Good Friday hian, sual a tlu tawh, boral tur mihring min chhandam turin Lal Isua khawvelah lo kalin, sual man min tlaksak turin a lo kal a ni tih hi, thawnthu mai lovin, a tak tak (historical fact) a nihzia minhriat tir a ni. Sual chu engnge ni? Bible chuan, “Sual chu Dan bawhchhiat hi a ni,” a ti a. Tupawh thil tisual apiangin Dan a bawhchhia a ni” tiin min hrilh bakah, “Sual man chu thihna a ni,” a ti a. Chuvangin, suala tlu tawh mihring te’n chatuan nun kan neih theih nan, SUAL man thihna chu Lal Isuan a tawrh a tul ta a ni.
Zirtirtu senior leh lehkha thiam tak pakhat chuan, “Pathian engkimtithei chuan, a Dan chu thlak danglam mai sela, Lal Isua thih a tul kher lo tur,” a ti a. A dik awm hle mai. Mahse Pathian engkimtithei chuan, tih theih loh a lo nei tlat mai. A Dan a thlak danglam thei lo. Chatuan atanga chatuan thleng pawhin a dan chu kum khua Van ramah leh lei tharah pawh a awm reng ang. Dan chu Pathianin thlak danglam thei nise, a fapa thih ai chuan a thlak danglam mai ang a, sual man min tlaksak turin a thih a tul lo vang.
“Ka pa, he no hi ka hnen ata la sawn lul rawh. Mahse keima thu ni lovin, nangma thu ni zawk rawh se,” tia Isuan thlaphang tak chunga a ngen lai khan Pathian chuan, a Dan thlak danglamin Isuan thihna chu a pumpelh mai tur a ni. Mahse “Lei leh van a ral ang a, ka thu erawh a boral lo vang” tih hi Pathian thuchhuak chu a ni. Dan thu ami chhun han te tak te pawh, lei leh van a boral hma chuan a boral lo vang. Chuvangin Good Friday hian Pathian Dan nghehzia min hriattir a, kumkhua pawhin a boral lo vang.
Friday-ah Isua a thi tih hi tuma phat theih loh thudik a ni a. Bible chuan “Inrinni, Chawlhni a ni lek lek tawh” tiin min ziak sak a.Friday zawhah chuan, Chawlhni lo thlengin Pathian Thupek, Ten Commandments angin an chawl ta a ni tih min hrilh avangin, ringtute Chawlhni, Sabbath chu Saturday – 7th Day hi a ni tih hi fiah takin a lo lang a ni. Ten Commandments-a Chawlhni min ziak sak hi, ringtute’n i ngai pawimawhin i serh ang u. Hei hi Sakhaw dang zawng zawng aia Kristiante danglamna a ni a, Pathian chhinchhiahna a ni. Ezk 20: 12, 20.
Hmanlai sualna avanga thihna anchhia lakah min tlan tawh a.Mahse tlanchhuaha kan awm hnu hian, Dan bawhchhiat phalna mihringte hnenah pek a ni lo va. Van rorelna hmaah mifela chhiar tur tumah awm dawn lo mah ila, mitinin kan hmabak theuhvah Pathian duhzawnga awmin sual dovin theih tawp chhuah theuhtura ruat kan ni. Pathiana mi piangthar tak takte chuan, Pathian an hmangaih tawh avangin, a duh zawnga awm hi, an hlimna leh lawmna a ni tawh a. Pathian duh loh zawng tih erawhchu, an tan thiltih hrehawmah a lo chang zawk tawh thin. An thinlunga Pathian hmangaihna luanglut avang chuan, Pathian duhzawng ang apianga awm chu an tan lawmna leh hlimna a lo ni thin a ni. Chu chu Piangtharte nun awmdan chu a ni. Nang leh kei kan piangthar ve tawh em?
Thisen chhuaka Kros-a thihna chu ngainepin engtin nge Dan bawhchhiat Sualnaah chuan kan awm reng theih ang?
Women’s Ministry
-----------------------------------------------------------------------
Similar Posts
- GOOD FRIDAY EARTHQUAKE – GOOD FRIDAY A LA NI TA ZEL?
- Nunna tui Krista – Lalhmangaihzuali, Tripura
- KRISTA KRAWS THILTIHTHEIHNA ! By Denis Lalfela
- Krista Kraws Thiltihtheihna! – Denis Lalfela
- Ka Rawn Puak Ve Phawng Mai a Ni.
He thu hi Friday, April 2nd, 2010 dar 12:01 am a Religion . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
