Italy khawpui Rome a khualzinte hmuh chak ber pakhat chu catacomb hi a ni. Pope pakua, Mt. Cecilia leh ringtu tam tak an lo martar-na hmun hian lung a tileng thlawt mai. Catacomb sawmruk dawn lai zinga lian ber leh tlawhtu ngah ber chu Catacomb of St. Callistus a ni. Tlawhtute hi darkar chanve vel hrilhfiahtuin a fanpui thin. Ticket man mi pakhat tan cheng zali vel a ni. Mumang pawha ka hmuh phakloh, Catacomb chhung ngei maia tawngtaina room-ah Lalpa Zanriah (Eucharist) ka buatsaih ve ta hlawl mai. India atanga khualzin mi sawmhnih lai an tel bawk a; Catholic puithiam ka nih avanga he hun hlu ka nei theite chu vannei ka inti a. Martar tam takte leh ringtu hmasate an lo zalhna hmun ngei maia inkhawmna kan neih chuan min cho thar nasa in thlarauah lung a leng hle.
Catacomb martarte thlan kan fan lai hian ringtuten Pathian remruatna kan thlir dan ka ngaihtuah ta chiam mai a. Chutih lai chuan nikum August 6 a boral, kan upa ber Lucy Sapliani thihchampha vawi khatna kan thleng ta reng mai chuan lung a tileng thar takzet a. A hnu lawk September 13 a puithiam a min nemnghehna ni (ordination day) pawh hmang hman lova a awm te leh a thihna avanga beidawn ziate, lusun khawhara kan awmlaia inbuatsaih a tul si dan te leh Pathian remruat pawm har ka tihziate rilruah a thar a, dem tur ber hre si lo hian thin a rim hlur mai a. A chhanna erawh martarte thlanah hian a lo awm reng mai.
Kristian nun chu Kraws kawng, harsatna leh manganna keng tel a ni. Catacomb martarte chuan Krista an hmuh chian em avangin thihna pawh an hlau lo. Rinna chuan hmuh theih loh min hmuhtirin huaisenna min pe. Nitin nunah pawh rinna kan mamawh fo. Bus a kan chuanin driver chu thiam tak, zurui lo, kan kal tumna min hruai thleng thei a ni tih ringin ngaihngam takin kan chuang mai thin. Cancer zaitu chu doctor thiam tak anih kan ring a, a thiamna check turin zaina pindanah kan va lut ve kher lo. Nupa pawh mit an insiai zauh atang khan an inhmangaih tih an hria a, a tu emaw zawk inringhlelin an inbihthla duk duk lo. Thlarau nunah erawh rahbi thar kan kai tur a ni. Hmangaihna Pathian a ni ti fo mah ila, mahni nuna a hmangaihna kan experience si loh chuan rinna a ni ve tlawng mai a. Harsatna leh thlemnaah chutiang hriatna/ rinna chu min chawm ahnekin a tlu mai thin. A hmangaihna temtu erawh chu tihdanglam leh tihchakin an awm a. Biak tlak Pathian an neihzia hriain, harsatnaah an tlanchhe ngai lo; Pathian auh leh hnaih nan an hmang hlauh thin. Chutiang mi chu an hmel a ng a, thlarauin an khat a, biak an nuamin an tawngkam leh chetziaah Krista kan hmu thin. Chu chu testimony ropui tak a ni. Chu testimony pe chhuak tur chuan chhungrila tihdam kan nih a tul a, chhungrila zalente chuan Krista chu martar thak thlengin an zui ngam zawk a lo ni.
Rinna chuan hmuh theih loh thil a tinzawn avangin, kan rin ang hi a lo ni lo mai anga tih hlauin kan ring ngam lo fo. Ringtu nghet pawh rinhlelhna in kan khat leh thin a, duhthlanna fumfe siam lovin kan vakruai thin. Rinna kawnga duhthlanna chuan tihduhdahna hial min thlen thei, mahse tah chuan tawp lovin, thlamuanna leh beiseina nung min pe. Duhthlanna siam ngamlo ringtu chu a nung ve tawp mai a, harsatnaah belh tur nei lovin beidawnna in a khat a, sualah inhnemna zawngin, hlimna emaw a tih khan a thlarau nun bakah a taksa hial pawh a eichhe thin. Chutiang Setana bawih rinawm, khawtlang hmelma hiala chang sal tangte chhanchhuah chu Kohhran leh ringtute tih mkmawh a ni. Rinna a hmasawn tur leh thlarau bote chhanchhuak turin Krista kan thlan thar reng a ngai a. Tih tak emah chuan an Lalpa nena hun tam tak hmang tawh Zirtirte pawh khan, Lalpa, kan rinna tipung rawh an la ti ve tho mai. Nitina Lalpa kan thlan tharna hi rinhlelhna tibotu leh sual hnehna min petu chu a ni.
Khawvel thilin min chim hneh a, Krista thlan reng har kan ti. Nitin a aw hre mah ila, kan zalenna hmangin kan hnawl fo. A sawmna chhangtute erawh chu Lalpan a khawngaihnain a thuam a, natna khumah pawh hlim hmel puin, rilru zangkhai tak leh Lalpaah lawmna thinlung pek an ni thin. Taksa hrisel nei tura chaw tha kan ei ang hian, rinna a thang turin nitin thlarau chaw kan ei a ngai a. Kan ei loh chuan kan hriat lohva Isua kalsanin mihring takin kan nung a, sum duhna leh sual pawisak lohna a lo lal zual a, kawng dika kir leh a har thin. Chuvangin nitinin kan inhlan thar tur a ni.
Pathian thilmak tih kan sawi seng lo. Kan ruahmanna tipuitlingtu pawh amah a ni. Amah chauh belh tur kan nei tih min zirtir fo. Chumi atan eng kawng pawh a hmang thei, hauhsakna ata retheihna, chapona ata tlawmna, nawmna ata tuarna thlengin. Krista Kraws atanga nitin harsatna thlirtu ten tuarna phena malsawmna an haichhuak thin. Nitin kraws min pekah tlanchhe lova a hmel mawi min hmuhtirtu a kan hman hi Lalpa duhdan a ni. Thatni a Pathian hrechang lo, chhiatni a mawh zawng zawng phurhtirtu ringtute hian, Krista kraws ah chiah damna kan hmu ang. Ringtute chu rinna a chak takte kalkhawm an ni lova, nitin an kraws theuh pua bei hram hram tute an ni. Chhelna leh beih hrm hrmna hi ringtute tinungtu, huaisenna leh phurna thar pe zeltu a ni.
Tuarna phena malsawmna la dai baw lo leh rinna mit a mahni nun enlet lo chuan kan sawi ram hi a hrethiam kher lovang. Engkim malsawmna a chantir theitu hnena inhlan thlap hi a har anih hi! Krista mi hriat chu khawvelah tlan mahse a hlim thei tawh lo. A tlan thui pauh leh a beidawnna a nasa tial tial a, a reithei rei mai a ni. Luhlul lui tlat chu mangang si tal chhuak thei lovin a awm thin. Sual bawiha kan tanna theuh ata tal chhuah tumin kan bei em? Kum tam kan hneh theih loh pawh Krista nen chuan zankhat thil thuah pawh kan hneh thei. Sim duhna tak tak nena Krista khawngaihna kan hmachhuan phawt chuan englai pawhin hnehtu kan ni zel ang. Lal Isua lalna kohhran leh chhungkuaah inunauna tha zawk leh hlimna dik kan hmu thin.
Sual kalsana nunthar nungte aia Lal Isua tilawmtu an awm lo. Harsa hle mahse tirhkoh Paula anga lungawi zel ka ching ta tih nun hi damna awm chhun a ni. Catacomb martar ten thiamthu pawh sawi lovin Krista vangin nunna an chan a. Krista avanga engkim chan huam inti ve si hian ka lo la chan tlem khawp mai. Krista vangin enge i chn ve tawh le? A fapa pawh ui lova min petu Pathian hmaah hian vui thei ka ni hauh lo tih martarte thlan hian hriatfiah tir a, lung a chhe rum rum! Thlaraua lawmna thar nen catacomb chu ka chhuahsan a; Lal Isua hunlai pawha Appian kawngpui an tiha ka kal lai chuan Pathian lakah vui thin mah ila Ama hnenah bak tlukluhna tur kan nei hauh lo tih chu hre lo tawh mah ila kan thinlung phekah ziah thar leh niin ka hria a, ka lawm ta veng veng mai a. Thihna lui kawrruam zawh mah ila, thil thalo reng ka hlau lovang, nang ka hnehah i awm si a tih hi thudik, pawm harsa tak a ni. Ngaihtuah chian erawh chuan Emanuela, Pathian kan hnena awm hian min awmpui theuh a; kan kawngte aiin a kawngte chu a ropui zawk tih hi sawi tam ngai lovin mintin mai hi min zirtir a nih ber hi. Kan nitin kraws te hi Krista hmangaihna a min thanlentirtu leh ringtu puitling a min chhertu an nih theih nan Pathianin mitin min tithar theuh rawh se.
-----------------------------------------------------------------------
Similar Posts
- Li thùk lamah deng zel rawh! – Denis Lalfela, Rome
- Lalpa thuin len i deng ang u! – Denis Lalfela, Rome
- KRISTA KRAWS THILTIHTHEIHNA ! By Denis Lalfela
- Krista tuarna ka ngaihtuain – Denis Lalfela, Rome
- NANG MALSAWMNA NI ANG CHE – Denis Lalfela
He thu hi Friday, August 7th, 2009 dar 8:09 am a Articles . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
Kan naupan laiin ‘Cotacomb Martar-te’ tih lehkhabu Upa Chawngzika ziah kha Sunday School kal kim lawmmanah kan dawng thin.
Catholic ka ni lo na’nga Mizo tlangval-in khatiang hmuna Eucharist i han theh thei chu ka lawmpui che a, ka chhuang bawk che. Pathianin malsawm zel che rawh se.
zo chhul chhuak hmuntin ah kan awm hi a tha in a hlu in a ropui e.in dem ringawt lovin in in chawi mawi tlang zel ang u
Keipawh Catholic chu ka nilo nachungin, ka kal ve chakna pawl tak chu a ni e.