India rama heart patient upa ber VL Bela? Civil hospital cardio unit in khum 3 chauh nei Lung (heart patient) natna nei India rama upa ber chu Mizo pa niin BM Birla doctor te chuan an sawi a, amah hi Tuikual Venga awm a hming chu VL Bela, kum 97 a upa a ni.

VL Bela hi kum 2005 khan a lunga thisen zam phui pakhat chu thauin a hnawh a, hei vang hian heart attack a nei nghe nghe a ni. April, 2005 khan hemi hawlh pawp tur hian BM Birla, Kolkata-ah refer a ni a, angioplasty tihsak niin, kum 4 hnuah pawh a hriselna a la tha hle a. Angioplasty an tih lai hian kum 92 niin, India rama angioplasty an tihsak kum upa ber nia hriat a ni. An khawih dawn hian a kum a upat tawh vangin daktawr te pawhin an huphurh viau a, mahse, a taksa a chak tha nia an hriat avangin an hlawhtling takin an khawih thei ta a ni.

“Inchhung dung leh thenawm velah te pawh ka la vei peih a, ka beng hi a tha lo deuh tawh a, ka mit erawh a la tha hle a, ka chaw ei a tui a, insawiselna ka nei lo,” tiin VL Bela chuan ZALEN a hrilh a ni. VL Bela hi 1912 khan Mission Vengah a piang a, hemi Veng-a piangah chuan damlai kum upa ber nia sawi a ni bawk.

“Angioplasty kan tih chuan lung thisen zama block-tu awm kha balloon te reuh te thuna hampuara tihpawp a ni a, a pawp sa hi a ping (collapse) leh theih avangin ‘ball pen spring’ ang deuh an dah a, ‘stenting’ an ti bawk a ni,” tiin Dr. Loncy V Lalzarliana chuan a sawi.

VL Bela enkawltu Dr. Tarun Paraharaj, Cardialogist BM Birla Hospital chuan, “Kum 80 mihringin kan tlin tawh chuan thih kan hnaih tawh tih kan inhria a, damlohna kan neih pawhin dam rei tawh lo tura inngaihna a awm tlat a, mahse mihring hi kan dam rei tial tial a, kum 80 hnuah hian ‘nun’ a la awm a ni tih hriat a tha. Heart patient phei chu kum 80 an pelhin khawih theih tawh loha ngaih thin a ni a, mahse a ni tawh lo, rei tak an dampui thei a ni tih hriat a tha,” tiin a sawi.

“Pu Bela hi ka hriat theih chinah chuan India rama angioplasty tih tawh upa ber a ni a, khawvelah pawh a nih hial ka ring. Angioplasty kan tih dawn khan ka huphurh ve hle a, a upat tawh vangin kal a thisen chhuak vangte leh lung lam kaihhnawih vangin kan khawih lai hian a thi ang tih a hlauhawm hle a. Hlawhtling takin kan zo a, vawiin thlengin a la dam a, October thla lai hawl khan an inah ka tlawh nghe nghe a ni,” tiin kan palai a hrilh bawk.

Mizo kan la aware tawk lo: Mizo zinga cardiologist kan neih chhun Dr. Loncy V Lalzarliana chuan Mizo te chu lung enkawl lamah kan la hniam thu sawiin, “Zai tawhho pawh hi duh angin an in enkawl lo niin ka hria. An tha deuh a, damdawi thlah maite an ching a. Lifestyle (nun dan phung) tlema her danglam a ngai thin a, rihna tihhniam te a ngai a, ei leh inah insum a ngai bawk a, hengte hi lung natna nei hian kan la hre tawk lo hle a ni,” tiin super specialist Dr. Loncy chuan ZALEN a hrilh.

Cardiology Unit tihchangtlun ngai: Civil Hospital-a Cardiology Department chuan tunah hian khum 3 chauh an nei a, damlo thenkhat chu casualty-ah te dahin rikrum thilah a buaithlak hle thin. Khum 4/5 emaw tal chu a mamawh hle a ni. Heart attack nei phut an awm pawhin khum an indaih loh vang hian an buai thin hle niin thudawnna pakhat chuan a sawi.

Aizawl Civil Hospital hi khawpui damdawi In zinga lung tha lo enna ‘angiogram’ khawl nei lo zing ami a ni a, a khawihtu mihring awm mahse, a khawl a awm loh vangin lung natna nei leh neilo finfiah dawn pawhin phai lama inthawn a ngai zel a ni. “A khawl tal hi chu nei ila, state pawna pawisa seng teuh teuh lo hian ‘diagnosis’ chu hetah kan ti thei ang a, pawisa kan seng tlem zawk a rinawm a ni,” tiin hnathawk pakhat chuan a sawi.

Share

-----------------------------------------------------------------------
Similar Posts

• When your mind says – Dylan Patrick O’Leary
• Dan Seals 1948 – 2009
• IN BED
• Uain(Wine) tlem aiah he damdawi hi lo ei tawh rawh
• Aung san suu Kyi man vangin Sitting Demonstration

He thu hi Sunday, October 25th, 2009 dar 11:10 am a NEWS . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.