“Nimahsela sipaihoten Jerusalem khua an hual in hmuh hunah, a boral dawn tih hria ang che u. Chutih hunah chuan Judai rama awmte chu tlangahte tlan bo rawh se; a chhunga awmte chuan chhuahsan rawh se; rama awmte chu a chhungah lut suh se.” Luka 21:20, 21.
“Jerusalem chhuahsan a hun ta. Hmanhmawh rawh u. Rome sipaihovin khua an hual a; Pathianin kawng min hawnsak mai ang,” tiin Jerusalem Bishop Simeona chuan upa kalkhawmte chu a hrilh a. Chu thu chuan Jerusalem-a Kristiante chu a dengchhuak rang kher mai. Chhiatna lo thleng tur kawk zawng hian chhinchhiahna mak tak tak panga a awm tawh a. Chungte chu:
1. Zanlaiah mak tak maiin tempul leh maicham chung a eng.
2. Mi tam takin ni tlak laiin chhum zingah indona sakawr-tawlailir leh sipai rual an hmu.
3. Puithiamin tempul-ah thawm maktak a hria.
4. Lir a nghing.
5. Zanlaiah khawpui kulh kawngkhar chhak lama mi, thirtlawna an kalh chu hmuh theih loh kutin a hawng.
Kristiante chuan sipaihovin khawpui an hual tak tak hun hriat theihna Isuan a lo pek tawh kha an nghak tur a ni tih an hria a. Chu hun chu a lo thleng ta. Mahse engtinnge Rom sipai ho chu an paltlang ang? A chhan hria miah lohin Rome sipai hotu Cestius-a chuan a sipaite chu a hnukkir thut mai a. Juda mi tam tak chu Rom ho um turin an tlan chhuak a. Hei tak hi Kristiante nghah kha a ni a. Rom sipai emaw, Juda hotute emaw tumahin Kristian tlanchhuak chu an dang lo. Perea ram, Jordan lui rala Pella khua-ah an hotu Simeon-a hovin an tlanchhuak ta dial mai a ni.
A hnu lawkah Rom sipaiho chu an rawn kir leh a, khawpui an tihchhiat hma loh chu an hual bet tlat a. Khaw chhung an luh hma pawhin mi tam tak chu riltam vang leh hri vangin an thi a. Hemi tuma Jerusalem hualnaah hian mi maktaduaih khat chuang an thi a. Mitthi ruangte chu kawtthlerahte chuan an vum ther thur a. Khawpui pawn phaizawlah te chuan ruang a let pheng phung bawk a, mi tam tak chu tempulah Messian a chhanchhuah beiseiin an tlan lut a. Chu chu sipaiho chuan luh chilhin an that a, tempul kailawnahte chuan thisen a luang nasa hle.
Hemi tuma maktaduaih chuang thi zingah hian Kristian pakhatmah an tel lo va. Sala an man sang tam tak zingah pawh an tel ve lo. Isua hrilhlawkna an rin tlat avangin Pella khua-ah khan Krista zuitute chu an him vek a ni.
Matthaia 24 leh Luka 21 hrilhlawknate chu AD 70 khan Jerusalem tihchhiatna-ah a lo thleng dik a. Mahse hun tawpah hian nasa zawkin a thleng leh dawn a ni. Chumi hunah chuan Krista lo kal lehna ringtute tih loh chu an boral vek ang. Chumi ni atan chuan i inpeih tawh em?
Courtesy: Dorothy Watts
Women’s, First Mizo SDA Church
-----------------------------------------------------------------------
Similar Posts
- Jerusalem Tihchhiatna
- Hmeithai Rinawmna
- Kum Zabi Pakhatnaa Martarte – II
- KRISTIAN SIPAITE AN TAWNGTAI HIAN
- Mi Pakhat Kang Thei Lova Chu
He thu hi Monday, March 1st, 2010 dar 6:00 am a ETC, Religion . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
