Vanglaini : Home Minister R.Lalzirliana chuan, ‘Ralmuanna tichhetu hel pawlte leh, sualna tipunluntu khawchhak unaute lakah sorkarin khauh takin dan a kengkawh dawn a, Mizoram hi ralmuang taka siam sorkarin a tum a ni.’ a ti a; Khawchhak unaute chunga khauh an tum chu midangin dem phah dawn mah se, pawisa thei an nih tawh loh thu leh, dan anga huaisen taka kal an tum thu a sawi.
Home minister hian Feb. 3 chhun khan ama office-ah Mizo Historical and Cultural Map, Dr.RL Thanmawia buatsaih a tlangzarh a, tlangzarh inkhawma tel val upa rualte hnenah sorkarin khauh zawka dan kenkawh a tum thu a sawi.
Zira chuan, ‘State pawna mi hel pawlten mipuite an tihthlabar chuan na taka chhanlet a ni ang. Eng hel pawl mah sorkarin khawi ngam a tum lo. A bikin HPCD te phei chu Manipur state sorkar nen inkahhai an puang a, khawi hmunah mah activity an nei tur a ni lo. Mizoram mipui tana hnawksak zawnga an awm a thiang lo. Chhiah an khawn chuan ngaihzam an ni lo ang. Hmun thenkhata an chhiahkhawn lo puibawmtute pawh thubuai rip tak siamsak an ni ang,’ Home Minister chuan a ti.
R.Lalzirliana chuan, ‘Khawchhak unaute zingah mi tha tam tak awm mahse, Mizoram sualna chi hrang hrang inthah, inrawk, insuam, pawngsual leh ruihhlo tawlh tam ber hi Burma atanga lo kal kan unaute tih a nih avangin, Mizoram ralmuannain a chhiatphah nasa ta hle a, Foreigner Act hi khauh zawka kenkawh a, chumi bawhchhiate chu lak khawm a, dan anga thawn let a tul dawn ta tih hi sorkar ngaihdan a ni,; a ti.
Khawchhak unaute chungah dan anga khauh taka an chet tur thu a sawi a, he an thil tih avang hian politics-ah dem kai phah dawn pawh ni se, tihmakmawh a ni dawn tih Home Minsiter chuan a sawi.
Kum 10 eptu MLA a nih chhunga hel zalen dan te, tualthahna ualau tak tak pawh Police ten an chhui chhuak thei lo a ngaimawh thinziate sawi chhuakin, sorkar thar a pian chinah Police ten tualthahna khirhkhan leh inrawkna ril tak taka mawh[hurtu pawh rang takin an man zel tawh tih Zira chuan a sawi bawk.
-----------------------------------------------------------------------
Similar Posts
- HM-in Burma sipai sorkar kuta hlan chungchang sawifiah
- HPC(D) te hi fapa awm tha duh lo angah kan ngai : Home Minister
- Vairengte mipui lawm lo
- ACHR-in Mizoram enfiah tum
- Sorkar hnathawk aikal la te zawnchhuah beihpui thlak
He thu hi Thursday, February 4th, 2010 dar 10:01 am a NEWS . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
