Mizo mipa zaithiam Vanlalsailova’n “Ka cell phone thawm alo ri a….” tih hla in mipui beng a tih tlai zia chu kan hre theuh awm e. Mahse kan cell phone thawm a rawn rik a, kan biak te hian hlimna min thlen vek kher lo tih chu kan hre theuh awm e. Lungngaihna phone call dawn chang a awm a, hlimna phone call kan dawn a awm chang pawh a awm thin awm e. Mahse kan cell phone hman service center atanga phone call kan dawn thin hi chuan hlimna leh lawmna, min ti nui tu a thlen hi chu a tam hian ka ring lo.

Buai em em laiin phone alo ri ral ral a, mi pawimawh tak emaw tiin rang lutuk in kan han phawrh ve a, mahse tu dang ni lovin Customer Care lam atanga vai nu alo ni leh thin hi chu thinrim tak tak te pawh kan awm thin tih chu keimah ni kan in hre vek awm e. He call hi a dawng zing deuh chuan nikhat ah vawi li vawi nga te an dawng thin ani awm asin!

Kan thianpa nu hian tum khat chu min hrilh a, “Ka in su a, ka phone a rawn ri a, phone nei thar tir tih takah, chutia call ka dawn ve chhun chu tiin ka insuk chu ka dah a, hmanhmawh tak mai hian ka phone ri chu chhang turin ka tlan chhuak a, ka la tawlhthlu zui!! Rang takin ka tho a, ka tluk vang a aw ka vin a chhan chu ni ber in ka hre bawk silo. Awka zang vah leh nem dap hian ka va Hello! ve talh talh a, mahse tu dang chu ni lovin, vai nu hian hnamdang tawng hian min lo chhang ta si a, ka thinrim dan chu sawi ngaihna pawh ka hrelo, vawin ni thleng hian kha min rawn phone na number kha ka mobile ah hian ka saved phah asin” tiin min hrilh a. Kum upa lam alo ni bawk nen service call vang mai mai a an tlu kha lo tlu na palh ta ang se a pawi thui theih tur zia te ka ngaihtuah in thil tul lo tak ni te pawhin ka hre thin.

Hetiang a rawn call/SMS thin hi tih bik ka nei chuang lova, a chhan chu connection ka hman tawh zawng zawng ah hian ti lo bik hi an awm ka hre tlat lo. Kan nau pakhat ve thung hi chuan SMS lamah buaina a tawk ve thung a, chu a buaina tawh chu ngaihthah chi ani in ka hre lo. Top-up a thun a, service lam atangin pawisa an rawn cut a, SMS a dawng a, pawisa an rawn cut leh a; an mahni atanga an duh vang reng pawh ni lo, ninawm ti tak chunga SMS rawn thleng thin vang a an pawisa an rawn paih zel hi chu a mak ka tiin hriatthiam a har ngawt in ka ring!! Number han thlak dawn se, a number lo hmansa thlak a ngaingam silo. Service lampang atanga SMS an dawn apiang a pawisa an chawi zel bawk si chuan hman reng tlakah kei chuan ka ngai hauh lo mai.

February ni 15, zing lam dar 2:15 a ni a, ka phone a rawn ri ta ral ral a, thinphu dawt dawt chungin zualko anih ngei dawn hi tiin khum atang chuan kan tho ta dawr dawr a, phone ka’n han la chu zualko ni lo chuan vai nu aw, Mizo tawng pawh nilo, Hindi ngei mai hian an service a rawn fak zal zal bawk chu alo ni leh a, ngawi reng in thinrim tak chung in ka phone chu ka dah a, mut leh tur chuan khum lam chu ka pan leh ta a, chutia zanlai a phone lo ri chuan mutmu pawh min tuah mumal tir ta mang lova a huatthla la duh kher mai.

Tuktin mai hian zing dar 9 leh dar 10 inkar hian SMS ka dawng ziah mai a, chu ka SMS dawn chu alo thlen darkar atang hian enge message nge anih, khawi atanga ka dawn nge tih hi ka sawi sual lo tlangpui. Ka bill zat min rawn remind tu hi ani deuh ngei ngei a ka tan hian he thil hian tangkaina a neih reng ka hre lo mai. Thlatin bill alo kal a, tah chuan ka bill zat chu a rawn lang vek zel a, tuktin mai a, ba thing ang zia zang a in hrilh tlut tlut mai chu patling pumpa SMS dawn a tan chuan a ho lampang deuh chu ani. A ninawm zia lah sawi thu a cheng lo.

Ram dang ah te zirna run sang bel in kan lo awm ve tawh thin a, nu leh pa chhung leh khat te’n cell phone neih loh ringawt chu a thalo e tiin kan han pai ri ve tat tat a. Aizawl a connection kan hman ang tho hi kan hmang ve a, mahse hetiang em em a service call ka dawn tam leh an in fakna SMS ka dawn tam hi ka hre ngailo. Phai lam a kan ho tu lian te hian an Mizo Customer te chungah hian hlri an lei ta bik emaw ni chu aw tih hial na te pawh ka nei rum rum thin. Kan ram a kan inbiak pawhna te hian mi ram a in biak pawh na rual an pawl phalo em ni tiin ka cell phone network tower phen atangin ka rawn chhakchhuak ve a ni e….

Share

-----------------------------------------------------------------------
Similar Posts

• Puii Zûn
• Aizawl Call Centre a hnathawk ten hlawh an la theilo
• Mi bum hmang man
• Tunlai mite nun ka hmuh ve dan
• El aw el!

He thu hi Wednesday, April 14th, 2010 dar 11:56 am a Articles . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.