Chumi hunah chuan hrehawm tuar turin an mantir ang che u a, an tihlum ang che u; ka hming avangin hnam zawng zawng huat in ni ang. Matthaia 24:9
Parawl pakhat chuan a kawngka kharin Rome khawpui kawtthler thim lam chu a pan a. Hmun thim lai chuh ru zel chunga a kal chuan miin an zui nge zui lo tih hriat tumin hnung lam a hawi sek a. Khawpui daifem a thlen veleh rang zetin lungpui kara luhna thim mup lam chu a pan nghal a. A luh hnu chuan kawng nuam lo zet mai, hmanlai atanga khawpui sak nana lung laknaah chuan a inpal nawk nawk a. Rimawi lo chhuahna lam chu dim tein a pan zel a.
A tawpah chuan mei eng teng teng hi a va hmu a, rang zetin eng lam chu a pan nghal a. Lung ker pindan kual ruih maia mipa leh hmeichhia a var hlira inthuam, hlim tak maia lo zai chu a va hmu a.
Zan rei tak thleng Nero-a sipaite hmuh phak loh Rome khawpuia Kristianho bulah chuan a inkhawm ve a. A mal te tein chung mite chuan fiahna an tawh dan te, an tawngtai chhanna te, hnehna an chan dan testimony chu an insawi chhawk a. Rapthlak taka an chhungte leh an thiante man an nih dan leh sawisak hlum an nih dan chanchin an inhrilah chu an tap ta hlawm a.
Chu tihduhdahnaa a sulsutu chu Rome laber, Nero-a a ni. Kum 64 AD July thlaa Rome khawpui a kana tang khan tihduhdahna hi a hluar nasa hle. Mi tam tak sawi dan chuan amah Nero-a ngei chuan Troy khaw kang chanchin hlaa a phuahnaah tanpuitu a nih beiseiin Rome khua chu a hal a ni an ti. Chu kangmei chu ni ruk chhung zet, khawpui hmun thuma then hmun hnih a kanral thlengin a mit lo. A tihkan a ni emaw, ni lo emaw mipui chuan Nero-a chu an puh vek a. Mipuiin an hua tih hriain, Nero-a chuan kawtthlera mipui thlanchheho chu a sum bawm a ruah thak thleng pawisa a sem a ni.
A chunga mipui rilru lakpen tumin Nero-a chuan Kristian ho chu Rome khawpui haltu-ah a puh a. Kristian zawng zawng mana tihhlum tur thu a pe a. Thenkhat chu sakeibaknei an sehtir a, a then phei chuan chu aia nasa an tuar a ni. A chhiahhlawhte chu ramsa vuna Kristian ho chu thui hnana ram ui khawlh sehtir turin thu a pe a. A then chu alkatra an tat chuak vek a, thingah phuar betin lalber huanah chuan an phun a. An hal alh a, an taksa alh engah Nero-a chuan ruai a theh thin.
Catacomb chhunga ringtu awmte chuan, “Isua sawilawk ang ngei khan a lo thlen ta,” an ti fo ngei ang. An zai zawhah tawngtai rualin fiahna an tawh palh pawha rinawm tlat turin an infuih sauh sauh a. Thusawi leh tirhkohte lehkhawthawnho chu an ngaithla ho va. Lalpa Zanriah kil hovin a tuk leh atan chakna an la khawl thin.
AD 64 khan awm ve ta la, Catacomb chhunga inkhawm tur leh Lalpa Zanriah kil turin i nunna i thap ngam ve an gem?
Courtesy: Dorothy Watts
Women’s Ministry, First Mizo SDA
-----------------------------------------------------------------------
Similar Posts
- Colosseum Ennawm Chhuahna Hmun Chu
- Kum Zabi Pakhatnaa Martarte – II
- Catacomb martarte by Denis Lalfela, Rome
- Dak In Pui a ka thil tawn hi in lo tawng ve tawh ngai em??
- Keimahni Lam!!!
He thu hi Sunday, February 7th, 2010 dar 6:46 pm a ETC, Religion . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
