“Tihchim lohva lung intiang reng reng hetah a awm lo vang.” Mathaia 24:2
AD 31 khan Isua chu a zirtirte nen Jerusalem tempul kailawnah tempul tihchhiat a nih tur thu hrilhlawkin a ding a. A hnu kum 39-ah Rom sipai hotu Titus-a chu tempul venhim tumin chu kailawnah vek chuan a ding bawk.
Titus-a chuan, “Tempul lung inrem hi khawih miah loh tur. He in ropui tak mai hi Rom ropui nan venhim tlat tur a ni. Khawvel thilmak pasarih zinga pakhat a nih hi,” tiin a sipaite chu thu a pe a. Titus-a chuan tempul chhunga Juda hruaitute chu, “In hmun thianghlim hi thisena bual tir turin min tilui suh u. Rawn chhuak ula hmun dangah i indo ang. In tempul thianghlimna hi ka vawng him ang tih ka tiam e,” tiin a au va.
Juda-ho chuan inpek ahnekin sipaite chu anchhia lawhin an lo tawng a. Titus-a chuan thlem chi an ni lo tih a hre mai a. Tempul mawina tihmelhem lova a chhung mite thah vek dan chu a ngaihtuah leh a. Mahse chumi zan a mut hlan chuan buaina a chhuak ta a. Sipai pakhat chuan tukverh atangin tempulah chuan meichher a vawm lut a. Kar lovah cedar thinga siam bang thuahna chu a alh ta hluah mai a ni.
Titus-a leh a officer-te chu kang thelh tumin tempul-ah chuan an tlan lut a. Mahse sipaihovin tempul cheina rangkachak kang tui an han hmuh chuan thunun zawh rual a ni lo. Tempul chhungah chuan eng thilmak nge awm ang tih an ngaihtuah a. Chutah kawngkhar innghahna chu sipai pakhatin a hal leh a. Mei alh chu a nasa ta lutuk a, tawrh zawh rual a ni ta lo. Sipaiho chuan an ro lak theih apiang lain mei sa lutuk chu an tlansan ta a ni.
Titus-a chuan hla fe atangin tlangkang tluk zeta tempul chung mum put mai kang dur dur lai chu a thlir reng a. Rapthlak taka tempul bung hrang hrang kang chim dur dur chu a hmu vek a ni. Darkar tlem te-ah mi 18,000-in kum kua zet an sak tempul chu a chhe ta vek mai a. Mei daih veleh a hnuaia ro hlu inphum zawngin lung intiangte chu an kar phawng vek a. Khawpui leh tempul chu a pherh vek a ni ber. Krista hrilhlawkna kha a lo thleng dik ta a ni.
Titus-a chuan a hnehna lawm nan tempul ro thenkhat chu Rome-ah a phur thla a, tun thleng hian Rome-ah hmuh theih a la ni. Chutah vek chuan khawnvar halna ban pasarih leh tangkaraw tawtawrawt leh chhang dahna rangkachak dawhkan, indo hriatreng nana a hawn thlak chu i hmu bawk ang. Titus-a thil hawnte hi Pathian Thu dikzia leh Krista leh A thutak hnartute chan tur min hriattirtu an ni.
Cortesy: Dorothy Watts
Women’s Ministry, First Mizo SDA Church
-----------------------------------------------------------------------
Similar Posts
- Ringtuten Jerusalem an tlanchhiatsan
- Colosseum Ennawm Chhuahna Hmun Chu
- Hmeithai Rinawmna
- Martar Hlim Tak Chu
- CATACOMB CHU
He thu hi Monday, March 8th, 2010 dar 3:39 pm a Religion . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
