Union Agriculture Minister Sharad Pawar chu April 29 chawhma khan Lengpui Airport lo thlengin, Chief Minister Pu Lal Thanhawla chuan Airportah hian alo hmuak a. Union Minister lo zin chhan ber, Mizote lo neih dan a hmuna rawn en chu Lengpui khawdaia lo neihna hmun ( jhum cultivation area) a tlawh nghal.
April ni 29 zan dar 8 : 30 pm vel khan Bairabi Rel station bulah kangmei a chhuak a, chhungkaw 12 In luahlai leh Dawr atana luah In 5 te chu bungraw chuh hman lohvin a kangral vek a thi leh hliam an awmlo. Bairabi a kangmei chhuahna chhan hi In pakhat Pu Vanlalthlana In atanga Current put (short circuit) vang niin an ngai a. Bungraw chhe tamtak zingah Kolasib – Bairabi Sumo tlan lai Pu Vanlalthlana ta chu a kang chhe hneh hle a. Vawk 3, Kel 1, leh Ui pakhat an kanhlum bakah eirawngbawlna Gas bur 7 a kangral bawk.
NERIST Entrance Examination petu te, A hmasain hlawhtling taka in exam theuh theih nan NMZP hmingin duhsakna kan hlan a che u.
(kan naute emaw kan thinte leh kan chhungte leh kan hmehriatte an awm a nih chuan lo hrilh ila a tha awm e)
NERIST MIZO ZIRLAI PAWL (NMZP) chuan NORTH EASTERN REGIONAL INSTITUTE OF SCIENCE AND TECHNOLOGY (NERIST)-a B.Tech leh B.Sc. zirtur ten harsatna leh buaina tam zawk kan pumpelh theih nan heng a hnuaia mite hi NERIST-a kal turte hriat atan kan han tarlang a ni e.
Tualbung khuaah unau nula 2 a ni zawna natna in anga an thih avangin mipui an chi-ai hle. Tualbung VCP Pu Thinlaihnema hnen atanga kan palaiin thu a dawn danin Pathianni leh a tuk Thawhtanni khan an khuaa Pu lalbiakmawia fate nula pahnih an thi a, Pathianni khan a naupang zawk Lalmawizuali kum 17 mi chu a thi a, a tuk thlan nghahni zanah a u Laltanpuii (21) chu natna ngai chiahin a thi ve leh a, an khua a sik a, an kua a thalo a, an pum a na a, reiloteah an thi ta mai a ni.
Sawrkar kum kalta, 2010 – 2011 chhungin Taxation Department, Serchhip Zone chuan chhiah chi hrang hrang an lakkhawm atangin cheng nuai 96 chuang an hmu a, Serchhip Zone hian hemi chhunga an Target chu cheng nuai 4 chuangin an khum a ni. April 26 khan Pu Lalthachianga, Superintendent of Taxes, Serchhip Zone chuan a Office-ah tualchhung chanchinbumite kâwmin, he thu hi a sawi a, nikum chhung khan Serchhip Zone hi target atan cheng nuai 92 siamsak an ni a, an target hi khumin, `96,00,685.00 a hmu a ni.
April 26 hi Mizorama Chhandamna Sipai pawl din cham vawi 94 na a ni a, Mizoram puma chhandamna Sipai pawl chuan he hun hi urhsun takin an hmang a, Central North Division SAY te chuan he ni pual hian Aizawl Civil Hosptal a hman atan thisen an pe bawk. Chhandamna Sipai Pawl hi a dinchhuaktu William Booth-a chuan kum 1865 khan London ah a din a, hemi hnu kum 17 zet liam hnu kum 1882 khan India ram ah a ding tana, Mizoram ah chuan hmuchhuaktu in Sipai Pawl a din atanga kum 52 hnu kum 1917 khan Lieutenant Kawlkhuma’n a din veleh a ni.
April 26 zing dar 8:15 vel khan Republic Veng ah Nausen thi chu Tuihawk luankawr ah thi a chhar a ni. Nausen thi an chhar na hmun hi Republic veng Zawngtah Tuikhur lui (Kela road)-niin, Nausen hi thla 5 mi vel ni a rin ani a,Police-ah report nghal niin Police te hian nausen ruang hi enfiah turin an la nghala he chanchin buatsaih lai hian nausen hi tu paih nge tih hriat a ni lo. tuna nausen ruang an chhar na Tuihawk luankawr ah vek hian tlem lai deuh khan nautih tlak ruang an lo paih tawh bawk niin kan palai chuan thu a dawng ani.
Serchhip Jawaharlal Nehru Hospital-a Doctor leh thawktu dang indaih lohna phuhruk nan Doctor 4 dil belh tum a ni a, May ni 13-a Serchhip damdawi in kum 50 tlin champha (Golden Jubilee) lawm turin inbuatsaihna kalpui mek a ni. Inrinni khan Serchhip Damdawi in-a Doctor leh thawktu dangte indaih lohna chungchang leh harsatna sutkian dan tur chungchang sawiho-in inkawmhona neih a ni a, he inkawmhonaah hian Serchhip damdawi in-a thawktute leh Serchhip Block Congress hruaitute bakah tualchhung chanchinbumi thenkhat te an tel a ni.
(He thu hi LHminga Hlawndo min rawn thawn a ni a, in lo chhiar ve atan ka it em a, aphalna lain ka rawn post a ni e. “Thlamuanna Thuchah ” Upa Lalthankima, Dawrpui Vengthar atang lak chawn a ni,)
KAN EASTER LILY
“Mi Nung a chu ka ni, ka lo thi a; nimahsela ngai teh, kumkhua atan ka lo nung leh ta a ni.” (Thupuan 1:18)
March 29, 1983-a ka zing tho chu ka zangkhai hle mai. Kan hulhliapa thutthlengah ka thu a, kan hawi vel a. Kan tual kovah chuan pangpar a lo par buk luai mai a, a mawi ngei mai. Easter Lily a ni. Thawhlehna pangpar a ni. A bul chu purun bul ang hi a ni a. Lei chhungah rei tak, ral ta vek ang maiin a awm a, a hunah a lo chawr chhuak leh a. Tunah hian Lalpa thawhlehna puang chhuak turin a lo par ta. Ka va lawm em! Ka sawi fiah thiam loh chu an nunin an rawn sawi fiah ta. Pathian ringtu chu leia phum tawh pawh nungin an la par chhuak leh vek dawn tih an entir a ni.
More >>>>
