Tirhkoh Paula chuan Rom khuaah te, Korinth khuaah te leh khaw dang dangah lehkhathawn tha tak tak a thawn a, keia lehkhathawn ve hi zawng thu fahrah te te hlir a ni e.

Nu leh pa duh tak,
He ka lehkhathawn tlawm tak hi uluk takin lo chhiar la, hringnun darthlalangah hian tunge i nih chiah i inen ngam dawn em? I ngam chuan chhiar rawh le…

Khaile, pehhel kual vel loin hei le… I fanu/fapa kha ni ve ta la, tuna i enkawl dan leh i nundan chiah khan enkawlna dawng ve ta la, nuam i ti ang nge, “Hremhmun a ni ringawt a lawm” i ti zawk ang? I fate dinhmunah khan indintir chhin teh, an tan pa tha tak i ni ang em? I fate ngaihtuahna anga ngaihtuahpui thiamna i nei em? I thu zawmtir tlat i tum a, anmahni ang rual i nihin i nu leh pa thu i zawm tlat bik em? Nangmah avangin an thawveng nge an thawpik? Tu emaw bula i awm hian hrehawm i ti riau ngai em? I bula awm te hian hrehawm an ti riau thei tih i ngaihtuah ngai em? I thinrim i hrik thlak na tur te, chhiahhlawh cheia i thawh peih loh zawng zawng i thawh tir tura Pathian pek che an ni lo. Malsawmna an nih kha!

“Tunlai thalaite inchei duh dan hi chu aw… Dinga lai lang, thuta ngum lang, a kekawr reng a kap a fual mai, a samte saw Tluk Leh Ding Awn a ni ringawt alawm, mut nachang hre si lo, thawh nachang hre si lo, zing thawh bak thawh nei lo,” tiin kan sel maw? He darthlalangah hian lo in en teh. I thatlai hunin eng tin nge i inchei bik? A zuih, a arh hunlai ten i ti lo bik em? I samte pawh mipa si khan bal hneng hnuangin i zuah ve tho em? Beatles shoe nen jeans tight tak hain Khaini i ak puar ve lang thin em? Thalai nundan i sawisel hmain heng zawng zawng hi inzawt hmasa ve phawt rawh.

I nulat lai, i tlangval lai khawvel leh tun inkarah hian kum engzat nge ral tawh? In hunlai leh vawiin chu chhim leh hmar ang a ni. In hunlai milin thil zawng zawng hi teh suh. I teh dik vek ngai lo ang!

Kan fate dawtin kan chawm seilian a, thla (moon) laksak thei niin kan insawi ‘champ’ a. Hmai kawr vuahin fate kan counselling a. Enge a hrin? A hun hmain driving license kan nei a, a hun tawhah kan pension leh thei si lo! Kohhran leh khawtlang hi lemchanna tualzawl emaw kan ti a, lemchan thiam inchuhin kan hmanhlel a nih ber hi maw le.

Huho nuna pawimawh ber chu INHRIATTHIAM tawnna hi a ni. I fate kha hriatthiamna nen i enkawl nge? Lal hrawt nan i hmang zawk? Pathian hian hriat thiamnain min enkawl lo ta se, vawiin hmu thei hi kan awm kher ang em? I ngaihtuahna ang leh i lo tawn tawh ang kha i fate khan an la tawng ve lo. Nang aia khawvel la hmang rei lo zawk an nih tlat vang alawm. Chuti ang ni loa i lo tawn tawh leh i lo hriat tawh ang zawng zawnga i enkawl a nih vaih chuan i tum loh deuhin i fate an awm ang?

I fate tlin lohna lai i hriat ang bawk hian i faten i tlin lohna sawi tur an hria. I fate sawiselna tur i ngah ang bawk khan sawiselna tur che an ngah ve tho asin! Nu leh pa zawng zawng hian fa tha neih kan duh vek. Mahse, kan enkawl danin a zir em? Eng anga tha paw’n enkawl mahila kan hmuh phak loa an awm hi a tam si a, kan hmuh phak loa an awm lai pawha veng theitu Pathian hnenah hlan reng mai ila…..

Share

-----------------------------------------------------------------------
Similar Posts

• Dawn a ti sei ngei e!
• Joba tawrhna leh ringtu nun – John Zosiama
• Chhungkua hi engtin nge i lo din ve le? – Marem
• NH 54 Lamtluang-ah PWD fakna chhan tur ka hre love : By Lalhmunzauva
• Pathian chhanchhuahna chu lo thlir ve ta che.

He thu hi Thursday, October 7th, 2010 dar 10:24 pm a Articles . a dah luh a ni a, a hnu chhui zel duh tan hetah hian RSS 2.0 a theih e. Ngaihdan i neih chuan hetah, hian rawn thawh la, Hnuchhui leh dawn chuan hetah hian rawn kai rawh.