Lengzem : Ka duh reng vanga ka kawm pawh ni lo, mahse, ka thianpa ni ve ta tlat bawk si kha, engtin tin emaw ni Aizawlah a rawn vak lut ve rawih mai a, Aizawl khawpuia In heti zat ding zingah hian ‘ka In’ han tih tur chai nei bik hek lo; Mission Veng velah hian thian thenkhatin a lo invawmluh vena tur an lo dapsak chiam a, a In luah tur zawng tura inkaihhruaina an inpek chhun chu, “Man tlawm te!” tih mai te hi a ni. A dang a ngai lo. Tui connection a tha em? Inthiarna a awm tha em? ‘Bed room chuti zat tal’ tih velah hian buai a ngai lo, ‘man tlawm te!’ a ni tawp mai.

Tripper Trick!
Tichuan, a thian fel tak takte chuan chutiang In chu an hmuhsak ta hlauh mai a. “Tlaiah min lo nghak rawh u, ka bungrua ka rawn dah phei dawn e,” a ti a. Kan lo nghak ve thap mai a. Thim hlim, tumahin a bungrua an rawn hmuh chian theih tawh loh tur hun awm velah chuan a rawn ri phei ve ta rum rum mai a! A rawn ri chher chhuai chhuai a, an lo lang ta. An pute hriat lohin a driver ngamtlak deuh tu emaw kha vau titih, thlem titihin a rawn hijack ni ngei tur hi a nia, tripper sen vur mai hma-ah chuan a rawn thu nui sang mai a, a hrilhhaithlakin a va lawmpuiawm angreng tak em aw! An han ding a, a mutbu, zawng awm tiat lek, ui no neihna tham khawm ni awm tak kuah chung chuan a rawn tum thla tharh a, a tih fo thin dan pangngai angin, ngaihsam hmel zet, thunei hmel angreng fe si hian, “Bungraw dang chu a hnungah hian a awm, lo hlang thla r’u,” tih pahin a han kal kual thar thar a. Tripper hnung chu kan han en a, engmah a phurh awm hmuh tur a awm si lo.

A bungrua zawng zawng hlan thlak tuma kan insan phek vel lai chuan motor khawl chu a ri ring zual thut a, a hnung chu a kang ta tual tual mai. Kan thianpa ber chuan nasa fahrana meng phawk chung leh mangang hmel zet mai hian driver chu a va ko, “Mawla, bun suh, aw haw…, a bun dawn ka ti…! Han bun vaih teh.., ka khum…, ka khum…!” ti chungin a tlan kual. Tripper body kha a han nam thin, ani ang pa derdep tan han nam din mai mai chi a ni der si lo. Driver lah chuan thawm bengchheng karah chuan kan thianpa thusawi kha hre ve tawh hek lo. A ro hlu neih ang ang chu bun ngei tum chuan a tisang tak tual tual a.

A sang tawk ta fu tihah chuan gas cylinder pakhat a rawn lum chhuak tawp tawp mai a, a hnungah cooker ung fahran hian tlan chhuah ve hman loh hlau ni awm tak hian chak fahranin a rawn um chhuak bawk! Kan thianpa chuan mangang rawl leh thinrim rawl inpawlh nawk hian, “Aw…, ka cooker…!” tih pahin a chal a han dawm a, driver thutna lam chu a han thlek phei a, motor khawl lah chu a la nung vut vut mai si. Kan thianpa chuan awmze nei lem lova au vak vak bak chu tih theih a nei tawh bik lo. Driver chuan a hnung sang fe-a kang tawh chu a han tiche dut a, thirbel tharlam lo tak, ram bai-belah te pawh hman ve nual tawh ni awm tak chu a rawn thlawk chhuak leh nawlh a, a neitupa chuan rang takin a lo chhar a, a awm-ah a han pawm bei a, mi dang chu awm lo ila chhuak takin a tah khum em em ang!

Chutia kan thianpa a mangan em em tawh lai chuan lo thlir ngawt mai loh chu a thiante tan tihtheih a awm lo. Driver chuan nasa lehzualin a han sawi che leh a, khum a lo lang ta! |ah aw teuh hian chu khum neitupa chuan, “Khi…, en teh u, ka khum…, a lo kal…, a va mawl tak em! Khum hi bun chi a ni ngai em ni? Lo vuan teh u a chhia ange…, ka vel dawn emaw ni chu le!” a ti khur dar dar a. A bula mangang taka lo vir kual ve ringawtte chuan driver nge velh a tum khum kha tih pawh kan hre hrang tawh lo.

Chutia khum lo chhuak tur mangang leh hrilhhai taka kan lo nghah thap lai chuan, khum sirah chuan a rawn ri thla leh ruk ruk a, gas stove tharlam lo ve tak mai chu lei charah a rawn inchhawng leh ta vá mai a. A nghing lai lai a, a tlu tur chu a neitupa chuan va vawn din tumin hmanhmawh takin a tlan phei a, a vuan hman tep tihin leiah chuan a tlu chher chhuai a. A gas stove leia mu bal mai chhar tuma a zu kun lai tak chuan khum lo tla turin a rawn delh tur chu a han hmu leh. Hmanhmawh taka tlansawn pahin khum ke lo lawr thla tawh chu a han vuan leh hram a, mahse, tlanchhiatsan loh chu thil tih chi a ni tawh lo.

Lei charah chuan khum chu chik tuarh khawpin a rawn innghat thla leh ta hnawk mai a, a ke vel chu a sawi deuh bui a, a bula lo en thaptute chu “Tunge min cho?” ti ni awm tak hian, ding sawi luai chung chuan a insawi deuh hluau hluau mai a. Khatia tripper atanga bun thlak a nih khan a khum neitupa kha nge a khuma kha lungawi lo hmel zawk a hriat loh. A khuma tak pawh kha lungawi hmel hi a pu bik lo va, “Driver chuan min va hmusit ve! A bun te-a mi han bun khanglan chu le!” ti ni awm tak hian motor lam chu a la nger deuh chhur a. A neitupa lah chu a khur dar dar tawh mai bawk si! Driver kha a pumrua han en reng reng pawhin ka thianpa khan a ngam ve lutuk ang tih ka hre mai a, mahse, kutthlak tuma a che miah lo leh, hmai chhana hauh pawh a hauh ngam loh dan atang khan rin dan ka nei ve. Ka thianpa khan a motor kha hman man chawi lovin, engtin tin emaw a tawngkam thiamna hmangin a rawn bum chhuak ni ngeiah ka ngai a. Hman man pek ahnekin, a in tur neih ang ang te pawh a rawn inzawhpui tawh zawk ni ngeiin a lang. (Heta ‘in tur’ tih hian zu a kawk kher lo, tuisik emaw, sertui emaw, bawng-hnute emaw pawh a ni daih thei!)

Tichuan, a chhar khawm theih ang ang chu kan chharkhawmpui a, a In luah tur lam pan chuan kan liam ve ta thliai thliai a. In thar luah tur lam pana kal te chu hlim taka rik chel chul awm tak hi a nih tehlul nen, party worker nuthlawi bill tang ang mai hian kan ngui nghiai mai a, sawi tur hria pawh kan awm lo. Tripper driver vang vek!

Home Sweet Home
A neitupa turin tum buau chunga hma a hruai chu kan zui ve hnak hnak a. Saiip chhia-a zar chawp mai mai zun-in pahnih kan kal pelh hnu chuan a in luah tur chu kan thleng ve ta. A neitupa tur chu a lut hmasa ber a. Kawngka luh chiah ding lama switch chu a’n hmet ri khap a, chu chuan in chhung zawng zawng chu chiang takin a en chhuak vek a. Bulb dang vuah belh a ngai miah lo. Bulb pakhat khan a kil kar zawng zawng thlengin a en hneh em em mai a ni. Kan thil ken theuh chu kan han keuh ve dat dat hlawm a. A neitupa ber chu biak huphurhawm khawp hian chhuat sir kil khatah chuan khawte retailer fapa awm tha duh lo ang mai hian a thu tum bar mai a. A lu chung zawn, mihring lu chen awm velah chuan poster hlui tawh tak, a luah hmasatuten uluk taka an tar, an chhuahsan dawna an chhawm zui tak loh ni awm tak, a thar lai chuan In lem mawi tak ni ngei tur, a hnuaia Home Sweet Home tih inziak hi a intar a.

Chu poster intar chuan eng eng emaw min ngaihtuahtir a. Eiru milianho in ropui tak taka chengte tan an in chu a lan danah ropui hle mah se a nuamin a thlakhlelhawm chuang reng reng lova, in ropui hian hlimna a chhawm sa tlat loh avangin In reng reng hi a luahtu rilru a zirin a nuamin a nuam lo mai a ni tih te ka ngaihtuah a. Ka thianpa tan pawh chu In zim te chu home sweet home a nih theih ngei beisei tak chung hian, a in luah tur nawm reuh turzia te, khum atanga rawng a bawl mai theih tur chuan khawsak a tih awlsam turzia te, bulb pakhat lek hman a ngaih avanga electric bill-ah insen vak a ngaih loh tur thu te ka han sawipui ngial a, mahse, a luahtupa tur ber chuan a bengkhawn tha duh lo va, mi pawh a melh tha peih lo. Driver thil bun thiam lutuk khan kan hlimna tur zawng zawng pawh a bun liam zo ta vek emaw tih mai tur hian, chhungkhat pa berin nupui fanaute ngaihtuah lova ngaihzawng thar a neihna in chhung ang maiin kan boruak chu a rit churh mai a ni!

Cooker Thatchhia
Kan boruak up lutuk tih zia-awm hram hram tum chuan, “Khaw’nge, chaw ei puar phawt mai ila, kan tha tlang mai ang, kan riltamin kan chau tlang a nih hi. Chaw chhum phawt mai teng aw,” tih pahin a cooker chu ka’n phawrh a. Gas te chu kan han fit zung zung a, cooker chu gas thukah chuan ka’n hung a, mahse, ama thu ngawt chuan a ding duh ta tlat lo. Ka thlah rual rual chuan a tlu zel mai a, vawi li vawi nga vel ka tih hnu chuan a neitupa chuan vin fahran hian, “Mawla, a chhunga chaw leh tui a awm loh chuan amahin a ding thei lo tih hre ve mai ta che!” a rawn ti tuarh a. Ka harh hawk a. Nia, ka mawl em a, ka knowledge te hi a zim em avangin chaw leh tui dah kher loha ding thei lo cooker te hi a awm tih pawh ka lo la hre pek lo a, ka thiamloh liau liau a ni!

Riltam tawngkhawng leh driver mawl lutuk intawng sual vel hian thil zawng zawng hi a lo chawk buai thei hi a lo nia. Kan han ei puar tlan hnu chuan kan boruak pawh a kang ve ta. A hma lawka a umin min um chhuak duh mai awm mange tih tur khawp khan, kan haw tur pawh chu tha takin min rawn zui chhuak a, a rangva them rawn hum chhuah chu a kawngka lu chungah chuan a han kilh bet a, lungawi hmel tak hian a thlek vang vang a. A rangva them kilh beha ama hming inziak, ‘DINA TLAU’ tih chu mawi fahran lo mah se a chhiar theih hram hram a. Remchang hmasa bera la tlawh leh ngei tura kan intiam hnu chuan hlim takin kan inmangtha ta a

Share

-----------------------------------------------------------------------
Similar Posts

• Friday the 13th zan ti ti
• IN BED
• Tipper leh Bike insu; Bike khalhtu a thi
• Mizo takin
• Friday the 13th zan a ni a…

He thu hi Friday, January 22nd, 2010 dar 8:40 am a Articles, Jokes . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.