Photo : wonderboy
Vanglaini : Committee on Traffic Management ruahman angin, nimin atang khan Aizawl khawpuia Zodin Square leh Chanmari kâwn inkarah No Vehicle Zone hman a ni a, lirthei zawng zawng tlan khap a ni. No Vehicle Zone avang hian nuamsa takin mipuite kawngpuiah an kal thei a, bungraw lian tham zuar dawrkai thenkhat erawh chu an inhralh theih loh phah thung.
No Vehicle Zone hi chawhma dar 10 atanga tlai dar 4 thleng neih a ni a. Kulikawn lam atanga city bus leh lirthei dang kalte chu Assam Rifles mandir hêlin an tlan lêt leh a, Zemabawk lam atanga kalte pawh Chanmari Presbyterian Biak-in hêlin an lêttir leh bawk.
Hetih lai hian, Vaivakawn, Armed Veng leh Ramthar Veng lam atanga lirthei kalte an thlen theih tâwpna leh a chhehvelah traffic jam a tam phah a, traffic police ten rim takin an buaipui a ni.
No Vehicle Zone avang hian kawngpui a tháwl a, kawngpuiah nuamsa takin mipui an kal thei a, Dawrpui taxi stand leh Israel Point velah phei chuan kawngpui dunga thil zuar an tam hle a ni.
Kawngpuiah mipuite nuamsa taka an kal vel theih lai hian, No Vehicle Zone-in a huam china bungraw lian deuh zuar, an dâwr atanga motor-a hlân nghal ngai bungrua neite chuan an inhralh thei loh phah tih Vanglaini an hrilh.
No Vehicle Zone hian VIP-te pawh a huam tura tih a nih lai leh, private motor-te khauh taka vên an nih laiin, officer motor thenkhat tlân tlangtir a awm nual. Vanglaini palaiin police motor tlan tlang pawh a hmu nual a, chung zingah chuan – MZ-01 B-2868 (Gypsy), MZ-01 B-2726 (Gypsy), MZ-01 D-7833 (Bolero), MZ-01 A-7212 (Bolero) leh bike thenkhatte a tel. Police gypsy pakhat, stationery phur chu emergency chhuanlamin an kaltlangtir a, Chief Secretary motor pawh tlan tlangtir a ni.
No Vehicle Zone hian damlo a huam lo tih ni mah se, damlo eng emaw zatin harsatna an tâwk a, damdawi-in pan ngaite chu duty ten an tlan tlangtir mai laiin, damdawi-in atanga chhuak, damlo thenkhat chuan taxi leh ambulance hman mai tur a awm loh avangin harsa tak chungin ke-in an kal hlawm.
Zodin bula No Vehicle Zone intannaah press mite hun eng emaw chen an awm ve a, chumi avanga police officer tlan tlang tum, tlan tlang ngam ta lo hmuh tur an awm. Police officer pakhat tlan tlang tum pawh press mite awm avangin duty ten an tlan tlangtir ngam lo a, a hnuah officer chuan traffic police duty-te biain, thil awmzia a zawtfiah leh a ni.
-----------------------------------------------------------------------
Similar Posts
- No Vehicle Zone
- No Vehicle hun siam danglam
- Aizawl traffic a buai tual tual?
- ‘NoVehicle Zone’ MRTU-in duh lo
- Motor tlan dan ti danglam
He thu hi Tuesday, December 22nd, 2009 dar 12:24 pm a NEWS . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
hleihneihna khawvel a ni th a ciang hle anih hi..no vehicle day hi a thrat rual rualin kei k ning khawp mai.