Sept. 30 zing dar 6:50 vel khan Sairang Kurung lei thlang, Kurungluiah hmeichhe bawp dinglam chhar a ni. Kurungluia mihring bawp an chhar hi hmeichhe bawp niin a lang a, a kumkuruh dinglam telin a mal leh chawn velah hliamdang a awm hran lo. A kezungpui a ruh langin a sawp tih a hriat theih niin an sawi. Sairang VCP Pu Vanchunglura chuan “Sairang hi kan khaw awmnain a zir vang tepawh a ni a, ruang chhar tih vel hi kan tawng hnem ve ta hle a, hetianga mihring taksa bunghrang tlahlang chhar hi kan la neih awm ka hrelo. A landan atang hi chuan tan bun a nih a rinawm hle mai a, rilruah chuan Zuangtui nula bo te pawh kha a dap thleng rum rum mai. Bawp liantha tak a ni” a ti. Kurung luia hmeichhe bawp dinglam ni a hriat chhar hi Police leh khawtlang hruaitu ten an enchiang mek..
Recent Comments:
USER
Categories
Archives
Sept. 29 zing dar 2 vel khan Aizawl atanga Guwahati pan Amosa Sumo Service chu Silchar pelh hnu, Silchar atanga km 13 vela hlaah misual ten an suam. Misual te hian he Sumo-a chuang Mizo hmeichhe 7 leh Khasi hmeichhe 3 bakah Sumo Driver Malsawmkima thil neih an laksak a, a tangkafaia an laksak zawng zawng chu Cheng nuaikhat singhnih leh 163 a tlinga, thildang an laksak te chu Mobile phone 8, rangkachak thi, ATM Card, Electors Photo Identity Card, Sana leh an thil neih dang te a ni. Thu dawn danin suam an nih hnu hian Passengers-te chuan an chuanna Sumo hmangin Silchar-a Mizoram House an pan a, LO an hrilh dan chuan heng misual te hi mi 15 vel an ni a, tualchher silai ni awm tak pakhat, chem, tiang leh chemte te an keng a, truck pakhat 1109 Model chu an suamna hmunah hian kawngkham zawngin an dah a, hemi hmun an thlen veleh misual te hian an chuanna motor chu an hual nghal a, driver chu motor atangin an pawt chhuak a, motor chabi an dil a, hetih lai tak hian a hnunglam atangin a tukhumah an vaw nghal a, nikhaw hre lovin Driver hi a tlu a, nikhua a hriat leh chuan an lo suam zo tawh a ni.
Ngopa bul Teikhang khuaa Storekeeper thawk lai mek Pu Pachhunga Chhangte (kum 52 vel niin an sawi) Aizawl Tuikual ‘N’ chu Sept. 27 dar 10 vel khan Teikhang thlanmual thar thlang lama pukah thi-a chhar a ni a, a luah silaia kahna hnuhma a awm. In atanga a chhuah dan nena an chhutin Teikhang khawtlang hruaitute chuan amah leh amah a inkaphlum nia rinna an nei. Teikhang YMA President T Khaikhansuana hnen atanga thu danin Pachhunga hi Sept. 27 zing khawvar hma khan a silai ulhbun nen an In atangin a chhuak a, tlai khaw thim thleng khan ala haw loh avangin a chhungte ngaihthalo chuan khawtlang an pun a, mi tlawmngai ten zanah an zawn hnuah Forest Reserve ram chhung, thlanmual thar thlang pukah thiin an hmu ta a ni.
via FB Chanchinthar : Sept. 26 chawhnu dar 1;10 velah khan Aizawl-Sangau Sumo TMS MZ-03-2505 chu Serchhip – Keitum inkarah a chesual a, vanneihthlak takinh thi an awmlo hlauh. Sumo ah hian mi 10 an chuang a, hmeichhia 6 leh mipa 4 an ni, Sumo driver hi Lalrinfela a ni a, he sumo hi Pu Rothanga Sangau ta a ni. Serchhip leh Keitum a mi tlawmngai ten hliam te hi dar 2:50 vel khan an la chhuak kim thei a, hliam zingah hian Suimoii leh Rohmingsnagi te chu a nazual deuh an ni. Midang pawh hliam an awm nual. Sumo chetsual chhan hi kawng kawiah N.Vanlaiphai Sumo nen an inpel chu Sangau Sumo hi a ke lamah chian kuanlohna a awm avangin a kaul zo lovin a tlanliam ta a ni.
Vanglaini : MNF party chuan, Assam Rifles ram chhungah Thanzauva s/o Lalthanhawla, Zarkawt tih hmingin LSC a awm thu an tarlang a, he mi chungchang hi sawifiah turin Chief Minister Lal Thanhawla an phût. MNF thuchhuah chuan, CM Lal Thanhawla’n September 16-a Congress Bhavan-a a thusawinaah, ‘AR ramah LSC nei an lo awm chuan kan endik ang… AR luahlai ramah hian civil lam thuneitute’n ram an nei thiang lo’ tiin a sawi tih a tarlang a; “Chief Minister hi sipai ram luah chhunga LSC neitute zingah, Thanzauva s/o Lalthanhawla, Zarkawt, LSC No-19/85, Area 3315.26 sq.ft. neitu hi tu nge a nih sawifiah turin kan phût a ni,” an ti.
Zawlaidi siamtu, Grape grower’s Society te chuan, an Zawlaidi siam te hralh chhuah theih turin um thahnem tak an peih fel tawh a, nimahsela, sorkarin nikum lam aia nasa taka an rate a tihhniam sak avangin, rate thar siamsak an nih hma chuan, an Zawlaidi siam chhuahte mipui hnen-ah an hralh chhuak dawnlo tih an sawi. Hemi chungchang-a Champhai leh Hnahlana Grape grower’s Society hruaitute hnen atanga thudawn danin zawlaidi man sorkar lam in nikum lam aia tihhniam tura a tih chu kuthnathawktute hmuhsitna lian tak nia an society chuan an ngaih thu an sawi a, nikum lam cheng 137 a society te pek chhuahna rate chu kumin hian cheng 102 a pe chhuak turin rate bituk sak an nih thu an sawi.
Sept 20 khan Zarzosanga Sailutar khua leh a thiante pahnih Hruaitluanga Aizawl Durtlang leh Lawmvela Manipur Parbung khua te chu Sailutar ram Tuitlaluiah lui an kal a, an hawn lam hian tlai ruahsur nasa tak rawn thawk avang khan an kalna zawn kawngchhak a rawn min thut mai a, lei tawlh hian Zarzosanga thiante pahnih Hruaitluanga leh Lawmvela te chu a hnawl ta a ni. Zarzosanga hian Hruaitluanga hi a hnukchhuak hman hram a, Lawmvela erawh hi chu leimin hian a hawl pil ta a ni. Zarzosanga hian a thianpa hliam natak tuar Hruaitluanga chu ramhnuaiah kalsanin, Sailutar khuaah a han zualkoa, he chanchin buatsaih lai hian Hruaitluanga hruaichhuaka leiminin a chhilh Lawmvela ruang zawn hna thawk turin Sailutar atangin tlawmngaiin ram lam an pan mek niin thu dawnna chuan a sawi.
Sept. 20 thimhlima ruahsur nasa tak avangin Aizawl khawpui hmun hrang hrangah harsatna thleng a awm nual. Dar 6 vel khan Zonuam Govt. Complex road-a Pu Zoramthanga te chhungkua chuan an zanriah chawhmeh tur an la chhuang mek a, ruahbawhawk a rawn tlak khan an kawmchhak leimin rawn tawlh chuan an kawngkharpui chu a rawn ti ri thrawt thrawt a, pa ber Pu Zoramthanga chuan an kawngkharpui hawn a han tum chuan pawn lama leimin chuan a rawn chhilh bet tan tawh a, theih tawp chhuah a a han tlawh thuai thuai hnu chuan tlanchhuah theihna khawpin a chhuih hawng thei ta a, hmanhmawh takin an chhungkaw member 6 te chu pawnah an chhuak thei ta a ni. An eirawngbawl mekna gas an off lo tih hriain Pu Zoramthanga chu hmanhmawh takin inchhungah a tlanlut leh a, Gas a off a, a tlanchhuak leh hmanchiah tihin leimin nasa tak rawn thawk leh chuan an inluah lai chu thlanglamah an inchhung bungrua zawng zawng nen a hnawl liam ta a ni.
Sept. 19 chawhnu dar1:30 vel khan Vairengte Chhim veng tlaklama Chhuahchhe veng an tih mai thin Pu Kanchha bathlarah naute pianghlim chhar ani. Pu Kanchha nupui Pi Lalchhuangi chu inthiarin ekinah a kala a kal lam chuan naute hi a la awmlo. A inthiarzo ina a lut leh tur chuan puana thilfun bathlar chep taka lo let chu a hmua, a chet deuh avangin naupangin uite puanin an tuamah angai deuha, a han enchian chuan mihring naute pianghlim hmel a han hmuta maia, a tre nghal chula thenawm an rawn tlan khawma Police an hrilh ta ani. He naute hi a chhung zawkah puanhlap pangngaia tuam ani a, a pawn zawkah puankawpa tuam leh ani. A pianhlim te-a helai hmuna hnutchhiah hi anih rin ani. Naute hi Vairengte Damdawiinah dahluh nghal ani a, mipa kg 3 a rit a ni a, a hriselna pawh a tha viau rih niin thudwnna chuan a sawi a, thlakima piang a nih rin ani. A hringtu nu hi tunge anih hriat a la nilo
