“Milem siamchawp leh thil, a anpui reng reng… chibai i buk tur a ni lo va, an rawng i bawl tur a ni hek lo.” Exodus 20: 4, 5.

Hmeithai Synphoros-i chu AD 108 atanga roreltu rawng tak, Lalber, Trajan-a hun lai khan Rome-ah a khawsa ve a. Fapa pasarih neiin Kristian chhungkua an ni. He thu hi lalber chuan lo hriain chu hmeithai chu a fate nen chuan a ko ta a. “In chhungkua hian Hercules-a leh kan ram pathian dang reng reng hi in be ve lo tih hi a dik em?” tiin Lalber chuan a lo zawt a. Symporos-i chuan, “Dik e, thing leh lunga siamchawp pathian be lo tura thu min petu Isua Krista kan bia a lawm,” a ti a. Trajan-a chuan  chapo takin, A tha e. Khawvel awptu Rome lalber ka ni a, Rome pathiante be turin thu ka pe che u a ni,” a ti a. Symporos chuan zam miah lo hian, “A theih loh,” a ti a. A fapate pawh chuan an lo zawm ve a.

Lalber thinur chuan, “Hercules-a tempul-ah hruai ula, Hercules hma-ah chuan hruhrualin hlap hrep rawh u,” tiin sipai ho chu  thu a pe nghal a. Lalber thu ang a an hlap hrep hnu chuan a chhip samin siling-ah an khai a. Chutah a nghawngah lung tawn betin Tiberi luiah an paih ta a ni.

Trajan-a chu a la lungawi tlat lo. Symphoros-i fapa pasarihte chu banah phuar betin an kut leh ke chu hruiin a pawhtir a. An hliam chu a nat tehreng nen, an kut leh kete an pawh bal thleng pawhin tuman milem biak an tum lo. An unau parih chu ngunhnama tihhlum vek an ni. Crentius-a chu a hrawkah an zai a. Julien-a chu a awmah an vit a. Nemesius-a chu a lungah an vit tlang a. Primitius-a chu a pumah vih niin Justice-a chu a hnungzangah vih a ni. Stacteus-a chu a nakah an vit a, Eugenius-a chu an tan bung thung. An vai hian bana phuar beh an nih laiin an thi vek a. An thih dawn thlengin tuman an nu biak Pathian chu an phatsan lo.

Bithunia Governor Pliny-an chutiang tihduhdahna chanchin a lo hriat chuan Kristiante chhan nan inrawlh tulin a hria a. Hetiang hian Lalber chu lehkha a thawn a. “An sualna belhkhawm chu hei hi a ni. Hun ruat bikah an inkhawm, mi pakhat Krista an Pathian faka zai, rukruk, tualthah leh thilsual ti lo tura intiam, an rinna vawng reng leh tumah bum loh. Hetiang hian an tihbakah chhang eia uain in turin an kalkhawm a. Tichuan thil sual engmah tilovin an tin leh thin,” tiin.

Hemi hnu hian rei vak lo chu tihduhdahna pawh a ziaawm deuh a. Mifing leh fel tak takin chutiang taka rawnga nghaisak tuar tur khawpin Kristianten thil tihsual an nei lo tih an hria a, an lo khawngaih em em thin. Thil tisuala an puhte nun mawizia hmutu officer tam tak phei chu an fel khawp mai a, thenkhat phei chuan an rawn zawm ve hial a ni.

Courtesy: Dorothy Watts

Women’s Ministry, First Mizo SDA Church

Share

-----------------------------------------------------------------------
Similar Posts

• Colosseum Ennawm Chhuahna Hmun Chu
• Martar Hlim Tak Chu
• HE CHHINCHHIAHNA HMANG HIAN KAN HNEH
• CRISPINA RINNA
• KRISTIAN SIPAITE AN TAWNGTAI HIAN

He thu hi Tuesday, March 23rd, 2010 dar 1:48 am a Articles, Religion . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.