PATHIANIN mitin mai hi mite tana malsawmna ni turin min kova. I pathian kohna hlu tak hi ngun takin i ngaihtuah ngai em? Abrahama hnena ‘Nang malsawmna ni ang che’ ti a Pathian kohna kha nang leh kei hmanga chhumzawm zel a ni a. I duhthlanna azirin malsawmna i ni ve dawn tihna a nih chu! Mizoramah ringtute nunah Pathian thua tuihalna thar leh boruak thar kan tawng chho mek niin a lang a. Heng malsawmna te hi kan hlut thiam a pawimawh hle ang. Mite tana malsawmna kan nih theih nana rahbi thenkhatte i thlir ho phawt mai teh ang.
1. Tawngtaina
A hmelmapa Setana bei turin Lal Isua chu thlalerah ni 40 leh zan 40 a inbuatsaih a. Sawmli chuan famkimna a entir avangin Isua chu a tang hle tih a chiang a. Setana chu tihtlawm ni mahse, hun remchang hmasa bera Isua thlem leh turin a kal bo ta a ni. Tawngtaina chuan kan thinlung a chhemalh a, hneh theihloh min hnehsakin beiseina thar min pe thin. Kan nunah Pathian a lal ber theih nan chher hriam kan ni a. Nun tam nei tura min buatsaihtu a ni bawk. Tawngtai mi chuan engkimah Pathian remruatna a hrethiam a, mite tana malsawmna a ni thei ta thin a ni.
2. Kraws pu a zui tur
Lal Isuan amah kan zui theihna kawng min kawhhmuh chu mahni kraws theuh put hi a ni. Kraws chuan Pathian hmel min hmuhtir a. ‘Thinlunga thianghlimte chu an eng a thawl e’ (Mathaia 5:8) tih ziak ang khan thlaraua rawngbawl duhtu tak tak chuan kraws hmanga nitin a intihthianghlim a tul ang. Kraws chuan inngaihtlawmna min zirtirin mite harsatna hrethiam turin min tithianghlim a. A hma ang kan ni thei tawh lo. kan kraws te hi zo taka pu tur kan ni lova, rinawm leh chhel taka pu tura koh kan ni zawk. Beidawnna leh harsatnaah Pathian a chet thin avangin kraws hi kan ngainep thei lo.
3. Rilru phir nei suh
Mite tana malsawmna ni tur chuan rawngbawlnaah rilru phir neih a rem lovang. Kaisara thilte chu kaisara hnena pe a, Pathian thilte chu pathian hnena pe tura thu petu Isua hi a thusawiah a chiang a. Rilru phir leh phawkleka rawngbawl hi a huatzawng a ni. Kan thinlunga kan duhnate a inmil hun leh Lalpa ropui nana thil kan dil hunah chauh kan duhna leh dilnate hi tihhlawhtlin a ni ang. Duhthlanna mumal tak hi siam a har hle a; uluk taka duhthlang te pawh an inchhir leh a, a then an bang a, a then an rinawm lova. Chutiang khawvela kan awm avangin thinlung zawng zawnga Lalpa kan thlan a hun takzet a. thinlung taka lalpa au lo leh khawvel thlah thei lo mi chu mite tan malsawmna a ni tak tak ngai lovang.
4. Malsawm la, anchhia lawh suh
kan tawngkam chhuak hi malsawmna authlatu a nih laiin anchhia a ni thei bawk. Tawngkam malsawm leh ngainatawm hman hi a kristian a, chhawm nun ngei ngei tur a ni. Nu leh pa ten fate mal an sawm tur a ni. Hnathawhna hmun tinah malsawmna kan ni thei. Kawng kal paha mite malsawm hi a hlu em em a; kan mi hriat lem loh pawh hi malsawm ringawt mai ila. Mi rel nan hun kan nei tlem anga, Lalpa thlamuanna leh malsawmna chuan min umzui veng veng mai dawn a ni. Hmelma leh ngaihdam theih loh kan nei anih pawhin Pathian hminga mal kan sawm a, Pathian auh tam lehzual nana kan hman a tul hle. Ngaihdamna duhtu kan nih hmasak hi kan tihmakmawh a ni a. Lalpan aw-ka te min pe a, heng hi mite malsawmna atana kan hman a tul hle bawk ang.
5. Krista khawngaihnaa awm a him ber
Mite tana malsawmna ni tur chuan krista khawngaihnaah kan cheng anga, mahni hmasialna nun kalsanin mite tan kan nung ang. Sual lian a chengte leh chung sual sim duh lote chu an luhlulna sual avangin an boral thin. Khawngaihna chu rawn sur mahse la, a loluhna dawhthleng kan thinlung hi kan hawn si loh chuan hmasawn ahnekin kan hnungtawlh fo thin a nih hi. Lalpa min dahna hmun theuha lawmthu sawi theih hi khawngaihnna nuna cheng te awmdan a ni. Pathian hi nang leh kei min kohnaah a uang lova, keini pawhin kan chhan dan hi fimkhur a tul hle a. Mite tana malsawmn ni turin haw u inngeih dial dial in tan i la theuh ang u.
(He article ziaktu hi Salesian Pontifical University, Rome (Italy) atanga M.Th a zawh hnuin, October 2009 atang khan Sacred Heart Theological College, Shillong ah Professor leh One year Diploma in theology ah Director in a awm mek a ni. Contact no: 9862753130)
-----------------------------------------------------------------------
Similar Posts
- Krista Kraws Thiltihtheihna! – Denis Lalfela
- KRISTA KRAWS THILTIHTHEIHNA ! By Denis Lalfela
- 2010 atan inhlan tharna
- Lalpa thuin len i deng ang u! – Denis Lalfela, Rome
- Li thùk lamah deng zel rawh! – Denis Lalfela, Rome
He thu hi Friday, February 26th, 2010 dar 6:06 am a Religion . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
