible chang chhiarin, fuihna thute a sawi a. Pastor Hluna hretute zinga mi thu sawi chakte tan hun a hawng a, Pastor Lalsanga Fanai, Pu Kailiana Hauzel, Pi Sangi Vangchhia, Pu Rotluanga Vangchhia leh Pu Lalfela Chhakchhuak te’n an thian pa Hluna chanchin hriat reng tlak te an sawi hlawm.
 
He mi zawh hian Pastor Rual Chhina Vangchhia in Consecration Prayer a nei a, Pastor leh elder ordained tawh zawng zawngte an tel hlawm.
 
Kohhran thalaiten’n  hla mawi takin an sa a. Kan kohhran chungchang thu kan sawi hian kan hmaih hauh loh tur chu, kan thalaite hi an ni.  Kan thalaite hian zai an thiam em em a, Pathian Thlarauvin a awmpui a ni tih hi kan ringhlel lo. Pathianin malsawm zel rawh se tih hi kan tawngtaina a ni 
 
Pastor Hluna’n thu a sawi a. He mi zawh hian kohhran thalaiten hla thar, ruah tham loh hla Pi Huttie Smith phuah an sa a. A mawi kher mai. Tlangval Dinpuia’n  he hun hlu tak mil zawng hla phuah tur hian Thursday zan khan Pi Huttie chu hla phuah turin a va ngen a. Hun chep tak karah Huttie chuan tawngtainaa dil chungin hla chu a lo phuah a. Friday niin a thluk a siam a, Friday zanah thalai hovin an zir ta a. A thu hi a mawi hle a, a thluk a mawi bawk a, thalaiten an sa thiam leh zel bawk nen, in hriat ve theuhvah kan it a, Pi Huttie Lalpa’n hla a pek hi a thu tal lo chhiar ve teh u.
 
                                            I RAWNGBAWLTU
                                                             
                                                                by  Pi Lalhuthangi
 
 
                                      1.  Damlai hring nun buaina karah,
                                           Hlun tur reng awm lo mahsela,
                                           I kohna aw hria hi Lalpa
                                           Hei kan hlan e, i maichamah.
 
                                                Nangma mi thlan I rawngbawltu,
                                                Vawngin, serh thianghlim tlat ang che.
                                                Thlarau Thianghlimin hruai zel la,
                                                I ropuina’n hmang zel ang che.
 
                                      2.  Maltin sawmtu Lal duhawm ber,
                                           I hnenah hei kan dil a che.
                                           I hriak thih Davida ang khan
                                           Kawngbote hruaitua’n hmang rawh.
 
                                      3.  I chanchin tha hril zel turin,
                                           Tichakin thuam la, kalsan suh.
                                           Thlemna, harsatna karah pawh
                                           Tlu lo turin venghim ang che.
 
                                      4.  Engkimtithei kan chawimawi che,
                                           Ropuinate i ta ni se,
                                           I tlansate i lawr hunah
                                           Van hmun nuamah hruai ve ang che.
 
 
Head Deacon Pu Lalthanzuala Phillips in kohhran aiawhin lawmthu a sawi a. “Lalpa i rawngbawla min koh hi,” tih hla sain, inkhawmna chu tihtawp a ni a. Chu mi zawhah lo kal khawmte ei atana buatsai ei turte hlim tlang takin kan eiho dar dar a, kan hlim tlang hle.
 
Pastor Hluna hi Industrial Arts laa graduate, eizawn nana thingrem leh dawhkante siam thiam mi ni mai awm tak a ni a. Sangha mantute Isuan a man khawm ang khan, Pu Hluna pawh Pastor atan Pathianin a man ta tlat a. Zirtirtu hna thawk tanin, Mizo Conference President hnate a chelh a, chuta tangin Bangalore bul Hosur khuaah Southern Asia Division lam te a kai pha ta daih mai a, Southern Asia Division ah chuan President zin bo hlanin, President ai hial a awh thei a ni. Lalpa’n a kaihhruaina hnuaiah First Mizo kohhran pawh hi thang duangin thang lian zel se tih hi kan duhthusam a ni e.
 
 
 
Women’s Ministry

Share

-----------------------------------------------------------------------
Similar Posts

• 2009 MIZO DAY – By Zotin Khumi
• KRISTIAN RIMAWI LAM MI ROPUI
• F.Laltuaia a Fam ta
• Kan La Ngai Vawng Vawng Dawn Asin!!
• Chaltlang road a min

He thu hi Sunday, May 31st, 2009 dar 3:29 pm a ETC . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.