‘Nangmah I inhmangaih angin I vengte pawh I hmangaih tur a ni,’(Mt 22:39)

Rawngbawlna kawngah hian chanchintha hril hi kan dah pawimawh ber rual hian, a chhehvel keimahni min hualtu thil pawimawh tak tak thenkhat hi kan ngaihthah deuh thin em aw tih theihna lai a awm thin. Thil tam tak sawi tur a awm rualin, a pawimawh ber zinga pakhat mahni thenawm khawvengte nena kan inlaichinnaah hian kohhran memberte hian Pathian thu pek kan zawm meuh em tih hi in ngaihtuah ho teh ang u.

Mahni vengte hmangaih hi Lal Isua khan a dah chungnung em em a, thupek ropui ber nen intlukpuiin a dah hial a nih kha! Kohhran mipui zawng zawng Pastor atanga a te ber thleng hian mahni inhmangaih lo tawp chu kan awm lo ang a, mahse mahni kan inhmangaih anga midang hmangaih chu kan lo awm mial a nih pawhin pahnih khat bak kan nih a rinawm loh.

Kan sawi thui lutuk loh nan Midangte hmangaih kawnga langsar ber pakhat midangte lungngaihna leh tuarna tawmpui chauh hi tarlangin hemi kawngah hian kohhran mipuite eng dinhmunah nge kan din in thlir teh ang

Khawtlangah chhiat tawh nikhua hian a phusa ber chu YMA an ni. Mahse a memberte chu kohhran mite vek tho kan ni a, hetah hian kohhran member a bikin hruaitu lamte hi kan indah hrang deuh thin em aw a tih theih. YMA hruaituten hnathawhkawr an hak laiin kohhran hruaitute chuan thingpui no an dawm thin an ti.Lal Isua Krista’n vengte hmangaih tura thu min pek chu a hmanna hun tur niawm takah kan inthiar fihlim a, kohhrana lang tam lutuk lo, khawlaia rui kawi vel mai maite tih awm tawk chauha kan dah deuh reuh thin hi chu Pathian duhzawng a nih a rinawm loh.

Lumen a ngaih zana lusun chhungte lungngaihna tawmpui a tul hunahte hian Kohhran hruaitu thenkhat chuan an fate an tir tha duh meuh lo, ‘ Zute an ina , sual an zir thin’ an ti hlauh! Hei hian a  tarlan chu mahni an inhmangaih lutuk tihna a ni. Miin an hmangaih nghawih ngawih leh an thlakhlelh ngawih ngawihte an sun a, lungngaihna namen lo an tawh laia ‘ Mami/Mama nang chu va tlaivar ve suh aw’ ti thin nu leh pate hian mahni vengte hi an hmangaih a rinawm loh.

Thihna meuh hi chu mihring tawha rapthlak ber a nih avangin khawhar ina lenkhawm leh bungraw senghawi vela tel tura fate tir ngai reng reng lo hi chuan Pathian thu hi a bukin an thelh a ni. Hetiang nu leh pate vang hian nakin lawkah chuan Tlaivar nachang hre lo, thlan laih nachang hre lo, khawhar ina kal nachang hre lo thalai kan pung tual tual anga inhmangaih tawnna pawh a bo tual tual bawk ang. Kan hun tawn mekah pawh chumi sawhkhawk chu kan tem daih tawh a ni.

Kan khawtlang hi nasa takin a sawp chhe tawh a, YMA lamin a beih let nan ‘Khawtlang nun siamthat’ tih chu kumpuanah an  hmang a, kohhran member tam tak erawh chuan kan ralthlir a ni.  Lal Isua Krista kha chuan khawvel chhe lutuk a hmuh khan a awm mai mai thei lova, a van ropuina zawng zawng hlipin a lo kal a, mite tan rawngbawl sakin amah a inhlan a… Kohhrante hian eng nge kan tih ve dawn le. YMA tih turah kan dah dawn em ni? Luhchilha siamthata dinthar leh hi kan tih tur a ni dawn lawm ni?

KTP memberte lek phei hi chu kan mihringpuiten tanpui an ngaih a, kan thlamuanna an thlakhlelh ngawih ngawih chuan va tlaivarpui a, an tana kan tih theih tawk va tih a, thlante va laihsaka, va inhlan hi kan rawngbawlna awm reng a ni, tunah chuan Tlaivar zak zak thin tam zawk hi chu rui chi an ni deuh vek a ni, KTP ten kan tih tur kan tih tawk loh vangin Lungte zawk an au chhuak a ni.

Kohhran member thenkhat chuan YMA,MZP etc-te hi kan hmu khawvel tlat a, an zinga tel pawh kan duh meuh lo, mahse heng mite hriat thelh thin chu kohhran hi huap zo a ni a, keimahni huang chhung mai ni lovin mi zawng zawng a huap zo a ni tih hi. Kohhran dika awm lote chauh hian mi an huap zo thin lo tih hi theihnghilh loh a tha hle.

Share

-----------------------------------------------------------------------
Similar Posts

• Kum thar Chibai
• HO MAI MAI (Mi mawl duhthusam!)
• INNEIHNA HI PATHIAN RUAT A NI
• LTP kan la tiam lo asin!
• Lo in ngaihtuah ve teh!

He thu hi Monday, March 1st, 2010 dar 4:51 pm a Articles, ETC, Religion . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.