Krista rawngbawltu tak tak chuan hrehawm a tuar ngei dawn tih Isua’n a hre sa dim diam a. Chuvangin a zuitute hnenah, ‘Khawvelah hian hrehawmin in awm thin, nimahsela thlamuang takin awm rawh u, keiin khawvel ka ngam ta’ a lo ti lawk a ni (Johana 16:33). Krista zuitu, Krista rawngbawltu, Krista tana thawk kan nih chuan hrehawm chu pumpelh tum chi niin a lang lo va, mahse hrehawma kan awmin thlaphang tur erawh kan ni lo. Kristaah thlaphan leh mangan, lungngaih leh beidawn a awm si lo va. Tin hei hi hre reng ila; ‘Khawvelah hian hrehawmin in awm thin’ tih tawngkam hian kan hrehawmna chu he khawvela kan awm chhung atan chauh a ni tih pawh a chiang tawk e.

Rawngbawltu thenkhat nuam sa deuhva khawsa an awm a ni mai thei; Delhi-a tlangval pakhat nen kan titi a, sorkar hna lian kalsana Pathian rawng bawl ta zawk Mizo missionary pakhat chanchin kan sawi dun a ni. An ngaihsanawmzia ka han sawi tan dek dek a. Ka thianpa chuan, ‘Missionary changkang an nih hi’ a ti ta daih mai a. Han sawi zawm leh ngaihna ka hre lo hle.

Kan thalaite, abikin vai rama missionary-a kalte hi an changkang lutuk em aw! Hrehawm an tuar lo thei lovang a, hnam dang missionary-te aiin an zuau zawk a, an no zawk a ni lo maw!

Missionary ni tawh reng, mahni thawhna kalsan a, mahni ringtharte chu awplumtu tur awm lo mah se hlawh tha zawk hmuh theihna a nih phawt chuan kalsan mai duh kan missionary-te zingah an awm thin em? Pathianin a duhna hmuna thawk turin min ko va, min dah tawh hnuah Pathian aw ni lo, nulehpa aw, chhungkhat laina aw, kohhran hruaitute aw ngaithla ta zawk a Pathian min dahna hmun kalsana rawng bawl ve tho an awm thei ang em?

Khawvel hi kan pelh hunah Pathian lalthutphah hmaah kan awm ang. Tuma chhiar sen loh, hman tin zinga mi te, chi tin zinga mi te, mi tin zinga mi te, tawng tin zinga mi te puan var sina tumkau kengin, lalthutphah hmaah leh Beram No hmaah kan ding ang. Tumkau chu kan hlado (hnehna sign) a ni ang a, Pathian chhandamna chu kan hnehna hlado tur chu a ni (Tp 7:9-10). Kan ral beih thin- Setana leh a hote kan hnehna lawmin hlado kan chham dawn a ni.

Chumi hunah chuan vantirhkoh zawng zawng chuan Hnehtu Pathian chibai buka bawkkhupin kan hlado chu an lo ‘amen’ dawn a ni (ch 12).

Kan hriat reng tura pawimawh chu rawng kan bawl chhunga hrehawm kan tawrh tur lam chu a ni. Heta ‘tuma chhiar sen loh mipuite’ pawh hi nuam tawl chunga he hmun hi thleng an ni lo va. ‘hrehawm nasa tak ata chhuak-hote’, ‘achhun azana a rawng bawl thin’ an ni zawk a ni (ch 14-15). Pathian hma an lo thlen tawh avangin ‘an riltam leh tawh lo vang a’, ‘an tuihal leh tawh hek lo vang’; ‘niin a em hek lo vang a’, ‘lum reng reng pawhin a tihrehawm hek lo vang’. Tin ‘Beram No, lalthutphah laia awm chu an vengtu a ni a’, ‘nunna tuikhurahte a hruai ang’; Pathianin an mit ata mittui zawng zawng (abo-abang awm lovin) a hru fai tawh’ dawn a ni (ch 16-17).

Heng mipui chhiar sen lohte hian heng hrehawm te hi an tuar a ni tih kan hre thei nghal awm e: riltam te, tuihal te, ni sen sa hnuaiah thlan tla zawih zawiha rawngbawl te, zo tlang thawveng nuam tak kalsan a Ganga lui ruam sa huam huamah hrehawm taka rawng bawl te, vengtu leh tantu nei lova baihvaihna te, an nunna hial ngaihnepna, tahna leh thihna hial te hi. Chuvangin hrehawmna reng rengin a tawh phak lohna hmun nuamah chatuan atan Pathianin a dah a, an mittui zawng zawng a hru fai tawh a ni.

Nang rawngbawltu, chungho zingah chuan i tel ve dawn em?

Contact : puhminga@yahoo.com

Share

-----------------------------------------------------------------------
Similar Posts

• Hrehawm Tuar Rawngbawltu – R.H. Hmingliana Hmar
• Mahni Leh Mahni Intihtlawm – Upa K.Vanlalauva
• Kanan ramah mana a tawp – Upa Vanlalvuana Sailo
• Kohhran beihrual leh rawngbawlna – Denis Lalfela
• Immanuela thi zama’n thisen lui a luang chhuak?

He thu hi Saturday, June 27th, 2009 dar 10:55 pm a Religion . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.