Tunlai chu Tripura lamah tihdam rawngbawlna a lar hle in an sawi a, hetiang hi chu Mizoram lamah chuan thil thar a ni lemlo khawp mai. Mizo te hi Pathian thu kan awih bik vang nge, ram danga thleng zen zen lo tihdam theihna thlarau te hi kan chang ngun bik riau mai. Nge kan hrisel loh em vang zawk pawh hriatthiam a har hle ai. Engpawh nise thlarau leh taksa lamah hian tihdam ngai hi kan tam ve hrim hrim tawh bawka, taksa lam doctor leh thlarau lam doctor te pawh hi an inzah thual chu a ngai ve reng a ni. Engtiklai mai pawh hian khawi lai kilah emaw hi chuan tidam thei hi an awm deuh reng maiin ka hria.
Tihdam theihna mai bakah inlarna hmu pawh hi kan tam thei riau mai bawk. Vaki hian liam kawn an nei thina, inlarna pawh hian larkawn a nei ve emaw ni chu aw tihtur khawpin inlarna lam pangah pawh hian kan mikhual lo tlang hlein ka hria, kan inlarna hmuh te erawh zawng a chang chuan a inkawkalh hle thin tih erawh a chiang thung. Tutute emaw hi an inlar chhawk mai mai ani lo maw tih pawh awlzate a ni ta mai.
Mahse tun tuma inlarna ka sawi tur hi chu a dik tak a ni, awih loh chi a ni lo tlat, pawimawh veng veng tak a ni. Mi tam tak inlarna ai chuan a chhawr nahawm zawk ang.
Vawikhat chu pa pakhat hian inlarna hmuh hi a chak tlat maia (mizo tam tak angin). Vawikhat a zing tawngtainaah chuan inlarna a dil la. Chumi tum chuan a duhthusam ngei mai inlarna chu a hriain a hmuta. Chutia aw an hre thut leh Pathian an hmu thut mai chu a hamhaih nasa hle maia, sawi tur a bar pawh chu a hre ta hauh lo mai. Mahse Samuela ang deuh khan “Lalpa enge ti tura min duh?”, tiin an zawt ve chawt maia. Chutah Pathian chuan, “pawnah sawn va chhuak la I kawtah sawn lunglun lian tak mai ka daha, saw saw nitin I lo nam thin dawn nia, chutah thla thum hnuah ka lo kal leh ang”, tiin tihtur chu a hnutchhiah hnuah chuan a bo leh ta daih a.
Chutianga Pathianin ti tura a tuk chu thil tha ni ngei tura a rin avangin nitin mai chuan zingah leh tlaiah a nam ngat ngat thina. Chutianga thla thum dawn lai mai a nam hnuah pawh chuan vawite khat mah chu lungpui chu a che eih lo tih te chu a ngaihtuah neuh neuha, a rilru pawh chu a hnual tan tawh hle mai. Mahse Pathian ngei khan nam turin thu kha a pek miau avang zawka nam hram hram chauh a nih avangin phur lo tak chung chuan a ti lui hram hram zela. Mak deuh maiin vawikhat chu a zing tawngtai lai bawkin inlarna a hmu leh thut maia. Chuta a hmuh vethung chuan, “Engatinge saw lungtum saw nitin mai I nam I nam? Chet pawh a chet eih loh saw, I hun leh tha I seng thlawn mai mai anih hi, tuna tang chuan bansan hmiah rawh”. A rawn ti ve ta thung. Inlarna hmuh chu a chak thin tehreng nen a duh aitam an hmuh meuh chuan a buai phili leh viau lawisi, zawm tur bik hrelo chuan a awm renga. Mahse chiang zawka an ngaihtuah chuan lungtum nam chuan awmzia pakhatmah ala nei lo tihte an ngaihtuaha, inlarna hnuhnung zawk chu a zawm ta nge ngea, thupek hmasa chu a hlen chhuak zo ta lo.
Chutah a thla thumna chu a lo thleng. A tawngtai lai bawk chuan inlarna a hmuh hmasak ngei mai chuan a thutiama dingin a rawn tlawh leh chat mai. Chutah chuan zawhna a zawt ta a, “ti tura ka tih che kha I lo tie m?”, tiin. Ani chuan engmah sawtna a neihloh zia leh tinther tiat takngial pawh a la lumsawn lohzia te chu a lo hrilh ve a. Chutichuan Pathian chuan heti hiang a chhang ta a, “Nam tura thu ka pek laic he khan namsawn turin ka hleinem che, lo nam ziah turinka mai chauh che a nih kha. A nam kha I hna a nia, a lumsawn erawh chu ka hna a ni. Nitin I nam khan a hlawkna chu lung lumsawn leh lumsawn loh lamah I teha I ti dik lo ani e. I ban puam te, I zak thlar te, I dul leh chawn leh mal te kha han en teh. Thu ka pek lai che kha chuan an zawi nen a nih kha, mahse he lung nitin hun rei tak I lo nam tawhna azarah tunah chuan thahrui leh thisen zamin a khat tawha, an thangin an sek talh tawh ani lawm ni, kha kha a hlawkna chu ani e?, tiin a zilh let ta a ni.
Mihringte hian Pathian hnenah kan mamawh thil tam tak kan dil chamchi thin. Pathian pawhin a thilphalna chu awpbet mai lovin kan hnenah min hlana, kan tawngtaina te chu a chhang ziah thin. Amaherawhchu kan tum angin chhanna chu kan hmu lo fo. Kan tisa mitin thlarau chhanna chu kan en tlat thin a vang hian kan hmu theilo thina, ‘Pathian hian min chhang lo anianga’ tiin kan beidawng fo bawk. Mahse rinna mit nena kan thlir chuan kan tawngtaina te hi a thlawn lo tih kan hmu thei ang. Harsatna tam tak kan tawrh te hi kiang lo mahse, hetiang tuar thei tur hian chakna min lo pe daihzawk a lo ni fo thin. Chutiang harsatna te kan tawrh hnuah chuan midangte hriatthiamna te leh tanpui theihna te kan lo nei ta thina, chu chu malsawmna liau liau ani. Keini hian lung (harsat mangan buaina) nam sawn kan lo tum thin, mahse a laksawn chu Lalpa hna ani. Mahse theihtawp chhuaha beidawng lova kan tihve tur rinawm taka tih hi kan bat a ni. Hetiang inlarna hi mitinin kan hmua, kan zawm peih loh avangin kan buai thin mai a lo ni. Chuvang chuan Tirhkoh Paula anga chhun thluk tawpa, Isua tho leh chu a hring ahrana hmuh ve kher kan mamawh love, amah chu ringla a man a ti vek ang. Kan tihtur, a thuzawm kawngah erawh inthlahdah a thianglo thung.
-----------------------------------------------------------------------
Similar Posts
- INNEIHNA HI PATHIAN RUAT A NI
- Pathian Samsuih – by Rev. Dr Paula Pakhuongte
- Hetiang Hi Ka Dawng Zing Tawh – Enge In Ngaihdan?!
- Pathian Mithlante -1 Korinth 1:26-31
- Pathian chhanchhuahna chu lo thlir ve ta che.
He thu hi Saturday, November 21st, 2009 dar 10:15 pm a Religion . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
A va tha kher em! Amen thuai theh ang.
A ropui hle mai, kan ngaihdan leh kan kawng zawh min zawhpui tura Pathian beisei tlat, a kalna chu ama rel ani tih ngaihtuah miahlote tan hian a va man hla em, zirlai tha tak a ni
A va tha ve, Pathian rawng kan bawlnaah hian kan hlawhtlinna(output) hi kan intehna tur a nilova, taima leh rinawm takin ka thawk em tih kan inngaihtuah a pawimawh zawk a ni. Anih loh chuan kan CHAPO thin.