Consumer-te hmakhua ngai hauh si lo leh an diknate humhalhna chang hre uk si loten tun hnaiah kawlphetha, water supply, gas harsatna leh mipui tuarna tuarpui ni awm fahrana mombati a thlawna an sem ngawt mai chuan kei mimawl ha hi a titim hauh lo mai a. Ka nuih a za lek lek zawk a ni.
Tunlaia kan buaina leh harsana hi Consumer Protection Act hmanga hma lak chi tak vek a ni a, CPA hmanga sutkian theih niin a lang. Miin pawisa senga a power a chhit chuan, a man hu tawk a tel tur a ni, sawi tur tam tak a awm lo. CPA 1986 hmangin service provider kan tih mai power & electric deptt. chu an cho let mai tur a ni. CPA 86’ hnuaiah hian deficiency in service leh unfair trade practice section hmangin heng service providers PHE te, P&E te khin theih an ni.
Tunlai hian mombati a lar hle, Congress dem nan kan hmang a, mombati sawrkar kan ti chhen bawk a. Hetianga kan indem dawn a nih chuan tute mah hi kan fihlim law, tu sawrkar mah hi an thianghlimin an fel kim hek lo. MNF pawh kha (mombati semho) kum 10 zet zawt an sawrkar chhung khan power-ah min tihmasawn chuang lo va, kan hnianghnar lohzia erawh tlang hriat a ni.
Hun kha leh chen an sawrkar a, engmah kan intodelh ngai law, project eng emaw zat an tizuzi a ni tih kan hria. Ka sawi tum ber chu Mombati semtute hi eng nge maw in nih bik le, kan ti a nih chu. Congress leh MNF hun laia hruaitute kha tuna hruaitute tho kha an ni a. Minister te chu dang mahse Pu Zorama leh Pu Hawla tho kha an ni e. Technical lamah chuan eng ruai an ni lovang tih chu a chiang ve tho mai. Chuvangin, ngaiteh, power-a kan intodelh hun hi chu duhthusam mai mai a ni e.
He khawvel ram zau tak leh Zoram zimteah hian dawngdah leh thatchhe taka hna kan thawh chhung chuan engah mah kan intodelh thei lovang. Mombati factory emaw, mombati subsidy tih dante hi kan inzirtir te a nih ngawt loh chuan hlawhtlinna lamtluang kan zawh thei lul lovang. Eng chhit tur kan la tlachham kum khua mai dawn a ni.
Ka sawi zel dawn, LP Gas chungchang te hi kan sawi thin maw! Nitin zantina kan innghahna ber a ni zel tih kan hre theuh. Mahse LP Gas lamtluang hi kan hre mawlh lo, kan zir peih mawlh lo. Tute mahin kan zir peih hek lo, a to bulte hi kan ngaihsak lo. Heti khawpa gas harsatna lo hluar zelte pawh hi a kaikuang chu mipui leh gas connection nei uk loten gas kan hmang vet lat hi a nih thu Consumers Affairs Deppt. in tarlangin gas sem chhuah 30% hi connection nei lote pek an nih thu an sawi nghe nghe a nih kha. Chumi awmzia chu MNF Ministry hun lai khan hnianghnar chu sawi loh, Minister leh supply hotute, MCU hotute ruahmanin gas sem zai a nih theih nan VC Card te, Ration Card tein gas kan inlaktir a, chu a chhapah nasa taka gas a lo harsat zual zel avangin tun thleng hian gas lo thleng chu mumal takin sem a ni lo va, special permit te, quata etc. tihte a lo ni zel a. Hetih lai hian black market hi a nasa em em reng a ni.
Essential Commodity a nih avangin inchuh a nasa a, tute pawh mai hian gas bur 2 bur 3 te kan neih loh chuan kan ngaih a ngam thei lo a ni. Mihring kan pung zel a, gas hmangtu kan tam zel a, connection thar a tih theih nasa lo hle bawk nen. Chuvangin system mumal nei lova gas kan sem chhung chuan kan harsatna hian zual lam a pan zel dawn a. Ngaihthah mai mai chi erawh a ni lo hle, gas sem dan tur pawh LP Gas control order-ah a lang vek. Tuna kan kalphung hi chu phuahchawp mai a ni.
Kan thupuia kan hman mekah lut leh tai la, roreltuten thil an zir peih a ngai hle. Electric chhit thua Act te, Water supplies thua rules kan hman mek te, Gas sem dan turleh control items a nih dante chu a zira zir tham a ni. A ngaihna hre tan harsatna sut kian zung zung theih a ni. Ka sawi tum ber pakhat chu politician-te i intathriam ang u, official lam ho pawhin thil thup nei lovin, kan ram hruaitute hnenah thurawn tha pe thin se, kan ti a ni.
Ram changkang zawk tak tak leh khawpui lian pui puiahte pawh power tlakchham hi Talk of the City a ni ve mek bawk. Mombati a thlawna insem khum erawh kan hre ngai lo, ‘Zawngin a ngum khak a hmu lo’ tih mai bak chu engmah zirtur kan nei lo khawp mai. An hun laia mipui tuarna kha tunge theihnghilh thei ang, gas pawh a harsa, power-ah pawh kan hnianghnar ngai chuang lo.
Saptawng chanchinbu Telegraph chhuak hnuhnung ber pawl (a ni chiah ka hre ta lo) ah chuan heti hian a inziak a, “Power Crisis in Meghalaya” tih a inziak kulh mai. A ziah zel dan chuan Meghalaya-ah hian an power chawkluhna ber Umion Lake chu tunlai hian a chim chin ft. 3192.93 a nih lain power pe chhuak tura reading mamawh zat ft. 3220 chu ft. 28 in a pha lo a. Tin, Meghalaya power mamawh zat chu 600MW a nih laiin 175MW chauh an thar thei thung tih a ni ve mek bawk.
Hei vang hian Maghalaya Electricity Board (MSEB) chuan power cut a tum nasa hle a. Power chhit pawh renchem a tul hle tih chu an dinna a ni mek a. Chuvangin Meghalaya State hydro power potential 3000MW neitu meuh pawh an buai mek a nih hi. Opposition ten mombati elsen nan an sem kan hr eve lo. Hetianga ti peih chuan LP Gas pawh sem mai ang hmiang. Mahni tih theih hauh loh tur, mahni sahmim puarna duh vanga hetianga mombati sem hi kei ve hian ropui ka ti hran lo. Politics lem ka ti mai. Hetiang thu ka sawi avang hian power-ah intodelh lo ang u ka tihna a ni lo, intodelh a harsa ka tihna mai a ni e.
Mizoram political party te hian kan politics khelh dan pawh hi kan inenfiah a ngai khawp mai. Political term thar kan chher chhuah te pawh a ngai ta zel. Kihhnawk tih ang chi tawng tharte hi a lo tul ta a nih hi, hetiang thu vir vel mai maia politics kan khelh a, mipui zirtir kan chin chuan kan nakin hun politics vendetta hi thlir lawk ngam pawh a ni lo. Mipuiin kan tuar nasa hle dawn, kum 20 dang lo kal leh tur kan thlir lawk ngam lo mai dawn!
Heng essential service, Telephone te, Power & Electricity te, Water supplies (PHE) te, PDS (Gas, Rice, Sugar K. oil etc.) te hi hmangtu kan pung tulh tulh dawn. Ni mai teh se tia amen liam puat puat mai mai chi a ni hek lo. Henga thawktute hi an hah hle a, an thawh thatah fak ila, an chhiatah sawisel bawk ila, tiin thu kan inchah a ni. Mahni hun lai theuhva mipui rawng kan bawl dante hi inenfiah ila, mahni chhungkua leh party chauh tana thawktu kan ni zawk foe m, tih inchhut ang u. Mombati politics hi a khamawm ta e…!!
-----------------------------------------------------------------------
Similar Posts
- New Market A Tawt, Mipui Kalna Tura Inzuar An Tam
- In Kangah nu leh a fate 2 kanghlum
- JNNURM Hnuaia Dawn Mini Bus 14 Vailiam
- May thla chhungin NLUP
- Thalai hna hmulo tam laia, pension tawh rawih nawn leh hi?
He thu hi Monday, March 1st, 2010 dar 4:50 pm a Articles . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
Zia lo hle mai, he Article ziaktu hi Lallunghnema Charity Lodge a ni, Pu Hawla leh Pu Zorama ang khan ngaihdam kan dil, a hming tarlan a lang lo tlat mai… – Hmuna
A thlawn a sem chu Dozen 1 – 5 vel tal chu chan ka va chak tak em e oooooooooooooo
[...] Mombati sem hian ka ha a titim love » buannel7 hours ago by Hmuna Consumer-te hmakhua ngai hauh si lo leh an diknate humhalhna chang hre uk si loten tun hnaiah kawlphetha, water supply, gas harsatna leh mipui tuarna tuarpui ni awm fahrana mombati a thlawna an sem ngawt mai chuan kei mimawl ha hi a … [...]
an ngawt mai ti raw engmah ngaihtuah hawt lo a,an party hamthatna tur leh sawrkar sawisel ngawt mai hi chu a hmasial thlak ngawt mai.Ram an hmangaih tak zet chuan sawrkar kha thlawp ta sela ram ahmasawn zawk awm mang e o.Mahni party sawrkar laiah ti thei mang silo midang tih tir tum chu buaithlak tak asin.Tang rual hi thiam ila kan lo sawrkar lo anih pawn chu chu ram hmangaih tu in ti te tan chuan tih om tak ani. In tih el hi chuan mahni hma a sial zawk ani lawm ni?