Union Christian College chu Meghalaya rama awm a ni a. Barapani tuipui-in a hual vel a ni. Hei vang hian, UCC tih aiin, barapani tia sawi a hlawh mah mah zawk thin. Campus zau tak a nei a, nuam kha kan ti em em thin. North East hnam hrang hrang te fuan khawmna hmun a ni a, campus chhungah vek kan awm a. Ngaihzawng te hial kan nei ve thin.

Muani chu imphal a tanga lo kal a ni a. Chemistry Honours kan la dun a.Ashish-a hnuaiah kum thum chhung zet chemical reaction kan zir chhungah khan, kan pahnih inkarah reaction a lo awm ve a. Kan college kal thinna kha ka damchhungin ka hre reng tawh dawn a ni.

Ani nen khan engtikah mah kan inhmu leh tawhin ka ring lo. A chanchin ka hriat hnuhnung berah chuan Manipur University-ah Chemistry a zirtir a. Chu thu ka hriat lai chuan, Manipur-ah ka zin nghe nghe. Bank lama hnathawk ka ni a. Ka hna chu Bank hna-ah rau rau pawh hna zahawm ber pawl a ni. Muani chuan, pasal a la nei lo a. Kei pawhin, nupui ka la nei bik lo. Muani’n pasal a neih hma chu nupui neih tum lo ka ni chuang lo a, nupui neih hi ka la hmanhmawh lo ve hrim hrim a ni.

Ka rilru-ah chuan ka va tlawh dawn emaw ni chu aw ka ti a. An thenawm pa, UCC-a zir thin tho Chhandama nen kan inhmu a. Ani pawhin min ngai em em thin tihte pawh a sawi nghe nghe a. A phone number pawh ka dil vek a. Tlawhlo chuan, ka Cell Phone-a a no. ka chhinchhiah sa pawh chu ka paih leh ta zawk a. Chhandama chuan kan inhmu tih te, a no ka dil tih te chu a sawi ngei anga. Manipur atanga ka haw hmain tlawh ka tum tih te pawh a sawi ngei dawn a. Ka tlawh leh tak silohah chuan, mak a ti viauin ka ring.

Muani chu nula te lam lek lek, hmai sawl lam, ngo vang mai leh, aw ngaihno bei zet mai a ni. Tu pawhin kum thum zui se chu, an ngai zawng lo thei lo ang. Mipa ngaihsak thiam, nunnem leh ze zawi tak, a tul huna khauh feng mai hi a ni reuh a. Chungte chu, amah ka duhna chhan pakhat a ni. Ze zawi viau e ti lo chuan, a zia chu atlang hrak lawi a. Poetry a tui hle a, saptawng te ina ziak fo thin a. Sap novel a chhiar fo a, amah avang chuan sap novel chhiar ve ka chin phah nghe nghe.

A nui mawi em em a. Ani aia nula nui mawi kha ka la hmuh leh awm reng reng ka hre lo. A mitmeng a mawiin a fiah kak bawk a. Khangte kha ka mitthlaah hian chaing em emin a lang. Sap Thawnthu te pawh tun thleng hian ka la chhiar a. Eng thawnthu pawh chhiar ila, Ka kiangah chuan Muani chu a tel ve zel ni hian ka hre thin.

Kan inthen atang khan mi tam tak an garduate leh tawh a. Keini aia kum ruk zeta hnungte pawh an graduate leh tawh a. A rei leh tawh hle a ni. Chuti chung chuan, Muani hlimthla chuan mi zui zel a. Ka thut, ka din leh ka mut pawh chuan mi kiansan ngai lo ni hian ka hria.

UCC-in kum sawmngana a lawm kha, kan College kal tawp kum a ni a. Golden Jubillee Souvenir pawh a chhuak nghe nghe a. Miss Rebecca-i editor a ni nghe nghe. Chu Souvenir chu tlaiah ka keu mai maia. ka lung a ti leng thar ta riau a, he thu hi ka ziak ta a ni.

Muani’n min haw san dawn tum kha ka la hre reng mai. Kei kha enge maw thil avangin ka la haw hman lo a. Lalte-a te nen thla hnih deuh thaw kan la cham leh a. Session thar zirlaite pawh kan lo hre leh nual hman a ni.

A haw dawn ni khan, kum danga kan lo tlawh fo thin college playground-ah kan va kal leh a. A walkman-ah, ‘Red River valley’ Roger Whitaker-a sak kha kan ngaithla dun a. Sawi tur kan van dun hle. April thla tir a ni a. Khua a la lum lutuk lo. T-Shirt var a ha a, jeans kekawr pawl nen. A incheina chu a inhmeh ngang mai. Thal a ni a, tui a kang vek a. Tui tlin thinna hmunah te chuan kan kal dun a. Kan hun liam tawh hnu te chu sawi dun talh kan tum a. A kal bo dawn maiu a, thil dang sawi a har tlat tawh. Kan han sawi a, kan ngawi leh thin a.

College palyground chhim lam goal ban hnungah chuan kan thu dun a. Ka hriat reng tur leh tur loh te, ka hmangaih reng tur leh tur loh te min zawt a. ‘Ka hre reng anga, ka hmangaih reng dawn a ni’ tiin ka hrilh a. A mit a en chung a, chung thu chu sawi turin min ti a. A mitah chuan kan en a, a mitmeng chu a fiah kak mai a. Chutia, han en tak kalh ah chuana sen ap ap a, ka sawi ngai chu ka sawi nawn leh a. A nui a. Ka fawp a.

Chhun lai a ni a, khua a thiang kak a. Muani chuan zawi sap hian, ‘He chhun ni eng hi tlai lamah khawthlang lamah a liam ang a. Ni a lo tlawk dawnin kawl a rawn eng anga, ni tla tur chuan rangkachak rawngin kawlkil chu a rawn kap ang a. Tin, zan a lo thleng ang. Keini pawh kan inthen ang a, ka kalsan che a tul tawh ang. Kan nunna ngei pawh hi, ni inher thin ang hian a her liam dawn a ni.He damchhung rei lotea nang nen a kan intawng hi ka lawm em em thin a sin” a ti a. Chu thu chu, ka beng hriata ri tawhah chuan thu mawi ber a la ni. Tun hnu a Muani nen kan inzui lai ka ngaihtuah kir hian, Muani khan NUN hi a lo va hre chiang em, Philosophy a lo va nei tha em! ka ti thin.

Loh theih loh vanga inthen tur kan ni a. Mah se, ka thinlung chhungril takah chuan na a awm a. A ni pawh chu a ni ve tho a. Mite chu, an inhmangaih a, inthente an hreh a, an innei thin tihte chu kan hre ve tho a. Kan thawnthu chhiar thinah te pawh chuan chung te chu a awn ve ngei bawk a. Chutiang chu ni mah se, inneih kha kan sawi ri lo hrim hrim a. Kan hma lam hunah kawng thui tak zawh tur a la awm a, kan hre lawk lo a. Engemaw hun laia kan pahnih rilru vang mai a, hmalam hun ngaihtuah lo a lo inneih kha kan ti lo ve ve a ni. kan lehkha zirpui thin then khatte chu an inru haw zui fo. Hmangaihna chhuan lama damchhung kawngpui thuam pawimawh lai taka din laia lo inneih mai kha ka ngaithiam tlat lo a. Ka sawi rik miah lo avangin a ni pawhin a sawi ri maih lo nghe nghe. Hmangaihna hi mi chak lote chhuan lam a ni tiin ka sawi fo thin nghe nghe.

An hawna tur Bus chuan College campus-ah a rawn lam dawn a, tlai dar 5-ah. Chu chuan, keini pahnih chu min pawt then hlen tawh dawn a ni.

Playground-ah chuan dar li thleng kan thu dun a. Kan tawng tlem dun hle. Roger Whitaker-a zai chu kan ngai thla tlut tlut a. Mite inthen tur chu an mittui te a tla thin tihte pawh kan hre dun a. Keini erawh chu, kan mittui a tla lo a. kan chhung ril erawh chu a rum thung a.

Dar 5…… Tlai dar nga hi khawvelah hian vawi tam tak a lo ri tawh thin. Khami tuma tlai dar nga kha, ka tan chuan khawvela dar nga pawimawh ber a ni. Ni tla tur chu rangka chak rawng angina eng deuh phut a. Thli na vak loin a thaw a. Bus chhunga luh dawn chuan, ‘Mangtha’ a ti a, ka inchi bai a, ka kut a thlah veleh ka lu ka bu a. Bus seat hnuhnung ber dawttu tukverh sirah chuan a thu a. A walkman chu mi hnutchhiah a. Chuang tur chin an chuan khah chuan, bus chu a rum vung vung a, a tlan ta muai muai a. Ka lu khum ka phawk a, mi rawn en vawng a. Ka mithmuh atanga a tlan liam dawn thleng chuan a rawn hawi tawk a tawk a, ka lukhum chu sang takah ka lek a, ka theih pa tawpin ka vai a. Muani te chuanna Bus chu a liam a, ka hlimna thlentu pakhat chu a bo ta a. Ka thinlung chu a ruak vek a…Bus tlan ri te kha tun thleng hian ka la hre theiin ka inhria.

Ka nuna mi pawimawh tak pakhat chu a kal liam ta a. A walkman min pek a Roger whitaker-a zai chu Refactory lam pan pah chuan ka ngai thla leh a. Chang thumna chu hetiang hia nih kha.
‘Do you think of the valley you’re leaving
How lonely and dreary it will be
Do you think of the kind hearts you’re leaving
And the pain you’re causing to me’. Ka khup te chu a zawi zo vekin ka hria a. ka chaw ei pawh a tui hauh lo a. Ngawi rengin ka ei a. Tlaia chapela kan inkhawmnaah pawh, zai kan hruai a. Tingtang ka perh a. Kan hla sak kha pakhat mah ka hre lo. Ka perh sual em lo chuan ka hria.

Khami zan khan thla lah kha a’n eng em em khawp a. Ka room tukverh chu ka hawng a. Chu thla eng zet mai chu ka thlir reng a. CHu college a ka khawsak ve chhung kum thum-a ka nun te chu a chiang em em hian ka mitthla-ah a lo lang a. Thlifimin mi rawn chhem heuh heuh a. Thing sang pui pui karah chuan Staff Quarter te chu a lang phauh phauh a. Ka room atang chuan meitei nula hmeltha tak, kan hnuai chaih a mi thin, Shadani-i te in chu a lang ruai ruai a. a pa chu, Office assistant a ni. Shadani-i nui chu a mawi hle.

Muani te chu engchen nge an kal tawh ang tih ka ngaihtuah a. Muani veng tur chuan, Pathain hnenah ka tawngtai ta hial nghe nghe a. A walkman mi hnut chhiahah chuan Engelbert Humperdinck-a zaichu ka ngai thla a. There Goes My everything tih chu ka ngaithla a. Khami zan ang reng reng khan he hla hi mawi ka ti leh ta ngai lo. He a walkman min hnutchhiah hi tun thleng hian ka la kawl a. Hemi khawl hmang kher hi hla ka ngaithla ngai tawh lo a. Ka room-ah a langsar lai berah ka dah a, ka mut dawn apiangin, ka tawngtai hmain ka thlir leh ziah thin.

Zan lam rannung thawm ri cherh cherh tih loh chu thawm dang pakhat mah hriattura awm lo a. Kan hostel a awm ve mi dangte chu hostel danga an len vek avangin keimah chiahin ka awm a. Kan Hostel hi Annex Hostel a ni a. A awmna a fal deuh avangin a reh thin hrim hrim a.Kan warden Rudolf-a chu shillong lamah a awm daih leh nghal a. Kan Hostel tual sira cement hmanga siam thutthlengte chu thla eng hnuaiah chuan a lang chiam em em a. Chutah chuan, Muani nen vawi engemaw zat ka thu din thin a ni.

O Take me back to Barapani

Khami ni atang khan kum tam tak a liam leh tawh a. Kan college kal ve laia kan zirtirtu thin Ajoy-a te, Driver Bah Nirei-a te pawh an thi tawh a. Librarian Lily Hicks, min duh sak em em thintu pawh kha a thi tawh nghe nghe.

Ka lunglen chang hian ka ngaihtuahna hi UCC-ah khan a thlawk kir fo thin a. Thla engin Barapani tui a rawn ka en sur te kha ka hre reng thin a. Far thingsang pui pui mai ding sung mai te kha thlasik khawthiangah khan an sang zual sauh te khan ka hre thin a nih kha.

Rokunga’n Lei Mawina tih hla a phuah kha, Mizoram ai mah chuan, Barapani leh a chheh vel nen chuan a inhmeh zawk daih hian ka hre thin. Chung chu, kan Barapani chu a ni. Kristian Hla bu-a hla pakhat Aw, galili ram Vannei mi tih ka siam dang lam kha ka la hre reng. Chutih lai chuan, B.sc kan zir a, Mawi taka Muani nui ri kan hre thin. ‘AW, Barapani, ram vannei mi, I chhungah muani a leng si’ tiin ka thlak a. Uluk theih tawpin LK-a’n Puanah a ziak a, rawng hringin-puan varah. Muani hnenah ka pe a. Khami tuma a nui hmel han mawi zia kha aw……….

Zanin August ni 30, 2008 a ni a. Chhun lamah ka thainte ho an rawn leng nak nak a. Tlai thim hlim atangin kan thlalak hlui te ka en a. Thlalakah chuan kan hmel chu alang chiang em em a. Kan hriatrengna pui tu tha tak a ni. Chung thlalakah te chuan kan hlimlainia kan thlate chu chiang takin a lang a, kan hlimlaini a kan hmel put thinte pawh chu a hmuh theih a. Kan hlimlaini liamta te erawh chu a kohkir theih tawh si loh.

Ka ngaihtuahnaah chuan, Lalsangzuali Sailo hla sak thin, ‘Ngaiteh, Kumhlui’ tih chu a lo lang a. Ka hriattawk lekin ka computer-ah ka zai tir a. Hetih pah hian, tuna i chhiar mek hi ka ziak bawk a. Chu hla chang khat chu mawi ka ti zual riau nghe nghe.
Tuipui lianin Phairuang a hnawl,
Kawr vai a thlen ang mai hianin,
Ngaiteh, hunin nunhlui a hnawl
Chatuan hmun thleng turin. tih chang kha. Muani chu a ngaihawm thar leh zual sauh a. Amah hriatrengna tur thil chu, a walkman mi hnutchhiahte leh, kan thlalak dun te bakha, ka ngaihtuahna chauh chu a ni ta a. Thil dang tam tak chu ka ti boin, ka ti chhe tawh a. Ka thinlung ata hi chu a bo ngai lo ang. Chu chu, JIm Reeves-a khan a lo sa ve thin nghe nghe a. ‘I forget many things in my life time,
But darling, i won’t forget you’ tihte a nih kha.

Golden Jubillee Souvenir chu ka keu leh a. Phek 70-na a hla chang khat lek chuan ka rilru a hneh thar hle a. Souvenir phek dang dangah pawh he hla hi ziaktu hrang hrangin an tarlang nghe nghe a. Pu Hicks-a khan tum khat chu Chapel-ah achham chhuak nghe nghe.

O take me back again to barapani,
O take me back again,my heart is there
O take me back again to barapani
O take me back again, where all is fair
For in the UCC my heart shall ever be
O take me back again to barapani
He hla hi UCC chanchin mai ni lo a, India hmarchhak zirna chanchinah pawh mi ropui ber tih hial tur, a hre tawh reng rengin an theih nghilh ngai loh, UCC Principal hlui Dr. HJ Taylor-a phuah a ni a. Mi thiam ropui tak a ni a. Nuclear Physics lama mi hmasa a ni.

UCC leh a awmna hmunah chuan Dr. Taylor-a thinlung a awma . Chu hmunah chuan, ka thinlung leh ngaihtuahna tam zawk hi a cham bang ve bawk a ni. Muani nen kan intawnna hmun a ni a. Muani nen kan inthenna hmun pawh a ni bawk.

Zing dar hnih a ni tawh a. Ka chhungte an mu vek tawh a, thawm dang pakhat mah a awm tawh lo. Ka Computer- a Engelbert-a zai ri tih chauh lo chu. Bathlarah ka dak a. Zemabawk lam chu a lo pe tiarh a. THuampui kawng phei a motor tlan chu, a hmalam a eng phe zeuh zeuh a. Zan lam rannung, a hming ka hriat si loh, UCC atanga Muani a haw zan a hram ang chu an hram cherh cherh a. Thlang lam atang thli rawn thaw chuan ka biang a rawn chhem heuh heuh a. a vawt ru surh nghe nghe.

Rei fe ka din hnu chuan ka room-ah ka lut a. Muani Walkman mi hnutchhiah chu ka la thla a, Battery ka vuah a. Roger Whitaker-a zai awmna cassette chu ka thun a. Ka khumah mu chung chuan kum riat zet kal ta a, UCC playground sira far thing kara Muani nen thinlung ip pik taka kan lo ngaihthlak daih tawh, ‘Red River Valley’ chu ka ngaithla leh a. Roger Whitaker-a chu a zai hluah hluah a. Muani nen kan inthenni tlaia Refactory panna Step a ka awmdan ang chuan ka awm leh ta a. Whitaker-a hla thunawn chu hei hi a ni:

‘Please Come back to the Red River Valley,
Please Come back to the heart that is true,
I’ll be waiting my dear in the valley,
I’ll be waiting my darling for you’

Share

-----------------------------------------------------------------------
Similar Posts

• I Yr BA Examination 2009 result
• Mizo te hi thlalak lamah kan duai bik lo!! – Marka Pa
• Ka Pawnfen Senduk Mawlh Kha!
• Duham lovang u – duham chu channa
• Mama pa ve kha! (cont.)

He thu hi Wednesday, February 10th, 2010 dar 2:46 pm a Articles, Literature, Story . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.