Vanglaini : Aizawl khawpui chhunga taxi intlan chhawk tura sorkarin ruahmanna a siam duh loh lantir nana taxi-te thawhtanni atanga an tlan chhuah loh hnuah, Mizoram Road Transport Union (MRTU) thu angin, nimin Sept. 15  atang khan city bus-te pawhin zawm vein, an service lo a, hei vang hian Aizawlah nunphung a buai phah viau a, kea mahni hnathawna hmun leh zirna-in pan an tam hle. Mipui harsatna zualpui phuhruk nan sorkar department bus 50 chuang a tlantir nghal a ni.

Taxi nuarte city bus ten an zawm ve avang hian khawpui chhunga veivahna lamin a tuar phah a, sorkar lamin MST bust leh department hrang hrang pawt khawmin MST bus 20 leh department bus 38 lai service mah se, mipui mamawhna a phuhru zo lo a, bus service te chu a tawt hlawmin, kea kal an tam hle. Sorkar bus a tlan avang hian buaina a awm loh nan bus stand tinah police duty dah vek a ni bawk.

Mizoram sorkar chuan, taxu leh city bus-te chu tuking zing Sept.16 thleng hun pein, service turin a hriattir a, nuarte chu sorkar thu awih tura hriattirin, an service zawm leh hma chuan an harsatnate State Transport Authority in ngaihtuah a tum loh tih a puang a ni.

Sorkar thuchhuah chuan, lirthei nuarte chu an nawrh an chawlhsan a, an service hma chuan engmah an chungchang ngaihtuah theih a nih loh thu a hriattir a, “Mizoram sorkar chuan city bus leh taxi neitu zawng zawngte hnenah sorkar duh dan ang leh permit an dil laia ziaka an intiam anga service chhunzawm turin September 17 zing lam thleng hun a pe a. Hei hi an zawm lo a nih chuan a tul anga thuneihna hman a nih tur thu hriattir an ni,” a ti.

Sorkar thuchhuah chuan hetiang hian a tarlang bawk : “Taxi intlanchhawk tura sorkar ruahmanna duh lo a, taxi-ho nawrhna belhchhah tura city bus service tihtawp a lo ni ta hi Mizoram sorkar chuan pawi a ti em em a. Hei mai bakah MRTU te’n maxi cab leh sumo service zawng zawng tihtawp vek tumin ruahmanna an siam ru a ni tih sorkarin a han hre leh zel hi mipuite harsatna siam leh, sorkar tih buai tumna lo chu MRTU te hian agenda dang an nei lo niin a ngaih theih rum rum a ni.

“Hetih lai hian, mipui harsatna beisei loh tak lo thleng hi sorkar chuan pawi a ti a. Theihtawp chhuahin department hrang hrang bus te leh MST bus-te nen bus 50 zet tlantir mek a ni a, a tul chuan private motor neitute thahnemngaihna pawh ngen zel a ni ang,” tiin.

Thawhtanni tlaia MRTU hruaitute thukhawm chuan taxi intlan chhawk dan sorkarin a ruahman hi pawm harsa an tih avangin, nimin atanga tiamchin awm loa city bus-te’n nawrh an zawm ve pawhin awmzia a la neih loh a, sorkarin thu lawmawm a neih loh chuan vawiin atang hian passenger phur motor dang maxicab te pawh service lo turin an lo ti tawh a ni.

Hetih lai hian, Zoram Taxi Owners Association chuan thuchhuah siamin, Traffic SP in intlan chhawk dan tur a ruahman anga service vek turin taxi neitute a ngen a, an ngenna zawm loa tlan duh lote chungah sorkarin hremna a lek pawhin ZTOA in mawh a phurh loh tur thu an sawi.

Mizoram Maxicab Owners Association pawhin MRTU in vawiin atanga sumdawnna motor, mihring phur chi leh bungraw phur chi zawng zawng tlan lo tura a ngenna chu zawm loin, an tlanna kawng pangngai theuhah tlan turin maxicab neitute an ngen a, hemi chungchanga an thuchhuahah chuan, hetianga MRTU thu zawm lo tura an thutlukna hi nimina MMCOA emergency meeting neihah a siam a ni tih a tarlang.

Aizawl khawpuia maxicab counter hrang hrangte pawhin vawiin atang hian tlangdung hrang hranga tlan turin ticket an pe chhuak vek a, MRTU anga maxicab te tlan lo tura ruahmanna siam chungchang hi hriattirna an dawng lo tih an sawi.

-----------------------------------------------------------------------
Similar Posts

• Taxi intlanchhawk ah sorkar a ding nghet
• Mizoram Road Transport Union in Sawrkar an nawr ve thung
• City Bus fare vangin nunphung a khaihlak
• Mizoram Road Transport Union in bus fare an buaipui
• Bus fare chungchangah NGO in sawrkar thlawp

He thu hi Wednesday, September 16th, 2009 dar 11:25 am a NEWS . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.