Hmasawnna kan Chhiat Phah??

Kan hmanrua leh thiamna hrang hrang hmasawnna tura siamchhuahte hi kan chhiat phah nasa hle, kan ti a. Hmasawnna tura tana siamchhuah ni si chu engvangin nge kan chhiatpui tak mai le? A chhan bulpui ber nia ka hriat chu – kan hmanrua leh thiamnate hi kan hrechiang HMASA tawk lo. Tin, lo hriatchian hmasak pawh tum i la, hun awl awm mang loa heng hmasawnna hmanrua leh thiamnate hian min rawn den thin vang a ni bawk.

TV en vanga naupang exam failed phah hi engzat nge awm ang? Tape recorder vanga intibuai, inhau, insual, ladt. hi eng zat nge awm ang? Computer vanga chhungkuaa buaina chhuak an awm ang em? Tun thlenga Biak Ina inkhawm laia mobile lo khawih ru zeuh zeuh engzat nge awm a, he’ng mite hian mobile leh Pathian awmzia hi an hre lo em ni? Silent/Off loh vanga inkhawm laia mobile phone ri hian inkhawm urhsun boruak a tichhe thei em?

A chungami khi a lehlam hawi zawnga ka han thlirna a ni a. A tha lawm zawnga hmang chu kan awm teh meuh mai. Nunphung a tizangkhai em em a ni.

Damna, damna!!!

Aw, Mizote hian damna hi kan va han duh em? Hruaikawnah tidamtu a awm! Zote-ah tawngtai dam thei a awm! Kan pan sup sup mai! Kum 2002-a Homiopathi zir ka thlan khan tumahin ‘a tha a sin’ an ti lo, ‘engati nge i thlan duh zawk a’ an ti vek! Mahse, 2008-2009 chhung khan media lamah A.Y.U.S.H. chu tihlar a han ni a, 2007 hma lama zir tur an inhmuh zawh loh thin kha 2008-ah chuan mi 20 velin an zir thar a, 2009-ah chuan mi 50 laiin an rawn zir thar ve ta!! Engvanga zir thar tam ta hluai nge an nih? Damna dawi an zir dawn tlat alawm! Damna pe theitu nih hi Mizote zingah chuan a hlu zual bik em ni le aw, ka ti thin. A chhan pawh mipuite hi damna duha tuihal huam huam kan nih vang a ni ber mai!

A.Y.U.S.H.

Health services monopoly ni thin chu mipuite hnena duhthlan theih tura allopathic thiamna chauh ni lo, thiamna dang rawn chhawpchhuah hi India Sawrkar sukthlek lam a ni a, chutah chuan (kan duh emaw duh lo emaw) Mizoram sawrkar pawh a bang bik lo. Hmanlaia tanga an lo hman thin damdawi- Ayurveda te, Unani te, Siddha te chu India sawrkar chuan chawikan a tum nasa em em mai a. Chumi rual chuan Yoga, insawizawi zirna (Hindu te’n an Sakhaw mila an kaihher a, Buddhist leh Jainism te pawhina an duhna lama an kawihher) chu India mite hming lanna langsar tak a niha vangin ken tel a ni ve bawk a. Tin, India mite kutchhuak ni lo mah se, Christian missionary te’n India mite thinlunga thuk tak maia an lo phun, mahni ta zawk ni mai ang hiala an vawn ngheh tawh chu chawilar tel a ni bawk a. Mizoramah phei chuan a lar ber a ni ta nghe nghe a.

Engtin nge kan lo chibai ang?

India danpui chuan India mi tinte hi zalenna min pe a, kan duhzawng thlan theihna zalenna a ni. Sakhua pawh kan duh duh kan zawm thei a, chutiang bawkin inenkawl damnaa tan pawh kan duh duh kan hmang thei a ni. A duhin damdawi an ei a, a duh chu tawngtai dam thei an pan mai a, phal vek a ni! AYUSH te pawh hi tunah chuan duhthlan tur zingah a lo tel ve ta reng mai! Heng damdawi thiamna chi hrang hrangte hi eng nge an nih chiah a, eng nge nghawng a neih dan te hi kan hrechiang lo hlawm rih hle a.

Rinthu leh ‘an ti’ tih mai loh chu sawi tur kan nei tlem hlawm hle a ni. Tam tak chuan heng damdawi te hi Sakhuana lamah kan kaiher nasa hle mai a. Ayurvedic te pawh Hindu a ni kan ti a, kan insawithaih nasa hle! Mahse, Aizawl Civil Hospital thlang kawng kama damdawi dawr te hi hmanni chu kan han enkual zuai zuai a (kal pahin), Ayurvedic damdawi an lo pho lang nasa hlawm hle mai (Ayurvedic damdawi zawrh phalna permit nei tak maw?). Himalaya brand te pawh kan lotion zawrh vel mai mai chu a ni a. Heti chung hian Ayurveda sawiselna chu a nasa hle a ni. A damdawi do lo hian a doctor -te hi kan do zawk em ni? Chuti a nih chuan monopoly kan khelh thin kha ui vangin itsikna lamah kan inher rem ta em ni ang le?

YOGA: Hei zet hi zawngin sawi leh sel a va han hlawh em! Medical science atanga thlir chuan Yoga hi taksa sawizawi zirna mai a ni. Mahse, mi thenkhatin Hindu te’n Yoga an hman dan chu Yoga tihdan tura an ngaih tlata vangin dodalna leh sawiselna hi tawk ta a ni ber a. Yoga hi Jainism -ah pawh a hranin a awm a, Buddhism-ah pawh a hranin a awm bawk.

Sawrkar Policy

Yoga tihhmasawna tihchangtlun hi India Sawrkar laipui policy a ni. Kan lo dang thei ngawt lo. Helai tak hi ngaihtuah chian ngai lai chu a ni. Lo dang thei lo mah i la, kan lo her rem thei a ni. Central programme tam tak kan lo herrem tawh thin kha maw!

Yoga hi an a scientific definition ang ngei hian pawm thlap mai i la – Taksa Sawizawi Zirna tiin. Yoga ti nasa ber Hindu te an ni a, an tihdan kan zawm ve kher a ngai chuang lo ang a. Chaw ei dawn, mut dawn, ladt. -a kan tawngtai thin ang hian Yoga kan tih dawn hian duh leh tawngtai ve thin mai ta i la! A fuh zawk fu lo maw? Eu ngawng ngawng mai hi a Hindu-na a awm lo, a ‘omm’ chin hi i thliar thiam mai ang zawk ang u.

(Note: Article tak taka tana ka ruahman a ni lo a, a tawngkam a ulhin a thu a hlawm tha lo ang, chhiartute’n chhiar dan i thiam mai teh ang u).

Mizo AYUSH dinhmun tlem lo tarlang tel teh ang:
Doctor thawk mek – 22
Doctor zirchhuak hlim – 5
Zirlai – 84
Session hnuhnung bera zir thar zat – 48

Tin, tunah hian MADA hruaitute chu:
President – Dr. Lalkhawngaihi, Champhai
Secretary – Dr. C.V.L. Hlimpuia, Kolasib

He conference kan hmanna turah hian chanchinbu mite chu lo kal vek turin a mimal takin ka han sawm e. Chanchinbu mi kha chu conference kalna-ah an dawng ngai lo a nih kha maw le!!