Kan Lal Isua an khenbeh khan ama rualin misual pahnih an khengbet tel a, a ding lamah pakhat, a vei lamah pakhat.  Mi sual pakhat zawk chuan Isua chu a hau va. “Krista chu i ni lo vem ni, intidam la, keini pawh min tidam ta che,” a ti a (Luka 23:31). He mi sual hian Isua chu tunge a nih pawh a hrethiam pha lo va, amah ang maia sual emaw a ti ni tur a ni, nuih zat bur takin a hau vel a. Ama sualzia pawh a hre pha lo va, chhandam ngai mi sual a nih pawh a ngaihtuah pha ngai lo a niang.  A bula mi a nuih sawh kha tunge a nih pawh a hre bawk hek lo. Krista chu i ni lo vem ni ti mah sela, Krista chu tunge ni tih leh a awmzia pawh a hre chuang lo.

Isua leh lama an khenbeh ve mi sual erawh kha chuan Krista chu tunge ni tiha hriaa, “Pathian meuh pawh i hlau na nge?” tiin a leh lama mi sual an khenbeh ve chu a zilhhau ngam a. Pathian a ni tih a hre chiang a. Amah siamtu a ni tih a hria a, a zah a ni. Mi sual a nihzia a inhria a, a misual thian hnenah chuan, anni thian dun chuan an sual man an hmu a, hrem an phu reng a, Pathian chu anni khin rual a ni lova, engmah a tisual lo a ni tih a hrilh ngam a ni. Chu bakah Isua chu LAL a ni tih a hria a, “Isu, i ram i thlen hunah min hre reng ang che,” tiin a ngen ta hial a ni. Hei tak hi misualin chhandam ngai a ni tih a inhriat a, Isua hmangaihna leh chhandamna ropuizia lanna a ni.

Misual pahnihte khan thihna pumpelh chu an duh ve ve a, Isua hnenah pawh an dil ve ve a. Mahse, chhandamna an zawn dan chu a va inang lo em! A hmasa zawk kha chuan, “Krista i ni lawm ni, in chhandam la, keini pawh min chhandam ve ta che?” a ti bawl bawl mai a. A pahnihna erawh kha chuan Pathian chu a tih a, a thil sual tih a zep lo va, Isua thiltihtheihna leh thatnate a pawm thlap a, a tanpuina a dil a, “Isu, i ram i thlen hunah min hre reng ang che,” tiin a ngen a. Isua pawhin, “Tih tak meuhvin tunah hian ka hrilh a che, ka hnenah Paradis-ah i awm ve ang,” a ti nghal a. He mite pahnih atang hian chhandamna zawn dan theuh theuh hi a inang lo hle tih a lang a. A ringtute tan chuan enganga sual pawh ni ila, Amah kan rina chhandamtu atan kan pawm phawt chuan kan sualte ngaihdam nan Isua Krista thisen hlu chu a tha tawk a ni.

Thisen lui chu ka lo hmuhin
Khawngaihnain a khat
Chu lui fima ka inbual chuan
Ka sual a tlengfai ang.

Chhiartu duhtak, Isua nak thianghlim atanga luang chhuak thisen luiah chuan i inbual fai theuh ang u hmiang.

Women’s Ministry

Enteh u, Pathian beramno kan sual thawina tur a ngei saw.
Chau a rumin kraws a pu a, hmusitin an nuihsan a.
Aw jerusalem, Hosana titute khan ‘khengbet rawh’ tia au in!
Hmangaihtu i haider ta maw.

Kraws chu sual hnehna a ni Kraws-ah khaikân a nih hnuin Isuan, “Ka Pa, anni hi ngaidam rawh; an thiltih hi an hre lo a nih hi” (Lk 23:34) tiin amah thiam loh chantirtu leh khengbettute a ngaidam a. Ngaihdamna hi Pathian atanga chhuak a ni tih leh ngaidamtu nih ropuizia a puang chhuak bawk a. Hre reng chunga min tinatute pawh kan ngaihdam hian hnehna kan puang a lo ni reng mai. Tin, Krista hnehna azarah hnehtu kan ni ve a; mihring ram atanga thil theih loh ni anga lang kha Krista avang zawkin kan lo hlen ve reng a lo ni. Kalvari inthawina chuan mi tin min silfai ta a. Sual leh thihna chu hnehin a awm ta. Chak lohna nei theuh ringtute kan nih avangin vawi khat chauh hnehna puan chu a tawk ngai dawn lo va, ni tina hnehna kan puan a tûl dawn a ni. Thil tha chu hre reng mah ila kan hlen kher lo. Kan duh anga kan awm theih lohna tak hi kan thinlunga sual awm nghet tak chu a ni. He duhthlanna inlumlet reng mai nunram hi Tirhkoh Paulan Rom 7:14-23 ah min hrilh a. Mahse chu sual hnehna tur kawng dik chu min kawhhmuh bawk a. Kan sual avanga krawsa khenbeh Isua Krista hminga hnehtu kan ni (Rom 7:24). Krista thihna leh thawhlehna chuan mi tin hnehna famkim min pe ta. Lalpa chu fakin awm rawh se!

Kraws chuan nun thar min pe Vawi thum lai a Lalpa phattu Petera kha, vawi thum vêk Lal Isuan a beramte chawm turin a ko nawn tlat mai (Johana 21:15-17). Lal Isua chhandamna ruahmanna (project) ropui takah chuan misual ber pawhin hmun kan chang vek a ni. Hei tak hi Pathian leh hringfate danglamna a ni. Keini chuan min phatsantu leh min tiduhdahtu chu ngaihdam ahnêkin an hmel pawh kan hmu peih meuh lo. Lal Isua chuan a mangan lai bera amah haidertu kha a la hmang duh tlat a ni. Ngaihdam tlâk loh khawpa suala i inngaih lai khan, Lalpan a la ngaidam duh che asin! Tun aia nasa a hman che a duh tlat a ni. Nun thar pek che hi kan Pathian hlimna zuk ni tlat a. Kan va han nihlawh em!

Kraws chu nun keh sawmna a ni Kraws thlangtute nun chu a kehsawm ngei ngei tur a ni. Lal Isuan keh sawm nun hi a ngai pawimawh a; mi dangte tana thlarau chaw ni thei tur khawpa keh sawm turin min sâwm theuh a ni. “Buh fang leia a tlâk loh va, a thih loh chuan a mal chauhvin a awm reng thin; a thih erawh chuan tam takin a rah thin. Tupawh a nun thlahlel chuan a hloh thin; tupawh he khawvelah hian a nun ngaitlâwm chuan chatuana nunna tur a vawng reng ang” (Johana 12:24-25). Tisa châkna sual te, eirûkna leh sual lian dangte kan khenbeh ngam si loh chuan, kan rawngbawlnain rah tha a chhuah ngai lovang. Keh sawmna nun chuan thianghlimna nun a hring tur a ni. Lal Isuan, “Thinlunga thianghlimte chu an eng a thâwl e, Pathian an la hmu dawn si a” (Mathaia 5:8) tiin pawn lam leh chhung lama thianghlim a tulzia a sawi a. Pathian hmu tur chuan ni tin kan intihthianghlim a, ni tin Lalpa hmangaih lehzual kan tum a tul bawk ang.

Kraws chu ni tina put tur a ni Kraws chu ni tina pu tura sawm kan ni. Amah Isua ngeiin, “Tupawhin mi zui a duh chuan mahni hrehawm pawisa lovin, ni tin a kraws puin mi zui rawh se” (Luka 9:23) tiin min phût a. Luka ziak hi i chhiar chiang em? ‘NI TIN’ tih hi a ziak tel kher a. Hei hian kan peih châng châng ni lova, englai pawha Lalpan kraws min pêk vete pu tur kan nihzia a tichiang a. Kan krawste hi zo taka pu tura beisei kan ni hauh lo va; chhel taka pu tura koh kan ni zawk bawk a ni. He kraws pu tur hian khawvel mit hmuha mifing leh mi chakte thlang lovin, chhuan tur rêng nei lo mite thlan an ni (I Korinth 1:26-27). Tin, kraws lêra a tuar lai khan sipai za hotu khan Pathian Fapa a ni tih an puang chhuak a nih kha!

Isua nun pum mai kha Pathian Fapa a nihzia puan chhuahna a ni. A thihna leh thawhlehna hian a nemnghet chiang hle. Famkim lohna khawvela kan la awm avangin mamawh leh duh tam tak kan nei. Kan duh apiang kan hmu hek lo. A chângin kan buai a, a chângin kan mangang ru thin. Kan hliamte a nasa a, dam harsa kan ti fo. “Engati nge Lalpa?” kan ti fo theuh awm e. Heng kan zawhna leh tuihâlna zawng zawng hian Krista Krawsah chauh chhânna fumfe leh damna famkim a hmu ang. Bân phar meuha kan tana a tuarna azarah tihdam kan ni. He damna thu hi Mt. Peteran ti hian a sawi: “Sual lamahte thi tawhin, felna lamah kan nun theih nan amah ngeiin thingah khan a taksain kan sualte a phur a; amah an vuakna vualte chuan tihdamin in awm ta a” (1 Petera 2:24). Krista kha tholeh ta lo se la, a tuarna khan awmze famkim a nei lovang. Krista thawhlehna hi kan tan beiseina thar lo ni se la: a tuarna, thihna leh thawhlehna chuan kan hliam zawng zawngte tidamin thinlung thar min thlen theuh rawh se.

(He article ziaktu hi Katholik Puithiam a ni a. Sacred Heart Theological College, Shillong ah Lecturer a ni. Mobile: 09862753130).

January thla tawp khan Israel siam thlawhna khalhtu awm lova thlawk thei Heron TP tia an vuah chu Israel ram chhunga thlawhna tum hmun kiang lawka a ruk tea en chhin an tum chu a tla chhe palh a. He khalhtu awm lo thlawhna hi Boeing 737 tiat laia lian a ni a, maktaduai sawmthum man laia hlu a thlaa hmanraw thar an vuah tumna lama chhe palh a ni a. Hetiang khawpa lian khalhtu awm lo thlawhna hi Iran beih thut a tul pawha hmantlak tur a ni ngei ang a. Boruakah mel 4600 lai thlawk thei a, darkar sawmli boruaka awm thei tura ruahman a ni. Engang hmanruate nge kentir an tum chu rinna mitthlaa suangtuah ruak ruak theih tak a ni. He khalhtu awm lo thlawhna lian hi a chhan leh vang tha tak awma an duan chu a ni ngei mai ang. Chhe palh hlauh lovin, an duan ang taka hman theih ni palh ta se, tun laia kan thu thar puan ngaihthlakte hi a danglam daih mai thei asin. Tihbaiawm tak tur a ni. Hmul thi a ding uaih uaih thei alawm maw le. Kan naupan lai Maubuang zirtirtu zahawm tak Pu V. Hawlla hla phuah:

“Thlang Sappui val run thang mawi rem thiamte’n,
An rem chhawng sang khamrang khawithlar angin,
Kum lo thleng zela’n run rem thiam zualin,
An rem chungmu ang thla zar duaiin,
Thangvan zawla’n chung muvanlai iangin,
Thlakhawng lovin a leng tlangtin khumin,
THIHNA TUR BORUAK RIMCHHIA PAWH CHAWIIN,
MURVATE LENIN A THLAWK VEL THIN”,

tih kha min tihre chhuak a, Pu V. Hawlla khan a lo va hrethiam em ve aw, tiin min ngaihtuah tir a.

US hian khalhtu nei lo thlawhna hmelma beih nan leh thuruk lak khawm nan a hmang a ni tih chu hai rual a ni tawh lo va. Hummingbird anga siam, grams 19 leka rit, a thla sei lam inches ruk leh a chanve chauh, in chhunga duh duha thlawk lut leh chhuak thei, thla la thei, thu pawimawh la khawm thei  tura duan a ni mek a. Daidep lem, keite lem, phengphehlep lem te, vaki lem te, dragonfly lemte pawh. Daniela 5:12 ah chuan hriatnate a pung ang a, mite an tlan vel ruai dawn a ni tih kan hmu a, chu hun chu kan thleng mek niin a lang a. Mi fingte finna sanzia leh lei chung hmun tina vak vela pawi an khawih theih nasatziate hi ngaihthah mai mai theih a ni ta lo. Matthaia 24 kha han chhiar ila, Isua zirtirten tawpna chhinchhiahna chu engnge ni dawn tia an zawhna leh Isua chhannate kha han ngaihtuah ila. Krista derte an lo awm tur kha a sawi a.  Kha kha chu thil mak vak a ni tawh lo va, an tam tawh mai a. Hnam hrang leh hnam hrang indo te, ram hrang leh ram hrang indo te, tam tlak leh lirnghingte pawh vaukhanna pawimawh an ni. Amaherawhchu, chungte chu nau vei tantirhna a ni a ti lek a. Mahse, nu nau veite hian chuti teh chiamin nau an vei rei hran lo va, chuvangin, Bible-a hrilhlawknate hi a lo thleng zut zut thei tawh a ni tih hi i ring ang u khai. Doomsday buaipuitute ho pawh hian an hun chhiar dan chuan khawvel tawp thleng turin minit nga chauh kan nei tawh an lo ti ve mek bawk.

Chuvangin, ngaihven rengin i awm ang u khai, eng hunah nge kan Lalpa chu a lo kal dawn tih kan hre si lo va.

In rawngbawl pui,
Women’s Ministry

Pi Wood-i chuan a car leh a pawisa pawh mi sual hnenah chuan a sawi hmuh a. Mahse, chu mi sual chuan engmah a duh chuang lo. Pi Wood-i chuan hliam a tuar chung pawhin a Bible a keu va, amah beitu mi sual chu a chhiar sak a. Mi sual chuan a ngai thla a. Pi Wood-i chuan inkhawm turin a sawm bawk a. Darkar khat leh a chanve lai hnuah chuan misual chuan ngaihdam a dil a, a kal san ta a ni. Pi Wood-i nghawng hliam chu damdawi inah hmun sawmhnih leh panga vel laiah an thui sak a, an kilh beh sak bawk a. Chutianga mi pawisawi lo tihnat duh ringawt misual chu police te pawhin an la man theih ngei an beisei a ni.

He thu hi Feb. 5 a chanchin thar an tar chhuaha lo lang a ni a. Mi sualte sualzia leh mi thate thatzia hi a inpersan nasa hle tih a tichiang a. Matthaia bung liah khan Setana chuan Isua kha thil chi hrang hrang, ei leh bar tur te, mahni inhumhimna tur te, ropuina leh hausakna tein a thlem a. Chung thlemna do harsa tak takte chu Pathian thu hmang vekin Isua khan a ngam a nih kha. Chutiang bawkin Pi Wood-i pawhin Pathian thu hmangin amah beitu mi sual chu a hnawt bo thei a. Tunlai hun harsa tak kan tawn mekah hian Pathian thu hi kan ral thuam tha bera kan hman theih a va duhawm em! Nge, ei leh bar, silh leh fen tha tha, cell phone tha tha te, hausakna leh nawmchenna tinrengtein kan Pathian hi kan hralh zel dawn em ni ang le. Pathian tana thuhretu rinawm kan ni thei ang em?

Women’s Ministry

‘Aw Lalber, tunah i thu ang ngeiin
I bawih hi thlamuangtakin i chhuahtir dawn ta a,
I chhandamna mitin hmuha i siam kha,
Ka mit hian a hmu ta e.
Jentail-te hnena i eng tilang tur leh
I mi Israel-te ropuina tur chu,’ a ti a.

A nu leh pa chuan nausen chungchang a sawi chu mak an ti hle a. Sumeona chuan anni chu mal a sawm a, a nu Mari hnenah:

‘Ngai rawh, Israel zinga mi tam tak
Tluk chhiat nan leh din chhuah nan
He naute hi ruat a ni,
Chhinchhiahna an hnial luai luai tura chu.
Nang pawh, ngunhnama chhun angin i thin a la na ang,
Mi tamtak rilru chhungril tihlan a ni dawn si a,’ a ti a.”

Thlarau Thianghlimin Sumeona chu Isua lo piang a hmuh hma loh chuan a thi lo vang tih a lo hrilh lawk a. Thlarau thu hriattir chu ringhlel lovin a lo thlir reng a, nausen a hmuh chuan a lo pawm nghal chat mai a ni.

Pathianin A Fapa mal neih chhun kan sual tlan tura mihring anga lo piang tura A rawn tirh hun hriat rengna Krismas kan hman hun a lo thleng hnai ta hle a. Krismas kan hman hian Pathian hmangaihna ropuizia, a Fapa neih chhun pawh ui lova kan tana A rawn pekzia ngaihtuahin, engnge pek ve tur kan neih ang le? Kumin Krismas hi hmuah dan tharin hmuah tum ta ila! Krismas kan hman chhan chu Isua a ni tih hriain i lawm ang u. Isua chu kan chhungkua leh kan thinlung theuh vah Lalber ni turin sawm nawn leh theuh ila. Pathian chuan Amah kan hriat theihna turin kan thinlung pawh mak takin a thlak danglam thei a. Amah nena kan inrem theihna tur kawng a lo sial sa vek tawh a. Krismas kan hman chhan chu Isua a ni tih hriain lo pawm nghal chat ila, I LAWM ANG U. “Hmana mi thianghlim Sumeona ang khan, hmua lawm apiang hi vannei ber an ni.”

Women’s Ministry

zcariboulh.blogspot.com : Bible hi Pathian lehkhabu thianghlim, Pathian thu ziakna, Pathian thawkkhum a ni a. A hluin a ropui hle. A ropuina leh a hlutna  hai chhuak tur chuan chhiar tama zir tam erawh a ngai thin. Pathian thu thiltihtheih zia hi a tawng tawh mi tam tak an awm a,  an la awm zel bawk ang. Mihring hian chuai ni leh ral ni a nei thin a, khawvel pawhin tawpni a la nei ngei ang, Pathian thu erawh chatuanin a nung reng ang a, tawpni reng a nei dawn hauh lo.

Kan Bible an lehlinna hi a original hle anih ka ring a. A chhunga hming awm te pawh hi sap hming ai chuan Hebrai ho hming a ang hle zawk. Sap ho hi chuan an hnam hming milpuiin Bible-a hming awmte an dah siksawi kual mai a, kan bible ah erawh a original hming angin a awm mai. Jakob-a pawh kan ti hJames ve he hu loh hi.

Mahse sap ngaisang hnam kan ni a, sap ho tih entawn thin kan ni. Sap ho hi chu an thiangzau hle a, an tihdan kan copy chho ve anih vaih chuan kan bible hi, nakinah chuan version hrang hrang kan la nei ve nuaih maithei a ni.Tunah pawh hian mi’n Bible a chhiar dawnin chhut thar, chhut hlui, tia a sawi a ngai tan der tawh a nia.

Kan bible letlingtu hmasa te kha an fimkhur hle a, tawngkam pawh an uluk hle. Mizotawng ziak dan diktaka ziak, reference hial atan pawha hmantlak chu kan Bible ngei hi niin ka hre thin. Thu uar a tulna laiah pawh an uar thiam hle. Tawngkam ulh leh hrilhfiah ngaihna lai pawh a awm nual. Hetiang ang tawngkam ulh lai hi siam that an duh anih pawhin siamtha mai se, a zavaia siam that vek erawh hi chu thil tul lo tak niin ka hria. King James Version ang chiah chiah neih ve kher hi a tul lem lo. Kan ngaihsan em em sap ho hi, rinna lamah chuan an pachhe ve teh mai ania. Rinna lamah chuan kan chung en kher tur a ni lova, Bible an chawh kual ang hian kan chinglet ve kher tur a ni lo. Bible hi kan duh duha kan chinphar kual tur a ni lo. Kan rinna innghahna bul a ni a, thu harsa lai deuh a lo awm anih pawhin kan zir ve mai tur a ni. Hetih lam kawngah hian Muslim ho hi an conservative khawp mai. An ni chuan an thurin bu Quran hi chin pawr ve mai mai an phal hauh lo. Keini zawng kan at huai a, Pathianthu te hi kan duh dan danin kan chingphar a, kan duhlai lai kan la kawi a, Pathian hming pawh kan duh hun hunah a naranin kan lam mai mai a nih hi.

Tunlaiah mi tam takin Nibiru leh X-planet te lo buaipuiin khawvel tawp dan tur lo puang lawk thin mahse, keini ringtu te chuan Pathian lehkhabu thianghlima inziak bak hi chu ring lo ila a fuh ber awm e. Hmasang Babylonian leh Sumerian ho te leh  Mayan ho te rindan ai chuan kan Pathian thu thianghlimin a sawi hi a rintlak zawk zia leh tawpna ni chu Pa Pathian chauhvina  a hriat zia kan Lal Isuan a sawi te hi a dik zawk zia te fiahin a la awm thuai ang.

September 16, 2011 misual.com-ah khan Sabbath chu Sundaya thlak a ni tih thupuia hmanga an rawn ziak kha ka lo chhiar ve a, kan tuihnih duh a ni.  ‘Rinna Dinchanna’ tih bu Dorothy Eaton Watts (fam) ziah hmang hian ka rawn puak ve phawng mai a ni. Tlawmngai takin min lo chhiar sak hram ang che u.

Sabbath Thlakthlengna

“Chungnungbera kalhin thu a sawi ang a, Chungnungbera mi thianghlimte a ti chau vang; hunte leh dan chu tihdanglam a tum ang a; hun khat leh hunte leh hun chanve chhung chu a kutah pek a ni ang.”  Daniela 7:25

Sunday law hmasa ber chu lalber Constantine-an March 7, AD 321-ah a tichhuak a. Hei hi a thupek chu a ni. “Roreltute, khawpui mite leh sumdawng zawng zawngte chu an vaiin ni biakna zahawm takah hian chawl rawh se.” He thupekah hian Pathian emaw Krista emaw Bible emaw sawi lan a ni lo. Engpawhnise chutih laia ziaktu pakhat, Eusebius-a chuan chu dan chu heti hian a sawi zui,“Sabbath ni a tih tur reng reng chu Lalpa ni-ah kan sawn ta vek e,” tiin. Moses Stuart, Commentary on the Apocalypse vol. II p. 40.

“Constantine-a leh kohhran hruaitute chuan inkhawm ni atana Saturday aiah Sunday ni an hman chuan milem be mite tan Sunday ni chu an pathian biakna ni a an hman tawh sa anih avangin Kristiana in leh a awlsam dawn zawkin an hria a. Kohhran hruaitu, thuneihnaa tuihal, chaponain a tur ut ut ho chuan he dan avang hian kohhran ropuina leh hmasawnna chu a kal chak leh zual dawn a ni an ti.”  Indona Ropui p. 53

Chawlhni an thlak hian an tum angina a kal vek bik lo. AD 364 te pawh khan mi tam takin khawvel siam tirha pek tawh nisarihna, Sabbath chu an la vawng reng a. Bible thudik vuana an luhlul em avang chuan Loadikei Kohhran inkhawmpui chuan AD 364 khan Bible Sabbath serh chu an khap ta a ni.

“Kristiante chu Juda anga awma Saturday (Sabbath) chu awm awl nan hmang lovin hna thawk se la; Lalpa ni erawh chu abik takin an chawimawi ang a, a theih phawt chuan chu mi ni chuan Kristian annihna angin hna an thawk tur a ni lo. Judate anga an awm erawh chuan Krista hnen atanga lak hran an ni ang.”  A history of the Councils of the Church; Original Documents Book 6, sec. 93, canon 29 (vol. II p. 316)

Thangkhat lian lekah Setana chuan a tum ang takin Kristiante inkhawm ni chu Sabbath atangin Sunday-ah a thlak thei ta mai a. Tichuan, Pathian thupek, “Chawlni hi thianghlim taka serh tur a ni tih hrereng rawh… Nisarih ni hi Lalpa I Pathian Chawlhni a ni,” tih chu a bawhchhiat tir ta a ni.

Setana chuan thupek zinga Pathian nung leh dik anihna kawktu awm chhun thlak turin kohhran chhungah hna thawk ngam a. “Thupek palinaah hian Pathian chu lei leh van siamtu anih zia lantir a ni a, tichuan pathian diklote lak atangin a ti hrang nalh mai a ni.” Ibib. p. 55.

Heng dan an siam lai, AD 321 leh AD 364 khan Kristian kohhranah baptisma lo chang ta ang la, enge I tih ang? Enge I thutlukna ni ang le?

In Thawhpui,
Women’s Ministry

Ka naupan laia ka chak ber chu,  Pathian rawngbawlna a tangkai ve, ti mai ang, Pathian mi hman nih ve a ni. A pahnihna-ah chuan Israel rama kal a, Lal Isua sulhnu hmuh hi  a ni. High school kan kal ve laiin kan thian thenkhatte chuan, “Kei chu officer pasal neih ka duh” an ti a. Kei chuan, mahni tlinlohna hrerengin, ka rilru chuan, officer neih chu hna hah thlak deuh tur a sin, mi chunga mawhphurhna nei an ni a, an nupui nih a awl lovang, ka ti rilru a. Ka rilru takah chuan, Pathian ram tana mi tangkai nih ka duh a, mahse ka tling si lova, Pathian rawngbawltute tana, silfaitu or hmunphiattu  emaw nih pawh ka duh, Pathian rawngbawlna a nih chuan, ka ti rilru thin. Mite Pathian hnena hruaina hna-ah ka tangkaina apiang chhiahhlawh nih pawh pawi ka ti lo, ka ti a, chhiahhlawh ni tur pawh chuan thil tih thiam pawh chu ka nei meuh si lo.

Hun a lo kal zel a, High school pawh zo theia in ring lo chu, ka lo zo ve ta mial a. Pathian thu zirin hlau leh khur chungin Jorhat-ah ka kal ve ta ringawt mai. Ka huai sawt hle, Pathian thu zir ka chak em em a, rawngbawlna lamah tangkai vena tlem tal neih ka in beisei vangin. Pathian thu zirna-ah chuan Mizo inkhawmna-ah thusawi turin min han tir a, kei chuan, “thu sawi turin ka lo kal lo, Pathian thu zir turin ka lo kal,” ka ti ta mai. Mi thenkhat ngaihdan leh ka ngaihdan chu a dang hle awm e. Hotu leh mawhphurhna lam nihna ai chuan, tangkai ve theihna lam chu ka en reng a ni.

Hun a lo kal zel a, ngaihtuah loh leh beisei ngai loh thil ka chunga lo thleng chu, Jorhata ka awm lai a lehkha min rawn thawn thin tu Dr. Lalliana Mualchin U.S.A.-a awm nen kan innei ta a. Kan in kara thil kal hi thui tak sawi tur a awm, a tul chuan remchan hunah ka la ziak ang chu. Tichuan, kum khat hnuah U.S.A. chu ka thleng thla ve ta a. Pathian min kohna ka hriatthiam theih loh jail-a rawngbawl tura kohna chu chiang takin ka lo dawng ta. Tichuan, kum 2000 atangin Jail rawngbawlna lam hawiin ka awm a, mahse ka chunga thil thleng tur engmah ka ngaihtuah lem lo. Ka tih tur ber nia ka hriat chu, Pathian hmangaihna chuan mitin a ko va, tunthlengin Jail leh prisona awm tan pawh beiseina a awm a ni.  Khawvelin ngaidam thei lo mahse, Pathian ngaihdamna chu a tawp lo, tihte, Pathian-in a fapa khawvela a tirhna chhan chu thiamloh chan tir nan a ni lova, amah avanga chatuan nun an lo neih zawk nan a ni, tih hi ka thupui a ni ber. Chuta ka sawi tanna chu mihring hi Jail-ah an awm emaw, pawn lamah an awm emaw  Lal Isua chhandamna an nunah an neih hma chuan, ‘ An mihring nihna sual Jail-ah an la tang a ni’ tih hi. Jail-a rawngbawlna ka neih changin Burma Jail-a ka awm thu  testimony tawite tal ka sawi hmasa ziah thin.

U.S.A.-a kan awmna El Dorado County (district)-ah chuan kum 10 dawn lai jail rawngbawlna-ah chuan ka in hmang ve ta. Mingo vek an ni a, kei chauh Asian sap tawng thiam mang lo ka ni. Mahse, Pathian thil tihtheihna chuan tawp chin a nei lo va, mak tak takin, keima ngaihtuahna bakin, min hmang a ni. Sawi kim theih a ni lo, mahse Pathian thu hi min pek anga kan hman chuan hmeichhia emaw, mipa emaw, lehkha thiam emaw, thiamlo emaw, naupang leh puitling leh pastor tan engmah a dang chuang lo. Pathian hman a tan, a hnenah kan in pek a, a thu-ah kan in nghah chuan, mi mawl ber a kan ngaihte pawh a hmang fo reng a ni. Lalpaa rinawmna a pawimawh hle.

Vawikhat chu, Jaila rawngbawlna lama kan hotu nu chuan min rawn ko va. “Ngeni tu mah I kal pui tur ka hmu lo, nangmaha i kal a tul,” a ti a. Kan jail rawngbawlna (free on the inside)-ah chuan Lal Isuan a zirtirte a tirh chhuah angin, pahnih zelin kan kal a. Mahse tute emaw damlohna leh harsatna vanga kal thei lo an nih chuan, mahnia kal chang a awm bawk thin. Kei chuan mahnia kal chu ka hreh em em a, chuvangin a theih hram chuan ka tan kal pui an zawng thin. Mahse chu mi tum chuan hreh deuh chungin midang an awm si lova, keimah chauhvin ka kal ta a ni.

Mizoram Jail ang lo takin pindan hrang hrang a awm kha, a hrante tein an lo kal a. A chang chuan zan khatah pawl (group) 5-7 kan nei a. Tlai dar 5:30-ah kan tan a, dar 11 thleng kan awm thin. Kan hun neih dan leh pawl kal tam danin kan hun kan sem thin. Dan tlangpuiin pawl khat tan minute 40-45 kan hmang deuh ber thin. Chu mi zan chuan a hmasa berah mi pakhat David an tih chu amah chauhvin a lo kal a. A hmel atang chuan a chau a ni tih a hriat theih. Engmah ka sawi hma chuan, David-a chuan a sual thu leh ngaihdam tlak a nih lohzia leh hrem a nih dan leh tumah tlawhtu a neih ve ngai loh thu leh a chhungte pawhin an tlawh duh loh thu min hrilh ta mawlh mawlh mai. Kei chuan, “Ngaihdamna hi Pathian atang  a in tan a ngai a ni, tih leh Pathian ngaihdamna kan chan chuan mihring karah pawh Pathian Thlarauvin hna  a thawk thei” tih ka hrilh a. Tichuan, rinna thu-ah kan kai ta zel a. Kan hun a tawp dawn ta, Bible Hebrai 11 ka chhiar tir a, a kut vuanin ka tawngtai a, chawp leh chilhin Pathian ngaihdamna chu a chang in a hmelah a lang ta. Lawm em em in a awmna pindan panin a let leh ta a. Ni reilote-ah kan hotu nu chuan min rawn ko va, “Ngeni David kha kalkawnga police officer chilhlumtu a nih kha, i la hrereng em? tiin. A sualna chu khawtlang hriat a ni a, roreltute chuan thi turin a chung thu an rel ta a ni. Mahse Pathian a rin vangin Pathian ngaihdamna a chang ta.

He mi tuma jaila ka kal tur ka huphurhzia chu, setan-an ka chungah nasa takin hna a thawk a, mahse hlau leh khur chungin ka chhuak a, Pathian thu chuan David-a misual tak chu a hneh ta a ni. Hlau leh khur chungin kal mah ila, Pathian thu awina vangin hnehna chu Lalpa-ah a awm. Pathian thu nung chuan, misual thinlung chu a hneh ta a ni. Chu mi zana David-a hlim lutuk chu kawngka a kal chhuak pah chuan ti hian a sawi a, “Ngeni ilo kal chu ka lawm em mai. Kar leh inrinni zanah i lo kal leh ang em?” tiin vawi thum lai chu lawmna mittui tla nen chuan a rawn hawi let pahin, ka lawm em mai, ka lawm em mai, a ti mawlh mawlh mai a ni. Ka tan chuan theihnghilh a har mang e, chu mi zan chuan, ka mu tha thei lo. Miin misuala an ngaih, tumah tlawhtu pawh nei lo, nasa taka an hrem chuan, minute 40 chhung kan in kawmna-ah chuan  Lalpa-ah lawmna thar leh nunna thar neiin a nun chu chatuan a tan a lo dang lam ta. Zing leh zana tawngtai dan leh ka tihdan ka hrilh a, hlim takin kan in then ta a ni.

Hlau leh khur chungin chi theh in chhuak thin mah ila, kan buh phalte kengin hlim takin kan haw thin dawn a ni. Thlarau bote hmangaihna-ah hian mahni tisa lama chhungte leh duhsakte vei bik a awl hle. Pathian chu mitin tan a lo kal a, duhsak bik a nei lo tih hi ka thinlungah vawn ka tum tlat thin a ni. Hei hian Pathian hmangaihna hi mihringte hmangaihna aia a zauzia leh chatuan atan a ni tih min ngaihtuah tir thin. Pathian rawngbawlnaah hian  mahni mite, chhungte, thiante, vengte, kohhrante, pawlte leh thawhpuite duhsak bik awl tak a ni.

Pass it on

(He thu hi Pi Ngeni Mualchin in ZONU-EXPRESS, August 2011  tih a rawn chhuah atang ka lak chhawn a ni .)