Patling rualin sirkhen film kan han en zet zawng, ke pahnih hlang meuhvin thuthlengseiah kan thutung ang fer fur a, kawr awm zawr hnupin chilthli kan luantir nguah nguah mai a nih kha! Puitling film meuh en tur chuan patling pawh kan lo la naupang chhia tlang teh e maw! Kha ennawm atang khan mipa theuh theuh nih vang ngawt hian kan neih a lo inchen vek lem lo tihte ka hmuchhuak tawh a, Zopa mualpho titam mai mai en fo chi pawh a ni dawn em ni aw tihte a ni ka ngaihtuah tak chu, kan en leh a nih pawhin nupuite tel lo bawka en leh chi a ni ang; chuti a nih loh zawngin min sit haw dawn e mai! Chubakah kan en laia pitar kelchal tia awrh mai meilum ai lai Pu Leta’n a lo itmelh nget nget mai leh kei ngei pawn kan en zawh hlima kawtlaia bawngpui bawk ka hmuh keu tak vuh dante ngaihtuah let chuan kan khaw mipa ralkai chin ngawt pawh hi Pu Thangzauva hian puitling film min han khilai zeuh zeuh ta se kar lovah ran mai bakah tar zawng zawng pawh hi chhungkhung vek an ngai ang tih ka hmu lawk vek mai! A nawlpui ang a en phei chu tih chi a ni lo vang.

Khatia puitling film kan han en ve kha nupa nun hlimna atan emaw, helama kan hriatna tihzauh na’n ti a rilru nei ren rawna en kan ni lem lo va, sapho mipat hmeichhiat sualna kawnga an lo pen thui tawh zia leh an thlarau chhanchhuah a ngaih tawh zia zirchian tuma en phei chu kan ni lo lehzual! Zep nak chuan maw, rawp vang liau liau a en kha kan nia, mit chakna puitlin tir bak chu beisei dang kan nei lo!

Kan beisei ber lah chu kan han hmuchiang em em khawp, ti ila kan beisei phak piah lam daih kan hmu a ni zawk, mitthla a puitling film kan lo suangtuah lawk ve dan nen chuan inthlau vai vai tak a ni! Sairawkherh nen perhthluk ngei tuma Ramar a kawngtuma lo chan ve ran ran laiin Zukchal chang chhuak ta luau  mai ila, chutiang vel chu kan ni awm e, kan lo mitthla lawk ve kha puitling film a nih ngai chuan kan en kha chu ‘Upa pawl film’ a ni ngei ang! Thosilen hnuaiah, naupangho tihharh hlau tak leh kut lehlam a khumza kau thawm chhuah tur dawm bet chungin an bung ve tura lo suangtuah laiin chhun pachangah, chutah choka chhuatah lehnghal, thenawm zawng zawng hriat phak hial tura hlado nen meuhva huk dum dum chungin an inlim ta awrh awrh mai kha a nia, a lehlingin min barakhaih chiang kher a sin aw!

Khati khawpa kan mit chakna tihpuitlin a nih tawh aliama beisei dang kan lo neih tawh miah loh laiin kan film ropui en chuan lukhawng a nei zui ta zel mai a, ‘Lungte pakhata sava pahnih vawmthla’ tih tawngkam hi chu lo hre ve tawh thin mah ila kei, mizo pa azawnga ramvachal lo ber mai chuan engti kawng mahin vawmthlak ve theih hi ka lo inbeisei ngai lo, mahse he puitling film en vang ringawt hian pahnih, pathum mai pawh ni lo, ka vawmthla ta mawlh mawlh a nih ber hi.

Pu Thangzauva duhsakna vanga puitling film kan en zara keini ang, engtik lai maha thukhawchang tu bengkhawn hlawh phuh chhuak ngai lovin khaw khat parawn nihna kan han chang ve ringawt pawh hi beisei phak loh chawimawina a nia, rawn kan hlawhna erawh a van lawn kawng lampang ni lovin zan lawn panna lamlian chungchangah a ni thung. Mahse hei ringawt pawh hi keini ang duang tan chuan ran lu kima aih tham a ni.

Puitling film-in kan khua a rawn luh thu leh a entu awmchhun kan nih thute chuan kar lovah khua a dengchhuak thuai a, inrinni zan vai film mai mai en chang pawha a tuk chawlhni inkhawmna thlenga achangtunu lam thiamzia, achangtunu pa sual thiamzia leh achangtupa back kick mawizia nen lam detail tak meuha sep zui thin khua chuan film ropui kan en chungchang kan sawichhuah hun chu Judate’n Messiah an nghahhlelh tluk zeta nghakhlelin an lo ngaichang ta thuap mai a nih chu!

Hetiang taka a khaw rawpa zahmawh kan lo rawp mai hi chu mak ka ti ve deuh thin. Kan khawlai lengte hian zawhna mak pui pui dawngin, a mawl deuhvin min zawt lung lung a, intifing deuh chin hi chuan min zawt sep sep a, min zawt melh melh an awm bawk. Hetiang lampang ngaihsak lo leh pa intifekfawn tak tak ni a ka lo ngaihte hian midang an awm tawh loh chuan mi hi an zawt leh fuk fuk thin.

A hma zawnga hnuai en tak maia min kal pel ngak ngak thinte’na hetia ka hriatna lo zau tak thut vanga min han tlawn ta hurh ringawt maite pawh hi nuam ve tak chu a ni! Buhdengkhawl neitupa pawh hi kan khuaa buh thar tam ho chu tlawn hurh mai, keini pahmei buh mai mai chu her turin va keng ve mah ila mi nghah khawthim tir thak thak mai thin a nia, mahse hetia parawnkai ka lo nih tak chinah hi chuan an nu a lo tih tlan sek nachhan pawh hi zanlawn kawng a bo vanga an intih thiam loh thin vang a lo ni tih hi naupang ho buh her an rawn lehlan ran tak dan atang hian ka hrethiam ta mai.

Kan dinhmun chu hetiang vel hi a nih laiin kei lah hi nihna lo ang deuhva han lanchhuahte chu ka englo then vena zawng tak a lo ni vei roh pek a, kan khaw pahovin khabe uai duaia vainu lam lai chawn lang palh chang reng renga chitrahaar an en thup laite chuan nep tih hmel fahranin Bangladesh news ente ka’n lo rawt tlat ang a, Zeenat Aman poster-te chu mamawh hmel tawh lo fahranin vaihlo fun na’nte kan hmang vel thul, kan khaw paho chuan chu’ng thil ropui zawng zawng pawh min hnualsuattir theitu, chu puitling film chu engtiang fakauva ropui nge ni ang aw tih chu an suangtuah zui a, en phak chin chu min ngaisang awt awt tawh mai a, a rawp apiangin mi ngaisang zual a ni tawh mai! Mahse a nihna takah chuan he puitling film kan en vang hian Pu Thangzauva bawngpui pawh kan hmu Hema Malini vuh tawh zawk kha a ni reng sia!

Tichuan induh deuh bar leh sawichhuah ui hmel taka langin puitling film sermon chu kan han thlak chho sep sep tan ta a, pawnpui hnuai nupa awmdan mawi chu hre ber tawh tura ngaih kan nih angin kan thusawi reng reng chuan zawm a hlawh a, kan titi chu zanlamah pahovin an lo bawh zui thuai thuai a, duh ang ang kan phuah belh ve bawk a, ‘Puitling film-a an tih dan’ kan tih tawh chu a kawi a ngila lo practice ve zel an tum vang hian duh leh zan lai laiah patling khumlu-ah kan inrulpuiludin tir a, duh leh nu ber ball boot nen kan mut tir tup tawh mai a ni.

Hetiang hian a langa sawichhuah ni si lovin puitling film thlipui chuan kan khua min nuai a, pahovin kan thurawn apiang zawm thuai thuai an lo duhna vang chuan zan lamah naupangho lehkha zir hun tih tawi sakin a awm a, hma taka pawnto thawm lo daiin khumpui lamah erawh zan reh tak tak a awm ta meuh lo.

Kan khua hi mi berh te te awmkhawm ve mai kan nih avang hian in nghet tha tlet tlawt nei hi chu kut tang thliaka chhiar tham lek an la ni a, kan khumte lah hi Baktawng pa Nghaka Jeep an sawi ang mai, han che hlek ila a ri tluar tluar mai zel a, heti a nih vang hian pahovin chhungkaw tipung tura kan hma la thawm hi thup theih tak tak a ni lo. In inhnaih deuhte phei chuan thenawmte chhang neih hun tur hi siam lai atangin kan inhriatpui kur mai zel a, “Tun tum chu an thawm atangin mipa an nei ngei ang maw le,” tite hian mu chungin kan lo suangtuah pui ve mai mai thin. A dik thei phian lehnghal a!

Hetiang taka in leh khum nghet neih lama kan pachhiat laia puitling film thlipuiin min han nuai a, zan lama paho thapui chhuaha kan han bung tlang thin mai zawng, lirnghingin a nuai ta emaw tih mai tur hian in hi a sawi rual dul dul zantin ta mai thin a, sa lo hrangin zanlaiah kan ranvulhte lak rawn tum mahse khawchhung lut ngam lova ral atanga a rawn thlir ve mai mai hi ka ring thin.

Pu Leta sermon chu

Kan puitling film en thu hetiang taka kan larpui hluai takna chhan ber chu Pu Leta zahmawh sawi hrat vang hi a ni pakhat awm e.

Amah Pu Leta hi a insawidan chuan Pawih lal fanu hmelthain pasala neih luih a tum tlata, a duh siloh avangin Tiau ral atangin kan khuaah hian a rawn tlanchhe thla ta ni awm tak a ni. Mahse han en reng rengin a hmelah hian eng nge kim lo tih sawi fak theih si loh hian kim lo hi a’n tam em em khawpa, hetianga mahni hmel pawh inhmeh lo ngawih ngawih mai chi a nihna leh khawtlangin kan en dante han phuahrem khawm hi chuan lal fanu chu sawi loh, an lalpa arpui duatlai a lo sodomised vanga rawn raltlan a nih hi kan khaw rin dan tlanglawn ber chu a ni tho tho. Puitling lam chuan ‘Pu Let’ tiin kan ko tha ve maia, tlangvalhovin ‘Let-bawng’ an tia, nula hovin ‘Let-hur’, naupangho chuan ‘Let-hmelchhia/Let-ke-hlai’ an ti bawk, autu a neih naupan zawh poh leh auh nawmnah a hlawh zual ni mai hian ka lo hre thin.

Health worker-in vitamin thla thum chhung ei tur a lo chawh tumin ani ta pek chuan zing leh tlaia ei keuh keuh zawng theihnghilh palhte a hlauhawm e tiin tukkhat thil thuah a lo fai pak mai pek a, karkhat chhung chu a kal mar pung pung mai a ni awm e. A hmel hi en thuak hi chuan a chut hmel fu a, han belh chian hian rin ai daihin a lo la chut zui a! Amah pui roh hi, “Pu Let eng nge i tih dawn?” te han ti ila “Pu Munga vawkpui” ti loh loh mai, “Eng nge i thawh dawn ka tihna alawm” tih pawh a, “Ehiau! thawhlawm an khawn elaw?” ti chut chut mai chi, pa dar lum ve tak mai a nih lai hian zahmawh chungchang erawh nopui dawm tir phu hial khawpa hlap thiam a ni lawi a, vengchhak nuthlawi, tawng nuamti zet mai leh mi rel a hrat em vanga ‘kan khaw rel-station’ kan tih maite thleng thleng hian Pu Leta’n zahmawh sawia a ka a an tawh chuan ngawih han chuh thin a maw le!

Pu Leta hi zawng keini anga induh deuh taka thil han sawi tha duh lo ang vel chi kha a ni ve lo va, a thusawi ngaithlatu an tam leh a sawi sei a ni mai, a puitling film en chungchang sermon thlakna kiangah chuan kan kohhran chairman Upa Remsiama te lai lai hi chul ram thlir ni awm taka lang, hrawk bawk kal rulh rulha chil lem khulh khulhin sir zawngin beng an lo dawh hu ang a, kan VCP lah chanchinbu chhiar ni awm takin zei lo fe a bawp khawkherh tutin hmuh tur a awm ve ziah bawk. A sawi rei poh leh kekawr zipper nei dawrawm apiang an mualpho nasa a ni mai!

Heti a nih vang hian a puitling film sermon hi kar lovah kan khua pawh hian kan pun phah thur thur e ti ila a thusawi ngaithla chin chuan thu khuh lutuk min la tih cheu ka ring! Vawk hur tha thei lo pawh hi ran daktawr koh ai chuan Pu Leta zahmawh sawi ngaihthlak tir ila an hur hma zawk lo ti tawk lah bo lo! A sermon vang hian kan khuaah khum tamtak a chim tawh ti ila kan fun kim ber mai awm e.

Puitling fim en vangin Upa Hauzela a piangthar!

Mak deuh maiin Upa Hauzela erawh khatia film ropui kan han en atang khan Biak In a rawn bel ta tlat maia, a enpui dangte’n tawngtai takngial pawh inthlahrung rum tawh khawpa kan chet zui lai leh bialtu upa pawh tawk ngam lova kan hel kan hel tawh laia hetia ani a’n che ta bik tlat mai hian ngaihtuahna a tibuai hman khawp mai. Mahse Biak In chhunga a khawsa zia leh kohhran hmeichhe inkhawm zanah nen lam chhiara khuang vuak sak tur tala a inkhawm tak ziah dan te chuktuah khawma ngaihtuahna ka’n sen takah chuan eng dang vang a lo ni lo; nuho zingah khurbinpui tur a dap zawk a lo ni!

A biakin chhung rawn lut reng reng hi dar hnihna rual velah hmeichhe thutna lam atangin kiai suk suk chung hian a’n rawn lut ngei ang a, thusawi hun changa Bible a han chhiar ve lahin a zahmawh lai ringawt a thur chhuak a, nuho thutna lam nger sa teu tova ding chung hian ‘Ka pawl theihna’n ka nupui chu min pe rawh le’ tih te ngawt mai hi changthlanin a’n sermon zui chiam mai thin a, lamtualah kohhran hmeichhe  lam chhuak an awm tawh chuan kan hla sak chu tlar khat takngial pawh zawm thiam ve lo mahse a lo inzep lut ve hman ziah bawk.

Nuho hnungah chhing duar duar chung hian a lam su uih uih ang a, thusawi lai ni se eng nge an sawi lam kha a ngaihtuah tawh lo, nuho a lamah an hawi lai a ni em tih mitmei zuk zuk chung hian hun lo fe fe ah hian meng ker kur chung hian a’n lo haleluiah ta chiam mai zel a, thusawi lai mekah khan han haleluiah hnan chi a awm em tih aia nuho lo hawi lai a nih leh nih loh a ngaihchan zawk thin miau avang hian thusawitute zawk hi hrilhhaiin a siam fo reng a ni.

A hnu deuhvah phei chuan khuang tereuhte hi a kaih ve a, hmeichhe inkhawma kal bansanin an kal leh ban hun awm velah hian tawnghriat loh phuahchawp zet zet nen hian a ri leh hluai thin a, a in hi Biak In kawnga awm a nih bawk vang hian kar lovah nuho zinga eng emaw zat chu a kuai lungleng titih ta mai reng a ni.

Keimah-a puitling film side effect ve thung

He puitling film hian keima mimal leh chhungkaw nunah hian nghawng tha leh tha lo a rawn keng hnem khawp mai a, a tha lamah chuan kan nupa nuna hlimna thar a rawn thlen hi sawi hmaih chi a ni lo.

Kei hi tlangval lai chuan val to lo lutuka sawi chu ka ni bik lo nain kan khaw tlangvalah chuan kei aia dam rei hi an awm lova, min phu tawk leh ka nupui ni tlak hi kan khaw nula zingah hian ka hmu zo tawh dawn lo emaw ti a ka thianghlimna nen ban tlang law law tuma rilru ka lo siam tan mek laiin tun thlenga a dum ang anga ka nupui rinawm la ni ta, kan khaw tlangau tunu Remveli-te chhungkua hi an rawn pem lut ve a, ka nep phal ta ngang lo a ni.

Kan inchhai dan kimchang leh kan inneih dawna ka puzawn hnena ka thu delhkilh zozaite chu hun dangah kan la sawi leh zawk dawn nia. Kan inchhai tirh vel lai chuan fate rual awrh mai kha an la nia, chhungte leh thenrualte paw’n, “I ti awm ang lo e mai, kum em pawh a la tling si lo,” ti a min fah liam liam chungin, “Kum la tling lo mahse buk a tling tawh tho alawm,” tih chu ka changchawi ve tlat a, tichuan method hrang hrang apply-a rei ngial kan inchhai hnuah chuan tlangval dam rei chal khi phuk tawh runah tleirawl Remveli chuan a kawi leh rubber bun lai zawng zawng nen khiang a lo awi ve ta a ni.

Kan inneih zan pawh manhla tak a ni, thangkhat lian zet zantin ka lo hisap ve ran ran tawh zan kha a ni bawka khumpui linglet thawkin kan nu thar nen chuan kan han che tehreng a nih kha! Kan inneih atanga thla khat chhung zet kha chu kan mu mumal lo, ti ila kan muhil mumal lo a ni zawk awm a sin, mut chu kan mu hnem a lawm!

Mahse hun a lo kal zel a, a tira rin ang ngawt kha a lo ni lo, kan nupa kum inthlauhna chu zan lamah a lo lang chhuak tan ta. A naupang zawk na na na chu a lo harhvangin thosilen chhunga patling theihtawp chhuahna hi a duhkhawp ta lo fo mai a, thlan sa phul kaia pa berin thapui kan chhuah lai te hian fiamthu bu te hi a lo chiar nui ang vur vur a, a chang leh thosilen pawn lama a lu rawlh chhuakin lian pui puiin zozialte hi a lo pak khu ang tual tual a! A puan pho seng theinghilh hre chhuaka laklawh lai laia min thawhsan thurh thurh chang lah a tam, Siali khaw mawiah pa ber lungawi loh ai chuan tiin a dawh ve vel mai mai ni ber hian ka hre thin; hahthlak tak a ni.

Mahse Pu Thangzauva zara puitling film ka han en ve takah chuan kan nupa nun pawhin hmel thar a lo hmu leh ta. Nu ber hmelah kawl a lo eng a, a hma zawnga zan mut dawn apianga fa hrin hautak zia min sermon khum ziah thin khan mizote kan la tlem zia leh Birth control tul a tih loh ziate, Pathianin mihringte hi inthlah pung turin min duang a ni tih a chianna chu a siam dan kalphung reng mai a nuamsa tihte chu a titi kalphung a lo ni ta. Phir hlir pawh hring dawn se man hliah hliahin a hre ve ta a ni ngei ang.

Kei ngei pawhin pa ber chauh hi khumlaizawla nuam tawl bik tur kan ni lo tih ka lo chiang ve ta hle mai. Pheikhawk pawh duh huna va inthawlh thawta bun peih loh veleha bang kil vawm na’na hman leh mai ai chuan uluk taka tifai hmasa-a buna, bun peih tawh loh hnuah pawh uluk taka kan tihfai hian a tha rei thin a lo nih kha maw!

Ka puitling film en vang hian kan nupa nunah hlimna tamtak chhar thar mah ila lehlamah chuan kawng hrang hrangin chhungkuain kan tuar ve a, a tuar hmasa bertu chu vawk in chak bang mai mai remkhawma ka vuah pum ‘kan khum’ hi a ni. Tha ve tawk viau ni a ka lo ngaih lain zantin mai thapui thawh meuhva patling inhrosakna tur chuan a lo la iaiawm viau maia, Khum ke panga nei mai mai chuan zan tam min daih ta lo, kan khum chuan a rem lai laiah ke a nei ta tek tuk mai a, naupangho inbihruksiakin tlan luh na’n bera an hman thin kan khum hnuaite chu zawhte tawm nan pawha remchang lo khawpin khum ke chuan a lo luah khat zo ta, kar lovah khum hnuaiah thingkhawn tenau kan siam hi a ni ta ngawt mai!

Fate khawlai lengin perek sei tha leh thingzai bung la tha deuhte hmu fuh se thawk ropui inti takin an rawn hawn a, “A pa hei in khum kilhna tur….in khum ke tur ka chhar” tiin khawlai atangin awrawl tawp tawpin an rawn au ang a, ni e, chhungkua kan tang rual a ni e; kan tanrual a ngaihna chhan an la hrethiam ve lo erawh nu leh pa tan chuan thawk huaina tham a ni.

Tuartu dang lehte chu kan arpui leh naupangho hi an ni. Kan arpui hi a tui tam chi khawchhak lam atanga ka hawn thlak niin a tui chatlak lo viau thin a, sikul-a naupangho pai tur bakah a khat tawka awpkeu tir tur hi artui kan khawl ve rei rui thin. Mahse pa berin hetia film ropui en hnua thahrui hnar bera ka han neih takah chuan awp tur chu sawi loh, naupangho paw’n samtawk kan leh mautuai chhum an pai a tul ta fo mai a, nu ber hnenah vuivaina thu han thlen thin mahse an thlenna ber nena kan tanrual tlat avangin eng ruai erawh an an phah tak tak chuang hlei lo va, rilruah chuan pa ber tih atan chuan a mawi lem lo tih chu kan hre ve kur tho, mahse kan ar vulh pung lo mahse chhungkaw member tal kan pun phah dawn alawm tih ngaihdan nen kan inthiam chawp ve mai a ni zawk. Mahse dik tak chuan chhungkaw pa ber tan pawh arpui vulh lai hmai zah a lo na duh khawp mai.

Hei mai bakah hian zanlaia naupangho thangharhin zan danga an hmuh ngai loh pui pui an rawn hmu thin hi a ni manganthlak ta chu. Zan lai laiah an lo harh ve reng tih pawh kan hriat loh laiin, “Anu ka chuang ve duh tawh!” te an rawn tih chhuak phawng phawng ang a, a nih loh leh “Apa ka lo lirhpui ang che aw…” a chang leh, “A chim dawwwwwn!” huiham! Hetiang hunah tawh hi chuan pa ber hisap a buai map mai zel a nia.

Puitling film thawhhnihna

Hetiang tak hian puitling film ka vawikhat en mai hian kan chhungkua mi a nghawng nasa a ni a, vawikhat aia tam en chu keini ang thingtlang pa, sum leh pai lama engmah chhuan tur nei si lo, zan lama nei nung ve hle ringawt mai chuan kawng hrang hrangin kan tlin dawn lo, chuvangin ka en tawh tur a ni lo ang ti a chawlhni zing khat chu ngaihtuahna ka lo sen ve ran ran lai tak maiin Pu Thangzauva hnen atang bawk chuan sawmna ka dawng leh ta alawm le!

“Bawiha pa, kan VCP hian a en chak ve sia chawhma inkhawm reh laiin i enho leh ang u hmiang.”

Mitthlaah chuan kan khum a lo lang nghal, Saia pa sawmna ka pawm leh a nih chuan kan khumza te chu a hmanna tlak tur awm chhun, vawk in banga kan vuak bei leh mai a tul dawna, keini nupa pawh khum thar man kan tuak ngah hma chu chhuatlaiah kan mut mai a tul tawh ang. Chubakah artui neih belh ngaihna a awm tawh dawn loh avangin kan arpui chawp hian a tuihangah kan siam law law a ngai tawh dawn a ni.

He’ng thil zawng zawng ngaihtuah vek chung si hian Saia pa sawmna chu ka hnar phal leh ta chuang tlat si lo, rilru a inthiam lo tak chungin chhungte inkhawm tura an chhuah zawh hnu chuan dumbur nen Pu Thangzauva in lam chu ka pan phei leh ta hnu hnu a. Eng le khaw le, nupa kan hlim chuan fate chu an hlim ve mai a ni lawm ni?

Hemi tum hian Biak In lamah a khurbin pui tur a chhai thluk tep tawh lai a nih vangin Upa Hauzela a rawn tel ve thei lo va, kan VCP leh Pu Thangzauva makpa an rawn tel ve ta thung. Tum dangah inkhawm ngai pawimawh chi ni ngai lem lo mah ila hemi tum reng renga ka inkhawm tlanbo ka inthiam loh hi a la awm awm lo ve.

Mahse inkhawm lo a en kan tum vang nge ni, hemi tum hian a chhan pawh hriat loh vin Pu Thangzauva TV ah chuan a ri chiang viau siin a lem a lang thei ta tlat lo mai a, a neitu pa’n rei ngial a beih hnu pawhin a phu mur mur ringawt mai si, kan en lo mai dawn em ni ang ti a kan inrawnkhawm lai chuan Pu Leta sermon-a lo inhlan fel tawh kan VCP thinin a tuar ta lo,

“Hmm, inkhawm an bang takngial dawn, a lem kan hmuh theih loh chuan ring deuvin han ti ula, a ri tal kan ngaithla mai tur a ni, an awmdan chu Leta’n lo sawifiah mai rawh se,”

 A ni Pu leta lah a phur zawng tak mai a lo ni a, tichuan TV lam chu kan bial hnai sauh sauh va puitling film ngaithla tur chuan kan intiary ta a ni.

A neitu pa chuan cassette thunin ‘Play’ chu a han hmet leh ta khauh mai a, inkhawm reh laite a nia venthawn tur a awm rih lo bawka a volume chu ring tawk maiah a han dah nghal a, keini chuan kan beng kan lo chhi ta thap mai a nih chu.

Kan ngaihthlak tan atanga eng emaw chen chu a reh vung vung a, kan en hmasak zawk khan naupangho lo bihthlak ve vanga a ri pek rin ngam a nih loh avangin an awmdan tur chu rin thiam a har ta khawp mai, a hnu deuhvah chuan music a lo ri a, tawng reng reng a la awm lo, ri deuh hrut hrut a lo awm leh a, chutah Pu Leta chu TV lamah a va kun hnai a, a’n ngaihthlak vung vung hnu chuan kan lama rawn hawi let lehin intihre taka han kiai suk pah hian,

“A hmeichhiain a englo sak mek a nih chu…”

 Kan VCP chuan bawp a’n lo khawkherh nghal pang mai a, keipawh ka chil a rawn haw nghal ringawt! A reh leh ta vang vang mai, Pu Leta chuan hnai leh zualah a beng a va dawh a, chutah le, eng nge an tih leh ang ti a ngaihtuahna kan lo sen lai mek chuan a puak ta dur mai! kan hawi ho hlawm mai a,

“Khum atangin an intlawh thla a ni”

 “An khumza an chuan tliak a nih chu”

 “An laklawh lain sa a rawn kal thut ang a, an kap lawk a niang”

 Mahni ngaihdan dan sawiin kan ri ta nuai nuai mai a, chutah Pu Leta kan va en a, a ni chuan kan lama phawk hru a rawn hawi phei chungin, buh deuh nuai hian,

“A….a fawp puak a niang!!”

 Pu Thangzauva ngaih a tha ta ngang lo a niang, khawi maw tiin kan ngaihthlak lai chu a va hmet tawp a, a cassette phawrh chhuaka a’n en mai chu(h!), a sirah chuan hawrawppui ngei mai hian hei hi a lo inziak, ‘BOMBING OF HIROSHIMA!’

Kan VCP pawhin a bawp khawkherh a la thla rang khawp mai, inkhawm tlanbo meuhvin Japan rama bomb thlak chungchang vel chu chilthli uai duahin patling rualin kan lo suangtuah vei zu(k) nia le!

Pu Thangzauva’n inthiam lo taka a cassette dik a zawn buai chhungin inkhawm an rawn bang hman. Kan VCP rawp tihreh na’n patling rualin inkhawm kan tlanbo a la tul leh ngei dawn e.

ASP hi Server Side Scripting a tan a ni ber a. A awmzia chu, mi tu in emaw Internet a hawng a, website thenkhat a visit a, tichuan a Visittu (amah) kha Client tih a hriat a ni thin. Tin a visit a (Website) ho tu khawl emaw, server emaw kha Server tih a ni. Tichuan Client-Server kan nei ta der mai. CLient chu tu pawh website request tu te hi kan ni a. Tin kan webpage dah na computer chu server a ni ta tih na a ni.

Entir nan, www.google.com tih hawn ka tum chuan www.google.com hnen atang web page thenkhat ka request tih a ni a, tin www.google.com server in min lo response a nga, ka request thawn chu a lo chhang let dawn a ni.

Ekhai, a thupui tak tak ah I lut tawh ang u!!! Continue reading ?

Heng te hi entir na an ni. A hmasa ber ah khian Hidden Folder Test tih Address Bar atang hawng tum a ni a. A pahnihna ah ki chuan hawn tawh a ni. A pathumna a khian Chumi Test Folder chhung a File Read Me tih hmuh theih a ni a. A file Properties Dialog Bax nen lam lan tir a ni.A palina a mi ki Folder Option ah hidden file ho lan theih dan ah thlan a ni tih entir a ni bawk.

Tichuan heng zawng zawng ai a awl zawk a I file emaw folder emaw I hawn duh chuan hidden a ni nge ni lo tih ngaihtuah buai ngai lo in, I web browser kha han hawng pawp mai la.

Note: Web Browser hi chi hrang hrang a awm a, tin a siamtu leh browser a hi a hrang hrang a awm bawk. Entirnan:-

1. Google Chrome
2. Internet Explorer
3. Safari Browser
4. Jumpto Secure Browser

Tichuan I browser I hawn hnuah, I browser Address bar ah I folder / file Location kha han hawng leh la. Kha ti khan I hidden file zawng zawng pawh I hawng thei tih na a ni. Example: file:///C:/

Hemi te pahnih hi Google Chrome browser hmang a hidden file leh folder ka hawn dan chu a ni. A awlsam in a zangkhai em em a ni.

I duh chuan hetiang hian I lo ti ve thin tawh dawn nia.

Source : http://www.zonews.zosoftnet.com/?p=42

1. Domain Name (e.g.: www.zosoftnet.com)
2. Web Hosting    ( Document leh a Web Pages a dahna Server / Computer)

Domain hi site address hming mai a ni a. Duh duh I register thei a ni. Domain hi chi hnih in a then hran leh theih a : Top Level Domain leh Geographical Domain in. Top level domain kan tih ho hi chu .com, .net, .biz, .org a tawp ho hi an ni. Tichuan geographical domain kan tih chu kan hre thiam mai a nga. .co.in, co.pk, co.jp etc ho hi an ni a.

www.zosoftnet.com hi Top Level Domain a ni a. www.zosoftnet.in hi geographical domain a ni. www.yahoo.com leh www.yahoo.co.in chu a danglam na I hrethiam tawh in ka ring.

Domain hi website I neih duh chuan I neih hrim hrim a ngai a. (e.g.: www.ihming.com) Domain chu nei ta la, Web Space / Host I neih chuan loh chuan khawi ah mah I file I dah thei chuan lo a ni. Web Space / Host emaw pawh hi I lei ve ngei a ngai tih na a nih chu.

Domain I neih hnuah Web Hosting I neih a ngai a, Domain Setting atang I web Space/Hosting chu I point(hruaikawi) a ngai a ni.

Entir nan, I web Browser ah www.zosoftnet.com I visit duh chuan www.zosoftnet.com tih I chhut a ngai a, go button I click chiah khan, www.zosoftnet.com chu software (DNS) in IP Address ah a lo let a (174.122.46.6). Hei hi a awm zia chu ka web server chu 174.122.46.6 a ni a. He IP Address hi chu ka web server IP Address chu a ni. Chu mi server (Computer) ah chuan ka web page zawng zawng chu ka dah vek a, mi tupawh in www.zosoftnet.com tih an chhut chuan ka file ho chu an en thei ta tih na a ni.

Heng zawng zawng hun ah hian I rilru I siam a nih chuan website chu I nei ve thei a lawm. (Mahse, engtin?!!!!) Awl lutuk in maw le….chu poh I mizo pui ngei in a thlawn in a tih sak dawn che a ni.

A hnuai a mi te hi I tih a ngai a ni:

1. Domain Register : Domain registration hi khawng hnih ah khawng khawt zawk I thlan a ngai a. I than tur chu : subdomain of ZoSoftnet.com emaw ihming.co.cc emaw a ni. subdomain of ZoSoftnet.com I thlan chu I web Space chu 100% Uptime a ni dawn a. ihming.co.cc domain I thlan chuan I web Space uptime chu 89% a ni dawn a, chuan kum khat chhung chauh a free ang. Chubak ah subdomain of ZoSoftnet.com I thlan chuan I website theme tur a thlawn in I hmu nghal dawn a, I host pei chhung zawng a FREE dawn a ni.
2. Web Hosting : I domain duh thlan I neih hnu ah, admin@zosoftnet.com ah email a min rawn hrilh a ngai dawn a, Subject ah : DOMAIN AND WEB HOST FREE tih I rawn ziak a nga, chuan a hnuah ah (body) Domain : ____________________   Domain Duh zawk : _________________________  I Hming : ____________________ Web site duh chhan : __________________________

Zawh na dang I la neih chuan admin@zosoftnet.com ah min zawt thei a, a nihloh pawh in www.buannel.com, hemi post ah hian comment I leave thei ang!

Thank you.

Mizoram hi Regional Centre, Guwahati in a awp a. Phone 0361-2650541 ah emaw email: rcguwahati@nios.ac.in ah harsa takin an biak pawh theih. NIOS website a a landan chuan tunah hian Mizoramah AI/Study Centre 13 a awm. Aizawl ah hian AI panga a awm a. Chung te chu, an AI Number nen: Govt. Bungkawn High School (300002), TLR City College, Bazar Bungkawn (300003), Mary Jones School, Chanmari (300006), Scared Heart, Donbosco (300007), Govt. S. Himem High School (300009). Heng bakah hian Champhaiah NIOS approved AI pakhat – Zokhawpui Higher Secondary School (300012) awmin, Saiha ah pakhat – ECM High or Sec. School (300005), Kolasib ah pakhat – Madonna Education Centre (300001), Lawngtlaiah – Southern Baptist High School (300010), Lungleiah AI 3 – Sacred Heart School (300011), Darphawka Memorial School (300013), Govt Leitlangpui Higher Secondary School (300014), Serchhipah – Govt JM High School (300015).

Approved AI ni lovah i kal em?

A chunga kan sawi tak AI ah chauh khian NIOS thil, admission leh class kal te a tih theih a ni. Aizawl veng hrang hrangah ‘mi thahnem ngai zual te’n’ admission te an la a, class te an kalpui mek a ni. Hei hi an phuahchawp mai mai a, approved Study Centre/AI ni lova NIOS thil lo tih ve ngawt chu dan pawn lam thil a ni. Hetiang hmanga sum siam hi mi eng emaw zat an awm. NIOS thil reng reng a chunga ka sawi sikul baka kalpui an awm chuan, “a lem” an ni. Tawpsan vat se a him ang. He ka thuziak hi Judiciary/Police lam te pawhin PIL case ah suo moto in la se ka duh khawp mai. Public Interest a ni.   

Engzat Nge Admission Fee i Pek?

NIOS (pawl 10 leh 12) zirlai eng emaw zatte ka interview naah leh an fee pekna receipt ke en chuan, uchuak taka Fee laksak an nih mek thu ka hmu a. Hetianga zirlai naupang, harsa ve taktak te pawisa uchuak taka laksak a ni hi a pawi hle mai. Chhungkaw tamtak pawisa, diklo taka laksakna a ni.

Admission Fee pek zat tur chu hetiang hi a ni (source: http://www.nios.ac.in/): Pawl 10 (Secondary Course) – Subject 5 atan Rs 550/- (zanga sawmnga) leh, Additional Subject nei tan Rs 150 zel. Pawl 12 (Senior Secondary Course) – Subject 5 atan Rs 625/- (zaruk sawmhnih panga) leh, Additional Subject nei tan Rs 180 zel.  

A chunga ka sawi Fee bakah khian NIOS a chhun luh tur Admission kaihhnawih thil eng dang mah sawi tham, pawisa chawi tur a awm tawh hran lo. Admission Fee chuan registration fee te, study material man te, personal contact programme fee te, Identity Card leh a dangte a huam vek tawh a ni. “Mi thahnemngai zual” ka tih te khan admission atan admission fee pangngai let aia tam Rs. 1500 te an laksak a. Processing fee an ti a ni awm e. Process man a to hle mai. Admission hi online (internet atangin)a tih vek a ni a. I thiam ve kherlo a ni maithei. Mahse, i thiam loh leh i hriat loh man khi a to hle mai.

Monthly Fee Chawi a Ngai Hauh Lo

Hei hi Mizorama NIOS buaipuitu te’n in hriat an hlau hle. NIOS website leh Prospectus ah te chiang takin ziah a ni. Prospectus thar ber 2011-2011 ah chuan tihian pentui senin a inziak: “do not pay extra amount for admission and examination over and above the prescribed fee as mentioned in the Application Form for Admission to anyone.”

Mi thahnem ngai zualte’n appoved AI ni lova class an kalpui hi “tuition” te “coaching” te an ti a; an phuahchawp a ni. Monthly Fee hi chawi a ngai reng reng lo tih NIOS zirlai leh chhungkua zawng zawng hian i hre reng ang u. NIOS zirna ah Monthly Fee engmah chawi tur a ni lo.

Khawiah Nge Class I Kal Ang?

Personal Contact Programme (PCP) an tih hi Approved AI ah chauh kalpui tur a ni. Class zawng zawng kal hi “compulsory” a ni lova, monthly fee pek pawh compulsory a ni lo bawk a, tin, pek tur a ni lo hrim hrim.    

Approved AI leh a lem, a chunga ka sawi takah te khian tuk tin deuhthaw class lak a ni thin. Hei hi Coaching Class te an ti mai mai. Phuahchawp a ni. Open kalphungah regular class kal hi a awm vak lo.

Approved AI/Study Centre lova class la te hian sum siam nan class an la ve ngawt a. Henga kal hi “compulsory” a ni hauh lo. Mahse, i duh chuan fee pe la, an hnenah chuan zirtirna i dawng ve thei ang. Hei hi ‘tuition’ emaw ‘coaching’ an ti mai a. Chuta kal chu i duhthlanna a ni tih hre tawh ang che. Appoved AI chu Aizawlah 5 chauh, a chunga ka sawi te khi, a awm tih hriat tur.

Veng hrang hranga phuahchawpa NIOS class lo kalpui ve ho hi chu a lem vek an ni. “I dawt ngam leh dawt rawh” tih ang deuhvin, sum i neiha, counselling/tuition i kal duh erawh chuan, i thu thu le. Govt Chanmari Middle School, Chanmari (Basketball Court bul) a NIOS lo kalpui ve ngawt hotu (vai emaw ni lehnghal) pakhat chuan Monthly Fee an pek loh chuan zirlaite hming “thaibo” ah a lo vau tlat mai.  Zirlai tamtak ka interview tawh a ni. Fee pe tura tihluihna NIOS ah a awm tur a ni ngai lo.

Danin Ro A La Rel Ang Chu

Approved AI/Study Centre ah Coordinator, NIOS in a ruat te an awm vek a. An ni chuan, NIOS atangin hlawh/lawmman an dawng ve thin.  Coordinator te’n “sum kan dawng tlem/mumal lo” tih chhuanlama zirlaite hnen atanga Admission Fee tam uchuak tak leh Monthly Fee phuahchawp an la te hi thil diklo tawp a ni. An buaipui theilo a, NIOS in sum a pek that si loh chuan, zirna chu kalpui loh mai a tha zawk law’m ni. NIOS system hi siamthat ngai tamtak a awm ngei a. Mahse, a system that loh avanga mi rethei (leh hausa te) sum laksak a ni mek hi “SUAL” lian tak a ni. NIOS hi sum siamna atan hman a ni mek a nih hi.    

 Mizoram zirna kalphung siamthat hi mitin mawhphurhna a ni a. Open a zirna phei hi chu nasa lehzuala siamthat a ngai a ni. IGNOU hian zirlai a ngah ber a, NIOS hian an dawt ang. NIOS leh IGNOU te hi kalphung felfai tak nei an ni a. A nih dan tur angin kalpui mai tur a ni. Zirna hi sum siamna ringawta hman atan chuan a zahawm lua e. NIOS chungchang chhuichianga, action la turin Kan sawrkar leh thuneitute hian a rang thei ang berin hma la se a va duhawm em. 

Mihring lo pung zel hian eizawnna kawngah indaih lohna leh indip tawnna a hring lo thei lo va, ram chhunga hna awm theite hian min huap kim zo lo tual tual bawk. Chuvangin, kan thalai tam takten ram pawn thlengin hna an zawng ta a, hei hi Synod Social Front chuan thil lawmawm tak niin a hria a ni.

Kan thalaite hian khawvel hmasawn mek mila an mamawh phuhruksak thei tur nia an hriat hna hi chu an lo thawk hreh hauh lo tih a chiang hle. Mahse, fimkhurna tur an hriat thiam tawk loh avangin an kalna hmunah harsatna an tawk leh hnuhnawh fo thin tih hriat a ni a, chuvangin ram pawna hna thawh tumte tana kaihhruaina siam hi Synod Social Front chuan tul a ti a; hetiang hian fimkhurna tur thurawn a siam ta a ni.

1.   Ruaitu tur chuan a rawih tur hnenah a company kalphung zawng zawng a hrilh chiang tur a ni a, thawktuten an hna leh company kalphung chungchanga sawi tur an neih vete leh ngaihdan an neih te an pho lan ve theih dan tur a awm leh awm loh thlengin, kalphung kim tak an lo zir lawk theihna tur handbook leh employment rules chu a pe thei tur a ni.

2.   Ruaituin a mi rawih a beisei dan (management expectation) pawh a chiang tur a ni. Company chuan thawktu a duh ang mizia leh nungchang a hriattir hmasa tur a ni a, chutiang nungchang an neih theihna tura khuahkhirhna dan pawh a nei tur a ni.

3.   Ruaitu tur chuan a rawih tur hnenah a thawhna hmun tur (work place) chiang takin a hrilh nghal tur a ni a, hmun thu tur nge a nih kal kual vel tur tih pawh a hrilh tur a ni.

4.   Chhan tha tak awmin emaw, awm chuang lo pawhin probationary period chhung chuan ruaitu chuan a chawlhtirin a ban hlen thei. Heti hi a nih avangin probationary period an nei dawn a nih chuan a rei zawng tur an hre hmasa ngei tur a ni. Thawh tirhah eng ang dinhmunah nge an inrawih tan dawn tih pawh a chiang tur a ni.

5.   Thawktu chuan a duh hunah ama duhna ngei chuan a bang leh thei tih a chiang tur a ni a, chutiang atana dan ruahman pawh chu a awm tur a ni. Chutiang bawkin company chuan a hnathawk chu chhan eng vang pawhin a duh hunah chuan a chawlhtir thei bawk.

6.   Thawktuin chawlh a neih theih dan tur – \ul bik thila a hna chawlhsan chuang lo leh, hlawh chungchangah pawh inhriatthiamna awm tel chunga a chawlh theih dan a awm dawn em tih hriat chian tur a ni.

7.   A thawhna hmunah chuan thiamna te lo pungin chhawr manhla lehzualin hma lo sawn sela, hlawh leh dinhmunah a bak kal zel theihna dan ruahmansak a ni em tih hriat chian tur a ni.

8.   Hriselna lamah thawktu chu company-a a thawh chhungin natna khirh bik vanga enkawl ngaiin awm ta sela, company chuan eng angin nge a buaipui dawn tih chian a ngai. Tin, a hna avanga vanduaina tawkin, hna dang thawk leh tlak lo khawpin ram tui lei lo hial pawhin lo awm ta sela, company chuan a thawh theih tawk hna danga dah chhunzawm theih dan emaw, tuamhlawm zui dan tur ruahmanna a nei em tih hriatchian tur a ni.

9.   Thawktu chuan hlawh baka ham\hatna dang a neih theih turte pawh a hriat nghal a ngai a, company chu eng vanga zawm nge a nih tih amah ngeiin a chiang bawk tur a ni.

10.  Thawktu tur chuan a hna thawhna hmunah midang nena inan loh chang vawi tam tak a nei thei dawn tih a inhre sa tur a ni a, hotu tea vuivaina zawn tum lo tur leh tuar thei tura a inbuatsaih a ngai.

Buatsaihtu : Synod Social Front, Mizoram Presbyterian Church

(He thu hi chhiar zau atan ka it em a, Samuelapa te lam pawhin pawi an ti em llo ang chu maw!)

Hei hi eng thufing ber nge a nih ka chiang ta chiah lo, engpawh ni se a thu hi dikin i hria em? Kristian nun atang chuan a dik a ni tiraw? thlarau damna tur leh chatuan nunna kan neihna tur chuan kan lei taksa hian boral phah dawn mahse kan thih mai a tul a, ringtu hmasa tamtakte khan an damna tur chu an lo thihchilh tawh a ni. Mahse kan tunlai khawvel kan thlir erawh chuan he thu hi a letlinga zawmin taksa damna kan duh luatah mi tamtak hian boralna kan zawh mek niin a lang.

I lo hmuve ngai em? Kan khawpui lunlaia banner lian pui puia ‘Damna inkhawmpui’ tih intar te, local channel leh chanchinbu lama inkhawmpui leh crusade tam takin mi te hip khawm tura natna chi hrang hrang tihdam a nih dan an chhuahte hi. Chanchintha bute keuva Lal Isua rawngbawlnate kan chhiar chuan mi tamtak a tihdam chanchinte kan hmu a, a ropui a ni. Mahse thil mak tak pakhat awm erawh chu Lal Isua hian a tihdam tam takte hi a tihdam thu puangzar lo tur leh zep tlat tura a chah kher thin hi a ni.

Hei hi a chhan ni awma lang chu Marka 1:40-45 ah khan kan hmu a, a phar tihdam chuan Lal Isua’n zep tura a tih chu zawm lovin a lo va puangzar vak mai a, chumi avang chuan mipuiin an bawr nasat tak em avangin Lal Isua pawh rawngbawl turin khawchhungah a luh theih loh phah ta hial a nih kha. Keini pawh hian damna kan duh luatah Lal Isua kan zinga a lo tel vena tur hi kan dal hlauh thei tlat.

Setana hian hmanraw chi hrang hrang hmangin Kristian te min bei mek a, heng ruihhlo, mipat hmeichhiatna, eirukna etc. te hi chu Setana hmanrua an ni tih a langchiang nghal reng mai, hlauhawm viau mahse sual hnathawh an ni tih a lanchian nghal em vang hian an hlauhawm loh lehling phian a, a hmanraw hlauhawm zawkte ni a lang chu thil tha tak ni a lang si, kan chhungril thlarau nun thlenga min vaw chau tu te hi an ni.

Chu’ng Setana hmanruate chu engte nge ni ang? Han ngaihtuah mah teh, Bible thu hmangin kohhran min vaw phel a, tawngtaina hmangin thenawm khawvengte kan invua in inhek na’n kan hmang a, Pathian thu hmang veka mite diklohna haichhuakin, kohhrana lansarhna leh thusawi thiamna te chuan chapona te mi a siam thin. Bible chhiar, tawngtai leh kohhrana inhman te chu thil tha tak leh ringtu tan phei chuan tihmakmawh ni mahse Setana pawh hian hmanruaah a hmang ve thin tho a ni.
Hetiang bawk hian thil tha tak ni ve si, he ‘tihdam rawngbawlna’ pawh hi tunlaia kan kalpui dan en hi chuan Setana hian hmanruaah a hmang ve mek a ni thei ang em? Lal Isua khan chatuan nunna min pe tur leh kan thlarau chhandam tur a nih kha miten an hre lovang tih a hlau em em a, chu a lo kal chhan ber chu a rawngbawlna peng khat ve mai, tihdamna in a hliahkhuh tur kha a duh lo a ni.
Tunah erawh chuan tisa tihdamna chu inzawrhna’n kan hmang ta a, crusade buatsaihtu te pawhin mipui te hip khawm turin natna chi hrang hrang te tihdam an nih dan kan tlangau pui ta zawk a, mipuite pawhin tawngtai dam thei chu Khawbung thleng thleng pawhin kan pan ta nawl nawl mai a nih hi.

Taksa damna hi a hlu em em a, mahse chatuan nunna kan neih loh hlau em em a chumi atan chuan a fapa neihchhun thisen meuh pawh ui zo lo tu kan Pathian hian kum za em pawh dam tling awm mang lo mihring te taksa damna hi a ngai pawimawh ber lovang tih chu a chiang sa reng mai. Kum za pawh dam ila chatuan nena khaikhin tur chuan eng tham a ni si lo.

Damna beiseia damna inkhawm pantu tamtakte hian thlarau damna kan beisei tel kher lem lova, tamtakte phei chu chhungte leh thian thaten, “I dam ve mial maithei asin…”  ti a an bengvar chawpte kan ni. Hei vang hian tihdamna chang tu tamtakte pawh hian kan nunhlui kan kalsan chuang lova, Bible-a Lal Isua tihdamte kha chuan thlarau damna chang telin an nun kha thlak danglamin a awm thin asin.

Chuvangin tisa damna tlangaupui lam hi chu dahtha hrih tawh ila, thlarau damna hi i tlangaupui leh tawh zawk ang u. An thlarau damna nei tura kan pui thei a nih chuan kan dil hma hauh pawha kan mamawh zawng zawng min hriat sak vektu (Mat 6:8) chuan tul  a ti a nih chuan tisa damna chu a thlen em em ang. Thlarau damna chang tawhtu chuan he damchhung tawite hi an lungkham teh lua bawk lova, chatuan ram thlen hlan chu a n nghakhlem em em tawh zawk thin a ni. Lal Isua chatuan nunna min petu a nihna hi taksa tidam tu a nihna ai hian i lansarh tir hram ang u. Setana hian kan taksa tihdama kan thlarau hremhmun lama hnuh liam hi a thei ve tho asin.

Eng ang a natna khirh veitu pawh ni la Lal Isua hi taksa damna mai ni lo, thlarau thlenga damna pe thei tu anih hi tihtakzeta ringtu leh pawmtu i nih phawt chuan damna khawmpui kher i pan a ngai lo, i inchhung ngeiah pawh khan damna chu i chang thei asin. He thu ka ziah avang hian tunlai tihdam rawngbawlna te hi Setana hmanrua an ni vek e ka tihna a ni lo, Pathian ropui inpuanchhuahna tamtak chu a awm ngei mai, mahse fimkhur tak a kan kalpui loh erawh zawngin boralna lamlian min zawh tir tu a chang thei tlat a ni.

I Facebook Account kha Hack sak i nih lohna turin nangmah khan awlsam te a tih theih i nei a. Chungte chu:

a. Password tha hmang rawh:
Password khirhkhan tak tak, Special Symbols (like @#&*) te leh Numericals (1289) te bakah, hawrawp (a-z) te hi hmankawp la. Tichuan, a hnuai lama Points ka sawibelh turte hi i tih bawk chuan i Facebook Account Hack sak i tawk lovang tih ka sawi ngam zan.

b. I Mobile No Activate la, i Login a pianga i Mobile- a Notification pe tur che in siam rawh. Mahse, hei hi a buaithlak deuh (Boring) mai thei.

c. E- mail Account pahnih aia tam hmang rawh.

d. I Address te, E- mail te, Mobile No te kha nangmah chiahin i hriat leh hmuh theihin a siam theih a. Chutiang ang chuan ti ang che. Chuti a nih lohva, i E- mail kha pakhat chauh i hmang a, i Mobile No te i register si loh chuan awlsam tein i Facebook Account kha midangin an Hack sak mai ang che.

e. I hriat lem loh kha chu invite duh suh. Tin, an rawn invite che pawhin i hriat loh kha chu Accept loh mai tur a ni.

f. Facebook- ah hian i thlalak leh Video, i mualpho theihna tur ang chi dah miah suh. Social Network a nih angin i dah tawh a nih chuan mi tupawhin an lo Copy thei a. Chuvang chuan nangma himna atan midang mithmuhah in tarlang vak duh suh.

g. Facebook hi thian zawnna tha tak, chhungkhat in hmu ngai lo pawh in hmuh theihna hmun tha tak a ni. Chuvang chuan i hman thiam chuan i tan pawh a tangkai thei em em a ni tih hria la, hmang thiam ang che.

h. Mi- in i thlalak an dah a, i duh loh chuan anmahni hriattir vat zel ang che. Chuti lo a nih chuan nangma thlalak pawh nise, Copyright or Ownership i nei lo thei. Ka sawi awmzia chu, Stalking emaw, Piracy velah chhuanlam a tling tak tak lovang.

i. I Facebook Account i Open hnu a, i chhuah leh dawnah Log Out thlap la. Internet Explorer or Chrome, Firefox, Opera, etc.. a Data paihbona ang chi kha hmang ang che. Clear Browsing History hi a lar ber.. Khata Everything kha thlan mai tur.

j. Computer khan Password remember i duh leh duh loh a rawn zawt che a nih chuan, Yes suh ang che. I password kha remember tir loh tur tihna a nih chu. Hei hi Cyber hmang thinten hriat a tha khawp mai.

k. Facebook hi fiamthu thawhnan hman loh a tha. Mi rilru engemaw hleka tihnat theihna pakhat a nih hriatreng tur a ni.

l. I Favourite Music te, Movies te, Singer, etc., ang chi te Password- ah hmang miah suh ang che. I hming te, i birthday ang chi te pawh hmang suh ang che.

 
Kum thar 2011 chu kan duh emaw, duh lo emaw, ni rei lo teah a lo thleng mai dawn a.  Kum thar hian engang hun nge mitin tan a rawn thlen dawn tih chu tuma hriat theih a ni lo va.  Lo lungngaih lawk ringawt pawh a ni thei lo va, lo lawm em em sa ngawt pawh a ni thei lo va.  Kan hunte ruat a, kan hunte vawngtu Engkimtitheia kuta innghah hi kan tih theih awm chhun a ni ber mai. 
 
Amaherawhchu, kan tih theih a awm lo chung pawh hian, a tha ber tura rilru inruahman hi tute pawhin kan tih theih theuh a ni a.  Kum tharah chuan eng thil tha nge ka tih theih ang, hmalak dan tur engtinnge ni ang tia Pathian rawn chunga ngaihtuah hi thil pawimawh tak a ni.  Mi thenkhat chuan nitin nun atanga an paih chhuah theih loh sim duhte pawh an nei nual thei.  Mahni ngawt chuan hel nuaia hlawhtlin a harsa viau thei a, TUM RUHNA nei chunga tih tak meuhva rilru leh ngaihtuahna nen thi thu nama tan a tul tak meuh meuh a ni.
 
Entawn tur tha hi tam tak tan insiam that theihna a ni a. Tunlaia chanchin lar tak mai pakhat han la chhuak ta ila.  America President Barak Obama chuan mei zuk ban harsa a tih ve thin em em chu thlakua lai mai zu lovin a awm thei ta a ni tih hi mi tam tak chuan chanchin thar puanna atangin kan hre thei theuh awm e.  Miin thla thum chhung mei zu lova a do theih chuan, an nghei hlen thei chawk thin a ni tih an sawi chhuak bawk a nia.  A va lawmawm em!  Mei zuk bansan thei lo, mei zuk bawia tang tlatte tan chuan chanchin lawmawm tak a ni.  Mei zuk hi thil sual zinga chhiar teh chiam theih si loh, hnawksak tak mai si a ni a.  A bawi ni tawhte chu a man nghet hle thin.   Chuvangin, TUM RUHNA nen, Pathian tanpuina dil chung zelin kum 2011 hi mi tam tak tan mei zuk ban theihna kawnga malsawmna a nih theihna turin duhsakna kan hlan che u a ni.  Pathian nen chuan engkim tih theih a ni si a.  
 
Women’s Ministry

Lehkha kan chhiar tlem zia hi a lang leh zauh zauh thin. Thiamna tak tak nei tur te, mi ze nghet tak nei turte chuan lehkha chhiar hi kan uar a ngai a ni.

Chutih rual erawh chuan, a zina zin ngei tluk erawh chu a awm lo. ‘Tuifinriat hmu leh hmu lo chu a inan theih loh‘ an tih thin ang deuh kha, zin hian kan hriatna la tih pun dan hi sawi thiam a har hle.

A zin ve thei chiah lo leh rem chang lo te chuan lehkha chhiar hi i uar ang u.

Hnam dang an zin vak vak vakna chhan hi an hoh vang leh an hman vang ngawt a ni lo.