Vawiin July ni 30 chhun dar 12 khan MPCC hruaitute chuan Aizawl press Club ah Chanchinthar lakhawmtute an kawm a, July ni 17 a Shinlung People’s Liberation Army (SPLA) Vanapa Hall a lawmluh an nih tum an party President Pu Lal Thanhawla Chief Minister ni bawk thusawi July ni 20 a Pu Zoramthanga MNF party President in a chhanletna chu thudik tawklo a ni an ti.

Chanchinthar lakhawmtute kawmna hun hi Pu Ronald Sapa Tlau chuan a kaihruai a, Pu R.Vanlalvena, Pu John Siamkunga, Pu R.Liantluanga,  Pu K.VL Siama leh Pu K.Lalrinawma MPCC Gen Hqrs a hruaitu dang ten an tawiawm a, Chanchinthar lakhawmtute hnen ah Pu ronald Sapa Tlau chuan Shinlung People’s Liberation Army (SPLA) mi 64 zet lokirte Mizoram Sorkarin July ni 17-aVanapa Hall-a a lawmluh naah CM Pu Lal Thanhawla’n Helho din thu hi Sorkar hmasain hriatpuina a neih thu a sawi chungchangah Pu Zoramthanga MNF party President chuan Hnam Runah July ni 20 khan Chanchinthar lakhawmtute kawmin, CM Pu Lal Thanhawla chu dawt sawiah a puh a. Pu Zoramthanga’n a puhna hi Congress Party-chuan a la thutak hle a ni tiin Mizo mipuiin thudik an ngaihchang thup a ni a ti a, Kum 2008 inthlan hma lawka Journalist, Pu Lallenmawia Jongte-in TV Interview-naa HPC(D) President Pu Lalhmingthanga a kawmnaah, an mahni HPC(D) do turin Mizoram Sorkar leh khatih laia SHDC Chairman, Pu Hmingchungnunga te’n Hel pawl dang (HNA) an din thu leh Burma rama an Training thu te, sum pawh Mizoram Sorkar leh SHDC hotute’n Pu Lianzama Hrangchal kaltlangin an pe thin nia a hriat thu a sawi a.

An training-na hmunah hian MNF Chief Organiser, Pu Hranglawma CM Adviser nia an hrilh leh midang 3 te’n an tlawh thu chiang takin a sawi bawk a. He CD hi tuna Congress Sorkar lo din hmaa Mizoram pawna record a nih angin, Mizo mipui lo thlirtute’n Congress tihtirah ngai lovin, thudikah an pawm a, Upain ‘misual chu um lohvin an tlan chhe thin’ an tih angin, Sorkar thar lo pian velah khan tuma vauna tel lovin Pu Hmingchungnunga leh Pu Lianzama Hrangchal te chu an bibo nghal a. Tunhnaiah Pu Hmingchungnunga chu Police-in an man ta a, Pu Lianzama erawh chu tun thlengin a chin hriat lohvin a la awm a ni a ti a.Hel hoin CD-a an hmel lang renga an sawina atang hian Pu Zoramthanga’n pha eltiang mahsela an inzawm thu leh an din thu an lo hriatpui chian zia an rawn sawi lan avangin, CM Pu Lal Thanhawla hi dawt sawiah hial puh mah se, ‘A vawtuin ek a cheh’, tih ang chauh a ni a, dawt sawia midang puhtu hian a mahin dawt a sawi zawk zia leh hemi chungchanga a thu sawi dang pawh belhchian dawl lo a ni leh ang tih a hlauhawm hle ni a sawiin Pu Zorama’n, “Mahni Sorkar do turin tuin nge Hel din duh ang?” a tih kha, MNF Sorkar do tur nilovin tichak tur zawka din mai zawk an ni a ti a, Kum 2003 Inthlanpuiah ‘Pu Zoramthanga’n Champhaiah Hel a ruai’, an tih huai huai lai pawh khan a rawih loh thu a sawi chamchi a, mahse  A lo rawih ngei bakah, a rawihna Fee a pek that leh si loh avanga a Hel rawih, Zothawna leh a thiante’n Hotel Orchid-ah mipui hmaah Pu Zorama’n an mahni a rawih dan puangin mualpho takin an rawn chapchar a.

Thil sual titute’n an thil tihsual thup nana dawt an sawi a ngaih fo avangin Ram hruaitu tan chuan dawta thup mawi ngai leh tur thila inhnamhnawih buai loh ting hi a fin thlak zawk tih hre nawn leh turin Congress Party chuan a chah a ni a ti a.

Tun tuma Chief Minister Pu lalthanhawla’n thudik tak hai langa SPLA/HNA din chungchang MNF Sorkarin an hriatpui thu a sawi chhuah kha Pu Rama hian rawn chhang kher lovin lo ngawi bo mai mai se, heti taka mualpho hian a insiam lo tur tiin A insawi fihlim tumna lamah ‘Buichhia laih lovin a inpuang’, tih angin, a Sorkarin a hriatpui zia a hrechiang bertu, HNA/SPLA-ho ngeiin MNF Lal lai ngeia chiang taka an sawi lai hmel langa an rawn puan chu Mizo mipui hmaah Congress Party chuan a nihna ang angin thudik awmsa a puang chhuak a ni a ti bawk.

Share

-----------------------------------------------------------------------
Similar Posts

• A ni thei ang ngem?
• Thil man to leh rel luh chungchang a BJP ngaihdan
• BJP-in Joint Action Committee din rawt
• MPCC in MPC pawl khat ho thiltih chu an dinhmun nen awm an tihpui
• Rahul Gandhi a lo zin

He thu hi Thursday, July 30th, 2009 dar 5:24 pm a NEWS . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.