M.N.F Sawrkar an her liam a, Congress Sawrkar an rawn chhuak hlawl mai, inthlan lai vel khan “Ni a chhuak dawn e” an ti luai luai emaw ka lo ti a. Mahse, hei kha Ni kha a hmanhmawh vak lo a ni ang e, a sawitute an hlima an hmanhmawh teh reng nen a ti ang lo khawp mai, Zawlnei der a siam teuh ringawt a nih hi; ka chhungkhat hnaivai takteah hian Politician challang tak te, challang lem lote pawh an awm ve nuk mai, chuti ang chhungkua zinga mi chu ni ve bawk mahila kei erawh siai chu ni ila neutral siai ka ni ang,

amaherawhchu kan ram hmangaihtute che vel hi phak ang tawka ka thlir ve chang hian ram hmangaih ve mai hi a hlawk dawn ta riauvin ka hria a, chuvang chuan khawi party-ah emaw ber hian tel ve ka duh ta a ni, han tel maina tur ka hriat loh avangin chanchinbu kaltlang hian ka rawn in advertise a, in duhzawng ka lo nih hlauh chuan min rawn be pawp ve tawh mai dawn nia, mahse in party-a ka lo tel chuan in-candidate ve ngei ka duh dawn a, seat chu min pek ve ka beisei tlat dawn a ni, inthlan leh huna in Party candidate ka nih chuan heti ang hi politics ka khelh dan tur chu a ni :

1) Vote thlak hma chu Angel ten min awmpui reng emaw tih mai tur khawpin ka nui sang reng ang a, milian leh te ka thliar rih dawn lo inthlan hma chu! Tin, hmelhriat leh hriat lem loh te, tun hmaa ka lo kal pelh thin mai maite pawh kha nui sang chungin ka chibai deuh reng bawk anga, mahse min lo thlang tling anih vaih chuan tumah ka hre zui tawh hauh lovang, chibai chu sawi loh nuih pawh ka nuih tawh tur a ni lo.

2) Tanpui ngai mirethei leh chanhai inhriat chuan min rawn hrilh zel ula, midangte hriat ngei ngei turin ka lo tanpui zel ang mahse midangin an hriat dawn lem loh chuan min rawn hrilh buai duh suh u, chubakah, ka in-candidate tumna bialah chhiat tawk an awm ngat phei chuan min rawn hrilh vat ula ka tanpui ngei an ngai a nia.

3) Campaing-na thu leh hla lamah kha chuan min ngaihtuah hauh suh u, mipuite chu ka tiln theihna tur a nih dawn phawt chuan ka bum zaih zaih mai ang, engpawh “I ti angem?” min tih apiang a tha lam hawi a nih phawt chuan ka vei zawng tak a nih thu ka lo hrilh zel ang a. Tin, tuten emaw Contract leh hna lam chi reng reng min lo dil lawk a nih chuan min vote dawn phawt chuan lo lungngai rih lo phawt turin ka hrilh zel bawk ang. Amaherawhchu, ka tling a nih phawt chuan ka chhungkhat hnaivai leh ka duh sak zual deuhte bak ka pe chuang miah lovang.

Ka khingpuite chu an that lohna lai leh an tih sual lai chu ka chang ran ang a, mipui hmaah ka sawisel reng bawk ang. Chumai chu duh tawk lovin dawtte paw’n ka puh deuh zauh zauh bawk ang a.  Tin, anni paw’n min sawisel ve ngei dawn a, ka huatzawng an sawi vaih chuan ka tlin hunah a ni mai… Ka in-candidate takah chuan cable T.V-te leh chanchinbu lam te paw’n min rawn kawm ngei ang a, chutih hunah chuan ka tih loh tur tha deuh deuh ka sawi vak vak ang. Mahse Pathian nungin Mizoram a hmangaih ziate, kan sual ziate, Israel Parliament, hmasawnna a zuanin a zuang, Pathianin in-candidate turin min ti tih vel chu ka sawi ve lovang.

4) College S.U leh M.Z.P lama mitam zawk ten anmahni tana tangkai tur chauh an be tha a,  zak map lova chhawr tum rana thiana an siam zung zung ang hian ka tana tangkai turte chauh ka be tha hawrh hawrh ang a, tangkai lem lo tur te chu engatanmah ka ti lovang.

5) Politics hi ram siamthat nana hmang lovin ka u leh nau, thian tha, ka nupuite chhung, ka makpa, ka monu, ka tu leh fa te leh ka chhungkhat laina hnai deuh te siam that nan ka hmang ang a. Tin, ka Campaigner duhsak zualte pawh vawi hnih/khat vel chu an lungawi nan hna ka pe bawk ang, a va tlem awm ve in ti mai thei, a chhan chu anni paw’n min duhsak vang leh ram hmangaih vang em em pawh ni lovin hna an duh vang chauha min campaing pui mai mai an ni tih ka hriat ve kar avang in Contract ther hlo te te bak engmah ka pe lovang.

6) Min vote turin mi khawngaihna ka dil vak vak ang a, mahse ka lo tling anih hlauh chuan miten khawngaih min rawn dil ve tawh thung dawn a ni, khawngaih ka dilte pawh kha an rawn lang ve ngei ang a, amaherawhchu ka khawngaih let ve tawh hauh lovang, zingkarah Pi tar putar khawngaih thlak awm tak tak te mut rei ka duh avangin ka Bangla kawtah ka in nghah tir thup reng bawk ang a, tichuan ka hnena an thil rawn sawi te pawh kan ti ang ti chung zelin engmah ka tih sak chuang lovang, an lawm nan lekhate chu ka ziah sak ve ang a, mahse Phonein “Lo pe suh u”, ka ti zel ang.

7) Ka lo tling a nih chuan hna ruakte chu pawisa anih loh paw’n In hmunin ka lei tir thin ang a, Written test leh Personal Interview tih velte chu ka tan chinfel a harsa tawh love.

8 ) Langsar si loin ka eiruk theih theih ka ei ru ang a, lo langsar ta pawh nise tunlaiah midang eiru langsar deuh deuhte pawh engtin mah an tih theih chuan tak tak loh hi, chuvang chuan lo langsar palh pawh nise ka hlau teh chiam lo, chubakah engpawh lo tisual ni ila tuman min ngam dawn hek lo, min man pawh nise Central Jail ka thleng teuh lo mai, an man chhunte paw’n Central Jail em chu an la thlen loh hi. Tin, ka tlak hma chu ka in chhek nghah hman viau tur a ni ringawt, achhan chu ka lo rethei rei ve tawh bawk em a ni.

9) Ka hnuaiah emaw ka thawhpuiteah midik deuh ka kawng dal thei an awm anih chuan hmun dang a transfer a ni mai, har lo lutuk. Tin, ka chhungte, Party workers leh ka thian hnaivai deuh ten Officer huat zawng an nei anih paw’n ka sawn sak hmiah hmiah zel ang, Tawngkawlawng-ah a ni mai…

10) Ka inti lal hle tur a ni, Traffic zam karahte pawh ka tlan deuh fua fua ang a, thil pawimawhte chu a awm tak meuh mai, kei chu pawimawh vak lem loah pawh ka tlan fua fua zel mai dawn a ni. chubakah min vengtu Police te chu ka nupui tirhkual vel tur te an ni a, kei ai chuan kan nu kha a lal hmel tawh dawn zawk a, achhanchu Minister emaw a inti tawh mai dawn a ni.

11) Ka eiruk thup nan Kohhran-ho zingah ka tel ngei ngei a ngai dawn a, thawhlawm ka thawh deuh teuh teuh ang a, a dik a ni mai, tichuan chanvo min bel theuh tawh mai ang, chubakah Y.M.A te K.T.P leh pawl dang tanpui ngai an awm chuan ka tanpui deuh zeuh zeuh bawk ang.

12) Ka tlin zel theih nan ka bialte erawh chu ka vur hle tur a ni, thlan nawn leh loh chi hauh loh khawp a thain ka bialte chu ka thuam tha ang a. chu chauh chu ka thawh that awm chhun a ni mahna.

Party tinte u, hetiang mi hi induh zawng takni berin ka hriaa, chuvang chuan hetiang hi ni thei turin ka inbuatsaih mek a ni, tunlaiah mitha leh midikte an hnawk tawh bawk si a, an dik zawh pauh leh mi tam tak tan an hnawk zel mai si, chuvang chuan mitha leh dik nih ai chuan  dik loh law law ka thlang ta zawk a ni. achhanchu dik taka ka thawh chuan inhlawk thei dawn si loa, min duh loh mai ka hlau em a ni, in pawlah min la lut anih chuan in duh zawng tak mi ka ni thei ngei ang, mahse han luh mai na tur ka hriat loh avangin Political paty-te u, In pawlah ka lo tel ve.

Share

-----------------------------------------------------------------------
Similar Posts

• Engnge i ngaihdan ve
• CM Chawhlui Kilpuinaah Ka Tel Ve
• NANG I PIANGTHAR EM?
• Buhtawihtui
• Tlawmngaihna leh AIDS

He thu hi Sunday, January 31st, 2010 dar 7:43 am a Articles . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.