Tholeh Krista hmingin chibai le. He khawvela hmangaih rawngbawlna chu hlenin, kan Lal leh Chhandamtu chuan thihna a hneh ta, halleluia! A vuakna vuala tihdam hringfate tan thlarau zalenna kawl a eng ta! Pathian thu chuan, “Atirin Thu a awm, Thu chu Pathian hnenah a awm, Thu chu Pathian a ni. Chu mi chu atirin Pathian hnenah a awm” (Johana 1:1-2) tih min hrilh a. A tir ata Pa hnena awm, Thu chu Lal Isua a ni. Sual hnehchhiaha awm hringfate tlan turin Thu chu Tisaa a lo chan a ngai ta! Thu chu Tisaah a lo chang a, kan zingah a awm ta a (Johana 1:14). Tichuan, “Pathian, hmasanga thlahtute hnena bung tam tak leh kawng tinrenga Zawlneitea thu lo sawitu khan, heng ni tawpah hian keimahni hnenah a Fapaah chuan thu a sawi ta” (Hebrai 1:1-2). Isua chu mihring famkim niin, sual lakah erawh a fihlim a ni.
Tidam thei hmangaihna nena rawngbawl hi Isua chaw tui ber a ni. Galili rama rawngbawlna atan dawn khan, Pathian Thlarau Thianghlima chhun khah a nihziate, riangvaite hnena Chanchin Tha puang tur a nihziate leh khawngaihna kum puang tura tirh a nihzia huai takin a sawi bawk a nih kha (Luka 4:18-19). Tidamtu Isua ruahmanna (project) ropui takah chuan mitin ten hmun an nei vek a ni. Khawtlanga mi tlaktlai lo, eiru thin nia an ngaih Mathaia leh Zakaia te pawhin dinhmun tha an chang tlat. Hmangaihna atanga chhuak rawngbawlna chuan misual berte a lo thleng phak thin a lo ni. Kohhranah drugs addict leh zu ngawlvei ten hmun an chang lo a nih ngai chuan Krista rilru kan tina ngawt ngei ang le! Rilru a tha leh fel in ti a, midang sit ran chunga rawngbawlna hi Lal hmaa din pui tlak a ni dawn si lova. Kan inchhir loh chuan Lal Isua thusawi, “Chhiahkhawntute leh nawhchizuarte chuan Pathian ramah an luh khalh dawn che u a nih hi” (Mathaia 21:31) tih hi kan chan tur a ni ngei ang le.
Mari Magdalini chanchin hian tidam thei hmangaihna ropuizia a tilang chiang ber mai. Bible mithiam thenkhat sawi danin a nun hmasa (khawvel) ah chhuan tur tehchiam a nei bik lo. Mari Magdalini kha hmeichhe awmherh ve tak, customer pawh nei ve tak a ni an ti. Chutianga pa pakhatin a mutpui man pek a tum lai chuan, Mari Magdalini chuan a lunglen thu a sawi a. Chu pa chuan Mari hnenah, “Hmana ka hmelhriat i tih, Isua kha kan khuaah a awm asin!” tiin a hrilh a. Mari Magdalini lawm lutuk chuan a tangka pali dawn pawh chu a paih darh vek a. A tlan ta vang vang a. Mipui tam tak hnunglam atangin Lal Isuan chhang leh sangha a tipung lai chu a va hmu hlauh mai a, a tap ta hawm hawm a. Isua biakna chance erawh a nei lo.
Pharisai pakhatin Lal Isua chaweiah a sawm hlauh mai a. Chutia an thut thap lai chuan hmeichhe pakhat (Mari Magdalini) a lo te lut a. Zirtirte pawhin an dang zo lo. In chhunga awm ten misual a nih thu an sawi luai luai laiin, Isua erawh chuan a thiltum chu hlen turin Mari Magdalini chu a sawm thung a. A sual avanga tap tawp thei lo, Mari Magdalini chuan Isua ke chu hriat rimtui fahran mai, man to tak mai chuan a chulh a. A samin a hru a (Luka 7:38). Tidam thei hmangaihna neitu Isua chuan ngaihdamna famkima thuamin thlarau damna a pe a. A lawm lutuk, tlan chhuak mai tur chu Isua chuan auvin, “Mari Magdalini, he hriak rimtui bur hi dah tha la, thlana min zalh dawn hunah ka taksaah chulh leh ang che aw” tiin a chah a. A zirtir atan a lo ruahman reng tih a chiang hle. Mi tawp leh nikhua lova an sawi hmeichhia kha, Isua tana mi tangkai, thlarau tam tak chhanchhuak tura zirtirte zinga rawngbawl ve tura thlan a ni ta! Pathian (logic) thil thlir dan hi a mak dangdai teh asin!
Easter tukah zirtirte hlauva an khurh laiin, Mari Magdalini chuan thlan lam a pan a. Lal Isua thlana an zalh hmaa hriak rimtui a chulh bakah, Tholeh Krista hmu hmasa bertu a ni ta! A lawm lutuk chu “Lalpa chu ka hmu ta” (Johana 20:18) tiin zirtirte a va hrilh a nih kha! Lal Isuan a kohnaah che hian lawm la, a hmangaih che avanga nang thlangtu che hian i mamawh a hria e. I chaklohna, hneh theih loh leh manganna pawh a hre vek. Tidamthei hmangaihna tlangaupuitu i nih theih nan kawng chhuk chho tak hmangin a chher hriam thin mai zawk che a ni. Thlawhna khalhtu (pilot) te pawh hi vansang boruak hlauhawm leh chhum zing mup mai an paltlang avanga chawimawi an ni. Lalpan a dahna che hi a tha tawk a, amah nen hma i sawn thei a. Amah nen thlarau tam tak i tidam thei a, ama zarah hneh theih loh nun chu i nei bawk ang. Kan tlinloh leh fellohna haider a, tidam thei hmangaihnaa min thuam thintu Tholeh Krista ropui ber se. A thawhlehna chuan hnehna nun leh beiseina thar min thlen theuh rawh se.
-----------------------------------------------------------------------
Similar Posts
- Sumeona
- KRISTIAN SAKHUA LEH MIZO HNAM SAKHUA DANGLAMNA
- Li thùk lamah deng zel rawh! – Denis Lalfela, Rome
- Lalpa thuin len i deng ang u! – Denis Lalfela, Rome
- Kohhran beihrual leh rawngbawlna – Denis Lalfela
He thu hi Saturday, April 3rd, 2010 dar 7:21 pm a Articles, Religion . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
