Tunlai in mi tam takin tarmit vuah a lo ngai ta a, tarmit vuah ngaih dan hi a inang hlawm lo a, kan mit pian dan a zir leh kan kum upat dan azirin tarmit chi hran kan mamawh thei a ni. Kan mit ah hian darthlalang pahnih a awm a, a pawnlang ber fim tak hi mit darthlalang kan tih ber hi a nia, tichuan, kan mit naute hnungah hian mit darthlalang dang a lo awm veleh a, he darthlalang pahnihna hi a ni upat hnua lo paw a (mit naute paw) khawhmuh lo ti fiah lo tu, zai that theih chi hi a ni.
Heng kan mit darthlalang te hian pawnlama kan thil hmuh te hi a lo siam rem a, kan mit hnung lama mit parda(retina) ah a hlimthla a va siam a, chu chu hriatna thazamin thluakah a va hriattir a, chutichuan kan lo hmu chiang thei thin a ni.
Mit thenkhatah chuan mit parda-ah hian hlimthla a va insiam fuh thei lo a, chhan hrang hrang a awm thei a, a chhan tam deuh ber chu mitmu sei zawng dang lam vang a ni. Mitmu hi a tawi lutuk emaw a sei lutuk emaw a ni thei a, a lo tawi lutuk chuan hlimthla kha mit parda hnung lam ah a insiam a, thil hmuh a lo fiah lo thin a, a sei lutuk chuan mitmu chhungah mit parda va thleng lovin hlimthla kha a lo insiam a, thil hmuh a lo fiah lo ta a ni. A chhan dang leh ah chuan kan mit darthlalang awmdan(curvature) azirin kan thil hmuh tur hlimthla kha mit parda hnung lamah maw mit parda hma lamah emaw a lo insiam in thil hmuh a lo fiah lo thin a ni.
Hetianga mit parda a hlimthla a insiam fuh loh avanga khawhmuh fiah lo hi tarmit nena siam rem theih a lo ni a, mit parda hnung lama hlimthla va insiam ho siam rem nan hian convex lens (plus power) a lo ngai a, mit parda hmalama hlimthla lo insiam ho siam rem nan hian concave lens (minus power) a lo ngai thin a ni.
Mi tam takin tunlai a tarmit mamawh kan lo tam ta hian television en tam leh computer hman tam vangah an ngai a, hei hi chu a dik lo deuh. Amaherawhchu mi hriselna lamah kan lo bengvar tawhin in ngaihtuah nachang te kan lo hre tawhin kan mit te pawh tun hma mi te ai chuan kan lo hmang nasa deuh bawk a (a then chu tul vang ni em em lo te pawhin), tarmit mamawhna hi chu tun hma ai chuan a lo sang ta deuh zawk a ni.
Heti anih rual hian kan mit te hi kan dim lovin duh chen chen TV emaw computer te kan thlir tur tihna erawh a ni chuang lo. Tv leh computer en tam hian mit-ah harsatna dang a thlen theih bakak kan taksa dang a tan pawh TV leh computer hma a reitak tak thut hi a tha chuang lo a ni. Computer kan thlir nasat chuan kan mit khap nachang hre lek lo a kan lo en thin avangin kan mita tui mit tihnawngtu kha a nih tur angin a lo insem rual tha lo a, mit ro a lo thlen thei a, mit a lo hnawn that loh chuan mit thip, mit kham, mittui tla, mit men nuam lo leh lu na te a siam thei a ni.
A hma a kan sawi tak chi hnih bakah khian mit darthlalang rual rem tawk loh avanga khawhmuh fiah lo a awm thei bawk a, heng pawh hi tarmit chi dang deuh athen lai chauh a power awm(cilyndrical) a tih fiah theih a ni. Hetiang ah pawh hian minus power leh plus power a awm thei ve ve.
A pali-na atan chuan mi-in kum 40 a lo tlin hnu hian a hnai hmuhfiah loh a lo nei thei thin a, hei hi a chhan chu kan mit chhung tha te an lo thum ve tawh vang a ni. Hemi atan hian chuan plus power hmanin thil hnai hmuhna chu a lo pui ve leh thei thin. Heng a lo nih tawh chuan kum a lo tam telh telhin tarmit power chu a lo pung chho ve thin. Thil hnai enna tur atana tarmit ho hi chu khaw thlir nan a hman tur a ni lo va. Mi tuin emaw tarmit a lo vuah sa anih chuan minus emaw plus emaw pawh ni se thil hnai enna tur kha a tarmit neihlai nen a kawp a siam mai chi a ni. A chungah khawhawina tur leh a hnuaiah thil hnai enna tur chi in. Mi in a hma-in minus power a lo hman chuan kum 40 pelhah tarmit tel loin thil hnai a hmu fiah veleh zawk thei.
Mi tam takin tarmit an han vuah dawn hian taima taka vuah vanga mit chu lo tha leh a, tarmit bun reng ngai lo turin an beisei thin a, tarmit power tlem deuh ah hian chuan vuah lem lo a awm pawhin a lo zia awm ve thei thin a, mahse a power sang deuh chinah hian chuan vuah reng a ngai thin. Naupang lamah hian an tet laia plus power hmang ho hian an lo len deuh in an mit a lo thang tha ve thei thin. Minus power hmang ho ah erawh hi chuan an tarmit power hian an taksa than a kin hma chuan san lam a pan tlangpui. Taksa than a lo tawp hnu chuan tarmit power pawh a lo tam belh vak tawh thin lo. Heti a nih avang hian tarmit vuah ho tan chuan a khat tawka in entir thin hi a tha a ni.
-----------------------------------------------------------------------
Similar Posts
- Mitdelna leh a chhante – Dr.Lalbiaktluangi M.S (Eye)
- MIT CHUNGCHANGA NGAIHDAN DIKLO
- GLAUCOMA(MIT BP SANG)-Dr. Lalbiaktluangi M.S (Eye)
- Aizawl ah tui harsa dawn??
- I bike a bo ve tawh em?
He thu hi Tuesday, September 21st, 2010 dar 9:30 pm a Articles, Health . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
