Zonet : Ni nga chhung lai, Krismas chawlh hman a nih hnuah Dec 28 khan sorkar office-te chu hawn leh a ni a, Dec 29 pawh hawn a ni ang. Vawiin khan office kai erawh chu an tam lo hle a, a kai chhunte pawh chawhnu lama haw an thahnem hle a ni. Kan palai-in vawiina New Capital Complex-a Civil Secretariat a tlawh pawhin, office kai leh dawrtu an awm mang lo a, Secretariat-a room hrang hrangte pawh a ruak hle a, Minister leh Parliamentary Secy., office kaite pawh ZNP President leh MLA ni bawk, Pu Lalduhawma fapa vuinaah an kal deuh vek nia sawi a ni.

Hetiang bawk hian department hrang hrang office-ah pawh kai an tha lo hle a, chawhnu lamah chuan office-te hi a ruak hle hlawm a, office dawr tum tan pawh biak tur mumnal awm lohna a awm nual a ni. Sorkar office ang deuh bawk hian,  Aizawl khawpui chhung pawh kar kal ta lam nena khaikhin chuan a thawl hle a, Traffci jam nasa zual lai a awm meuh lo a, chak khai la leh chhuak hrim hrim pawh an tam lo hle a, tun thla ni 21 atanga 24 chhunga No Vehicle Zone puanna huam chhung, Zodin leh Chanmari inkarah pawh, lirthei leh mihring veivak an tam lo hle a ni. Kum thar lo thleng tur lawmna atan sorkar pisa chu naktip, Nilaini atangin khar a ni leh ang a, nakkum January ni 4, Thawhtanniah kum 2010 atan hawn tan leh a ni dawn a ni.

Ni nga chhung lai sorkar Pisa leh Bank-te khar a nih hnuah vawiin khan mi thahnem takin Bazar, Office leh Bank-ahte an mamawh an lam a ni. District hrang hrangah pawh vawiin khan sorkar pisa-te hawn leh a ni a, Aizawl ang deuh bawkin pisa kai an tam vak lova, hmun hrang hranga kan corr. hnen atanga thu dawn danin heng Office-ahte pawh hian hna hmanhmawh zual deuh chauh an thawk a ni. Hetih lai hian Zoram chhim lama Autonomous District Council 3-te chuan Krismas chawlh an la hmang zui a, Krismas leh kumthar inkarah Pisa hawng lovin an chawl tlang dawn a, January ni 4-ah District Council Office-te hi kum 2010 atan hawn tan leh a ni dawn a ni.

Vawiin khan khaw engemaw zatah Kohhran thenkhatin Krismas lawmna ruai an theh nawn. Heng zingah hian Lawngtlai khawpui leh he District chhunga khaw dang thenkhat pawh an tel a, Hnahthial-a Electric Veng, Chanmari Veng leh Lungleng Veng-te chuan Krismas lawmna ruai theh ni, tun thla ni 26, Inrinni khan mitthi an neih avangin ruai an theh lova, vawiinah an theh a ni.

Share

-----------------------------------------------------------------------
Similar Posts

• Hei hi pisa hunlaia sorkar pisa a ni.
• Krismas leh Kum thar borual Traffic SP in thlirlet
• Chapchar Kut lawmdan tur sawiho
• Eiru nia rin envelope hawn chhunzawm
• Anti Tobacco Squad drive

He thu hi Monday, December 28th, 2009 dar 11:23 pm a NEWS . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.