Hahchhiau tih ziah dawn hian H engzat nge ka mamawh tih mai mai te hian min ti buai a. Ka zir nasa bawk a, tichuan kei chu H-phobia atang chuan ka fihlim ta ti ila a dik thaw khat awm e.  Helaia ka naute pahnih Mizo tawng thiam vak lo kha, a nu leh paten Mizo tawng hi an thiam lo em mai nang lo zirtir teh min ti a.  Kan han in zirtir tak tak a, an harsatna langsar zual ber chu H bawk ani leh ta.  Entirnan : Ka duh lo, sawtah kal rawh, tih ho ang te hi a tawp a H saw an hmaihpalh leh tlat mai thin a nih chu! H bawk mai chuan ka zirlaite pawh a rawn ti buai ta anih chu.

H hi kan chhungkaw zinga a thawhdan hi a mak ve hrim hrim, ka vahnu kum 3 mi vel anih lai hian H hi a lam thei tlat lo pek a.  “Bawihte, Hello” ti rawh tih pawn. “Kallo” a ti tlat zel a.  H awmna zawng zawng kha K ang in zuk lam vek a maw le!  Mahse hei tlemin a lo upa ve ta a, a lam K ta bik lo e.  H tur alam K vek chuan a nuihzatthlakin a manganthlak duh ang reng bawk si.  A puitlin hnu thleng hian lam hlen vek mai ang ngem tih te pawh min ngaihtuah tir hman rum rum alawm.