Evening Post:PRISM bul tuma pawl parukin Mizorama eiru nia rin thlanna an buatsaihah mi 42 chu corruption thubuai awrh thei dinhmunah an ding mek. Hemite chungchang tur hi October 3 hian a chiang dawn a ni. Eiru ngei nia rin theih, mahse, hmalak tak tak dawna tlema la chhui chian deuh ngai mi 111 an awm bawk. October 3 hian PRISM chuan Central Hall, Venghlui-ah ‘Anti-Corruption Convention’ a huaihawt dawn a, hetah hian mi 42 chunga hmalak dan tur an relin an bawhzui dawn a ni. Anti-Corruption Convention hi Society for Social Action (SOSA) President SL Sailova’n a kaihruai ang.
Pawl paruk – People’s Right to Information and Development Implementing Society of Mizoram (PRISM), SOSA, Federation of Mizoram Trade Union (FOMTU), Youth for Mizoram (Y4M), Serchhip District Youth Convention (SDYC) leh Lawngtlai District Development Vigilance Committee (LDDVC) te hian August 1 – September 19 chhung khan Mizoram hmun hrang hrangah “Eiru nia rin thlanna” buatsaihin ei rua ni a rinhlelhten an mi rinhlelh zawngte hming leh eiru nia an rinna chhante an thlak theihna tur bawm an dawh a, hetah hian rinhlelh nia rinte hekna lehkha 549 a tla a ni.
Lehkha tla te hi SDYC bawm dawha tlate tih loh chu enfiah tawh niin eiru nia rin mi 208 hming a chuang a. Lehkha tla thenkhatah hian hming inang an awm nual a, chuvangin lehkha tla zat leh hming lang hi a inzat lo a ni. Chubakah SDYC hian an bawm dawha tlate hi a hrana an enfiah avangin lehkha tla 179-ah hian mi engzat nge anhming lang tih hriat a ni rih lo. Tin, lehkha tla thenkhatah hian a ziak chhiar mumal theih loh leh ngaihtuah chhunzawm theih tura chiang lo 10 a awm bawk.
PRISM chuan lehkha tla enfiah theihte an enfiah a, eirua rinhlelhte hi chhuizui theih an nih leh nih lohte an enfiah leh hnuah 42 chu hmalak zui nghal mai theih khawpa chiang awmin an hria niin PRISM President Vanlalruata chuan vawiin chhun khan Aizawla thuthar lakhawmtute kawmin a sawi. An hmalak zui dan tur erawh chu “Anti-Corruption Convention” thutluknaah a innghat dawn niin a sawi thung. PRISM hian eiru nia rin thlanna hming langte mipui hriata puanzar an nih tur leh nih loh tur chungchang leh an hmalak zui dan turte chu ‘Anti-Corruption Convention’ thutluknaa innghat tur a nih thu a tir atang khan an lo sawi sa tawh a ni.
Convention thutlukna anga hmalak zui nghal theih 42 bakah hian mi 111 te chu bawma lehkha thlaktute’n eiru nia an rinchhan chiang taka an ziaklan, mahse, hma han lak tak tak dawna rinhlelh an nih dan leh nih chhante tlema han finfiah leh deuh ngai an awm bawk. Heng mi 111 zingah hian SDYC bawma tlate hi an tel lo a, PRISM President chuan mi pasarih vel awm turah an ngai niin a sawi.
Anti-Corruption Convention-ah hian sawm bik an awm lo a, corruption tihtlem a nih theih nana rawtna neih leh a ngaihven apiang tel theih a ni, PRISM President chuan a ti a. Chawhma dar 11-ah tan tur a nih thu sawiin thingpui leh ei tur sem a ni dawn lo va, riltam tur chuan chaw fun mai tur a ni, a ti.
-----------------------------------------------------------------------
Similar Posts
- Eirukdona Inkhawmpuiah Mi 42 Chungthu Rel
- Eiru nia rin envelope hawn chhunzawm
- Eiru List-ah Sorkar Hnathawk Hlir
- SDYC ten hruaitu thar thlang
- INFORMA PRISM RTI Help Centre hawn a ni
He thu hi Wednesday, September 30th, 2009 dar 6:18 pm a NEWS . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
Hma han la tak2 teh se, tih theih nei em2 lo mah ila, full support ka pe e.
RIN ai in eiru an van lo tam love a ziak duh lo an tam anih hmel ve a hram tak tak ngam ang maw
an ti leh tak tak ngam ang chu maw..
lo nghak chhin phawt ang.. tumah in kan va hriatpui / hmuhpui ve lem lo a… hming list te an tihchhuah hunah… kan la comment ve chauh ang chu..