Tunlai chu chanchin thar chhiar a nuam lo thin ngei mai. Rinloh takin thihna kut vawt chuan thalai nun duhawm takte chu dimna tel lovin, rawng takin a ava han man ngun laileng vele. Hman deuhah Lalhmaa zaithiam kan chan tawha tunah Isaac-a kan han chan leha, hemi inkarah hian thalai tam takin thihthutna tawkin khawvel min liamsan ta zawng a nih hi. A pawi thin teh e.

Thihna chu tar tan asin maw kan lo dah thin le. Mahse thihna hi chuan hun a vawng dik kan ti dawn nge diklo kan ti dawn tih pawh sawi thiam a harsa anih hi. Thihna hian hun pawh a neilova hunlo pawh anei chuang lo anih ber hi maw. A duh hun hunah a duh duh a thiar mai zawng a ni tak a le, a chimawm mak tak e aw. ‘Aw thihna khawnge I tur chu, …khawnge I thiltihtheihna chu…” tih te hi he leiah ngei mai hian hnehtu zawk ni chunga han sak a va chakawm zual thin em!

Hetih rual hian thusawi tu leh mi hlim fal deuh chuan, “A Lalpa’n hun a ti a, a hnenah a la ta anih hi”, an ti sam et bawk vei nen. He thu tha tak hi a tuartu tan zawng sawi har tak tur erawh a ni thung tlat si. Thihna te hi awmlo theilo nimahsela Lalpa hian kan thih dan tur kilh kelh hi chu a ruatsa hian kei zawng ka ring ngam lo in ka ring phal hlawl lo. Chuvangin thihna zawng zawngah hian Pathian puh mai tur kan ni lo.

Thihna tam tak hi chu pumpelh ve theih chu a ni a sin mawle. Nimahsela mi pakhat chauh fimkhur emaw hi a tawk mai lo, midang zawng pawh kan fimkhur a ngai tel vek. Fimkhur viau thin mah ila midang an fimkhur tawk loh chuan dik takin kan thi thin a lo ni. Mahse kan thih tawh maiu chuan dik leh dik lovin awmzia a nei tawh si lo. Isaac-a thihthuah hian tunge thiamlo tih lampang chu ka hre pha lo, mahse midang nen insu an nih miau chuan fimkhur lo zawk an awm anih a rinawm hle, chumi nghawng chu a va na the reng em, ‘ a par vullai a thliak ta si’. Kei chuan dan ka zawm asin mawle ti ringawt mahila midangin an zawm loh chuan a dik bawk silo. Chuvang chuan fimkhurna hi kan zaa kan mawhphurhna vek a ni e. Fimkhur lohna hian mi fel tam tak nunna a lo la tawh reng a sin.

Tunhnai maia Mizorama Aids vei thar lo pung chak ta em em te hian lu a va han ti hai ngai ve aw. Thihna hian thalai a va bei nasa lulai em anih hi le. Hrisel lohna pangngai a thi erawh an tlem viau laiin, ven theih nisi, fimkhur loh vanga thihna hi kan thalai te zingah a tam fe zawk anih tak hi. Chuvang chuan I fimkhur tlang ang u.

Hetiang thihna hian thlei bik a neih miau loh avang hian naktuk mai khi ka tan tawpna ni a ni ve thei reng mai le. Lalhmaa leh Isaac-a te pawh hian an nun zel dan tur te chu an suangtuahin hmalam hun chu beiseina sang tak nen an thlir ve thin ngei ang, mahse an inrin hmain an tawp leh si anih tak hi, ava pawi thin take m. Chuvang chuan mitin mai hian nitin inpuahchah kan va mamawh tehlul em, kan thihni tur kan hre si lo.

Thihna hmanrua te hi an lang duhawm fo thin a sin. Nula/tlangval nalh tak tak te hi thihna tur anni thei tlat mai (Aids vangin). Tin thil tha tak anga lang te hi kan thihna tur a ni thei a ni tih hrerengin, hawhu, engkimah I fimkhur ang u, tichuan thihna tam tak kan pumpelh dawn nia.

Share

-----------------------------------------------------------------------
Similar Posts

• Isaac Lalmalsawma (Mizo Idol 07 Contestant) a fam ta.
• TI HIAN KAN NGAIHTUAH THIN
• Tlawmngaihna leh AIDS
• Mahse Hringnun a kalsual leh thin…
• Ka va haw tehtawt em!!!

He thu hi Sunday, November 29th, 2009 dar 8:54 am a Articles . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.