Lungawilohna khawvel leihringnun

“Ka duhin min duh silo, min duhtu ka duh silo….Aw…Saw Pa/Saw Nu neih ang te  saw han nei ve thei ni ila….”

He ngaihdan hian i suangtuahna vawitam alo luahve tawh thin ngei anga, mahse lungngai duh hran suh, mite aia duham ta lua i ni lem chuang love. Sual sa a piang hringfate zingah hian he ngaihdan tellova hringnun hmang hi chu Sodom leh Gomora khua mifel zat pawh an awm chuang bik lo ania! I star em em leh  i phulo ngawih ngawih ni a i hriat pawh khan khi ngaihdan tho khi a nei a, chutih laiin nangin “Min phulo…” ti a i lo hnawl ve ngawt pawh khan amah phulo inti em em tu a tawng ve tho asin! Dawt ani lo!

Mitin hian ni thei ta ila tih leh han nei ve thei ta ila ti a duhthusam hi kan nei theuhva, dinhmun a zir erawh chuan kan duhthusam erawh a inchen lo mai ani. Mahse han ngaihtuah teh, kan duhthusam ni a kan lo ngaihte pawh hi a tak ram han thlena han puitlin meuh hi chuan duhthu a lo sam lo leh fo thin ani tiraw? Chuti anih chuan engtikah hian nge kan duhthusam chu hlen famkim aniha nun hlimawm nena chawlh hun chu kan thlen tak ang le?

Rethei chuan hausak ve a chak a, hausa chuan neih belh zel a duh a, hmeltha ni a kan hriat te lah nalh leh zual tuma inseng nasa sa an lo ni fo bawk si. Duhamna a khat leihringmi nun ah hi chuan neih tamna leh Nihna hian duhthusam ram min thlen ngai dawnlo alo ni mai zawk lo maw?

Heti zawng hian ngaihtuah ve thung teh le, i pian a nalh lo i ti em ni? i hmel in rual a pawl lo i ti maw? Nge i fu-ke te pawh a lo kimlo hial le? I lo lungawi loh na leh mite neih ilo awh ve nachhan te kha ngaihtuah hmasa la, chumi hnu ah chuan vanneihna leh Pathian malsawmna i dawnte kha chhut ve thung rawh le.

Heti zawng hian aw!

Khawvelah hian mi maktaduai engzatnge tuna i dinhmuna dinve chak ngawih ngawih kha awm ta ang le? I hnar, i mit, I beng parh lutuk, i chawn kual mah mah i lo tih te kha, nangina i lo lungawiloh pui em em, “Helai hi chu chutiang khatiang chuan han ni ve se chuan…” I lo tih thin zawng zawng te kha han neive thei ta hlauh sela lawm hlum dawn tur hi khawvel mipui zingah hian chhiar sen loh an awm asin!

I rethei i ti maw? Africa khawmualpuia hnam pakhat zinga Missionary pakhatin a sawi hi ka hre reng mai, chuta hnam mawlho te chuan an fak hla ah chuan, “ Vanram ah chuan nang leh kei, mi zawng zawng te hian PHEIKHAWK kan bun vek tawh ang a….” tiin mittui nen vanram an thlen hun tur an lo thlir ve thin asin! Hengho tan hi chuan tuna i nun kha vanram ani mai lo maw?

Sum ngah ngah hmeltha

Mi hausa te chu kan awt thina, an dinhmun kan han thlirin an duh apiang lei thei a an awm thin avangin an tan lungngaihna chhan tur a tlem bik niin kan hre thin, a nihna chen pawh a awm ngei e. Mahse, in ti teh ang, hringnun ah hian duh thlang thei dawn ta la lungngaihna ngah tak mi nge nih i duh a, hlimna tur nei tlem tak mi nih le? Thlan thiam har i ti ve em? Hausa, duh duh lei theite te tan hian han hlim belh teh hurh phah nachhan tur hi a tamlo teh mai asin. Nangin han neive thei ta nila beng chen chena i zuan tawrh tawrhna tur kha an tan chuan eng he hu ani tawh lova, mi te duhthusam kha an tan chuan nun dan pangngai ve mai alo nih tawh avangin sum ngah vanga lungngaihna tur lo nei tlem ta deuh pawh nise an ai chuan hlimna tur i ngah fe zawk tih kha a chiang ani. Tin mi hausa duh duh lei thei te pawh hian duh duh an nei thei biklo asin!

Hmel ah Baat nai!!

I hmelchhia ni a i hriat bik em em loh laiin nangmah phu tawk ni a inngaia rawn ngaizawngtu te zingah chuan hmeltha ti a han sawi tur chu an vang hle lawi a! An phu tawk lo zawng thiam tawh turin rilru lam thiam Daktawr hnenah I tir mai dawn em ni ang? Lo tir ta ngawt la mi dang i va bem khan lo tir ve leh ta che si se Daktawr chamber ah khan i tirh ho te nen khan in thu ho leh dal dal mai tur ania!!

Ka sawi tum chu heihi ani. Hmeltha hi zawng zep nak chuan hmuh an nuam a, mi ten an ngaisang a, ngaihzawng neih dawn pawhin thlirna hmasa ani lo theilo. Mahse heihi tleirawl sahawk lai rilru mai ani. Nupui pasal zawnna atan kher chuan zankhat thilthu a vanduaina avanga chhe mai thei pianmawina, hmelthatna leh sum leh pai te hi tehna hmasa atana hman atan chuan an tlak lo khawp mai. Kum sul vei, kangmei leh tampui pawhin atih chhiat zawh loh tur chu ‘In hmangaih tawnna’ zawk hi a ni. Heti zawng hian ngaihtuah thiam ta ilang chuan kan phuloh leh min phulo tute pawh hi an lo tlem zawk ngei anga, ngaihzawng te pawh hi kan ban zeng zung mai mai chuan ka ringlo deuh!

Engtihnge nite ang?

Duhthusam ram thlen hi neih belh tam leh nihsan na hmanga puitlin kan tum chhung chuan duhamna thinlung pu hringnun ah hian kan thleng ngai lovang. Mahse i neihsa te kha han ngaihtuah teh le, khang ah khan lungawi hliah hliah mai han tum teh. A harsa miahlo asin! Kei, mite awt ngawih ngawih tura ngaih meuh pawh hian ka ngaihtuah chang chuan lungawi hliah hliah in ka awm leh thin! Nangmah awt ngawih ngawih tu tur che mitthla chung khan tum ve chhin rawh le. Hetianga i puitlin theih hunah chuan i Pathian rinna kawngah pawh ilo chak sawt ngei ka beisei. Kristian nunah hian kan hnuaia mite dinhmun ngaihtuah lo leka kan chunga mite ngawt kan thlir thin hi chuan mi dangte hmangaihna hi a awm mawh khawp ania.

Hetia sawi vang hian hmasawn kan tum tawh tur ani lo tihna ani lo. Bituk kan insiam anga chumi thleng tur chuan rahbi siamin theihtawpin kan bei ang. Mahse chumi atan pawh chuan hlawhchhamna ten min tih lunghnur lohna turin tun dinhmun zela kan lungawi thiam a a tul hmasa ani. I exam ah i fail emaw, hlawhchhamna dang pawh lo thleng tase, i hlawhchhamna anga hlawhchham phalo pawh kha tam tak a la awm tho asin! Lungawi takin bei nawn leh mai rawh!. Hetianga ngaihtuah hi chuan hlawhtlinna te pawh hi a lo lawmawm bik hliah hliah thin ani.

I lungawina tur chu i la neih lohva awmturah ngai lo la, i neihsa ah leh i nihsa tawh ah khan i lungawina tawk tur chu a awm reng tawh asin.

In ngaihtuahna te lo buai vek tawh rawh se!!!

Share

-----------------------------------------------------------------------
Similar Posts

• I LUNGAWI EM ? – H.S. Zalianchhûnga
• Chan tawka lungawi
• Min liam san leh si – darryans
• H mawlh mai hian min tibuai!
• Ka Duh Em Asin – Rev. C. Chanchinmawia

He thu hi Thursday, November 26th, 2009 dar 6:19 pm a Articles, ETC . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.