Zozam Times : Dawr rawk hrat vang hrim hrima Police Station pahniha thubuai 9 nei mek Chinsianmuan (21) s/o Khensuanmung, Myanmar Hmunlai khua chu nikuma Jail atanga a tlanchhuah hnu-ah January ni 18 khan Bawngkawn-ah Mizoram Police ten awlsam takin Taxi-a a chuang lai an man ta nge nge.

Chinsianmuan hian dawr rawk leh thilruk thubuai hi Aizawl Police Station ah 7 leh Bawngkawn Police Station-ah 2 nei mek niin, vawi engemawzat man thawi a ni tawh a, engemawtitiin a put ru leh hman thin a. Thawhtanni tlai khan Chanmari thlanmual peng bulah, Bawngkawn lam pan Taxi-ah a chuang lai hmuh a ni a. Taxi hi Bawngkawn Police Station bulah lo tidingin tlai dar 5:00 velah man a ni ta a ni.

Chinsianmuan hian mobile handset leh laptop computer a ru deuh ber a, a kaihhnawih bungraw chi hrang hrang a ru thin bawk. A thil rukte hi a tlangpuiin electronics lam a ni a, tiral mai lova a dahkhawl zel avangin Police te pawhin a chet dan hi mak an ti hle niin thudawnna chuan a sawi. Police ten an man lai hian a kut atangin dawr atanga a pawisa ruk nia a sawi Rs.16,100/- bakah mobile phone pakhat man tel nghe nghe.

Chinsianmuan man chung-chang hi Aizawl SP Lalbiakthanga Khiangte chuan vawiin khan thuthar lakhawmtute hrilhin, “Chinsianmuan hi dawr rawk hrat tak a ni a, laptop leh mobile handset dawr a rawk deuh ber thin. Amah hi mechanic hnate pawh lo thawk tawh thin, electronics lampang pawh hre ve nial nual, a thilruk pawh a tha tha leh man tam lam thlang ngat thin, hmun chep takah pawh inzep leng zel thin nia hriat a ni,” a ti.

Kum 2009 July ni 1-a Central Jail atanga an chhuah hian a tanpui Lalthankima s/o Lalbiaksanga nen zanlaiah an chhuak ru a. Hemi hnu hian awmna mumal nei lovin, Aizawl tlak lam veng thenkhat – Vaivakawn, Hunthar, Zohnuai leh Rangvamual vela mi huan leh ramah te buk sa chawpin, mi thlamah te, khampang leh pukah te, kawrte-ah te a khawsa mai thin niin Police te chuan an sawi a. Police leh khawtlang duty ten an zawnna lamah a khawsakna hnuhma hmun 6 vel chu hmuhchhuah a ni tawh a. Hengah hian a thilruk engemawzat chu Police ten khawmin a neitu hriatchiante hnenah engemawzat an pelet leh tawh a ni.

Aizawl SP chuan, “Vawi tamtak amah man tuma beihpui thlak a ni tawh a. Tlak lam veng hrang hrangah te leh Rangvamual thlang ramhnuaiah te ngawrh taka zawn tawh thin a ni a. Mahse, amah hi a fimkhur hle a, a che rangin a zuan a zang a, khamah te a zuangthla leh mai thin a, a awmna a sawn a sawn thin bawk nen, man a har hle,” a ti a. A inpuannaa a thilruk hriat thar lehte atangin thubuai dang pawh siamsak a la tul dawn niin a sawi bawk.

A thilruk manchhuah dan
 
November ni 4, 2009-ah Police ten an zawnna lamah a tawmrukna puk 2, Vaivakawn Zohnuai huamchhungah hmuh a ni a, heta tang hian bungraw chi hrang hrang 12 hmuhchhuah a ni.

November ni 7, 2009-ah Chawlhhmun VDP ten zu an check-na lamah Zohnuai huamchhunga a khawsakna puk pakhatah hmuh a ni a, kham sang takah a zuanthlak avangin man lohin a chhuak leh a. Chawhlhmun VDP te hian a puk thar hmuchhuakin heta tang hian bungraw chi hrang hrang 20 hmuhchhuah a ni.

December ni 12, 2009-ah Rangvamual khawtlangin an um a, kawngpui thlang maia a tawmrukna buk hmuhchhuah a ni a, hetah hian bungrua 3 hmuhchhuah a ni.

January ni 10, 2010-ah Hunthar Veng thlanmual bulah hmuh a ni a, man hman lohin a tlanchhe leh a. Helai vela amah an zawnna lamah Police ten bungrua chi hrang hrang 13 an hmuchhuak leh.

January ni 18, 2010-a man a nih hnu-ah Hunthar Venga thlam pakhat atangin a thil ruk chi hrang hrang 13 te man a ni leh bawk.

A thilruk tawh zawng zawng hlutna hi belhkhawmin Rs.10,32,183/- a ni