Lengzem : El Bethel lâr vanglai kha ni tain ka hria. November thla chawhnu lampang tawh, Nilaithawhtan tlaiah hian vawi khat chu kan veng parawn pahnih, thlai thar thawhlawm lilamtu bera Kohhran pawhin a hman chawtte hian, “Naktuk zingah kan rawn lêng dawn, Ni Mami biak a tul tlat,” tiin ka kawngkal chu min be ding a.
Chhei le, Enge ni ta ang? Ni Mami hi lo hmel duhtu an awm ve tak tak ta va a ni mai awm ve. Khawi lam mi, eng ti mi nge…? Zawhna hlirin ka rilru a insual a. Man eitu turte ka rilruah an lang zut zut a. MUP member zingah nupa tang then an awm leh awm lohte ka mitthla nghal zung zung a. Ni âr leh naupuakpuan ei tur dik takte chu thingtlangah tarkunin an awm tawh a. Han vak chhuak thei an awm tawh si lo. Pusum ei tur ngat phei chu tar pho dik tak a ni tawh si. Ka rilruin âr bo a zawng a. Ka buaina hauh lo turah buaiin tunge a veilamah dinpui ang? A vahnu hian tlawmngaih leh huaisen chhuahin a inpumpek duh mai ang em? A thi a hul tawh mai thei a, thisen pe ta vak ila a la sawt ang em? Amah lah hi a tunlai tawh si lo, ‘hmanlai mi’ ti ngawt dawn ila tunlai thleng rawka nula a ni lawi si, a inhmeh tur mo kawr design eng ang nge ni ta ang? tihte ka ngaihtuah nghal zut zut mai a.
Heti em ema taka ka faru inleng nei turin ka rilru a tihbuai na chhan hi nula senior namen lo a nih vang a ni satliah lo, chhan tamtak a awm a ni. Chung thil hrang hrangte chu, a inlengte lo thlen hmain ka han hrilh pur pur teh ang che.
A Ni Mami chu
Sawi tawh angin kan chhungkua hi thingtlanga awm thin, khawpuia pêm kan ni ka tih tawh kha. Nia, nau nula lêng rei ve thawkhat ka nei tih chu Huaikhuma chanchin, ‘Thingtlangah Mas’ (Lz Dec 06 & Jan 07) tihah khan ka sawi tawh a. A pian hun lai hi sâng zakua zawnga sawi a duh vak tawh lova, a hre ru awm chhun, primary sikul zirtirtu pakhat lah chu thang hnih liamta khan ngawr (Asthma) natna in a boral tawh. A thih hian ka nau Piangmami chu a tlaivar ve a, a tukah thlanlaiho thingpui no khawm kualtu ber a ni nghe nghe. Mizoram UT lawm tuma a in kha a thingpui thlum in hmasak ber a nih thu laina hnaite a hrilh ru leh zauh thin. Buai lai khan kan û ber Ramfangzaua’n sipai mit lêrh lakah vawi duai lo a lo hum tawh thin. Min chhangtu Tv Pawlsanga BA, Paul Lalsanga ni ta lah chu Tipaimuk Road lamah a inbengberh ve viau a ni awm a. Mahse a hming mai a nia. An nu lamah saphunin an tlei hle a ni awm e. Zawn chhuah hrâm pawh kan tum hran lo. Pathian nungin a la zawng chhuak ang chu.
Ni-Vah Thu
Chuvangin Piangmami hian Vahte tia han sawi tur hi a ngah lutuk lo. Keini nupa, Nguri nen hian kan chi a tha hrâm a, vah sawi tur pasarih a nei a ni mai a. Kan upa berte chhungkua zawng zawng lah chu amah chhiar telin pakhat an ni lawng mai si. Nia, a vah hmuh dik takte hi kan fate hi an ni rawih a. Mahse an zar buai hneh hle thung mai. Kan fate zawng zawng hi “I Ni khumah lâwn suh u, a lo hawnah a thinrim ang” tia vau loh hi kan nei lo mai ni lovin, kan nupa meuha an Ni khum kan thleh fel tâk sawk sawk châng hi a tam ta khawp mai. A lehkhabu chhiar lai, a chhiar chin a chhinchhiahna naupang hovin an lo tih bo palh te hian keini nupa tan tak hian a luhai thlâkin chhumpui nasa tak ang min hualveltu hi a tam thin. A Ni Mami hlabua chhunhan pakhat tê pawh hi kan fate hian an tihbosak ang tih kan hlau ngawih ngawih thin.
A vahte nen lipstick an intawm theih chin atang pawh khan vawkpa sut nghâk pasarih zet an vulh puitling hman ta awm e. Lipstick hring, hnawiha sen vam ham mai, kan fa upa berin a lo tihtliah palh tuma Nguri hlauthawng thlabar, chhan ngaihna ka hriat bik loh lai te kha aw! Nia, ka hauh hrep ai mahin a niin chaw ei dawhkana thu kam hnih-khat a sawi hian kan fateah rah tha a chhuah zawk a. Aluminium thirfiana kut chang a khawn tawh chu zilh nawn ngai an awm ngai lo. Sawi dawt mai ang. An Ni zing tho mitmengah hian kan chhungkaw diary tur hi a inziak vek a ni ber mai.
Torchlight chungchang
Torchlight, kawlphe-khawnvar, sihdêt kan tih pawh hi a ngah fe tawh mai. Buai hnu deuh khan lianga sazu kal hi a chhun kual zai zai tawh a. Hnawhtawt per en nan kan hawhsak fo tawh thin. Tlangval zupawl tuam, a Ni Mami Sihdêt hawhsak thei kha chu intithei tak an ni. ‘I di I di an ti’ tia signal hmanga khaw thenawm phêta zualko nan VC Secretary in a hawh zing khawp bawk. A hmaihlai chi, tawi chi, sei chi bakah kap (kalh) ngai leh ngai lo te hi a nei kim biai tawh a. Tunah hian torch light, battery charge theih, a mawng lama ha kherna pawh chhuah theih nghal chi zawngin a thiante phai kal a zar buai hle tih tlangkam atangin kan hre ru nghe nghe. A duh zawng tak phei chu duh huna herh sâna herh hniam theihna regulator awm, day and night tarmit anga chhun leh zan hre hrang thei torch light a ni nghe nghe. Nulat laia sihdêt day and night mamawh khawpa a dam hi lawmpui tur nge thingpuife pek chi tih pawh ka hrethiam ta lo.
Fashion lam
A nulat lai thawmhnaw hi lo dah tha vekin exhibition neih pui ta ila, luhai bûra en kual tham a ni ngei ang. Hmai hnawih lam pawh hi a nei ve nual. Powder diak, a tuamna pawl, ‘Himalay’ lem chuang a hman ruahna bur pawh thingtlanga kan awm lai khan thlai chi bawmah a sem ve tawh a. A hmai ngeih chi chu leia tiauvut zat, a ngeih loh chi pawh vana arsi zat ti ta ila kan uar lutuk deuh bakah, farnu kan inmualpho mah mah dawn tlat.
Tunhma chuan puan hi ama tah ngat lo hi chu bih duh ngai lo. Hnahchawia herawt lem leh kaihbu zia thlang thiam ngat kha a ni ve a. A themthiamna hi kan chhuang hle thin a. Mahse a kâwng a that loh chhuanlamin ngotekherh pawh bih thum lai chu a leiin a bih chul ve ta reng mai. Hun b$kah chauh a bih nain a Puanropui hi chu a ropui tawh lo khawp nia. Mo puan a lâk ringawt hi thûl thum khat tân a nia. A ni-âr ei hi khawl ta ila, mautam kuma chhung rual thlamuanpui tling tawh ang. Kum khat phei chu a naupuakpuan eina sum tlingkhawmin Pathian ram buh kan khul tawp tawh a ni. Khua hmunah awm ta zel ila, Thlengite nufa naupuakpuan man chu a ei kawp chiang khawp ang.
Ei leh In
Chawhmeh pawh hi a uluk hle. ‘Bai-thak-mawm’ a siam thiam a. Thingpui pawh ‘A paw hang, chi al lip lep’ lo chu a ti thei bau tawh lo. A nuna nunpui ta chu, ‘Dam reina’ tia a sawimawi tawh hi chuan, ankasa chhum-hân pawh ni se, a vahte ho chuan an mai pak pak zel. Pathian ni zing chawhmeh atan pawh naupang châk zawng rawn lova, an Ni kan rawn zawk thinna pawh thangkhat lian zet a ni ta. |henawmte vawk talh tum, a nâk-sah keih mawm hmak kan châk laite hian, bawng kambawl a châk zawk thu a han sawi ta tlat mai thin a. Kei a awm tleitu ngei pawh hian “Em em a!” ka tih rilruk chang a tam ve mai. Chhungkaw Mas thawhlawm zat bithliahtu a nih hnu-ah ngawt pawh Mas hla thar a piang hnem ta fu mai. Khawmpui palaia a zin bo hlan chauh hian sa thithun leh a rilphiarte kan ei ngam a. A hmai bawl chhuanlamin chawhmeh mawm lutuk hi a ei duh tawh lo lehnghal. Mahse Nguri hian khum laizawlah “Ei mawm teh mah se kum tam a bawl tawh awm chuang si lova!” tiin min hrilh ru sa sa thung. Ka nu leh pate dam lai khan lal fanu a ni thin a, an awm loh chinah erawh chuan pu ber, pa ber, nu ber leh Ni ber nih a kawp chawt ta mai a ni.
Vantlang Ni
Kan chhungkuaah mai a ni hlei nem. Kan fate chauhvin an NI lova, VANGTLANG NI nih hi a tling tak meuh meuh. Khawlaiah te hian tlangval zurui kal tha hlei thei lo pawh hian kawngkawiah tâwk thut mah se. “A! Ni Mami a ni reng mai!” tiin kal ngil hram an tum thin a. A sihdêt êng ringawt pawh hi kawi thuma hla atang pawhin pathlawi zu rui pawhin an hai ngai lo. A tel ve tawhnaah chuan nula awm tha duh lo deuh pawhin Kristian Hlabu an chuh chung zel. Ani meuh a lo lan tawh hi chuan hâr bula pathlawi nui ham ham lai pawh hi an reh duk zel. YMA social meetingah te hian hla lenglawng sak han chak ve deuh mah se, Ni Mami a lo tel chuan daw re miii… hla an sa leh thup thup thin. Khawmpui leh tournament thlen dawn pawh hian kan khua hian hian kan zo ang em tia an rawn hmasak chang a awm. Ti hian sawi ta ila, ‘Pastor leh upate thurawn lâkna, YMA leh MHIP khalh ng$ltu, tlangvalte tih, nulate hlauh, naupang tap thlêmna’ ti ta ila inchawimawinaah min ngaihsak hrâm ka beisei.
Vawk leh Sa
Hei aia bawnra hi a la awm: Veng pa rorum rual, Sa Sât Association (SSA!) meuh pawh hian lal fanu en hian an en tlat. ’Rinni zingkar sa dawr chu lo hual tuai tawh mah se, Ni Mami tawngtai inkhawm bâng a lo lan tawh chuan ‘A mawngtam t$ kg chanve leh a thin kurtai tiat’ hi an khersak nghal mawlh mawlh mai nia mawle. Amah vang te pawh ni fahmiang, veng pa un, Dospati King an tih mai hian, “Sa sahna-ah chuan zing tawngtai inkhawm bâng an tawrhhlelhawm ber, an duh lai tak hi Pathian hnenah an rawn dil sa thlap a, tawngtai chhanna dâltu nih ai chuan kal hmasaho chuan kan kian leh nge nge thin” a tih thin ni.
Pasal hmu lem lo mah se vawk vulhah hian a tluang a. Kan vawk sum tiat hretu a ni a, a man chhiartu leh têltu ber a ni bawk thin. |um khat, khaw hlui lamah man eia a zinbo hlanin, chhangchhiat chhuanlamin kan vawkpa kan lo tiral ve ngawt mai a, a zin hawah ngawi rengin vawk note panga ngawt mai a’n man thar leh sak mai chuh. Phun ngam ni hek suh. Chhangchhiat zawng a belhchhah ngei mai.
Thlarau lam Dinhmun
Pathian thu lamah hian a sâng lua lova, Mahse Nilai zan sawihona hawngtu ber leh Pathianni tuka Sande sikul zawhna chhangtu ber chu a ni lawi si. Inrinni zanah kawmthlang nute’n, “Nimin ka ba hmun thlawh laia ka rilrua lo awm chu…” tia bul an tan laiin, ani chuan, “D.L Moody-a chuan…” a tih loh leh “Pu Selet Thanga ngaihdan ang khan” tih te hi a sawi bul tanna a ni fo thin. Lâm hi a ngaisang lo a ni lo. Lam thin tamtak hi a ngaihsan lo a ni zawk. Mihlim chu a ni lova, a thlarau mi hle lawi si. A khabe bulah vuak hnih dana a kut a ben tawh chuan a tui hle tawh a, Kohhran Chairman pawhin lam ngei a tul tih a hai tawh ngai lova, Hmeichhe ziaktu pawhin khuangpute zai ngai miah lova hla chang sawi nawn chu tihmakmawhah a ni tih a hai lo. Thurinah a chiang a, ‘Chumi ziak’ tih hi a innghahna ber a ni thin. Kalsualna hi a ei bau lo mai ni lovin, ding lam emaw vei lam emaw ah hian pen a tum lo thlawt a ni mai. Krismas aia Good Friday la urhsun, Easter Sunday a vahte thilpek pe zat zat, Penticos nia inchei ngai lo, Tumkau nia lungleng thin, khawvel sande sikul ni ngaipawimawh leh kumthar ni chawhnua mu bo daih thin mi a nihna hian a kum leh rinna kawnga a dinhmun chu a hrilhfiah chiang hle a ni.
A nun hrim hrim hi a ngil a. Vawi khat mah kohhran thunun la tawk lo a ni bawk a, Thunun tawkte hi chhung inkhawmnaah tal hian a chham chhuak ziah thin. Tun hma chuan inngaihna suala tlu lo turin a inveng nasa thin a. Kum engmawzat kal ta atang khan a inthlahdul deuh nachungin he lamah chuan inven a mamawh ta vak lo a ni. Isua nen an inan lohna em em chu, thlêma awm turin thlaler leh hmun fianrialah a kal ngai lova, thlemtu a tawng ngai hek lo. Tu tan mah tlûkna siamtu a la ni lo va. Chuvangin Sunday school chawimawina Bible Society certificate hi chu tarlan sen loh a kawl tawh a ni.
Vantlang Titi
K-K Era (Koia mat se – Kasauti) chhung zawnga nula tluan parh kha a ni miauva. A chungchangah hian thu lengvâk a tam mai. ‘Ni Mami chu a si tawh lutuk a, tlem te te, hing deuhvin a zung thin’ tih te hi chu keini a chenpuite pawhin kan la approve bik loh thil a nia. ‘A ding mai thei tawh lova, a ding tur hi a ri tuar tuar thin’ an tih te hi chu sawi tur ting chuan vawi hnih khat chu kei ngei pawhin ka hre tawh. ‘Thlasika a heh a rêp tawh ngai lo’ an tih hi chu amah ngei pawhin a pawm thlap. ‘A aw ri leh hmui phun a inrual tawh lo’ an tih te hi chu khawchhak film hmehbel mai maia ngaiin lunglohva lak pawh kan tum hran law. ‘Ni Mami chuan Mosia pa hming chu a hre tawh lova, a hmel chu a la hria’ an tih te phei hi chu tupa zukhawn changlo thu-hla mai maiah kan ngai. Mahse, a uar falin ‘A hnute a elh ri thin’ an tih te kher hi chu kan thinrimpuiin a hriat kan hlau hle. ‘A chek a kha tawh lo vang’ tih leh ‘kum thum kal ta bak a hre mumal lo’ tihte lek hi chu medical expert leh psychologist te rawih hial ka duh rum rum. Mi a lo maha kan fate leh thenawm naupang ho ‘Thlanrawkpa khuangchawi’ leh Chhawnaboraza’ hmanga awi mu reng reng nih ve nak alaia. Eng pawh nise, kan farnu vang hian kan chhungkua kan phuisui a, inleng leh khual chhia-tha kan neih phah a, kan faten kutpalh an tuar lo deuh pawh hi malsawmna a tling hrim hrim. Kan chhungkaw tan chuan ‘Lui kianga thingphun’ a lo ni ngei e. Chuvangin nupui atana duhtu pawh a tawpah chuan a hmu ve dawn ta niin a lang
Kan inlengte chu le…!
Tichuan… i ti tawh mai ang. Zirtawp zingah chuan inlengte chu an lo lût ta ngei mai. Keia fel leh pak fawm chuan thutna awm zawng zawng phih chhuakin an chhungkaw dam leh dam loh thute kan zawh fe hnu chuan, an sawi duh zawng an sawi ta. “Nia, Ni Mami kher kan tih na pawh englo a nia. Mas committee-ah ran zawng in-charge kan nia. In vawk pa hi Mas a talhah kan awt a. A man thu hlaah Ni Mami awm se, a dang zawn buai ngai lova thu pawhchah nghal mai kan duh deuhva tin a nia,” an han ti mai chu. ‘Ranngo’ zawng emaw ka tih kha ‘Ngo’ an lo zawng tel ikhaw lo mai. Ka beiseina leh mitthla zawng zawng chu a bo duak a, ka tawt up hi a ni ber mai. Ka beidawng rilru insûm bawk si chuan. “Nia, a Ni man kan la tel lo mai pawha, vawk man chu a tel ve nual tawh a nia. Hei a la mu a. Naktuk zan inkhawm banah bia ula. Kawng lakah pawh a sawifel thei mai ang,” tiin ka thlah tak kha.
-----------------------------------------------------------------------
Similar Posts
- Saiha ah vawk dangdai
- Mo lawmna vawk sa eisual vangin 100 chuang buai
- Lunglei Miss Chapcharkut 2009 bihchianna
- Tunlai hian ran thi an tam
- Ruah sur nasa in harsatna thlen
He thu hi Thursday, February 11th, 2010 dar 6:27 pm a Articles, Jokes . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
