“Kraws-ah khengbet rawh, kraws-ah khengbet rawh” tiin Juda mipuite chuan Nazareth tlangval Isua kha ‘Judate lal’ ti-a a inchhal avang khan thiam loh chantir ngei tumin an awrawl tawp chuan an au rual thup thup a. Mahse Roman Governor Pilata chuan thihna tluk hiala sual tih a nei hauh lo tih a hriat kiau si avangin thutlukna a siam nghal mai ngam lo.

“In lal hi kraws-ah ka khengbet ang maw?” tiin mipuite hmin tum chuan tim deuh tak hian an zawt leh a. Chuveleh puithiam lalte leh mipui pungkhawm te chuan, “Kaisara lo chu lal dang kan nei lo, hemi hi i chhuah chuan Kaisara thian i ni lovang. Tupawh lal-a insiam apiang Kaisara do an ni” tiin an au rual leh ta. Chutah Pilata chuan kraws-a khenbeh turin Isua chu an kutah a hlan ta nge nge a ni.

Judate khan Isua kha Messia-ah an pawm thei lo. Zawlnei leh zirtirtu (rabbi) ropui tak pakhat ve mai a ni. Thil mak tam tak a ti ve thin. Kha vang khan zuitu tam tak pawh a nei. Mi tam takin an han zui dul dul mai leh tawngkam na tak maia Juda hruaitute a sawizel thin avang khan an mit a tikham hle reng a ni. Mistiri Josepha fapa, Galili rama Nazareth khaw chhuak ve mai Pathian fapa meuh-a a han inchhal phei kha chu sakhaw la urhsun leh Pathian pakhat chauh ringtu Judate tan chuan a huat thlala awm hle ngei ang. Kha vang khan vawi tam tak an vau a, an vau hneh loh avangin a tihboral dan tur an zawng ta reng a ni. Amaherawhchu thudik tan leh puanchhuah kha khawvela a lo kal chhan anih tlat avangin tuman an khap zo lo. A thih thlengin a thu a sut hauh lo thung.
 
Juda hruaitute kha itsikna-in an khat a, Isua zirtirna dawng turin inngaihtlawmna nen an inphah hniam thei lova, an inhawng thei hlawl lo. Anmahni duhthlanna ngeiin an dodal a, an hnawl a; krawsa khenbeh turin thiam loh an chantir ta reng a ni. Khatia sualna nei lo Juda tlangvalin a thihna hmun tur Jerusalem khaw dai kalvari pana kraws a put lai khan lainattu leh amah tanpui tura ke pen chhuak ngam reng an awm lo. A zirtirte bakah amah ringa  lo zui thintu leh damna changtu mi tam tak te khan Judate an hlauh avangin an tlanbo san a, tam takin an rinna an phatsan hial bawk.

Pilata ram roreltu meuh pawn vawi thum lai a sualna ka hmu lo tiin a han puang thin a, mahse mipui a hlauh avangin thutlukna engmah a siam ngam lo. Isua khan thihna phu khawpa sual tih engmah a nei lo tih a hrechiang. Mahse mipui thinur lakah humhim turin a huaisen tawk lova, thudik a tan ngam lo. A lalthuthleng mawlh chan a hlau a, mipui duh lo zawng thutlukna siam a ngam tlat lo. Kha Juda tlangval Palestina ram zimte-a zawlnei leh Judate lala inchhal lo hum ai chuan a lalthuthleng leh thuneihna kha a thlang ta zawk a ni.

Nikodema Pharisaite zinga mi leh Judate hotu pakhat zana Isua aruka va tlawhtu te kha khawnge a awm tak le! Isua hnenah “Thil mak tam tak i ti a, zawlnei Pathian awmpui ngei i ni tih ka hria” tiin a rinna a chham chhuak ve hial anih kha. Chumai a ni lo, Pharisaite hma-ah huaisen takin Isua a hum a, “Ama ka ngei leh a thiltih hriat hma-in kan danin tuman thiam loh a chantir ngawt thei lo” a ti anih kha. Mahse lainattu leh tanpuitu Isuan a mamawh lai berin a inlan ngam tlat lo. Isua thusawite kha a hrethiam lova, pawm harsa pawh a ti. Pharisaite zinga mi fel tak, mi inhawng leh rilru zau tak Isua pawh ngaisang tak ni awmin lang mah se rinna tak tak nen Isua kha a la pawm thei lo. A hnungzuitu dik tak nih a la ngam chiah lo niin a lang. Judate sakhua leh rorelna-ah khan dinhmun pawimawh tak a luah. He Juda tlangval zawlnei pakhat ve mai avang hian a dinhmun leh nihna a chan phal bik lo a ni. A vuina lamah chuan a rawn lang leh lawi si, mahse Isua ringtu leh zuitu rinawm tak a ni ta nge ni ta lo tih tuma hriat zui a ni ta lo.

A zirtirte kha sawm leh pahnih lai an awm a ni lawm ni! Khawilamah nge a bo tak diak hlawm le! An hotu ber Peter phei kha chuan, “I tan lalpa, ka nun pawh pek ka huam ang” a ti hial a ni lawm ni kha. Puithiam lal inah khan vawi thum lai mai tunge anih ka hre love tiin kum thum lai a lo zui tawh leh ‘Krista Pathian nung fapa chu i ni’ tia alo chhal tawh chu a phatsan tiap mai le! Inchhirin a tap a, tih theih reng engmah nei lo ni-a a inhriat avang khan hlau leh khur chungin a relhbo san ve ta a ni.
 
Isua zuitu inti te zingah hian hreawmna leh harsatna a lo thlen a, phatsantu ni lova thi khawp hiala rinna vuan ngamtu hi an tam lo reng a ni. “Kraws-ah khengbet rawh” titu te kha Isua hnawltu leh a thu ring duh lotu Judate chauh an lo ni bik lo. Pilat-a anga Politik thuneihna leh mipui tlawn lungawi tum avanga thudik tan ngam lo, Nikodema anga mi fel mah se ringtu tak tak nih ngam chiah si lo, leh Peter anga phatsantu tenawm ringtu chak lo suala tlu thin te hi “Kraws-ah khengbet rawh” titu, vawiin ni thlenga a khengbet nawn tute kan ni ve mai long maw?

Share

-----------------------------------------------------------------------
Similar Posts

• Nazareth Isua, Judate Lal (INRI) – John Zosiama
• Kum Zabi Pakhatnaa Martarte – I
• A sira misual
• Krista tuarna ka ngaihtuain – Denis Lalfela, Rome
• KRISTA KRAWS THILTIHTHEIHNA ! By Denis Lalfela

He thu hi Sunday, August 16th, 2009 dar 12:10 am a Religion . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.