buannel » NEWS

Home Department Thuchhuah

bronco — Mon, 21 May 2012 15:00:35 +0000

Vanglaini chanchinbu dt. 19.5.2012 (Inrinni) chhuaka “Hmar pêm lutte Job Card pek loh tur,” chungchanga Home Department insawifiahna. Kan hriat angin October, 2011 khan Halflong bula Dimasa-ho chenna Longren khua chu mi tu tih hriat lohten an hâl a. He thil thleng hi Hill Tiger Force-te thil tihah ngaiin, he pawlah hian Hmar, Kuki leh Naga-te an tel ve bawk avangin Dimasa-te chuan anmahni tamna khaw thenkhat Dima Hasao District chhunga Hmar chengte chungah an tuan let ve a. Hemi avang hian Jatinga leh Bairabi inkâr Rêl kawng hrûla Hmar chengte chuan an sa himna zawngin Rêl hmangin Bairabi an lut a. Dt. 14.10.2011 atanga dt. 17.10.2011 chhung khan chhungkaw 39 an lut a. Laina hnai belh tur nei lote chu Bairabi-ah an chenna tur ruahmansak a ni a, a thente erawhchu chhungte belin khaw dangah an kal darh bawk a.

An harsatnate hriain Mizoram Sawrkar chuan an mamawh, ei-leh-bar bakah inhlawhnate pawh a siamsak bawk. Dima Hasao District-a boruak a ralmuan leh tak avangin dt. 24.10.2011 khan heng chhungkaw 39-te hi an let leh ta vek a ni. Anni Hmar unaute hi an chenna Assam State-ah Electoral Roll-a chuang leh Job Card nei vek tura ngaih an nih avangin Mizorama an raltlan chhûnga an mamawh phuhruk nan inhlawhna a hrana siamsak tho an nih avangin Home Department chuan Mizoram khua-leh-tui-te dawn ang pe hrih lo turin Deputy Commissioner-te a hriattir a ni.

India ramah hian buaina hrang hrangte avangin mahni chenna hmun tlanchhiatsan thinte an awm thin a, heng Internally Displaced Persons-te State danga tlanchhia an nih chuan kal dan phung (Standard Operation Procedure) a awm a, hetiang ang hian, heng ang mite hi enkawl thin an ni. Hetiang a nih avang hian Bru unau-te tuna Tripura Camp-a kum 14 zet awm tawhte pawh Job Card hi Tripura Sawrkarin a la pe chuang lova ni.

Chutih laiin kum 1990 vela mi leh 2003-a Hmar raltlan tam takte chu Mizoram-ah chambângin khaw hrang hrangah an inbengbel a, Mizoram Sawrkar chuan an harsatnate hriatthiampuiin, heng kan Hmar unaute hi tihluihnaa chhuahtir a tum chuang lo va, henghote hi tunah hian Mizoram Sawrkarin hamthatna a siam tam takte dawngtu leh zarzotute zingah an tel ve a ni.

Contractor thatloh vangin kawng siam tur km 6.2 nuai bo

bronco — Mon, 21 May 2012 14:55:52 +0000

Zozam Times : Kolasib khaw chhung kawng siam mekah contractor pakhatin hna a thawh that loh avangin kawng siam tur km 6.2 chu nuai bo a ni a. Contractor hna thawk tha lo chu ban a ni tawh bawk. Kawngpui siam mek te hi nimin khan Urban Development & Poverty Alleviation Minister, Zodintluanga chuan a tlawh a, Kolasib khua chuan an khaw chhung kawng siamna atan central atanga sum an hmuh theih avangin an vanneih zia a sawi a ni. Minister in kawng siam a tlawh puala inkhawm tawite-ah Kolasib District Bawrhsap, Niharika rai chuan khawpui chhung kawng siam mek endik turin Town Road Coordination Committee din a nih thu a sawi a. Hemi hnuaiah hian a endik bik tur Monitoring Committee din a nih thu leh kawng siam mek chu ngun taka an endik reng thu sawiin, “Kawng siam tur atanga paih tawh, km 6.2 a thui hi siam leh theih dan kawng dap nise kan duh hle a ni,” a ti.

Kolasib Town Road hi package I leh II-ah then niin package I hi March thla khan thawh zawh tawh a ni a, package II hi June thla tawpa zawh tura tih a ni. Zodintluanga hian nimin khan Kolasib Saidan Sports Academy a tlawh nghal a, he hmunah hian Hall, Multi Gym te dah niin silai kahna hmun te pawh dah tura ruahman mek a ni. Minister hi Parliamentary Secretary, S.Laldingliana leh sorkar officer thenkhatin an tawiawm a ni.

Eiruk thubuai vangin Under Secretary man

bronco — Thu, 17 May 2012 12:42:52 +0000

Zozam Times : Sorkar sum ti-chingpen leh eiru ni a puh vangin Disater Management & Rehabilitation Department-a Under Secretary, Lawmkima, MCS chu Anti Corruption Bureau (ACB) ten an man a, zan khat hren a nih hnu-ah Court-ah bail dilin, Court-in a dilna a remtih sak angin a chhuak leh a ni. ACB hian report an dawn bawhzuiin Lawm-kima lakah hian case No 2/2012 an register a. May ni 16 (thawhlehni) khan manin, nimin khan Court-ah bail a dil a, Court chuan bail a dilna hi pawmsakin an chhuah leh ta a ni.

Bru laklet hlawhchham

bronco — Wed, 16 May 2012 12:15:54 +0000

Tripura Bru Relief Camp atanga Bru laklet thawh lina leh a Batch hnuhnung ber chu a hlawhchham leh ta. Tripura atanga Tuikuk hruaikir tum lina, a ni hnuhnung ber nimin khan Kaskau Camp-a chhungkaw 147 laklet tum te chuan Mizorama kir an duh lo a, niminah chuan Bru chhungkua let an awm ta lo a ni. Tripura Relief Camp atanga Bru te hruaichhuak tur hian, Mizoram sorkar aiawhin magistrate 5 ten Tripura a Bru camp 1, Kaskau-ah an kal a, amaherawhchu sorkara an thil phut tih hlawhtlin anih hma chuan Mizorama kir an tum loh thu an sawi ni a thudawn a ni.

May 15 a Bru laklet tura ruahmante chu chhungkaw 147 an vaiin mi 810 an ni a, Mamit dist chhung khaw 2, Thinghlun leh Kolaliana dah tur an ni a, a hlawhchham tak avangin Kanhmuna Felicitation Centre pawh niminah khan khar nghal a ni.

Puan tawh angin Bru Refugee laklet thawh lina-ah hian Mizorama lo let duh chhungkaw 7 chauh an awm a, chung zinga chhungkaw 6 chu tun hmalama an awmna hlui Zawlnuamah dah an ni a, chhungkaw 1 chu Zawlpuiah dah an ni.

Lawngtlai ah thli tlehin chhiatna thlen

bronco — Wed, 16 May 2012 11:51:21 +0000

May ni 15 tlai a thli tlehin Lawngtlai Bazar ami, T.Lalduhawma Kum 33, Pu Khuangchhuma(L) fapa chu a thiante pathum nen an ram kalna ah Aihniarlui ah thingin a delh hlum ni a sawi a ni a, a ruang hi May 15 zan khan Lawngtlai thlenpui niin, a hliam neih dan ah T.Lalduhawma chhungte hi an ngaih a that zan loh vangin Lawngtlai Police Station ah FIR an thehlut a, a ramkalpui a thiante pathum chu Lawngtlai Police te hian thu zawhfiah atan an la nghal a ni. T.Lalduhawma ruang hi May ni 16 hian Lawngtlai District Hospital ah Postmortem a ni a, ni 16 vek hian Lawngtlai Bazar Veng Thlanmual ah vuiliam a ni.

May Ni 15 lailam dar 4 leh dar 5 inkar a Lawngtlai leh a chhehvel a thli natak tleh chuan Lawngtlai Council Veng a UPC Of Mizoram Biak In chu a chung a tihchhiat bak ah Verandah a chhem chhe vek bawk a, Council Veng ah hian chenna In chhia, khawtlangin thawmthat pui ngai pathum awm in, B.Nguntlirha, T.Rosanga leh Laltanpuia te In chu thli tleh hian a tichhia a, heng In chhia te hi a chung thliin a lak te an ni hlawm. Council veng ah hian thliin nasa vak lova a tihchhiat In dang a awm nual bawk. Chawnhu ah H.Lalarsiropuia te In chu a chung zatve Inchhun chawpin thliin a la a, heihian In engemawzat thlawhkhumin a chhak tlang a Community Hall chung ah tla in Hall chung hi a tichhe nual a, heibak ah hian he Inchung thlawk a mi tho thingzai chuan Pi Sangkimi In chu a chung atangin a chhun bawk. Heng In chhia te thawmthat hna hi vawiin ni 16 hian Council Veng leh Chawnhu khawtlang te hian an thawk nghal a ni. thliin a tihchhiat te hi zingkar khan Pi Saizikpuii Sub-Deputy Commissioner Lawngtlai chuan a hmun ah tlawhin an harsatna te a enpui a, sawrkar lam atangin National Calamity Relief Fund atangin tanpuina awmthei angte ngaihtuah sak an nih tur thu a sawi a ni.

Helicopter service theih nan cabinet meeting nei.

bronco — Mon, 14 May 2012 10:54:35 +0000

Mizoramah Helicopter Service a awm theih dan tur relin, May ni 14 hian Chief Minister Pu Lal Thanhawla hovin a office cabinet room-ah sorkar hotute an thukhawm. Meeting chuan Mizorama helicopter tumna hmun, helipad awm tawhna hmunah te leh hmun pawimawh zual dang, avaiin hmun 10 velah helicopter service siam a, kumin August thla chhung ngeia tan hman nise a ti a. Hemi tura tul pawimawh, tender chu May ni 10 khan tihchhuah anih tawh thu tarlang in, June ni 11, 2012 thleng chhanna thehluh hun hawn a ni. Helicopter Service hi Mizoram-ah hun rei tak atanga tih tum tawh a ni a, central sorkar lam atanga phalna leh tuldangte hmuh mai theih anih loh avangin duh angin an kal chakpui theih lo tih an sawi a ni.

Meeting-ah hian Chief Secretary Pu Van Hela Pachuau, GAD Secretary Pi Renu Sharma, Principal Consultant (GAD Civil Aviation Wing), Wing Comdr. (Rtd) Pu Lalzawma te leh mi pawimawh dang an tel a ni.

HPC’D’ lakah sorkar thikthu a chhe tan

bronco — Sun, 13 May 2012 09:27:02 +0000

Zalen : Mizoram Police chuan tunhnai khan Mizoram chhunga Bank hrang hrangte, Electric Power petu line pawimawh leh nitin mamawh supply-na hmun pawimawh a thawkte chu HPC(D) ten bitum an tum thei tih intelligent report a awm avangin, inralrinna thu a chhuah mek nia sawi a ni a. Aizawl khawpui khawi laiah emaw bomb tihpuah tum ni awma sawi a awm bawk. Intelligent lam atanga Police ten report an dawn danin, HPC’D’ te hian power line pawimawh tak Manipur to Mizoram, Loktak Hydel Project leh Jeribam inkar tihchhiat an tum bakah, National Highway No.54, Silchar leh Aizawl inkara lei (bridges) leh culvert-te tihchhiat mai bakah, Aizawl khawimaw laiah bomb tihpuah an tum niin sawi a ni.

Hetih lai hian Zirtawp zan khan Aizawl Tuikhuahtlang-a PHE tanky lian chu tur phul tum ni awma thuthang a awm avangin Police thahnem takin zankhuain an veng a, mipui lam pawh an chi-ai hman teuh hle tih thudawnna chuan a sawi. Hemi chungchangah hian Aizawl SP chuan, tunlai boruak thlirin, fimkhur thu-ah Police te hian an veng chauh niin a sawi.

Hetih lai hian, tunhnaia Mizoram Police hotute thukhawm thurel angin May ni 11, 2012 (Zirtawpni) atang khan HPC Demand Area-ah Police ten Flag March an nei tan a. Kolasib District-ah chuan District SP, Madhur Verma leh Ist Bn IR Commandent H Lalchhuanliana kaihhruainain Vairengte, Saiphai leh Saipum khua ah Police ten Flag March hi neih a ni.

Flag March neih hma lawk hian Police hotute leh Vairengte SDO (C) bakah khawtlang hruaitute inkawmhoin, heta Police hotuten Flag March an neih chhan an sawifiah a. Tunhnaia HPC (D) inti ten an Demand Area huamchhung nia an ngaih Vairengte leh a chhehvel khuaa VC te hnenah donation khawnna lehkha an pek leh YMA te hnena lehkha an pek chungchangah mipuite thlamuan chu an thil tum a nih thu an hrilh a ni.

Mipuite chu chi-ai lo tur an ngenin, engpawh thleng se mipuite tanpui tur leh an thlavang hauh turin Police te chu an inpeih reng tih an hrilh bawk. Police hotute chuan mipuite hnena donation khawn chu dan kalh a ni tih sawiin donation pek pawh dan kalh tho tih an sawi. Heti anga donation an khawn avang hian tun dinhmunah thubuai 9 ziah luh a ni tawh a ni, an ti.

Flag March hi Vairengte atanga tanin Saiphai leh Saipumah neih a ni a, heng khua-ah te hian Police thuneitu te chuan khawtlang hruaitute kawmin an harsatna laka tanpui turin police te chu an inpeih reng tih an sawi a. Flag March an neih chu harsatna siam tur ni lovin, mipuite thlamuan tura buatsaih a nih thu an sawi bawk.

Champhai District-ah pawh District SP leh 2nd IR Bn Commandant hovin Flag March hi neih a ni a, Aizawl District chhung Sakawrdai leh a chhehvelah te pawh 1st. MAP ten Flag March hi an nei tan mek bawk a ni.

Vairengte VC, Political Party & NGO ten chibing zawnga thiltih an duhlo

bronco — Fri, 11 May 2012 10:15:24 +0000

Vairengte VC, Political Party leh NGO hruaitu kalkhawm chuan HPC(D) thil demand tihhlawhtlin an tum loh thu sawiin Vairengte leh a chhehvelah chibing anga chet lakna reng reng an phalloh thu an puang. Vairengte VC I & II, All Political Party leh NGO kalkhawmte chuan tunhnaia HPC(D) intite lehkha chunghang thlirin an sawi ho a. He an lehkha hi belhchian a dawl lova, lehkha no. leh date leh a hmun tarlan a ni lova, pawisa pekna hmun tur sawi a ni lova, April thla chhunga pek tura tih chu May 4,2012 ah hmuh chauh ani bawk a ni tiin an lehkha hi thutlinga an ngaihloh thu an tarlang .

Joint meeting thuchhuak chuan “HPC Rengte Block hruaituten vawi tam tak Sinlung Hills Development Council hnuaia awm tur leh Headquarter pawh Sakawrdaia awm lovin Vairengteah awm se kan thatpui tur thu sawiin Demand area chhunga awm turin min ngen tawh thin a, mahse vawi khatmah Vairengte mipuite hian kan la pawmpui ngai lova, an demand area-ah kan telloh avangin an thil phut hi tihhlawhtlin sak theihah kan inngailo a ni,” an ti a. An beih ber tura ngaih Mizoram sorkar bei lova Vaiurengte khua VC te leh NGO te an demand area ami nilote min rikrap ta mai hi hriatthiam har kan ti a, tun hnuah he tiang hi thleng tawh lo se kan ti, an ti bawk.
HPC(D) intiten heng an thurel avanga lungawi lova, mipui harsatna siam lo tur leh tiralti zawnga che lo turin an ngen a, Vairengte leh a chhehvelah chibing anga chet lakna reng reng awm an phallo tih an puang bawk, HPC(D) te thil phut anga thil a awm loh avanga Vairengte VC te, mipuite lkeh YMA hruaitu chungah eng harsatna pawh a thleng anih chuan Vairengte mipuiten a tawp thlengin an thlavang an hauh dawn ani tih an puang bawk.

AR rama LSC neite sorkar-a pekir turin hriattir

bronco — Fri, 11 May 2012 04:41:07 +0000

Zozam Times : “Ni 30 chhunga LSC an pekir lo a nih chuan IPC 420 hmangin hma kan la ang” : Brigadier SP Rawat
Assam Rifles DIG SP, Rawat chuan Assam Rifles ram chhunga pass (LSC) nei zawng zawngte chu ni 30 chhunga an LSC te thu-neitute kuta hlan vek tura a ngen thu leh, hei hi an tihlawhtling lo a nih chuan a tul anga hmalak a tum thu a sawi. May 9 chhun khan Assam Rifle Range, Khatla-ah chanchinbumite kawmin Brigadier SP Rawat chuan, kum 1890 atangin Assam Rifles te hian Aizawl khawpui chu an luah tan thu sawiin, “Hemi hnua pass awm te chu a lem leh siamchawp vek an ni,” a ti. Heng LSC te hi May 10 atanga chhiara ni 30 chhunga Revenue Department emaw DC-ah emaw an pekir lo anih chuan IPC 420 angin hma lak a tum thu a sawi bawk a ni.

Brig. Rawat chuan Assam Rifles te chu Zokhawsang lamah an insawn mek tih sawiin, tuna an luah mek ram, acre 105 zinga acre 89.39 chu an chhuahsan dawn tih a sawi a. Mahse Assam Rifles te hi Company pakhat chu Quarter Guard-ah hian an la awm reng dawn tih a sawi a. Aizawl khawpui atanga Assam Rifles sawnchhuah chu tute mahin politics-a hlawkpui tum lo se a duh tih a sawi bawk.

Assam Rifles DIG chuan Mizo thalaite a tam thei ang ber, Assam Rifles ah lut se a duh tih sawiin, “Kumin pawh hian sipai lak runpui neih leh a ni dawn a, zawhna pawh Mizo tawngin siam a ni tawh dawn a ni,” a ti bawk.

SP Rawat chuan Quarter Guard kawta laipui awm thin pawh a awmna ngaiah dah leh a nih tur thu a sawi a, tunah hian kawnglakah rawn phur hmek a nih thu sawiin, May 10 hian Aizawl a lo thleng dawn tih a sawi a. May 12, 2012 hian a hmun ngai-ah dah leh tum a nih thu leh inkhawm tawi buatsaihin Chief Minister chu khuallian a nih tur thu a sawi a. MLA, political party hruaitu leh mi pawimawh dangte sawm an nih thu sawiin, “Hetia laipui dah leh a nihna chhan hi Assam Rifles te thupui ‘Tlang mite thian’ tih vawn nun zelna atan a ni,” a ti bawk.

Anti Tobacco Squad drive

bronco — Tue, 08 May 2012 12:27:46 +0000

Anti-tobacco Squad, Aizawl District te chuan May 8 khan sawrkar pisa, zirna in leh vaihlo zawrhna dawr hrang hrangah Vaihlo khuahkhirhna Dan, COTPA 2003 zawm leh zawm lo an enfiah. Section 4 Puipunna hmuna meizial zu an awm leh awm loh endik in sawrkar pisa leh puipunna hmun dang an tlawh a:- 1.) Directorate of Health and Medical Education; 2.) Directorate of Health Services; 3.) NRHM Office; 4.) Mizoram State Health Care Society Office; 5.) Mizoram Rural Bank, Regional Office, Dawrpui Vengthar; 6.) PHE Office, Dawrpui Vengthar Branch; 7.) PPTCTC, Main Centre, Dawrpui Vengthar; 8.) SR. Town and Country Planner, UD&PA Department; 9.) Department of Fisheries, Temple Square.

Heng puipunna hmun ah hian zial zu pathum (3) man an ni a, fine zat chu Rs. 230/- a ni. Tin, heng bakah hian Zirna In Aizawl West College an tlawh a, Section 4 leh 6(b) Zirna compound atanga 300 ft huam chhungah vaihlo leh a kaihhnawih zuar an awm leh awm loh an enfiah nghal.

Section 5 (vaihlo leh a kaihhnawih fakmawina lam chi reng reng khap a ni) leh 6(a) kum 18 hnuailam hnenah vaihlo leh a kaihhnawih hralh khap anih bakah Section 7 (vaihlo leh a kaihhnawih funna bawmah hriselna a khawih chhiat theih Dan Vaukhanna thu leh a lem Tarlan vek tur) dawr 19-ah an tar leh tar loh en dik niin heng zinga dawr 1 chauh hian dan an zawm a ni. Dan zawmlo dawr te pawh hi vaihlo khuahkhirhna Dan hi lo zawm tawh ngei turin an hrilhfiah nghal bawk a ni.