Taxi intlan chhawk tura ruahmanna duh lohna lantir nana Mizoram Road Transport Union hmalakna Aizawl City Bus Owners’ Association-ten ni hnih bus an tlantir loh chu nimin Sept.16 tlai dar 6 atang khan an titawp a, vawiin hian dan pangngaiin an tlan zawm dawn. taxi driver-te erawh chuan an nawrhna hi an la kalpui zel dawn thung. Hetih lai hian, nimina Congress Legislature Party thukhawm chuan taxi-te chu permit pek an nih ang ngeiin an tlan tur a ni,” a ti.
Taxi intlan chhawk dan duh loh vanga MRTU-in a hmalakna pawh nimin tlai khan an titawp a, taxi-te chu dan pangngaia tlan turin an ti a, taxi khalhtu pawl lam, Zoram Taxi Drivers’ Assosiation (ZTDA) erawh chuan an thil nawr hi chhunzawm an la tum nia thu dawn a ni a. Taxi neitu pawl lam, Zoram Taxi Owners’ Association (ZTOA) chuan sorkar nen an inremna angin, sticker la an member te chu vawiin atanga tlan turin an hriattir a ni.
ACBOA Executive chuan nimin khan Minister Zodintluanga leh Parl. Secy. KS Thanga an dawr a, hotute ngenna zawmin vawiin atanga city bus an tlantir tur a nih thu an puang nghal a. Taxi-te harsatna sutpui tura nihnih chhung bus an dintir chu mipuite harsatna thlirin a tawk tawh tih sawiin, nimin tlai dar 6 atang khan taxi nawrhna an zawm ve chu an titawp ta tih an sawi.
Sorkarin ruahmanna a siam dawn chuan, vawiin hi taxi sticker A leh B tlan ni a ni a, hei hian zing dar 8 atanga tlai dar 6 inkar a huam. Hetih lai chuan, ZTDA chuan an nawrhna hi la kalpui zel an tum avangin vawiin hian ZTOA lam thlawptu taxi-te pawh an tlan dawn nge dawn lo a la hriat loh a ni.
Taxi te nawrhna avanga harsatna chungchang hi nimin tlaia Chief Minister Lal Thanhawla hoa Congress Legislature Party thukhawm chuan an ngaihtuah a. Hemi hnua CLP Secy. Lalrinmawia Ralte-in an thuchhuah a tarlan danin, taxi-te chu mipui rawngbawl tura taxi permit pek an nih an nih ang ngeia sorkar ruahmanna anga tlan turin taxi driver-te hriattir an nih thu a sawi.
CLP chuan, “Mizoram sorkarin Aizawl khawpui Traffice jam nasa ta lutuk leh chumi vanga mipuite’n harsatna an tawhte a lo ziaawm theihna a nih beiseiin, taxi intlan chhawk dan tur ruahmanna a siam a. Nikhat pawh a taka hman a nih hmaa ZOram Taxi Drivers’ Association-in an rawngbawlsak mipuite tawrhna ngaihtuah hauh loa service duh loa an nuar ta mai hi mipui tan a vanduai thlak kan ti a. Chuvangin mipui rawngbawl tura taxi permit pek an nih ang ngeiin CLP chuan ZTDA memberte zawm turin a hriattir a ni.
“Mipuite’n harsatna tam tak tawk mahse, thil tha zawk a chhuah theihna tur a nihzia hriaa chhel taka sorkar an thlawp hi CLP chuan lawmawm a ti tak zet a. Mipuite dinhmun hrethiam a, sorkar ruahmanna thlawptu Zoram Drivers’ Union, Zoram Taxi Drivers’ Association, Aizawl City Bus Owners’ Association, Mizoram Road Transport Union leh All Mizoram Maxi Cab Owners’ Association-te chungah Congress Legislature chuan lawmthu a sawi bawk.
“CLP chuan taxi permit hi district hrang hrang atana pek an nih ang ngeiin Aizawl khawpui chhunga district dang taxi service te zawng chhuak a, an district lama thawn kir tur te, taxi permit nei loa taxi anga motor chei a, service-te man chhuak tur leh dan anga an chunga action la turin sorkar a ngen nghal a. Mipuite tana tha tur a nih dawn phawt chuan tunah leh tun hnuah pawh huaisen taka kal zel turin, CLP chuan sorkar a ngen nghal bawk,” tiin CLP Leader Lal Thanhawla leh Secy. Lalrinmawia Ralte chuan hming an ziak a ni.
-----------------------------------------------------------------------
Similar Posts
- Taxi intlanchhawk tir
- Taxi leh City bus nuar, sorkar in service turin hriattir
- ZTDA press meet
- RV ah taxi a chesual
- Mizoram Road Transport Union in Sawrkar an nawr ve thung
He thu hi Thursday, September 17th, 2009 dar 9:17 am a NEWS . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
Sawrkar hi ding nghet tlat teh se. Tihchhim hnuah a lo tha lo a nih chuan Taxi pute hi full support kan pe ang a; a buan a hmaa kherh chiam nghal ngawt mai hi a mawl deuh tlatin a lang. Driver hi hman atangin tun thlengin mi fel tak leh rilru zau tak awm mahse an awm khawm chuan an butut deuh thin em aw ka la ti deuh. Chuvangin, sawrkar thu hi han zawm phawt sela, a lo that loh chuan kan la thle leh dial dial ang chu.
Taxi an ni emaw, ni lo emaw, Nawrh tih thawm hi ka ning tawh hrim hrim. Lam tang tur zawn khawm chiam chiam nen hian. Nawrh khapna Dan tha tawk hi a awm lo em ni? A awm loh chuan siam thuai chi a ni e.