“Mangan ni-ah chuan mi ko la, ka chhanhim ang che. Tichuan nangin mi chawimawi dawn nia a ti a.” Sam 50:15
Rom Lalber, Marcus Aurelius-a chu Rom dotu hmar lam ram tangrual sipaiho chuan an hual bet tlat mai a. Rom sipaiho chan chu a chhe tawh hle a ni. An rawn bei thut thin a ni ringawt lo; ei leh in tur an nei tawh lo a ni.
Marcus-a chuan, “Pathianten min tanpui a nih ngawt loh chuan beisei a bo ta. In hote kha din tlartir ula, Jupitar leh Mars pathiante hnenah min tanpui theih takin tawngtai rawh se,” a ti a. Mahse ni li zet an tawngtai hnu-ah pawh chhanna a la awm chuang lo. A ni ngana-ah Lalber chuan Kristian hlang awmna, Militine Regiment-ho chu a kova. “Kan pathiante chuan min chhang duh ta lo. In Pathian chu pathian awm chhun nia sawiin kan pathiante hi in be duh lo va, in Pathian hnena tanpuina dil turin ka ti che u a ni,” a ti a.
Sipaiho chu camp atanga hla vak lovah kal sawnin hetiang hian an va tawngtai ta a. “Lalpa, Isua Krista hmingin I hnen kan rawn pan e. A hminga kan dil apiang min pek I tiam a. Khawngaih takin ruah rawn surtir la, Pathian nung I nihzia chu han lantir teh. Kan Lalber hi malsawm la, amah leh a sipaite hnenah vawiin hian zahngaihna lantir ang che. Lalpa, khawngaihtakin ruah rawn surtir rawh,” tiin.
Chawp leh chilhin kawlkilah chhum dum a rawn let but but a, ruah chu a rawn sur ta buan buan mai a. Kawl a phe a, khawpui a ri dur dur bawk a. Lalber chuan hemi tuma a thil tawn hi Rome-a roreltute hnenah ti hian a ziak nghe nghe:
“Hmelmate bei zel thei rual kan ni lo tih ka hriat chuan kan pathiante chu ka au va; min chhang si lo. Min hual reng si avangin mi thenkhat, Kristian kan tihho chu ka ko ta a….. Hengho, misual tak nia kan lo ngaih thinte hi tunah chuan thinlung taka Pathian dik betuah kan ngai ta. Leiah bawkkhupin ka tan chauh ni lo, sipaiho zawng zawng tan an dil a. Kan eitur leh intur tlakchhamna lak atanga min chhanchhuak turin an dil a… Bawkkhupin ka la hriat ngai loh Pathian hnenah chuan an tawngtai a. A hnu lawkah chuan ruah vawt nuam tak mai hi a rawn sur ta a. Kan hmelmate chu rial, leh tek leh khawpuiin a nuai nek thung a. Chuvangin heng mite hi Kristian nih kan phalsak ta a ni. Chutilo chu an tawngtai ang a, hrem kan tawk mai palh ang e,” tiin. Fox’s Book of Martyrs, p. 59
In vengah harsatna tawk mek an awm em? An tan in tawngtaina khan thil awmzia a tidanglam vek thei tih hriatreng hi a pawimawh hle. Harsatna tawh laia mi tan kan tawngtaina hi Pathian kan chawimawina ropui tak a ni.
Women’s Ministry, First Mizo SDA Church
Courtesy: Dorothy Watts
-----------------------------------------------------------------------
Similar Posts
-----------------------------------------------------------------------
He thu hi Sunday, October 24th, 2010 dar 12:34 am a Religion . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.
