Mi eng emaw zat ngainat tak ka nei ve thin a. Zirtawpni hnuhnung bera  thihna puan chul hnu hlipa ropuina enga kalta Ramhlun N Kohhranin G. Lalchungnunga tia a hriat, keini chhungin ‘G-a’ tia kan sawi mai thin kha pa ngainatawm tak nia ka hriat thin a ni a. Kristian duhawm tak niin ka hria a, ringtute tan thihna hi engnge a nih tihte ka ngaihtuah phah.

Khawvelah hian mihring hi kan va han kumhlun lo em!Hetiang a nih lai hian chatuana dam tur anga inngaihnate kan nei thin a, khualzin kan ni tihte hi kan inhre miau lo a, kan vak bo thin. Nunna te hi kan ta a nih loh vei nen Nunna Petu hi kan hre duh lo fo thin.

Nitina hna ka thawh ve na hmunah, lungduh kal hmasa Roliana Ralte hla, Aizawl khawlaia mitdelten an sak thin ka ngaithla a

“Famkim loin awm thin mah ila
Kan hmel ni aiin a la eng dawn si
Kal hmasate nen kan intawk khawm ang
Famkim lohna khawvel kan ngai tawh ngailo ang”

tih chang ka ngaihthlak lai hian kan ina zing tawngtai inkhawm dawn apianga lo lut a, ka pa rawn sawm thintu pa nunnem tak bawk chu ka rilruah a lo lang leh a. Lobo zai a ngainat thu a sawite kha ka bengah a rawn ri nawn leh a, a ngainat em em LOBO hla pakhat Stony tih a tlar khat te mai, “Stony, Happy all the time” tihte kha amah hrilhfiahna ni tlat hian ka hre thar a.Mi hlim thei tak, Lalpaa lawm thin mi a niin ka hmu miau a.

Jeff leh Sheri Easter te nupa hla sak, ‘Lalpa ka lawm e’ tih hla ang kha keini chhungin G-a kan tih thin hian a thupui ber ni hian ka hre thin a. A thunawn te kha, a rilru puthmang sawi chhuahna tur niin ka ngai

“There’s a roof up above me, I’ve a good place to sleep.
There’s food on my table, and shoes on my feet.
You gave me Your love, Lord, and a fine family.
Thank you, Lord, for Your blessings on me.”

Ka In in chung a la nei a, mutna hmun tha tak ka nei a, Ka dawhkanah chaw ei turah a la awm zel a, I hmangaihna kan chungah i lantir zel a, Chhungkaw tha tak min pe a, Lalpa ka lawm e, mal min sawmna vang hian tiin zana a mut dawnin a tawngtai thin khan ka ring.

Mihringte hian khawvel hi ropui kan ti em em fo thin. Buai reng rengin kan awm a, Pathian malsawmna kan dawnte, kan chunga a thatna te hi ka chhiar thiam lo fo thin. Sam ziaka mawi ka tih em em thin, “Kan damchhung nite chhiar dan tur min zirtir ang che, finna thinlung neih phah hialna turin” tih hi kumin hian ka rilruah a chiang zual a. Ka ngaihtuah ka ngaihtuah a, damchhung nite chhiar dan tur zirtir hi chu kan va mamawh tak em tih hi ka thinlungah fiah takin a inziak kulh a.

Kan hmaah hian engnge awm dawn tih kan chhut ngai lo a. Mihring nun reng reng hi tunlai mite chuan kan ngaihtuah ngai ta lo. Leia sulrul leh tuiekin a ei chhiat theih ropuina leh sum leh paiteah kan buai thin. Kungfu thiam hmingthang, King of Kungfu an tih thin Bruce Lee-a fapa thlanlunga thu inziak te chu ka ngaihtuahnaah a lo lang a. Hetiang hian a inziak a nih kha “ Engtik hunah nge kan thih dawn tih kan hriat miau loh avangin hringnun hi belte phai theilo angah riak kan ngai chawk thin. Amaherawhchu engkim mai hi tawp leh tiamchin nei, reilote atana ruat a lo ni si. I naupan laia i hun hlimawm chhinchhiah tlak tak mai, i nunkhaw rahbi pawimawh tak i tuk lai kha vawi engzat nge chhui kir leh theihna hun remchang nei leh thei a i inrin? Tum li emaw, tum nga emaw a ni mahna, chuti zat zat pawh chu a ni kher lovang. Thla eng no nghiai hi vawi sawm engzat nge la chhim leh thei tura i inbeisei? Amaherawhchu, heng thilte hi tawpintai nei loa ngaih a va awl teh lul em?” Hengte aia thudik hi mihringte tan hian phuhchhuah leh a va har tawh dawn em.

Ringtute erawh hi chu kan va vannei em! Khawvela thil ropui ber ber te hi an la chuai anga, Lal ropui ber ber te pawh an la tlawm ang. Pangpar mawi ber ber te hi an la chuai ang.Kan lei taksa pawh hi vaivuta siam a ni miau a, vaivutah a la kir leh ang. Chumi hunah chuan kan ropuina ni a intan ve dawn chauh a ni. Khawvelah hian hrehawmin kan leng thin, mahse rei a ni tawh lo ang.

Khami, mi nunnem tak, mi zawi tak mai, a naupan lai atang tawha mi pawi pawh sawi ngai lo tura ka rin pawh khan a lei thawh rimna a lo chawlhsan ta. Hmanni lawkah pa pakhat hriatrengna hun kan hmanga, a thlan lungah chuan he thu hi a inziak a, “Nikin nia a thawhlehna nghakin a lei taksa chu he lei daiah hian zalh a ni” tih hi. Tlangnuam thlanmuala pa pakhat thlanlungah pawh he thu hi a inziak kalh a,

“He ka lei bawlhhlawh tak hi
Thlana a ngawih hun chuan
Thlarau aw mawi zawkin
Min chhandamna hla ka sa ang”

tih hi. Ringtute tan chuan thihna hi kan nunna a ni a, Pathian rohlu kan nih ang ngeiin chatuana A hnena eng turin kan kir leh dawn a ni.

Engtik hunah nge he kan khualzin kawng hi kan zawh tawp ang kan hre lo. Keini chhungin, “G-a” kan tih thinin Khualzinna a zawh tawp san a nupui leh fanaute pawhin an hre lo. Engtikah emaw, kan hriat loh laiin titha duh mang loa rawng kan bawl ve tauh tauh thinna hmun hi kan la chhuah san ve ang. Nunna petu hnenah engnge kan sawi ang le?

Leiah hian tumah damhlen tur kan awm lo a. Pu Chatuana te meuh pawh an thih thinna khawvelah hian keini pawh kan dam phawt chuan kan la thi em em ang. Chutih hunah chuan ropuina ropui zawkah kan la lut anga, lui kai hmasa te kan la tawk ang. Mi ngainatawm tak nia ka hriat thin, G-a pawh kan han hmu ang. Chutih hunah chuan hmangaihte an inthen tawh lo ang.

He thu ka ziah lai mek hian pindan leh lamah Jim Reeves-a zai mawi tak a lo ri a, he hla hi a sa a:

“ When our work here is done
And the life’s crown is won
And our troubles and trials are oe’r
All our sorows will end
And our voices will blend
With the love ones who’ve gone on before”

Ni e, kan lungngaih a bo anga, hmangaih lungduh kal ta te zai kan la zawm ang. APRIL 2008

Keini ang mi ho! belhchian poh leh ho telh telh thuziak ve hi zawng a thupui leh a thu hian inzawmna a nei em? tih pawh hriat theih va ni suh! chhiartute tan chhawrnahawm nilovin chhawr tlakloh a ni mai awm e!

Han-Ji-Eun tih hi mizotawng chuan – tak, der awmlo, nih ang anga langchhuak ngam tihna zuk ni daih a! Full House en thinte chuan a changtunu Han-Ji-Eun hi kan hre vek awm e. Thianpa pakhat chuan hmeltha teh nan ber a hmang thin a, Han-ji-eun aiin a hmeltha, hmelthalo tih vel kha a tehfung chu a ni mai!
Nula hoina an entawn, tlangvâl hoin an ngaihzâwn, Han-Ji-Eun atang hian enge kan zir chhuah ve tak ang le. A hmel chu ni bawk mah se, anih ang anga a lan ngamna hian mi a hip a ni! A nun tak tak (real life) lam chu kei mi mawl hian ka hre lo, ‘Full House’-a a part atang hian enge zir tur kan neih theih ve tak ang le tih hi a ni ngaihtuah ho ila ka tih ber chu..

Tunlai kan khawvelah hi chuan thil tak hi kan ngaisangin kan lâwm a, American Idol, Mizo Idol/icon, Beauty and the Geek, Laguna Beach, Tera mera beach mein etc. tih vel chan chawp awm lo, a tak tak hi a ni lâwm ni he lemchanna khawvelah hian lemchang thinte hian lemchang nilovin thil tak a ni lâwm ni kan zawn thin kha? Chu thil tak chu hmuh kan chak a, kan chil a put thin a ni lo’m ni….?

Tute nge lemchang ve ngailo mi tak chu? Nui ngailo, inhmuamup reng, kuthnung suiha intivei taka kal zen zen thin te, Biak In kawng pana hlabu leh Bible zakzeh paha kal bu hnak hnak thin te, Khawtlang leh kohhranah pawh nihna chelh ve teuh, an hringnun zirlaiah chuan engmah ni silo te hi an ni lo! Eng chanvo pawh a lian emaw a te emaw pawh chelh se, mahni theihtawp a hlen tum mi, Mihnuaia hnathawk pawh nise Pu te awm leh awm loh inang reng, danglam ngailo. Sawrkar hnathawk pawh nise a ruaitu sawrkar tana thahnem ngai taka thawk mi an ni thin. Office-a a thawhpuite zawng zawng dar sawm, sawmpakhat vela an thlen lai pawha a hun taka thu nalh thin. An pate officer lian tak ni si Scholarship dil dawna carpenter nih tir ta thut ve ngailo, tuma hriat loha eiruk theihna remchang tak pawh awm se rinawm taka ding tlat thin. Pawnlam aia chhunglam tha, langsar ropui aia thukru ropui thlang zawk thin, an nuna lem awm ve lo an nih ang anga lang tawp “Be yourself” tih thupuia hmanga, nunpui thin tute ho hi mi tak chu an ni.

Alexander-te, Napolean-te, Hitler-a ten an lalram thawhrimna avang leh tumruhna avanga an zauh duai duai laia kohhran Upa mahni thenawmte tana hnawksak khawpa mahni ram zauh ching, vantlâng ram pawh zah zo lo kan tam ta!! Kohhran upa meuhin Inkhawm kal hma tur tih puang ve dum dum si, Mahni hnathawhna lamah chuan dar 9 a tan tur kha dar 10-a mahni In atanga chhuak chauh thin te, Midang eiru haw em em scolarship diklo taka lak hreh chuang miah lo, Sunday School zirtirtu ve meuh si achanga rui thei, achanga sex hmang thei leh mai ngam kristian kan ni hi chu kan Han-ji-eun loh zia tilangtu pakhat chu a ni ngei ang le!

Kan pâwn lam nunah chuan kan ho-in kan lo uang ve hle te pawh a ni ang. Tin, kan sam rawng te chu thla tina inthlakin, tluk leh din fawmin a thenin chunglam, a thenin hnuai lam te pawh a lo kawk te pawh a ni thei! Kan pian nena inhmeh miah lo kekawr zuih mang kheng hain Aizawl lunlai tak takah te pawh kan lo vei thuak thuak tawh pawh a ni mai thei, hnehsawh takin Karizma, R15, Pulsar-te hi tlangval awm tha duh lo ang maiin chawmhlawm speed an tih ang te pawh hian chak deuh deuhin kan lo tuai vir ve tawh te pawh a ni mahna! Chung zawng zawng kan tih avang te chuan min hmu khawlo viau te pawh lo ni teh se….!

Min belchiang se min ngaisang rawh se. Tunge kan nun hi kaihruai a, fianrialah pawh kan rinawm tho em? tih te hi an hriat hunah min ngaihdan hi an thlak hmak ang! Kristian tlangval kan nih avangin vawi engzatnge Josepha anga SEX hi kan tlân san tawh tih te hi miten hre rawh se.

Chu thil tak chu hmuh tur, hriat tur an neih loh chuan hnathawh ropui, nihna leh chanvo langsar, qualification sâng tak pawh nei ila, Mark bial min pe tho tho ang. Ropui hi Occupation a ni lo a, qualification pawh a ni ngai lovang! Ropui zawk tur chu kan nun hi a ni dawn lo’m ni?

Kan awmna hmun danglam ang zela kan danglam ve zel chuan miten engtikniah mah kan nunah nun tak an hmu ngai dawn lo a. Banga milem tar nen danglamna kan nei dawn lo tihna a ni! Sapho chuan London-ah London mite angin New york-ah New york mite angin an lo tih ang hian kan awm ve mai dawn em ni? Zu in mi bulah kristian tlangval ka nihna ka pholang ngam ang a, fianriala ka bialnu bulah pawh Josepha angin Pathian tihna avangin Pathian tan ka rinawm tlat ngam tur a ni. Chutianga ka rinawm loh chuan hnung lam atang min nuih ang a, hmalam atang min fak tawh mai dawn a ni.
Kan cable TV-te hian Award sem ve dawn ta se Best Actor, Best Actress lawmman dawng tur hi kan tam ngawt ang, nominees pawh kan tam na ngiang mai thei a ni! a lema rawngbawl, alema nung, lemchan thiam kan tam ta hi a pawi a ni!

Adera nung ve ngai lo, mitak mahni nihna ang anga langchhuak ngam, a mawl ang ang, a thin ang ang, a retheih ang ang, a zei loh ang anga nung tawp maite bul tluka chawlhna nuam leh hahdamna, hlimna leh nuihna tur hi he khawvelah hian a tam bik awm lo e a….! Mother Teresa te, Mahatma Gandhi te kha hmelthat vanga hringfate thinlunga langsar tur leh châm reng tur chu nise, a tlinglo berte zinga mi an ni ngei ang le! khuanu ruat anga an nun tawp mai na leh an mihringpuite tana mahni indah tha a, mi tak, an nih zia an Show ngamna vang liau liaua chhuan lo la awm zel turte hnenah pawh hmingdai tawhlo tur an ni.

Hman deuh khan kan gospel singer-ho chu kohhran thununna tawk an awm nual a nih kha! Langchhuak vek kher lo sual tih hreh chuang si lo hi engzat tak ni maw? Tunlai chhanah chuan nula fel chu an rai nalh tawh a, “regu” fe fe rai duh miah lo an tam an ti. Lamtuala lam thin te pawhin lam lohna hmunah, Pulpit tlanga lawn thin te paw’n pulpit lovah, Sunday School zirtirtute paw’n Sunday School lovah mi tak kan nihna kan show ngam dawn em? “Rinawm taka kan din tlat chuan van khian mal min sawm ang” tih hi thupuia neiin, i han Han – Ji – Eun tak tak teh ang u.

Mizoram chu kan hriat theuh angin Zu khap na state kan ni a, chubakah kan kohhran leh khawtlang hian puan ang a hnawl a ni, India ramah pawh state dangte paw’n an lo practise tawh a, chu ti angin ram dangah te pawh, mahse kan hlawhchham tlang rih hle tih chu tu hrilhnawn ngai loin kan chiang tlang, abik takin ka pianna Zoramah hian Buhtawihtui hi eng hmuhin nge kan hmuh?

A that leh that loh lam ni loin zu in mite kan hmuh dan lam zawk hi ka rawn thlur bik tur chu a ni, Zu i in chuan vanram kai chu sawi loh lei lamah pawh misual ber ngaihin an ngai nghal vek ang che, i chhung leh kua ten an hriat phei chuan sual ta viauah ngaih nghal i ni ang, mipa ta ve chu tawhsual tawh changte pawh a awm thei accident emaw insual te pawh nise mahse chu ti ang i lo tawh palh hlauh chuan fimhkur hle rawh zu in ngai miah lo pawh ni la an puh zu rui leh mai dawn che nia, veng chhakah chuan a rui vak lo e an tih laiin veng thlangah chuan i chat thla ti tih tawh mai ang, zu nam chung phei chuan biak Inah luh reng reng loh tur mahse zu nghei thei si loa i inkhawm ve duh talh anih chuan a hnung berah mithianghlim ten i rim an hriat phak loh na chin ah thu ang che. Chu tilo zawng an vuak thluk loh vek che paw’n i hriat loh laiin veng pumin zu nam chungin i inkhawm tih an hre thuai mai ang.

Zu in mi i nih phei chuan hei hi hria la nitin bawnghnute no sawm leh zu no khat in pawh nila i bawnghnunte in ai chuan i zu no khat in kha miin sawi nuam an ti dawn, chubakah thil tha tih tum buai duh lo mai rawh mite thinlungah chuan Nickey cruz-a vanglai ang mai i ni tho ang, i ti lui talh anih paw’n lawm awm takin lawm miah si loin an lo fak vel luam ang che nga. Mahse, la enthlak deuh rih turin i chungchang thuah thutlukna an siam tho ang, thil pawimawh deuh pakhat chu i lo piangthar anih paw’n kohhranah va pawngpaw ngampat hauh suh, lawm awm tak chein lang mah se an lawm hauh lo che ania, eng tikah nge i tluk leh ang tih hi Isua lo kal an nghahhleh tluk zetin an nghakhlel tih hre ve kar la i lo tlu tak tak anih phei chuan rawn tawngtai sak che leh khawngaih leh lainat a hnek chein ka rin ang reng a ni tih bak engmah beisei suh.

Chu bakah tluang takin inhmang zel ta pawh nila kohhran meuh han hruai tur atan chuan nangni ang hnuhma nei tawh chu alangin sawichhuak lo mah se mithianghlimte mit i tlung zo chuang lo ang, nang ni ang ai chuan naupan lai atanga vawiin ni thlenga sualna nei reng reng lo Roman catholic-te phei chuan mithianghlima puan a tan pawha an iai loh tur a nun a tluan em avanga piangthar emaw inti ve ringawt eng tikah chiah nge i pianthar han ti ta i la chhang thei hauh lo tur misualte khawngaiha chhawmdawla tawngtai sak chu sawi loh sawi chhuah chi si loh a haw deuh tlat, a chungah thil an lo ti sual palh hlauh anih phei chuan ngaihdam ngaiin an awm ve ngai lo emaw tih theih khawp tura chetla leh fo thin mah se naupanlai atanga kohhrana a in hman tlat avanga kohhran zeizia hria kha nia an duh chu, sawi tur a tam duh tawk phawt ang.

Zu in miteah pawh hian zingkar atanga zan mut dawn thlenga in reng mai buaina siam ching mahni nupui fanaute bulah huai ber ni awm fahran a inluling vak vak mai thin hote hi chu kum nuaihkhat pawh lo liam se kan pawm loh tlan tur an la ni reng, mahse ,hmuhsita endawng tur chu an ni hauh lo, heng mite hi chu lo dahtha phawt ta ila, thenkhat leh thung chu in zeuh zeuh in ve chhun pawh a rui khawpa in ngai lo, chhungkua leh khawtlang tan pawh hnawksak lem lo nunphung ti khaihlak chuanglo te, patling thenkhat chaw ei dawna in leh mi thenkhat damdawi atana hmang thin ruih nana hmang miah lote an awm a, heng mite pawh hi kan hmu pangai chuang hlei law, damdawi atan hmang pawh ni se, zu kha a lem tawh hrim hrim chuan sual ta riaua in ngaihna te, sual ta riaua hmuhna leh hremhmun lam hawi ta anga inngaihna kan nei tlat thin hi zirtirna dik a ni thei ang em aw? tih hi ngaihtuah tham tak a ni.

Zu in avanga nun hlauh chan te awm bawk thin mah se tam tak tan chuan nun hlauh phah na leh chhiatpuina tham a tling lo, enjoyment lek a ni thei mihringa zir hi a ni thui em em a ni, zu in mi kan hmuh dan leh en dan hi inenfiah a thliar hran thiam a ngai khawpin ka hria, an vaia kan hmu he vek hi zawng tih loh tawp tur kan fel bik chuang si lo, zu hi ka sawi mawi a ni lo kan hmuh tak ang hian dik lo nia ka hriat ka rawn thai lang ve mai a nia, lo ngaihtuah ve chhin mah teh dawntisei buhtawihtui hi…..

Kan thalai leh hnam a chiang ten kan hnam nun hi a boral kan hlauva theihtawpin hnam chhan nan hma kan la a, hnam chhan nan chuan mahni thisen pawh chan huamin ke kan pen a chutih lai chuan kan hnam hi hnamdangte min la rawk fova, kan pawi an khawih leh fo mai thin hi chu ngaihtuah chian a hun ta hle mai. Kan hnam nun chhan nana kan vaupung kan tisang chung pawha hnamdang ten min hlau lova min zuam tlat thin mai hi chu a chhan chhuichian a va hun em. Mahni ram ngeiah kan zalen lohvin khawi hmunah nge kan zalen teh lul ang ni. Hei hi kan ram a ni si a.

Central sorkar in hnam hnufualte him nan a bik takin State dangte thik tur khawpin Inner Line Permit min pe a, mahse chuti chung chuan MZP tena ILP an check nikhua a ILP neilo mi engemawzat an awm leh thin hi chu thil diklo chu a awm a ni lo maw? Central sorkar in kan hnam nun humhim nan a ILP min pe chunga he kan hnam nun a la derthawng fo mai hi chu mawhphurtu hi an awmin i ring ve lo maw? Kan ram hruaitute hi nge a chhunga cheng mipuite hi?

Kan hnam nun a boral mek a kan Zonunmawi hian mual a liam mek zel zawng anih hi. “Zonun, aw nun mawi, liam lovin la chamrih teh la aw” ti a lo au lawm lawmtu Zirsangzela awrawl hi a thlawnin kan thamral tir dawn em ni?

Keinin kan au ding zo lo anih pawhin nakinah chuan tuten emaw an la auding ngei ang, he kan hnam nun hi a boral hlen dawn lo. Zofate tan hun tha zalenna ni a la herchhuak ngei dawn e. Chutih hunah chuan Zofate hi hnam dangten min tibuai tawh lovang a, kan ramah hnamdangte an tlangnel tawh hek lovang. Zonunmawi in Zofate nunah ro a la rel leh ang. Chumi hun thlentir tur chuan tuna Zofa Mizoram chhung leh khawvel hmun hrang hranga awmdarh zawng zawngte hi he kan Zoram hian min nghak reng asin. Lets make together, a CHANGE for a better Mizoram.