Lengzem : Bazar puiah ka kal a, dawr pakhatah hian ka va lut a. Chu dawr nghâktu zinga pakhat chu naupang kum 5 emaw, kum 6 emaw mi vel nen hian an lo inbia a. Dawr nghâktu chuan, “Mama, i pawisa rawn ken hian he naute lem leina hi a daih hlei nem,” a lo ti mek a.

Chu mipa naupang chuan ka lam a rawn hawi a, “A pi, ka pawisa hian a daih em?” tih pahin a pawisa hum chu ka hmaah a rawn pharh a. Ka’n chhiar a, a lo daih lova, “E, Mama, a daih lo a nih hi,” ka lo ti a. Mahse naupang chuan naute lem chu a pawm tlat a. Tu tan nge a duh tih ka zawt ta a. Ani chuan, “Ka nauvin naute lem hi a duh thei lutuk a, pek ka duh alawm. A piancham a ni si. Ka nu hnenah ka pe ang a, ka nu chuan ka nau hnen a thlen hunah a pe mai ang,” a ti a.

Chutiang thu a sawi lai chuan a hmel chu a lungngaih hmel reuh khawp a. “Ka nau chu Pathian hnenah a kal a, A-nu pawh Pathian hnenah chuan a kal ve tep tawh a pain a ti. A-nu chu Pathian hnena a kal ve chuan ka nau hnenah naute lem hi a pe mai ang,” a ti a. Chu thu ka’n hria zet chu ka bing mup mai a. Mipa naupang chuan mi’n en tha leh a, “A-pa hnenah chuan dawr atanga ka lo kir hma loh chu a nu kaltir lo turin ka hrilh a,” te chu a la ti tak deuh deuhva.

Chutah ama thlalak, hlim leh duhawm taka a nui lai hmel hi a rawn phawrh a, ka hnenah chuan, “A-nu chuan a kalnaah chuan ka thlalak hi a keng ang a, ka nau hnenah chuan a entir ang a, ka nau chuan min theihnghilh lo mai ang. Ih maw, A-nu chu ka ngai lutuk a, min kalsan lo se ka duh tehlul nen A-pain ka nau hnena a kal a ngai a ti tlat a,” a ti a. Naute lem chu a’n en leh a, a mitmeng chu a dul raih mai a, chu meuh zawng ka tuar zo ta lo, ka pawisa ip ka dap a. Mipa naupang hnenah chuan, “Khawi maw i pawisa chu i lo chhiar tha leh teh ang, a lo daih mial tawh mai thei asin,” ka ti a. Ani chuan phur fahranin, “Nia. Kei chu a daih tawh ka ring,” a ti sauh sauh a. A hmuh loh hlan chuan a pawisa zingah ka pawisa ka telh a, kan han chhiar that leh chuan a daih mai bakah tlem a chuang a.

Mipa naupang chuan, “Pathianin min pe a nih dawn hi, ka va lawm e!” a ti a. Ka lam a lo hawi a, “Nizanah mut dawnin Pathian hnenah naute lem leina daih pawisa min pe tur hian ka dil a. Ka nau hnenah A-nuin a pek theih ka ring a. Ka tawngtaina kha A hrereng a niang,” a ti reuhva. Chutah, “Rose par var pawh A-nu tan lei ka duh a, mahse Pathian hnena thil tam lutuk dil ka ngam lova. Mahse hei rose var leina tur pawh min pe tel a nih hi. A-nu chuan rose par var hi mawi a ti thei teh a nia aw,” a ti a.

Ka bazar kal ve chu ngaihtuah dang daih neiin ka haw leh ta a. Chu mipa naupang te reuh chu ka ngaihtuah zui ta veng veng reng a. Ka ngaihtuahna vakvel chuan a hma ni hnih vela chanchinbua thu chhuah a ngaihtuah chhuak a. Chutah chuan motor lian, zurui pakhatin a khalh chuan car pakhat, nu la naupang tak leh a fanu hmeichhe naupang chuanna a su a, hmeichhe naupang chu a hmunah a thi nghal a, a nu erawh ngaihtuahawm takin a awm tih thu a awm a. Driver zuruiin a sut nu chu nikhaw hre lovin a awm reng a, a nunna chelhtu Oxygen chu phawi a, thihtir mai tur nge la nghah rih tur tih an chhungkua chuan an ngaihtuah mek a. Oxygen an pek loh hun hunah nu chu a thi tho tho dawn tih a chiang vek tawh tih thu thlengin chanchinbu chuan a ziak a. Chu thi tur nu fapa chu ka mipa naupang hmuh kha em ni ang le?

Mipa naupang nena kan inhmuh hnu ni hnihah chuan chanchinbuah vek chuan nu chu a thih tak thu a chhuak leh a. A vuina hmun tur an sawiah chuan rose par var kengin ka va kal ve a. Chu nu chu rose par var pawmin kuangah chuan a lo awm a, a awm zawnah chuan mipa naupang duhawm tak mai thlalak a awm bawk a. Chuta tanga ka kal chhuak leh ta chu a hma ka ang thei tawh lo. Kha mipa naupangin a ngaih ngawih ngawih, a farnu leh a nu kha Truck Driver zuruih vang ringawtin kha mipa naupang khan a chan ta chu a nia le. KHAWNGAIH TAKIN RUI CHUNG CHUAN MOTOR KHALH LUL SUH

Share

-----------------------------------------------------------------------
Similar Posts

• Tunge nau titla?
• Roses Will Bloom Again – Jeff And Sheri Easter
• Fapa mal pahnih tuiah tlahlum
• Dawn a ti sei ngei e!
• Nui lawks ang u!

He thu hi Wednesday, June 17th, 2009 dar 5:08 pm a Articles . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.