North Carolina leh Tennessee inrina bul Tennessee ram lamah chuan tlang hringdup mai a awm a, chu tlang bul thutah chuan khua pakhat a awm a, chuta chengte chuan khawvel dang reng ngaihtuah lovin he hmun Smokey Mountain tia an sawiah chuan an damchhung nite chu chhiarin hun an hmang a. Smokey Mountain hmunah chuan thil ropui tak tak hmuh tur a awm lova, a khua a chengte chu kuthna thawkin an hah em em hlawm a ni.

He khua ah hian mihausa an awm lova mahse sum tam takin a lei theih loh hmangaihna leh hlimna chu chhungtin te chuan an nei thung. Smokey Mountain rama chengte hian California ram an ngai lova, Detroit rama awm an thlahlel hek lo. An inchhung chu han lut la carpet phah thei khawpa mi awmthei i hmu lovang a, mahse hmangaihnain a chenchilh ve loh chhungkua erawh hmuh tur an awmlo. Car mawi tak tak hmuh tur a awm lova, thuamhnaw changkang tak inbela lengchhuak an awm lo. An thawhchhuah milin an khawsa a, chu bak chu hmangaihna chiah ani Smokey Mountain ami te hian an damchhan ber chu.

Smokey Mountain khaw daifema huan pakhat ah chuan thei chi hrang hrang chinga enkawlin Jackson Taylor-a chu in chhe ve tak maiah amahin a awm a, hmel bumro tak leh khabe hmul tuak tawh tak chung pawhin he putar hian kawla nichhuak chhiarin khawchhung lamah chuan a thei te chu a va zuar thin a. A surasa pawh sawi lovin he putar hi nitin mai chuan khawchhung lam panin a thei zawrh tur te nen chuan a thawkchhuak thin a ni, a thei zawrh chu a darah kawtin intin mai chu a luhchhuah thin a, a in hralh that tum leh a hralh thatloh tum pawh hriathran theiloh khawpin he putar hi a hlim thei a, an khua a naupangte chu a lawm em em a, naupangte pawh chuan he putar hmel bumro tak hi an ngaina hle bawk.

A samsei tak te chu suk hunbi a nei lova, mahni intihfai nan hun a ruatlawk a ngai hek lo, he putar hi mahni chauva khawsa mah nise zing khua alo var tawh chuan khawchhung lama a thei zawrh hna chu engthil dang mahin a tibuai thiang lo. Naupangte chuan he putar lo kal hlan chu nghakhlel takin an lo chang thin a, ralkhat atanga alo kal an hmuh tawh chuan alam panin an tlan dul dul thin a, chu chu Jackson Taylor tan pawh hian he khawvel hahthikula hna a thawhna rama a thilpek dawn ropuite zing ami an nih chu hai lovin ani pawh chuan lawm takin chung naupangte chu alo kawm hlim ve thin a ni.

Chhun ni alo sa a, hahchawl nan thingkhung hlim hnuaiah chuan naupangte chu a kawikhawm thin a, theitui in atanga an tan liau liaua a siam chu he putar hian aintir thin a, naupangte chuan an nelin an ngaina em em a, mahse thei zuar maia hrawk chawm anih lam erawh an hriatpui phalo, Jackson Taylor pawn chung naupang lungmawl tak takte chu hrilh hriat a tum chuang lovin thawnthute leh a tunhma hun sipai a tan laia thlawhna a chuan thute, tuifinriat chunga lawnga ral an beihdan thu a sawite chu an tana chanchintha ni hial tur khawpa hluin chung naupangte chuan an ngaihven a. Chung thu a sawi zawh hnua hnunglama a ah tel reng thin a tingtang bial (Banjo) perha naupang ho nena an zaiho thin bak chu helai vela naupang awm ten thlahhlel dang an nei lo a ni. Khua alo tlai a, naupangte pawh chu an nu leh paten an rawn ko haw tliar tliar a, he putar pawh hian khaw pawnlama a in chu a pan ve a ngai leh thin si a khamlo tak chungin a tuka putar thei zuar-a lo kal leh hlan nghakhlel tak chungin an inthen ta thin a ni.

Tum khat chu hmeichhe naupang pakhat theizuarpa pawhina a ngainat zual bik deuh leh a kawm ngeih fal bik, tingtang perh te hial alo zirtir thin leh a tingtang bial (Banjo) a perh apianga a zai tir thin hmeichhe naupang chu, a nu chuan chu putar hmelhriat ngai hleiloh, a hming takngial pawh an la hriatloh leh zu ngawlvei nia an hriat hmel bumro tak mai kiangah chuan tal tam tawhlo turin a fanu chu a hrilh a. Mahse chu naupangte chuan a hlimpui em em mai putar chu a nu in a ngaihdan chu a dikloh zia fiah tumin hma takah putar theizuara lo kal tur chu changin, chu putar chu a hmuh veleh “AppleJack zu i in thin ami” tiin alo zawt nghal a, AppleJack chuan nui chungin alo pawm a “In ngai lo ve, thil tih harsalo ber alawm zu inloh te chu” tiin a bianga fawp chung chuan alo chhang a. Chu veleh AppleJack chuan a tingtang bial chu lachhuak leh in chu naupangte chu zai turin a sawm a, hlim takin an zai dun leh ta a ni.

Hun leh kumte alo vei zel a, Smokey Mountain pawh alo thang ve zela Siamtu’n hun alo duan sa chu lo in hrechhuak zelin hmana naupangte pawh kha tunah chuan anlo puitling ve ta hlawm a. Kha hmeichhe naupang AppleJack nena inkawmngeih emem thin pawh kha tunah chuan khuanun atan hmun alo ruat ah awmin Smokey Mountain ram mai nilo khawvel pumin Dolly Parton tia kan hriat alo ni ta a ni. Khua alo vara theizuar putara’n an khua alo thlen thin hun alo ni a, tun hma an naupan laia a thiante nena an khua a putar hlimthei deuh AppleJack a anlo hmuahna thin hmunah te chuan a va kal a, mahse lo kal tur a awm tawhlo. Thingkung hlim hnuaia an zai thinna hmunah ava zawng leh a AppleJack kha hmuhtur alo awm tawh silo. Hrilhhai takin inlam a haw a, thingrem hnuaiah chuan hmana AppleJacka’n a damlai a pek a tingtang bial chu phawrh in amah chauh chuan a naupan laia AppleJack a zirtir kha la hrerengin khawvel mite min awi ta zawk a ni.

Play a song for me Applejack, Applejack
Play a song for me and I’ll sing
Play a song for me Applejack, Applejack
Play a song, let your banjo ring

Share

-----------------------------------------------------------------------
Similar Posts

• Hmangaihna hi enge a awmzia?
• Mi Pakhat Kang Thei Lova Chu
• Khawpui laili a inbumna emni?
• Coat of many colors
• Api, ka pa lo tawngtai pui ang che aw.

He thu hi Friday, July 31st, 2009 dar 5:48 pm a Articles . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.