Lengzem : Kei ang val naran, pachhe kumhlum tan chuan zankhat mikhual han neih ve ringawt pawh hi a huhphurh awm a, a lungngaihthlak thin. Mi ina chaw eina tur hmu changa hlim thei viau e tilo chuan, chaw lo ei tur leh mihkhual chaw heh hmel deuh han neih ve meih hi chuan mo sual thawh fuhloh tuk ang mai hian kan tum bur a. Kan nihna ang lo taka hmel nelawm tak phut han tum ve hram hram pawh hian kan hlawhtling hleithei thin lo.

Sipai Khualte chu
Mahse, kha zan, sahmulphah thla, thla no ral lam ka lo thlir vauh vauh laia sipai khual ka han neih zet kha chu ka hlimin ka va han lawm tak em! Ka lawmna kha teh dawn ila a kawk sang ngawt ta ve ang. Khawchhak mifing pathumin kawng thui tak an zawh hnu a naupiang an va hmuhchhuah laia an hlimna ai khan khami zana ka hlimna kha a nep bikin ka ring miah lo. Ni dang a ka lungawilohna leh ka lungngaih thinna te han ngaihtuah chuan, khami zan kha ka lawm loh ber zan ni awm tak hi a ni a. Ei leh in lamah an hauhtak a, an hmaa awm reng reng kha chu an eiin an in zo zel ringawt mai kha a ni si. Chumai a nilo, thenawmte mitmei veng mi ka ni a, han bengchhen ve hluai te pawh ka inthlahrung a, ka tih ngai reng reng loh thil a ni. Mahse, khami zan kha chuan ka mikhualte bengchheng kha ka khap phal lo. Ka hlimpui em a ni!

India sorkar duhlai, thil danga chhawrna tur a hriat miah loh, ral kap atan chauh a chhawrna tur a hriat, a awm tilian thiamlo chung chung a sipai a an lak a, ral hma tawng a rei tak an lo chhawr tawh kha a lo lut hlawl mai kha a ni a. Khawng tak tak hian salute min han pe thuai thuai a, chu thil chu ka hriat ngai loh thil a ni hran lo. Hun dang hmun dang a salut dawng ngai miah lo hian sipai chhutri thenkhat an awm chuan salut khawng tak tak hi ka dawng ve ziah!! Chutah hlim takin chibai kan inbuk a. A mawia inlawm mai mai kan ni lo. Nung dam a kan han inhmuh ve leh hlawl thin vanga kan lawmna hi a sang em a, kan sawi thiam lo zawk a ni. Chutah, beisei lo takin kan thianpa pakhat, IR police training chhuak hlim kha a sipai thuam tial ruan mai nen khan a lo tei lut ve leh hlawl mai a. Hun rei tak inhmu tawh lo, beisei lawk lutuk lem lo a inhmukhawm leh thut kha kan ni a, nunphung pangngai a nung thei zia zang kan ni lo.

Hrehawm
Ei leh in te chu an thiam ve zawng tak kha a ni miau a, engmah kha min ren pui lo. An in zo a, an ei zo leh vek a, chutah an aw-ki a ring cho hret hret a, an khawhawi a zim tulh tulh a, an sawi zau tulh tulh thung. IR pa zawk kha a han insiam tha surh surh a, “Thianpa, training laia chhungten min rawn kan tum a min lo sazai hlauh mai han hrilhhaithlak duh zia mai chu….! tlangvala pumpa kha thirtlawnah min han uaitir a, sazai hmuhpui dangten min han zawn kual chiam mai a, ban a kham duh si, chhungte nen khan hun reitak inhmu tawh lo, inngai ve em em kan ni a, khatianga min lo zawn kual lai kher kher a an lo thleng kha chu pute lam ai mahin chhungte kha an huatawm rum rum tthei asin!” an ti a. Regiment pa, ei nghek bak thiam dang neiloh hmel zei mai kha nep ti awm tak mai hian alo vei nuih sun sun a.

A han sawi chhunzawm leh a, “Chhungten nghakhlel taka tualzawl sira min lo nghahthap laia tualzawla thingfak nena han indo lem chiam mai te pawh kha ho inti viau maithei. Mahse, a hunlai chuan hrehawm ve tak a ni. Tunlaiah naupang takngial pawh an indo lem tha duh tawh lo a, thingfak nena patling han indo chiam mai kha chuh……! Chhungten min lo thlir thap a, inchibai a chanchin chhia tha inhrilh tawn te pawh kan chak ve em em tawh lai khan tualzawlah kan han thi der ngut mai a…. Nuih awih a ni der silo!”

Ral hmatawngah…!
Chutiang ti ti maksak tak tak kar atang chuan zawi muangin indona mualah kan zuanglut ta. Khap tur ka ni lo. Hmuhnawm ka ti miau a, inkhap tur chuang kan awm lo. Pakhat a thutak em em lai khan Regiment pa a lo nui leh kuk kuk a. “Nep lutuk… indo tur alawm,” lo tih hluk pahin a hmaa a sipai pui thu chu a kutin an tin a, an kap puak ta pep pep mai a, chu chuan kan boruak chu a thlak danglam vek a. Ka inchhung zimte chu indona mual leh sipai nunchan zirna hmun a ni ta. IR sipai leh Assam Regiment LMG pu indo en zet zawng, namai lo tak a ni.

Pakhat khan kawngka chhunglama ka hmunphiah tun kha chuh thut a, pakhatin pawna ka hmunphiah tun a va la bawk. An silai magazine kha an han thlawn a. Silai mu an han load ri rawp rawp a, an han inkap ta cher cher maia, an lum tawp tawp a, thingthi in an han intlir leh cher cher mai a. An thi har dun si! Hmuhnawm tak a ni.

Pakhat zawk kha ka pindanah a tlan lut fua a, a tlanlut lo zawk khan dawhkan hnuai atangin kashmir vela hel ho an lo chan thin dan posi dik tak mai khan an lo chang ran mai a, ka bedroom kawngkhar a rawn ri tiah tiah a, hel ho an  rawn hnai tawh tihna! Regiment pa pawh a insiamrem sur sur a, a in ring tawh lutuk tlat! Chutah dim baksak lovin ka pindan kawngkhar kha a rawn intheh hawng lawp a, IR sipai a rawn lum chhuak tawp tawp a (a rawn lum chhuah paha a au dan hi lehkhaa ziah chhuah thiam chi a ni lo), hnim karah a lumlut (ka thuthleng sei pakhat hnuai kha hnim kar a ni!). A rawn lan atanga hnim kara a lumluh chhung kha second tlemte chauh a ni na a, regiment pa silai chu puak hnem hman tak a ni!

Dawhkan a an bottle hun in a chim chin kha ka han en a, chutia indona chhuak ta chiam mai chu mak ka ti hran lo! kei kha eng ber nge ka nih ka hre tawh lo a. Indo thawm erawh ka ngaithla ngang mai. An silai load ri thuai thuai thawm te kha hmun leh hmun deuhthawh ah ka lo ngaithla reng a, ka lam hawi khan an silai te kha an rawn lek fua fua mai si a, mi dawihzep deuh chu ni ila a mangangthlak viau maithei. Mahse, hmunphiah hmang a inkhap hlum ka la hre miau lo a, ka hlau bik miah lo. Hmun leh hmun deuh thaw ah te khan an han intlir zeih zeih mai a. An lum tawp tawp a, an thi thei silo. Grenade an han phawrh a, a pin an seh thlawn a, hlam hnih dan lek lek ah khan an han invawm a, a puak dur zel mai a. An thi thei chuang lo!!

Salaamii… Chhah!
Tan zawk tur pawh hrelo in sipai pahnih indo chu ka lo en a. Indona in a vawrtawp a thleng chho dawn chauh emaw ka tih lai khan an rawn tho chhuak a, ka hma ah khan khawng fahran hian an rawn ding dun a, an sipai chibai inbuk dan dik tak mai khan chibai min han buk leh thuai thuai mai a. Indona hmun atanga an parade na tualzawl a kan chuan chhuah leh thut dan pawh ka hre chiang bik lo. Kei kha Republic Day a India President ni awm tak khan ka lo thu a, ka hma ah khan sipai pahnih kha khawng em em hian an inzui kual a, salut min pe thuai thuai reng bawk a, chan sang angreng tak chu ka ni. Mahse, vai tawng vek a an au avangin ka hrethiam ve lo a. “Salamiii… Chhah…!” tih pahin an han per ri thuai a, an silai kha an han load ri leh rawp rawp a, an indo leh dawn emaw ka lo tih lai khan, che miah lo ten ka hmaah khan an han ding leh vang vang mai a!!

Chutih lai chuan kei kha Mizoram Chief Minister ka ni leh thut a. IR sipai sang chuang zing a Best Physical Fitness dawng thei khawp a sipai chhuanawm hnenah chuan Award ka hlan dawn a ni. Hnialna hman a awm lo. Ka award hlan tur kha an rawn la a, ka chhuar vel a mi thil engemaw kha an rawn chhawi chhuak a, chutah IR pa chu ka pindan ah a tlan lut a, ka sirah chuan ka bodyguard (Assam regiment pa) chu khawng takin silai nen a lo ding bawk a.

Engtia tih tur nge ka hre ve lo a, ka lo nghak tawp mai a ni. Chutah ka pindan lam atang chuan rimawi a rawn ri a, chu rimawi rem chuan khawng tak mai hian IR pa chu a rawn pen chhuak ta euh euh mai! Rimawi kha ama hmui atanga lo richhuak a ni a, ka zawn a thlen a, a rawn inher dawn lai tak khan command pek a ngai a, command chu rimawi tum tupa, award dawng tu tur ni bawk chuan a pek tho a ngaih bawk avangin reilote chu rimawi kha a han khaihlak hlek a. Chutah ka lam pan chuan alo kal ta zel a, rimawi a tawp a, ri thuai thuai khawp a khawng in chibai min han buk leh a, che miah lo in ka hmaah chuan a ding ta vang mai a. Kei Chief Minister hawihhai lo lutuk chuan a award dawn tur chu hlan mai nachang ka hre lo a, min han mitmei a, ka harh zawk a, award chu ka hlan ta. Chutah mipui chuan kut kan beng ta dur dur a! Hetah hi chuan kan part chan a in ang vek tawk. Chief Minsiter leh a bodyguard leh a lawmman dawngtu kha mipui vek kan ni. Chutah khawng takin an inher a, a per ri thuai thuai a, pindan lamah chuan rimawi rem bawk chuan a lut leh a.

Mute tlang hrutin
Award te kan han inhlan fel chuan parade bawk ka thlir leh ta. India sorkai duhlai, hel beihna-ah pawh vawi tam tak ral hmatawnga lo tal hiar ve tawh leh, Mizo tlangval dik tak, IR sipai sang chuang zing a best physical fitness award dawng thei ngat khawp a sipai tha kha an ni bawk a, inchhung dung a an han lam ve ringawt pawh hmuhnawm tham tak a ni.

Khatia sipai lam a hmuhnawm tham a an han lam lai khan, tu emaw zawk khan “Aw Sialkhawpui ka pianna hmun ka seilenna tlang liai luai….” tih kha an rawn la thut a, uar fahran a sak chhunzawm pahin mute tlang hrutin an han hrut leh delh delh a. An sa tui dawn chauh emaw ka tih lai tak khan silai a puak leh a, indona mual ah min zuan luhpui leh daih thul. Pakhatin bed room lam atangin bawkvak in a rawn veh phei a, pakhat in choka lam atangin bawkvak bawkin a rawn veh phei bawk a, an han in tlir leh cher cher mai thin a. Tan zawk lo neih ngaihna ka hre lo a, tunge che tha zawk pawh ak hrethiam hek lo. Mahni inchhung dung a patling pahnih in veh them them mai leh, an han inkap lum tawp tawp mai chu hmuhnawm dangdai tak a ni.

Mi tak tak
Min hawsan hnu a ka khawhar takzia te kha ka sawi vak chak. Mahse chu chu ka sawi tum a ni lo. Ka ngaihtuah zui a, kan thiam pathum chauh a kan awm lai a kan khawsazia leh kan lawmna mawlmang lutuk kha mi tam tak chuan rawn hmu se mi pangngai ah min chhal kher lo ang. Mi mawl awmkhawm pawh min ti se keipawn vui vai a lak ka tum kher lo ang. Mahse, hei hi ka ngaihtuah chhunzawm daih thung. Ka thiante kha an mawl lo. kei mi tihhlim tum in uan an chhuah a, chhuat ah an lum a, hmunphiah in an indo a, chil per chuai chuai khawpin an inkap a, an fiamthu a nih rual a ka zuk hmuh chu an hna ah khan an chiang a, an tui a ni. A hna kha hlawh hmuh nan ngawt an thawk ve mai lo. An at-chilh a ni. Chumi kawng ah chuan ka chhuang a, an ni ai a fing, an ni ai a lehkhathiam, an ni ai a hausa, kawng engkim a an ni ai a chungnung zawk ang a lang mi tam tak ka ngaihtuah a, ka thiante pahnih kha ka chhuang a ni. Mahni hna a rintlak loh leh run dal a thil ti ve mai mai thin leh, mahni mawhphurhna la zo lo leh rintlak hlawl lo, mihring rintlak miah lo te ai chuan, an hna a an tlin zia lan tir nghal mai ka thiante kha ropui ka ti a, duhsakna ka hlan rual in, ka sipai khual pahnih kha ka chhuang em em reng ang tih hi ka sawi tello thei lo a ni.

Share

-----------------------------------------------------------------------
Similar Posts

• Jerusalem Tihchhiatna
• Zaipawl Intihsiak Leh Zoawi Award
• Sakhua vang a D ka chan
• Sipai Pawl Ni
• Zoawi Lelte Vuiliam A Ni

He thu hi Friday, February 5th, 2010 dar 12:23 am a Articles, Jokes . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.