Kum 2009 chu a ral tep tawha, kum thar, 2010 kawl a lo eng ruai ruai tan ta. Henglai USA leh ram dangah pawh December 31 zan hian sana in zan dar sawm pahnih a kawh hun nghakin, damdawiin hrang hranga nau neihna wardah chuan doctor leh nurses te chuan kum thara nau piang hmasa ber chhartu nih tumin an nghak thup mai thin. He mi zan hian telephone te radio leh television a media ho ten kum thara nau piang hmasa ber awmnna chu eng damdawiin ber nge ni dawn tiin an beng an chhi thup mai bawk thin.
Kum thara nau piang hmasa ber chu a lo piang ta ngei a. He nausen vannei tak hian thilpek tam tak dawngin chanchin thar lawrkhawmtuten a thla te lain news ah an han chhuah uai uai a. Nausen nu leh pa leh a chhungte chu an lawm em em mai a. He kum thara ni chhuak hmasa ber hi an dam chhung pawhin an theihnghilh ngai reng reng dawn tawh lo a ni. Nau sen duhawm tak an neih bakah an chhung chu pakhatin an lo pun belh tak avangin.
Kum thar lo thleng tur hi, kum thara nausen piang hmasa ber nu leh pa anga hlimawm leh nuam hian kan hmang lo mai thei. Thenkhat tan chuan lusun mangan tahna hun pawh a ni theiin leh kum hlui lama kan mi duhtakte kan then avanga lungleng leh mittui tla chungin kan hmang a ni thei e. Hei hi hria ila. Hnung lama thil awmte chu theihnghilhin, hma lama thil awm te chu banin … (Phillipi 3:13) kum hlui chhunga kan tuar tawhna te chu nasa mahse, kan tuarna te hi min tichaktu an ni tih hriain, Pathian hmangaihna leh a malsawmna kan dawn tam takte chu ngaihtuahin lawm thu sawi zawk ila.
A hnuaia thu leh Bible chang kan han tar lan te hi i lo ngaihtuah ho ang u.
“Taima takin hnathawk la—a hlawhchhuah chu hlawhtlinna a ni.
Fimkhur takin thil ngaihtuah la—chakna hnar a ni.
Infiam hlim nan hun hmang la—tar harna a ni.
Lehkkha chhiar nan hun hmang la—hriatna tizau tu a ni.
Nuihza leh intihhlim nan hun hmang la—nunna atan hla mawi a ni.
Tawngtai nan hun hmang la—Kristiante nunna thaw a ni.”
“Kal kawng i zawn duh chuan Pathian zawng la—nun hlim tak leh hlawhtling i neih duh chuan Pathian thu awih rawh.”
“Ka fapa, ka thu ngaithla la, ka thu sawiah i beng dawh rawh. I mithmuh ata kal chhuah tir suh; I thinlung lai takah pai rawh. A hmutute tan nunna a ni a, an tisa zawng zawng tan hriselna a ni si a.” (Thufingte 4:20-22)
Kan hmaah 2010 khua a var tep. Ni 365 phek thianghlim leh fel fai tak, khawvel mi tumah la tawn loh chu kan hmaah a rawn inpharh tep tawh a. He hun thar lo inher chhuak tur hi i hman dan tur chu nangmahah a in nghat a ni. Bible chuan “Engkim tan hun a awma, van hnuaia thiltih zawng zawng tan hun remchang a awm,” a ti a. (Thuhriltu 3:1) Kan hnung lam hun te chu lawmthu nen hawi kir ila, kan hmalam hun hi beiseina nen i thlir ang u.
Kum thar hun lawmawm tak lo thleng tur hi nang leh i hmangaihte nen hlim leh lawm taka i hman theihna turin duhsakna sang ber kan hlan a che u.
In thawhpui leh Kristaa in unaute,
Women’s Ministry of First Mizo SDA Church of America
-----------------------------------------------------------------------
Similar Posts
- A pianna tlawm mahse ka Chhandamtu ani si a….
- KRISTIAN SAKHUA LEH MIZO HNAM SAKHUA DANGLAMNA
- Sumeona
- Ngawi rengin
- Happy Christmas & New Year – Te-a
He thu hi Wednesday, December 30th, 2009 dar 9:20 am a ETC . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
Chhiar a nuam hle mai, thanx